تختخ زماني وما بقا مني النوى
وصرت بلسان الحال منهوك القوى
وحلم التلاقي الكان يشمي عا الهوا
هلق عا ذوقو فصّل تياب النوى
وعا سيرة البدي اذا هب الهوى
بدّي جمال يكون قد المستوى
وبدّي حكيم يكون ما بدو حكيم
وبدي دوا ما يكون لازملو دوا
ولما خيال الموت قدامي مرق
وموضوع يوم نهايتي بابو انطرق
اصفرّت وراقي والقلب كلو احترق
وصرت بمهب الريح غنيّة ورق
ناديت ربي وقلت ما زالو انسرق
حلم اللي كان يفصّل لجسمي العرق
اقبرني بأرض تكون مليانه عريش
وركب عا ضهر المقبره كركة عرق
وقلتلها من بعد ما قل الجنا
ضهري حني وضهرك متل ضهري حنا
بايد القصيره مش رح ننال المنا
صرنا بلا طعمه والضعف فينا اغتنى
قومي تا نرحل طار من عنا الهنا
واللي لنا بها الكون ما عاود لنا
شو بعد بدنا نضل نعمل بالحياة
لا بتنفعي انتي ولا بنفع انا
البطرك يوحنّا طلتو طلّه
برسم الصليب عليه مندلي
إسمو بذاكرة الشعب رنّان
قبل انتخابو كل عمرو كان
ليل ونهار لأجلنا يصلّي
البطرك بنعمة ربنا تحلّى
وقادر زمام الأمر يتولّى
مش بس بطرك صار عنّا جديد
البطرك يوحنا اليازجي عا العيد
جانا هديّه من عند أللـه
يا بطرك من الشر ريّحنا
انكان الغلط موجود سامحنا
اختاروك قالو مؤمن ومنحبّ
ومبارك الآتي بإسم الربّ
قلنا بدقّ قلوبنا نحنا
البطرك هزيم تكرس لدينو
واكثر من الاكتر محبينو
كان الصلا والصوم عندو فرض
هوي ملاك تجسد على الارض
قولو لهل ما بيعرفو مينو
كل الملل اسلام ونصارى
قالو عظيم ورحلتو خساره
وقلنا لهم هل جبلنا الرحمات
لا تسجلوه بصفحة الاموات
رايح تا يعمل للسما زياره
قال الدني بتعيش بالايمان
ما كان عندو تفرقة اديان
بالحرب تا ياخد طرف ما حب
قال الخلاص منطلبو من الرب
عباد الله كلنا اخوان
البطرك هزيم لاجلنا صلى
وصوتو بوجه الهرطقه علا
عا قلوب كل الناس كان يفوت
صعبه بذاكرة الابد تا يموت
البيكون جبلو بعاطفه الله
دمعة الشاعر عصام ملكي على أميرة (حوش الأمراء) الشابة الفقيدة فانيسا مسلّم
دمعك "بهيه" عمل جوز العيون جرار
منو شي جرعه اشربي تا تعرفي عيارو
ومنها بعيده اذا ببيت الشعر افكار
هزو ضمير الوزن تا يدوبو حجارو
شمر عا زندو الشقا وما في عقل ما طار
والاهل قالو الفرح رح يقطع بدارو
وطلق وجودو الوعي وتغيّب الدبّار
وهاك الخدود الحمر تحت الارض صارو
قالت فانيسا لنا انو العمر مشوار
والاهل قالو العدل ما انسمعت خبارو
الاخات صارو حمل والحبل عا الجرار
وما جاب الها الدوا من قطعة غيارو
لما لحقها المرض يوم النهايه صار
يفقس زرار الوجع تا يدور مشوارو
كانت بعمر الندي والشمس منها تغار
والورد فيها لقى تبكيلة زرارو
**
توفت "فانيسا" والحلا توفى
ولا تسألو وين العقل صفـّى
"زحله" انتلت بالآخ يا ويلي
وبرد القهر خيّم على العيله
وصارت عا جمر الصبر تتدّفى
راحت عا غفله من جسدها الروح
وما في دوا للخاطر المجروح
