الصفحات

ننشر في هذا الموقع أشعار الشاعر الكبير عصام ملكي

غزلان

يا مطالعه شعري القلب مجروح
خلي المضي عا بياض يتشجع
من هالدني هلي انكتبلو يروح
تحت الارض بيضّل ما بيرجع

حبي "انا" وكبي محبة ذات
ودقي غرام بحفلتو يغنو
جسمك لأنو مرفع الشهوات
شهر الصيام بيبتعد عنـّو

بورشة وهم لا تشغلي الافكار
شو بتعملي ان رب السما تخلق
وقلك الك عالارض باقي نهار
وطالع عبالي آخدو هلق

كل العيون بتلحق الحلوين
ليكي "يا ريم" العاشقك ليكي
ان كان بدك تنطري تشارين
شلح النظر ما بيوقع عليكي

مش عارفه انو حياتك دين
وبعد الطفوله بتوصل الكبره
النهد الما بدّك ادقرو بالعين
جايي النهايه تعملو غبره

بلاها

بلاها كلمة الشاعر بلاها
اذا بيكون مصدرها البلاهه
واذا بلا قافيه ولا وزن هيي
عا درب الفن بتكوّم بلاها

الدعايه عن لسان الاكتريه
اذا بوجودها اخدت مداها
فيها تضيّع نفوس الغبيه
بكلمة شاعر الشهره اشتراها

بلا دواوين شعرتها عبيّه
وما فيها شعر يرفع مستواها
الدعايه قد ما كانت قويه
ما فيها تلبّس الكلمه حلاها

يا شعر المش عم بتخدم قضيّه
ما فينا نقول لحروفك عفاها
فينا نقلك بلهجه طريّه
ساعة مولدك يلعن سماها

هلي كلمتو منها نقيه
ضروري يكبّها ويلحق سواها
ما فينا من عبكرا ومن عشيه
نضرب بالرمل تا نصير نعرف
وينو وجّها ووينو قفاها

المعنى

اذا بنت المعنى بتعرفوها
لازم تعرفو اني ابوها
عليها سهرت تا صارت صبيه
اسألوها مين رباها اسألوها

عاشت مع حروف الابجديه
بافكاري اللي عم بيرافقوها
ولو ما تكون احلى بنت هيي
عمالقة الزجل ما تزوجوها

وبعدما تزوجت بالاريحيه
وعملو معلقات وعلقوها
اجا عالكون فوج شويعريه
وصارو عا الدروب يلاحقوها

بنتي المتل زهره بمزهريه
ما بدها شويعريه يقبّلوها
بعدما تغربت ميه عا ميه
ما لقيت متل بيت الخلفوها

انا اسمي المعنى وعاش فيي
الوحي ... ومواهبي بتقدروها
لكاس الخمر جبت القابليه
وكلما اعتلى فوق المنابر
الحقيقه الواقعيه بتسمعوها
 

بوليس اشاره

انا مارد اذا مدّيت ايدي
عا هللي بيدّعي بترجم وعيدي
بعين عنايتي عا الشعر ساهر
تا صرخة كلمتي تعبّي الجريده

نجاحي مش حلو انما كان باهر
لأني بحصد المعنى حصيده
وتا حتى يضل مرج الشعر زاهر
سقيت الفن من دفقة وريدي

انا من طلعتي استاذ ماهر
الفطاحل بالشعر صارو عبيدي
ولأنو قصايدي بإيمان ماهر
لتاني جيل عم سوكر بريدي

هللي من ورايي السيف شاهر
بوجهي يوقف بيعرف رصيدي
ما بدّي هوبره وعجقة مظاهر
بدّي رجال بتحّمي الحديده

لما الشعر كان بظرف قاهر
قلت يا ردتي مجدو استعيدي
وبعدما القافيه لبست جواهر
حقنت الحرف بنبيد المعتق
تا خلي اللون يسكر بالقصيده

زماني قال عن حق وجداره
إلي المجد وإلي تاج الاماره
لأني بِطلق عيارات ناري
عا هل ما بيفهم كلام الحجاره

