لا تسألوني لماذا استفحل الغضبُ
جُرم الركاكة بالأشعار يُرتَكَبُ
صف الكلام بدنيا الشعر مهزلة
تغزو الصحافة والالفاظ تغتربُ
أين الجمال بأبيات نُطالِعُها
والحرف فيها من الاعدام يقتربُ
لا تجذب العينَ اقوالٌ مشوهة
ان القصائد بالالوان تلتهبُ
يا ناطقين باسم الشعرِ ويلكم
من قال هيأتكم للعصر تنتخبُ
شاءت غرائزكم تنصيب قاعدة
لا يُقعد النصبُ من بالحق ينتصبُ
انتم محاولة خرساءُ في صور
ان جال فيها مزاجُ الفكر ينتعبُ
أنتم بلا أمل والصدق يدعمنا
اذ نحنُ نعلمُ من تسمو به الرتبُ
كونوا على ثقة ما جئنا في عتب
لو لم تداهمنا الآراءُ والخطبُ
فالقائلون بكم في كل تجربةٍ
يا ليت ما أكلوا يا ليت ما شربوا
يــا ناس دقو بمجتمعنا جراس
بدنا لتراث بلادنا حرَّاس
في نثر من طق الحنك مسحوب
بدرب الحياة مضيَّع الاسلوب
وفي شِعر بيجيب الوجع للراس
ضربنا المتل "بوكسين" حتى نشوف
كنو "رصافي" وبالاسم "معروف"
ولما الأمل بالحل ودَّعنا
ضربنا الرمل تا نفهم المعنى
وقديش بدّو الرمل يلقى كفوف
جيبو أبانا والذي وتابوت
بالقلب نص الشعر بدُّو يموت
بذمة ضمير الحي والوجدان
شعر العا وزن وقافيه "يونان"
وقلة ثقافة "ناس عنا" حوت
المعنى انخزق من كترة التمغيط
خلو النقد يتسلَّح بشبِّيط
الساعات قالو وقالت الايام
في شِعر اسمو علامة استفهام
وفي شَعر جعدي لازمو تمشيط
قالوا اللي قالو بأغلب الأحيان
انو الما مشيو بقافيه واوزان
صارو على الصابيع ينعدّو
وعا الشعر هلي عم بيتعدّو
بلبنان: منهم مِنْتِفِخ لبنان
يــا شاعـــر عليه الوحي تصلَّى
وسعـر الكـــلام الجوهري غلَّــى
شعــرك دوا للخاطر المجروح
بالابجـــديه ضلَّك تســـلَّـــى
كـــاســــك شـــربنا كلنـــا عـــا سطوح
بيــــوت المعنــــى والـــزمـــن دلـَّـــى
عـــا عطـــرك الطــــول الوقت بيفـــوح
بساعــــة حضورك والحلـــــو حلـَّـــــى
لبنــــان قلــــك مـــد فيي شلـــوح
فيــــك الوعــــي والنــــور متجلـــــي
البيكــــون منــــك جائــــزه ممنــــوح
لا شـــــارده ولا وارده مخلـَّـــــى
مــــش بــــس قلبـــــك للـــدنــي مفتوح
ومـــش بـــس جنحـــك بالفضــــا علاَّ
منقــــول انــــك للسفينـــه نـــوح
ومنقـــــول عــا تلاميذك اسمللـــه
مجــــدك علـــى النسيـــان ما بيـــروح
حيثــــك زمــــام الامـــر متولـــى
الخالــــق بعـــد مـــا حط فيك الروح
جبلــــك عقـــل حتـــى سعيــد تكون
وتكــــون وحـــدك للشعــــر الله.
يـا أبجديه مـــن الغفا قومي
عـــا الافضـــل الاقـــلام عم تومي
بذمّـــة ضميـــر الحـــي والوجدان
حـــرف البيكـــون من الوحي عريان
"الخيّـــاط" عمّـــا يلبّســـو طقومــه
ميــــن المـــا بــدّو يطالـــع كتابــــو
ويقشــــع ســـؤال مـــرافق جوابــــو
الــــورقه سفينـــه والقلـــم قبطـــان
بيحكـــي عـــن الغربـــه وعـــن الاوطان
ومـــا فـــي مثل مـــش ضارب حسابـــو
رافـــع وجـــودو للأدب رايـــــه
منـّـــو مــــا فينــا نشبـــع كفايـــه
عـــا كلمتو ريــق المطالع شـــطّ
يمكــــن كلامــــو بمغنطـــيس إنغــــط
تـــا يشـــدّ فينـــا صـــوب القــرايه
نحنـــا مـــا بدّنـــا بالحكـــي إفـــراط
بـــدنـــا اللّــــي قاطـــع بالــذكـــا أشـــواط
مـــن زمــــان قايــــل "بيدبا" مــن زمــان
"للدبشليـــم" العـــا زمـــانــو كــان
عـــا الـــدرب جايـــي للحــرف خيّـــاط
يـا قـاف ان حساب الحقل يقترب
واليوم جئـت لكي اعطيك ما يجب
ما قــل دل بـــان الــــذوق تجهلـــه
ان جلـت فيـــه بشرع الناس تغترب
يا ذابـح الفهــم ان الرأس مضطرب
مــن قال كاسك بالافراح ينشرب
لا شك انت بحب الذات منهمك
والخبث قال بك الامثال تنضرب
شروقي
قومي عا شم الهوا باعت ورانا "الان"
عالعود دق الهوى والجو غنالو