يا ست "بهيه" ودّعي العنّه
لولا ما بدها ملايكه الجنـّه
ما كان الله قلها تا تروح
الله عطاها من الجمال كتير
كانت "قمر" وباصدق التعبير
لما المرض فيها طفح كيلو
وشافا الندي بالعمر من جيلو
قلا تعي من ها الدني تا نطير
فوق الارض ايامها انعدّو
والموت عنها ما رفع يدو
قولي لاختك خففي الاحزان
مطرح ما هوي "بيننا" من زمان
بتكون هلق قاعده حدو
موقف "بهيه" بالدني بحيي
قالت الي شويه ورا شويه
وكان الدمع عا خدودها منهار
وقت اللي "بيي" راح كنا زغار
مش واعيين كتير عا بيي
جاوبتها الاحلام مصفـّره
وقلوبنا بالآخ منجّره
ما في حدا عا الارض مش ممقوت
مش بس مره كلنا منموت
في ناس بيموتو الف مره
لا شك انو بالفم المليان
لها الفاجعه بيحني ارز لبنان
بتقلكم هيي بدمع العيون
انشلله فدا عنكم وعنا تكون
وايامكن تبقى بلا احزان
هذه القصيدة الرائعة ألقاها الشاعر عصام ملكي في حفل عاد ريعه لترميم بناء سكن القنصلية اللبنانية
 |
| قنصل لبنان العام الاستاذ جورج البيطار غانم |
فيكم انا من زمان متولع
وصعبه لساني بهالمسا ابلع
انتو زهور بالف لون ولون
ويا سعادة القنصل بقلك هون
فوت على قلبي ولا بقا تطلع
طير الفينيق بجونا حلق
وقال الارز بقلوبنا تعلق
وهوني رجال الدين الهم يد
قالو لنا يا حبابنا عن جد
القنصل ونحنا واحد مننعد
يسعد مسانا كلنا هلق
الحفلات ما بتنجح بلا عركه
وكاس المتلت مرجعو كركه
الست البهيه وزعت بسمات
وجمعت لنا ستات وخواجات
تا يصير فينا نطرح البركه
شلحنا عا وضع القنصليه عيون
وقلتو الوطن عا دمكم بيمون
وجينا تا فيكم حالنا نقشع
والقنصل الغانم علم يرفع
وبدق قلبو يقلكم ممنون
لبنان غالي والمحبه جنون
والحرف منو وبالحلا معجون
جبران قايل كلمتو من زمان
لبنان لولا موطني ما كان
موطن الي بختار انو يكون
لبنان اسمو زينة البلدان
وجدودنا قالو عيان بيان
شوية سما لبناننا الاخضر
ولما المنيه لعندنا بتحضر
منروح عا لبنان من لبنان
القاصي بيقول وقلنا الداني
انو وطننا ما الو تاني
ومن جهتي يا اهل يا محبين
هاجرت سنة الاربعه وخمسين
وطول الوقت ضليت لبناني
يا شعبي الفيك تاريخك تباهى
عذابك عم يعيش اليوم فيي
اذا ما كلمتك علم صداها
صفوف الجو، بتموت القضيّه
الحياة تزوجت وجبة بلاها
بظروف مطلقه اللقمه الطريه
الوجع بالراس عم يركض وراها
تا يعطي الآخ صرخه جهنميه
الزعامه الفارغه خزّق عباها
عباها تفصّلت عا المجدليه
لأنو شمخة جبينك دواها
بوقفة عز مش بالصيدلية
انتفض عا الشلحو العيشه صفاها
انتفض عا التاجرو بالطائفيه
انتفض تا المعرفه ترفع لواها
وبدنية هون نعرف وين هيي
بدنا ربوعنا العافت سماها
ترجع متل زهره بمزهريه
وبدنا الشعر يجمع من شذاها
قوافي بكر ومقاطع قويه
وبدنا بيوتنا تجدد صباها
بعدما ختيرت بالمدفعيه
وبدنا العاطفه تاخد مداها
وهويه تظهر على الدين بدنا