انا عا بيدري فالش غماري
تا حتى تنقود العالم شطاره
اذا عا ضعيف بعلن انتصاري
عليي موقفي بيشن غاره

الزجل عم يدخل السوق التجاري
وانا بالشعر ما بحب التجاره
ما برضى شخص منـّو من عياري
بحق قصايدي يطلق عباره

بنزولي عالحرب طالع قراري
تا آخد مربح واعطي الخساره
وبعصر الادعا وشعر البزاري
تا حتى الوزن ما يضيّع طريقو
ضروري كون بوليس الاشاره

دم الانكليزي

طار الصواب وافلس التفكير
وخشمي انكسر ما عاد يتلزّق
ولما لحقني بقلتو التدبير
صار الحكي عالسكت يتخزّق

حاجي بوجهي تعمّري مسافات
عمري قصير وبعترف اني
باخد وقت تا ابعت سلامات
وانتي الوقت عم تسرقي مني

قلبي احترق واحترقت الهمات
وحظي انقرا عا كف عفريته
من النار بدّي اسحب لسانات
وشيل القدح من كل كبريته

حلو الشفا البيساقب الاوجاع
يهمّز عا جرح القلب تهميزه
صدري انتفخ قديش بدّو يساع
دمك متل دم الانكليزي

يا ريت لونك بالهوى بيحّل
ويا ريت عندك صنف يتصنف
بقبل خيالك عن سمايي يحّل
وقت البيصير الجوع يتأنف

تراب

لا قادره تتوبي ولا قادر توب
ولا خواتك مساقب على خواتي
تنيناتنا بالقهر بدنا ندوب
منرضى شهر ومنزعل تلاته

بدي بحنانك تمرغي الاحلام
وكون بربيعك قاطع كروته
انكنتي لطيفه بآخر الايام
شو بتنفع انتي وعم تموتي

مش عارفه من هون بدنا نروح
وانو الفنا تا يشوفنا تشجع
بكرا بعدما تروح منا الروح
لتحت الارض عا حسابنا منرجع

كنو فقط بالختيره بتنباس
شفافك لها مواويل ما بغني
بقلك انا رح اعلن الافلاس
بجاه السما حلي ابعدي عني

نحنا بيدين الكاينه العاب
واجسادنا للارض ترويقه
ما زال جسمك رح يصفي تراب
شو بتخسري لو بربحو دقيقه
 

دعوة مجمّرة

على اجنحة النسيم في ظلال الغيوم الملبدة صواريخ من التساؤلات تنطلق من اين الى اين وعلى هامش السماء عطش الاشجار يستفقد دموعها. وهنا في قعر هذا اليوم قليل من الآن والحرارة على اشدها. متى يقطع لحم المسافات اربا متى يكون اللقاء المنتظر عقارب الساعات تلذع الدقائق وعلى الوعود المجمره علامات الاستفهام؟

هلي عليها تعمّرو وعودي
وفكري بصف كلامها تخدّر
صارت وراها تشلح جهودي
لما الوهم عا دروبها كسدر

وهلق ببكرا معلق الآمال
وكلما التقيت "بأوف" عم غني
عالصبر عايش والوعد اشكال
ويا مصيبتي ان هرّ الصبر عني

قلي ضميري عند خود وهات
لما المرض عا صحتي تعدّى
ان ما متت ما شفت مين المات
بيع الدني وبحقها تغدّى

طار الوعي وتشلع الايمان
وغلّ الجدال بجونا السلمي
ومن بعدما كان الحكي طوفان
صار السكت عم يبلع الكلمه

كانت قصيده كلها الوان
وآخ العليها توقف الرده
ووقت اللي كسرت رقبة الاوزان
قلتلها عا البيت لا تعدي

وهلق بعدما عواطفي انساقو
صوب الكره مع "هيك ما بدي"
نهار السعيد اصفرّت وراقو
وصار الوجع بالراس عن يدّي