وسجل نفوسو العطر عا صرخة الوديان
الفيها سباق النقط عم يقشع بحالو
فصل الربيع ابتدا من اول البستان
غصن الما عندو ورق عم يلبس خيالو
وبعدو ربيع العمر عندي متل ما كان
بيفقس زرار الزهر تصريف اعمالو
عَيْنِكْ تشوف السهل قلبو انطرش الوان
والعين يا بو الزلف بقبش عا موالو
وبيت العتابا طلع من وصلتو مليان
عبى الفراغ وعطى الدينين اقوالو
انهزي بخيط الشمس صار الطقس دفيان
ما زال باب القلب عم يفتح مجالو
حابب عا سحبة شعر افرشلك الاوزان
الراكض وراها النغم تا يلقط ديالو
عرس الطبيعه بدي وصار الحجر انسان
ما عاد تهوى الشلح عا الارض احوالو
بلا وراق تين اركضي صار الكرم ولهان
بدُّو لعندو تجي وبتقلك الاوقات
فستان خيَّط لكي بساعة شغل بالو
شروقي
عري جبال الالب جوع النفس عا الباب
ورغيت ببحر الشعر موجات اعذاري
ما بريد يحكي الجسد قصة شو عندو تياب
بياخد عا خاطر طقم تفصيلتو عياري
ما في عراوي الو "تخيَّط بدون جياب"
وللخُزِقْ قال الخُزِقْ يا مرحبا بجاري
لبستو ولبسني عمر والخيط تخ وداب
وطالع قرار الفقر ترقيع اجباري
كلما طيور النظر غفَّت على العناب
بتحمل جناح البرق نشرات اخباري
بزمان كبر العقل كان الصبر بواب
واليوم طالب عمل من شغل افكاري
انتي انجبلتي بحلا والمنظر الخلاب
تخمين زرو انفقس عا "يخرب دياري"
اعطيني جواز اللقا ختير مصيري وشاب
بها العمر شلحة نظر بتحِّل زناري
ان كان دوري اجا طعمي السؤال جواب
بلهفه وحراره بجي وبرّش اشعاري
وبفلت عا وجه الحلو وبقلّك باعجاب
انكانت خدودك ورق بعمل شفافي قلام
وبكتب بهمس ولمس من هون مشواري
شروقي
وينك يا اخت القمر صار الدمع طوفان
هجرك بضرب الرمل ما عرفت اسبابو
بيتي بقوافي الشعر عا مفرق الاوزان
انما دق قلبك الو ما بينفتح بابو
طاير بقلب "الهوى" متل الصبي الجهلان
عا كل شلحة نظر عم يكتب كتابو
يا ما عا موج العطر بظروف كيف ما كان
طابع الوف القبل بشفاف مزرابو
عالصخر لما انبنى صار الصخر انسان
سجَّل عا "وجه الحجر" لمسات اعجابو
وعالحيط صورة زمن متشلع بلبنان
كبَّش بخيط الامل تا يرّقع تيابو
وعالسطح صابب وحي الاشكال والالوان
ابيات متل القطر بحروفهم دابو
وبالسقف اخ الوجع والقهر والحرمان
وبالارض حظي نكش تا يقبر شبابو
وداير مدار الشقا وغبرة حلم هربان
عا اللانهايه وصبر عايش عا اعصابو
جيبي الحكيم وتعي منِّي الفرح زعلان
ما ضل عندي دوا غير الخمر والكاس
يا دل قلبي احترق تا يشوف احبابو
بقلّك يا خيي ودمعتي وقيه
بالبال عم بتضل يوميه
ضعت بانا ومش عارف الدبار
سجل غيابك اربعين نهار
وآخ الطويله تسجلت فيي
رحت وكنت جوّات عينينا
وتا نرجّعك منّو بايدينا
ريقك بنظره ان كنت ناوي تبلّ
حدفلك شي غيمه ومن وراها طل
وشوف العذاب مكوّم علينا
الجنه عندما توصل عليها
وتشلح نظر فيها وحواليها
غنّي "لابنك" بالدمع موّال
وان شفت "بنتي" حطها بالبال
"وامي" دخيلك بوّس جريها
وحظك اذا ما حلّق صفوفو
يمكن معك ما يِطوَل وقوفو
"الوالد" توفى من كوام سنين
بارض الوطن بظروف تعبانين
بتاخذ وقت تا تقدر تشوفو
وبلسان نحنا وكل المحبين
ان سألوك عنا اهل بشمزين
قلن عا وجه الارض ما تهنو
طول الوقت بالآخ بيغنو
جايين يا تاني دني جايين
القالت لها عم انحسب اني
قلتلها قوانين لا تسني
عا وجهك التجعيد عندو رفوف
ووقت اللي قالت انت حالك شوف
تطلعتَّ فيي وفزعت منيِّ
والها قلت وحياتك كبرنا
وعم نحفر بدينا مقابرنا
جات النهايه بقلة التدبير
ومن حيث نحنا معترين كتير
مننسى بانو غيرنا صرنا
بيجوز شفنا من الدني كفايه
وعنا البدايه اسمها نهايه
عا كل مفرق درب دبي الصوت
بالبيت نحنا ناطرين الموت
وكل يوم عم بيقلنا جايي
وتا تعرفي اكتر يا انسانه
عنا الفرّج بفراغ القناني
صرنا الدوا عم ناخدو بانبوب
يا تقبريني تنينا مطلوب
ننشال بالكركه وجه تاني