ما بدنا الدين يظهر عا الهويه
يا مكوّمة بالراس احزاني
تا ضل اشرب خمر المعتق
جرح اللي كان مقطّبو زماني
بشلحة عيونك عالهدا تفتّق
عياري الفرح وحياتك عياري
والضحك بالتقسيط عم ادفع
وتا توصل على الكون اخباري
لعبّت صوتي بكلة المدفع
اليوم وقعت عالارض قدامي
وخشمي عا بعضو صار يتكسر
وصار الضمير يشطـّب اسامي
هلـّي ما خلو الحلم يتفسر
آخر قصيده نظمتها هلـّق
لعيونك وغلفتها بهيي
وآخر امل بوصولها معلـّق
برقبة نهار يفشكلك فيي
وبعدو اللقا هربان ومروّج
عا دروب بالاوهام مفروشه
وتمي عروس الزعتر تزوج
تا تطلع البوسات منقوشه
يا ضيعتي عم ينزف الجرح الغميق
دمعك نزل طوفان والدق انحشر
لما الاهالي هاجرو الجو الطليق
ما عاد فيكي تقشعي مواسم بشر
سافر جمال اليوسفي وبارو الحقول
قصة شو صابك حاضرك النا حكي
مش بس انو تشرنو كل الفصول
ما ضل الا من الجمل إدنو لكي
وتفاحة العا غصونها حكاية زمان
الموسم ضربلا سلام ما حكيت معو
اليبيس فيها عم بيعمل مهرجان
وكل الطيور الناطقه عليها اندعو
ونجاصة البوراقها كان الحفيف
يفتح حديث وتطلع الكلمه ملو
لما عليها مرقت شفاف الخريف
دار الغزل وتيابها شلحت الو
والمشمشه العطيت لكي مواسم ملاح
وبالجو كانت شامخه متل الهرم
نصا وقع عا الارض بجنون الرياح
ما لمّتو تا يضل طابعها الكرم
وبالرايح من المشمشه حد الشوار
مطرح ما كنا ناكل ونشرب عرق
بعدو الهوا متفسد بلعب القمار
كيف ما مرق عم يخلط بايدو الورق
يا ضيعتي لا توجهي عليي العتاب
بجسمي هجرتك بس قلبي ما هجر
راجع لعندك من بعد طول الغياب
بوس التراب ونشف دموع الحجر
بالحلم لما سمعتهم قالو
لبنان بدها تروق احوالو
ودّيت حالي بسحبة التفكير
عا بيتنا المهجور بشمالو
وهونيك مع وجه الصبح بكير
بسهول فيها شمخة جبالو
لقيت الجمال مفتقو التقصير
وخيط الشمس عم يلقط ديالو
وشفت الفقير بعدسة التصوير
وشفت البكي والمنشغل بالو
وشفت الهموم مقبّنه قناطير
وصرخة قلب لبنان عا رجالو
وبالكرم شفت المحل والتعتير
الصياد صرّف كل اعمالو
بيدفش بحظو والمجال كبير
والطير ما بيوقع عا اشكالو
الفرّي انقطع بمواسم التدمير
ولف الحجل بالسكت موالو
والتينة الكانت دني عصافير
صفرن ورقها وفضيت الاغصان
كل شي بقي عصفور وخيالو
لبناننا الاخضر باشجارو
ورملو وترابو وكومة حجارو
يا ما بسكوتو قلنا تا نعود
نخيّط عراوي تبكل زرارو
كونو المهاجر حاضر ومفقود
ما في رياح تلملم غبارو
بيرجع تا يسأل عن حلم موجود
بالذاكره وبيضيع مشوارو
نحنا انسمينا للكرم، والجود
منشان فينا يشد زنارو
كلما العريشه خلفت عنقود
ضيف الشرف بيحبحب قرارو
داب القلب والكيف متل العود
ضعفو كتب بالجو اخبارو
ولا شك كلما تمرق على العود
شلحة نظر بتزّم اوتارو
وحياة كاس انصب طقسو برود
وعندو مجال يتلّت عيارو
لبنان جنه والعيون شهود
هيّن علينا نعمّرو من جديد
بس الشعب مش هين عمارو