عاصفة ابيات

ايتها الحاضرة في كل ثانية من ثواني العمر وفي كل جولة من تحركاتي، لك اعلق الاسئلة على جدار الصمت وبظروف قاهرة ارسل لك لوعة الاعماق ورماد الاحرف كالظل في حرارة الشمس اشباح الذكريات ترافقني لم تعد اغنية الطيور ما كتبته على اوراق الشجر بأقلام الشرايين لم اعد انا كما انا الى التراب سأرحل غدا
يا حاضره بالآخ والهيهات
ومسجله بصفحة مواعيدي
بكفوف ديي مولف سلامات
وناطر تا ايدك تلتقي بايدي

لا شك حب الذات حب خوات
ولا شك انو نغمتو جديده
منو ما فيكي تاخدي شهادات
غير ما صفوف المرحبا تعيدي

دربك جمر بتدّوب الهمات
وبتنيّم الحزن بحضن عيدي
حاجي بوجهي تمغطي مسافات
اقصر مسافه صارت بعيده

بسكرة غرامي هشلت المازات
الكانت لكاس الخمر رديدي
وصار الضغط عم يلبس مشدات
وبكل صرخه يشك تنهيده

نظمتك رواق بعاصفة ابيات
ولما قلت شو بعد بتريدي
قلتي لجفاكي هات زندك هات
بلمح البصر حول عا بيت الشعر
ولا تترك على السطح قرميده

ضرب الرمل

في ذمة المسافات البعيدة قبائل من المواعيد يحتضنها الصبر بأيوبه وبانفاس ناريه تدغدغها خيوط الشمس، أين الطريق المؤدية الى عصرك الحجري في اية بقعة من الزمن تقطن المناسبات علامات الاستفهام جبهات عريضة وفي نفق التفكير اسئلة بلا اجوبة

جنيت فيكي وعمر جنوني
طابق سهر عا هامش جفوني
وصرت على ذكرك شغل التفكير
وارسم خريطة وين بتكوني

ومن بعد صفنه وكومة مشاوير
عا دروبك بدعسات موزونه
عزمت الوهم عا ريشة التصوير
ولبسّتك مساطر من فنوني

بضرب الرمل ما عرفت شو بيصير
ولحدّ وين بتقدري تموني
لما لقيت الحب طفل زغير
وحواجز الايام دقونه

ان كان بدو يعلم التقصير
عا عواطفك يا تقبري عيوني
بطرش خيالك دخنة سواكير
وعن كل صدفه بقطع المونه

لا شك نحنا منظمة تحرير
لا بدونك بتمشي ولا بدوني
بجو الحلا خلي الوعود تطير
بلكي مشاكل حبنا بتنحل
وبتحل معها عقدة النونه

كل الحروف تقاطعو

ايتها القادمة من صقيع الوحدة الى حرارة المناطق الاهلة، سراً ستبقى دردشة اللقاء، ساشتري سكوت البشر والحجر واشطب التقاليد. لك اجند الثقة والاخلاص وكل الاساليب، على المفارق تنتظرك عشرات الطرقات المعبدة، وفي ظلال الاشجار الطاعنة تقف المناسبات
لا تقطعيني الدرب حابب اقطعو
وراقي بعرس الزمهرير تشلعو
يمكن عا عمري يمرق نهار القصير
وآخر امل بالملتقى ياخد معو

واقف عا تلج ونار والموقف خطير
ومن جيبة سنيني الظروف بيوقعو
بيقظة شعوري تشنكح الحلم الكبير
الطالع عبالي "بدخل عينك اجمعو"

بعد الجمع والطرح عا دق النفير
لما لقيت الحظ غيّر موضعو
بحبل النظر علقت مشنقة المصير
تا شوف كنو اهتمامك بقشعو

حالي بحالي مضيّع بجمع الغفير
وبالمرحبا كل الحروف تقاطعو
وزهرة شبابي طلقت موج العبير
المن موسمو النسمات عم يتبضعو

يا مفرّق الاعمار حابب استعير
بصف الحياة. "نهار يرفع اصبعو"
مصفرن عا خط الاحمر وواقع اسير
عقلي هجرني وانقطع حس الصواب
وناطر عيوني من سفرهم يرجعو

