يا مهاجره من بعدما حظي هجر
بصفحة حياتي سجّل نفوسو الضجر
حاجي عليكي تفصّلي قماش الحجر
ما بقيت القى هم والصبر انفجر
مش بس اني للفرح بدفع أجر
جسمي بسدني ونص عقلي بالمجر
وإيدي اليمين ميبّسه واجري الشمال
يمكن عبكرا انفرع متل الشجر
***
يا ناعمه خييك اكلني حاف
ما حب كونك يلتقي بكوني
بنزلة غنا حرّم طلوع الأوف
وكل الهموم بشوفتو جوني
ولما غضب بيك لقيتو طاف
ولقيت لوني ما بقا لوني
من كتر ما عليي وعليكي بخاف
لميّت دعساتك عن الطرقات
تا قول انك ما بتجي لهوني
***
قاعد عا آخر هون وكوام الضجر
وهم العا كتفي حاملو بإيدي انفجر
خيالك بعدما تجنّس بفكري هجر
وطلق زماني وبلّش يرافق غجر
الغبره عا خطك عمّرت الها حجر
وعم تكتب عناوين عا وراق الشجر
وصفّ الطريق وكل دعسه معلمه
وحضرة مدير المدرسه شقفه حجر
***
هلي كنت عيّطلها يا هو يا يا
سيقانها عواميد محسوبه وايا
وبتفزّ عا السبعين نمرة اجريا
وطولا خمس تمتار وزنود عليا
قالت الي تا بوسها دبّ الحيا
وقلتلها بلا ونش ما يوصل ليا
ولما لقتني ملبّك بحالي وقصير
قالت لا تعتل همّ حملتني بديا
***
قالت الي من بعد موّال البكي
صارت وراقك بالمحبه مجعلكه
بين الحريم ان كنت خفف يا ذكي
بكتر الحكي ما فيك تربح معركه
جاوبتها كوني لظروفي مدركه
لساني قصير وما حدا مني شكي
وجبة حماتي كنت لابس بالغلط
لما مع النسوان كتّرت الحكي
***
يا مطعّمه خصرك بخصر الزنبقه
اعطيني دقايق يعملو ساعة لقا
روحي بروحك من زمان معلقه
وضيعت شوفة حال بضياع الثقه
كوني الي بالكاس خمر معتقه
للذكريات غبار مني ما بقا
غنيتك بإيمان تا يفل الشقا
ولما لزماتي صرت كبش المحرقه
صرت بخيالي عمر بيوت القصيد
وعلـّق برقبة كل حرف معلقه
***
قلتلها بالحب صرتي مخصصه
وعندك مواقف بالغزل ما بتنحصى
حاجي جفا صارت حياتي منغّصه
وجوع النفس عا النار عم يغلي حصى
وقلتلها ما زال انتي مرخصه
للعاشقينك ليش دمي مرخصه
وضليت احكي عن وعود مقلصه
وانو جناحي بالغرام مقصقصه
ولما خطرلي بوسها دار الصريخ
وهجمت على المعدور شلـّحتو العصا.
***
قلتلها يا ظالمه العصر افترض
انو زماني لحد هلق ما انقرض
عندي قلب بالحب عم يقضي غرض
ما في حدا عا دقتو مره اعترض
وسمّعتها أبيات من شعر انقرض
لما شو لازم قلها عليي انعرض
وكل الحلو سمّعتها بهاك النهار
وما سمعت منها غير يبعتلك مرض
***
قلتلها فيكي العيون تشوشحو
ابتسمي تا قلبي من عذابو ريّحو
بشفافك الخيرات عم يتصبحو
وشعرك حلو طالع عبالي سرّحو
وعنقك متل عنق الغزاله لصالحو
وجبالك الأفعال بالصرف ونحو
وضليت احكي عن جسدها وامدحو
تا طار عقلي بدون ريش جوانحو
ولما لتحت الخصر وصّلت الحكي
منها إجاني كفّ علـّم مطرحو
***
قلتلها اسمك عا قلبي حافره
وحبة شبابيك عا خدودك طافره
لا تحسّبي لجنة نعيم مسافره
هوني النهايه مع شعوب الكافره
لعندي تعي وكوني نجاحك قافره
خيالك بإيدك عن طريقي دافره
الشهد بشفافك موهبه وطوفه خيال
وصدرك قصيده بالحروف النافره
***
قالت عيونك فتح وشوف الحلق
ولمعة وجه من بعدما اليوم انحلق
قلتلها بوصفك اذا لساني زلق
لكل العيون الناعسه بجيب القلق
وجهك كانو مع بطاطا منسلق
وتمّك حلو بيضل هوّي ومنغلق
ولوما عيونك حول وسنانك كبار
بينقال عنك كان سبحان الخلق
***
قالت يا ملكي قول أيش محزنك
قلت الدهب لو بمسكو بيصبح تنك
وقعدت قبالي تسف قهوه عا البنك
وتدرز حكي وتقول قلبي موطنك
وسقف الحنك تاري بوجبتها رخو
عطست بوجهي وكلتها بسقف الحنك
***
لما دفشني الشوق صوب السلسبيل
رسمّت حالي ولبست موقف أصيل
وقلت الابانا وصرت سفّر قال قيل
وقربت ليها وقلت مش عابر سبيل
قالت الي وجهك بيفزّع مش جميل
قلي شو صابك؟ قلت الله الوكيل
لما وقعت عا الارض سايرني الحجر
وطوّل لسانو بحق منخاري الطويل