بلادي طلقت عصر الحديدي
تا تخطب للعمر ليله سعيده
القمر عا جبالها طيّر صوابو
وخيوط الشمس نظمتها قصيده
الشعر كرمالها فرّغ جيابو
وقال عملت لـ بيطلع بإيدي
وفيها الطير بيدوزن ربابو
كلما يكر الحانو الجديده
ومن موياتها الترياق جابو
ومن اوصافها الوصفه المفيده
وحلاها بجوّها فصّل تيابو
وعطاها خلقة ريال المجيدي
ولأنو مجدها بيضرب حسابو
ترك عا صخورها طابع بريدي
وجمال الكون سجّلها بكتابو
تحت عنوان "طفلتنا الوحيدة"
ويسوع الناصري المسمر ركابو
جنون الكفر. حفظها العقيده
وزرع بترابها زهرة شبابو
تا حتى يفرّخ الايمان فيها
ويزهر عالمسافات البعيده
هزّو الشعور وغربلو الكلمه
وخلو الوزن عالقافيه يحضر
لا شك بدو جوّنا السلمي
يرجع على لبناننا الاخضر
لبنان بدنا لفاطمه وجاكلين
تا يكون عيش المشترك منبر
كل دوله قايمه عالدين
بتزغر بعين الناس ما بتكبر
ممنوع يفرض عالشعب دينو
الحاكم اذا صوب التعصب مال
كلمن بدينو ربنا يعينو
منقول نحنا وقالت الامثال
كوني مواطن من "انا" ممقوت
وبشرع ديني الخمر مش منكر
شو خص فيي الحاكم ببيروت
ان كنت بدي اشرب واسكر
من بطن امي حرّ بدّي مرّ
مطرح ما بدي وكمل المشوار
ان ما انا كنت ببلادي حرّ
حرية العالم عليي عار
تا تعيش الله اكبر وآمين
ويدوب دم الحقد المجمد
بدنا محمد بالمسيح يدين
وبدنا المسيح يدين بمحمد
بالقول نحنا وبالفعل اخوان
وما في حدا احسن من التاني
ولبنان النا كلنا لبنان
عا شرط انو يضّل لبناني
نحنا هجرنا بلادنا منشان
قبل المسا بالقرش نتصبح
وحرف الهجا اول مهاجر كان
بمراكب الكانت عم بتسبح
لبنان ما مننسى ولا الوجدان
منضيعو مهما الكفر اصبح
لبنان النا كلنا لبنان
منو اذا بيروح شبر تراب
بتمشي الخساره بمأتم المربح
نحنا زرعنا قلوبنا تنهيد
والكون النا مصايب مصمّد
التنهيد لازم يختفي وما يزيد
ويدوب دم الحقد المجمّد
لبنان مهما يكون عنا بعيد
بقلوبنا بيضل ما ترمّد
بالرغم انو معرقل التوحيد
والمشكل الموجود متعمّد
وبالرغم انو الحزن صار شديد
وترابنا بالدم متعمّد
بيضل فينا نحط إيد بإيد
ونقشع يسوع بجامع الاسلام
وبالكنيسه نقشع محمد
شروقي
الفبرك بايدو الدني من جبالنا بينطال
لبنان اول وطن ما في الو تاني
النا ترابو دوا وهيدا حكي يوصال
وبقبال ليرة دهب قلب "العرقبانه"
بوجه الغريب اوقفو عذاب الاهالي طال
بلبنان صار الحكم تفصيل "عثماني"
نحنا ما بدنا وعد ينزان بالارطال
وعنتر ما بدنا اذا بيشد خلفاني
اخوان نحنا وبحب بلادنا ابطال
خلقنا عا ذات الوزن بنفوس شبعانه
المش ابن عم انحسب محسوب ابن الخال
وعا كل سحبة فرح ابره واسطوانه
لو خي خيّو ضرب بيضّل حسن الحال
ولا يوم منا حدا تسجل مخرباني
المجروح مهما انوجع بيضل جرحو عال
ولو كان حد القلب بيكون برّاني
من زمان قال المثل والقول مش بطال
وبعيد قولو تا تبرى شفرة لساني
زيوان بلدك ولا قمح الصليبي انقال
لو كان ابن الوطن عم يقطع الطرقات
ويدبح بظفرو البشر بيضل لبناني
شروقي
دخلك يا رب البشر شي ضلع تاني شيل
من صدر آدم تا نكشف اول بتاني
الاول بكفرو اغتنى بلكي بتاني جيل
منكتب عالوح الزمن لبنان "لبناني"
كلمن حبيب الوطن ببراعة التمثيل
وعند الحقيقه عبد كم قرش براني
القرآن قالو غلط وبيلحقو الانجيل
شعب اللي منو تقي مش شعب انساني
احمد "محمد" قتل ولياس دمو تقيل
كرمال اكلة حلو قوّس عاسرياني
"وهاني" عا خيو بطل لكن عا اسرائيل
قلو تا يعمل بطل بيصير مش هاني
"قايين" قالو التقى ودو ورا "هابيل"
تا يعود عهد المضى وتقوم الخيانه
مخلص ما بدنا وابي تا تضل قال وقيل
عا شفاف زيد وعمر نيران شعلانه
كلما التقينا بظرف تا نوضعو مقابيل
ظرف العطانا الم عم تنزل عيانه
صارو رجال الحكم للهدم والتعطيل
فضّو الخزينه ورجع يوم المخرباني
مش هيك بدنا شعب بدنا شعب بيميل
صوب المحبه الوطن بقلوبنا امانه
قالوا بكتاب الصلا موجود عزرائيل
وبالراس عنا التقى يا مرمر زماني
ايمتين موت العرب قال وربحنا جميل
الاسمو "تزار" وعطى انذار "قباني"
شعب العراق اندبح والكهربا قنديل
صارت عا ارضو وبحر اطفال جيعانه
صرنا بطق الحنك عم نسمع مواويل
ولا يوم الها انكتب تا تنسمى غناني
يا رب بدنا حدا من البير زير يشيل
نحنا بغربة قهر والصبر جمرو داب
ومنا سنين الفرج بتضل هربانه
شروقي
رايح عا تاني دني لا تسمّعيني رجاع
بالسوق ما في شقف تا رقـّع زماني
اللون الطبيعي انمحى وصارو الخيوط رفاع
وما قدرت عبّر ابر بعيون تعباني
خيالك عا فكري مرق من خمس ست جماع
بالرغم اني قلت معقول ينساني
وفاقت جروح القلب عا دعسة الاوجاع
وصريخ حرف الهجا وتدحرج لساني
صارت حياتي تعب كل الدروب كواع
ويا ريت للملتقى عم يلتقى ديانه
خيّم براسي الشقا وصارو الهموم ضياع
وما عاد يرضى الجرح تا يكون برّاني
لا تسأليني اذا بيتغيرو الاطباع
عا شريط اخ الوجع ما تسجل غناني
هربت قوافي الشعر من قلة الابداع
التفكير صوب الوحي ما عاد وداني
تخمين قللي الظرف من هالبلاد شباع
نشّف ضمير العرق لا تدوزن قناني
ولا بقيت ترسم صور رسم الحياة دفاع
لبنان دربو انقطع والآخره بتقول
حضّر جواز السفر عالمقلب التاني
يموت البخيل يموت خرجو يروح
لازم شلوشو من الارض نقلع
ما رش ميّ لاصبع المجروح
وقرش العاجيبو فات ما بيطلع
هوّي البيضّل يزور ما بينزار
حبة "لولي" لو ضيّفك بيموت
وقاف على بابو اربعين نهار
وكون عا ثقه ما بيعزمك تا تفوت
بيت البخيل معمّر بلا اساس
وما بينحسب مصروف مصروفو
مش عن محبه زيارتو للناس
منشان يتهرب من ضيوفو
الطبخه ببيتو معودّه بلا زيت
بيقول يلله بشحمتو قلو
ويوم العطاله بيهرب من البيت
تا يضّل زر الكهربا محلو
عا شفتو بتضّل كلمة هات
ومش عم تدور الخود عالسانو
وتا يقدّم سواكير خبريات
ما في حدا بيدوق دخّانو
ما في بخيل بلقمتو نصحان
بينصح بلقمة ناس بتهمّو
ببيتو ولا مره استفتحوا الفيران
العم ينشلح عالارض بيلمّو
انشالله البخيل يرافقو الافلاس
مفروض يوم نهايتو يقرب
عندك وعندي عم بيشرب كاس
لكن ببيتو ميّ ما بيشرب
ناس الوعي وهلق يا بنت الناس
مفصّل تياب الهم عا قياسي
من بعد ما ختير بايدي الكاس
جيتي بنغمة كاس وكاسي
نظمتك قصيده صيتها مشهور
ولما التقو الاوزان بقوافي
ضيّعت كلمة مرحبا وبونجور
بين الحكي العلقان بشفافي
وقلت لعذابي فـّل صاح الديك
خدها معك وعواطفي توقى
وبعدك بقلبي واقفي هونيك
مطرح ما بدها توقف الدقه
شحّو عيوني والعتم بيسّم
ولما عرفت صوب العمى إني
نخيّت عا نص الدرب تا لم
كمشة نظر وقعتـّها مني
شاحط ورايي والحلم هربان
وهمّي ما كانت حالتي تهمّو
الانسان "وحياتك انا" الانسان
ضحكه شلحها الكون من تمّو
ضيّعت حالي بصرخة الآلام
لما عليي خلفها سكـّر
وكاتب عا غبرة آخر الايام
اني "انا" ما بقيت اتذكر
يا مطيره عنـّي الوبر والريش
تا تلبّسيني الهّم يوميه
اعطيني حياتي صرت بدّي عيش
احسن ما جن وشلـّحك هيي
عصفور حظي والمشاكل "باز"
وساعة خلاصي هون وينيي
يا ريتني دمعة عرق ممتاز
تا صبّ حالي وإسكرك فيي
ويا ريتني مقعد زنودو كبار
وشكلو حلو وقماشتو رقيقه
تا يدق قلبي اجمل الاشعار
كلما بقلبو تقعدي دقيقه
ويا ريتني متل الطيور بفر
تا غط عا سحبة امانينا
واعمل من الحلمين عروه وزر
بشلحة نظر يتبكلو فينا
وبيت الشعر يا الف ريت وريت
خرج السكن بيصير بزماني
تا كنت عمرلك بفكري بيت
واكتب عا بابو بيت لبناني
شروقي
يا عايشين بدني ايامها تشارين
لبنان تشقة صور بالسحر مرسومه
اطول حكاية زمن برجال دنيا ودين
ومسحة جمالو بجبل وبسهل مقسومه
شمالو وجنوبو سما عالارض محسوبين
من هيك منا السما بتضل محرومه
الاخضر عا ارضو بقي تا يساقب التلوين
وعود الما عندو ورق عم يلبس طقومه
الكوره بعرف الدني جنة عدن يا مين
يمرق عليها ومعو مستودع فلومي
بيقول حب العنب بخراج "بشمزين"
تفضل يا جوع النفس عا سحبة كرومي
عناقيد كرم العنب بكواعها جزادين
مشقوع فيها الدهب والناس معزومه
والتين عامل عقد مع شركة التأمين
الدبور ما بينقبر والنحل ناهومي
وفرخ السفرجل غني والخوخ زندو تخين
واللوز قلبو جبن بالملح حلومي
الكوره اللي فيها انغرم زيتونها من سنين
غطى جسدها وطبع عا خدودها طعمومه
وتا تنام نوم الهنا النجمات سهرانين
بعيون قالت لها عا رياحتك قومي
هونيك شكل الحلو سجل الو عناوين
مع كل طلعة شمس للزاير بيومي
والطير فيها انتفخ بكروم مليانين
بيفوت ما بيلتكش بشروط الحكومه
عبى غصون الشجر عا سلامتو تلحين
وعا كل ورقه طرش كلمات مهضومه
المشوار بين الحبق بيسوكر التدخين
يمكن بايدو الحلا عم يزرع لغومه
والورد طوفة شذا والفل والنسرين
حزمو عا ضهر الهوا من الموسم شوالات
تخمين سحبو العطر من بنج العمومي