شبرق شبابو

قف ايها الزمن خجل الاضواء بتربص في المنعطفات والمفارق وعقارب الساعات تلتهم دقائق النظر. قف لنشعل الحب بثقاب الجليد مسافات الاعمار تقلصت والاسماء تنتحل اصحابها وهنا وهناك برماد الايام تتشح الاساطير
القلب انقطع وتخزّق الحلم الكبير
وتجنزت بالتم كلمة مرحبا
هلي فرشت دروبها عطر وعبير
طفيت بعتم الكون زر الكهربا

عا حبها يا ريت ما تنجد قرار
ما قدرت فيها شوف محاية ضجر
حسّيت اني بعد سحبة انتظار
كمشة تراب معلقه بشقفة حجر

فكرت فيها شبرق شبابو الربيع
لكن لقيت الزهر دقر ما علي
عند الهمس واللمس طوفان الصقيع
وبتبين على العين نار وشاعله

لقلبي قلت بالدمع مش هوني دواك
لا تطلب من الفول طعمة كستنا
ما زالك عرفت الحراره مستواك
خلي الجليد بعيد بتنال المنا

الواقع ضروري تلحقو وتلغي الخيال
بتبقى خيوط الاعتبار معبّره
شو نفع حوا انكان لابسها الجمال
وجواتها بتكون متل المقبره
 

وعدك الختيار

ايتها المدمنة على تمزيق القلوب مودعا انا ولكنني سأبقى عقربا متجولا في ساعة التفكير، مودعا انا وسأترك على جسدك المقمر بصمات النظرات الجائعة وسأدمج شعرك الطويل بأوزان خليلية. غدا اسير وحطام النفس باتجاه الوحدة القاسية على قارعة الطريق عويل الجماهير وجحيم ينتظر ليسجل بلسان النار نفوس وصيتي

اعطيني تا اشرب نشّف لساني
الكاس إندوخ من غمز القناني
من العمر باقي كمشتين زغار
حرف الهجا للموت هجـّاني

بسكر تا انسى وعدك الختيار
الخلـّى بلاد الجمر بردانه
وبزهق تا اسمع قهوتك عالنار
كلما النعس مشوار وداني

اعطيني عرق مع مازتو ونهار
من عمرك بعبّي الدني غناني
وبشلح ورايي قلة الدبار
وبلبس طقم قاعد بالخزانه

وعودي ابعتي تهميزة المشوار
البتفيّق الدرب على عنواني
بلكي اذا بتتدوزن الاوتار
عا خلقتك بقشع وجه تاني

صار الطقس بالحب بدّو غيار
من هيك جوع العين خلاني
نق على حالي وقول باستمرار
عن سفرتي قيمو اللحم والبيض
طالع عبالي خبز لبناني

رفع عتب

بين الشتي والصيف صرنا عم نضيع
وصرخاتنا الايام مش عم يسمعو
من البرد عم يترشحو زهور الربيع
وحضرة جناب الطقش ما بتفرق معو

دخلك يا رب الكون يا راعي القطيع
شوف اللي فيك بهالحياة تطلعو
آخر امل متعلق بخيط الرفيع
وجايي "عبكرا" بالعواصف يقطعو

بالكنفشه منطير عا الجو الوسيع
وما في حدا عالارض عارف موضعو
ما ضل عنا لا شفاعه ولا شفيع
يفتح مجال وحظ يرفع اصبعو

من همومنا يا ريت عم نقدر نبيع
صارو بحجم الكون يمكن يقطعو
وعم تركض الاعمار عالخط السريع
وكترو اللي صارو يطرحونا ويجمعو

يا رب بقدر قول بلسان الجميع
انو عتبنا عليك لازم نرفعو
بدك يكون الشعب لكلامك مطيع
وعا كل شلحة عين عم ياكل قصاص
يا مصيبة البدو حسابك يدفعو

ضحكة قدر

شروقي

يا مهاجرين الدني الفيها زماني كان
عالارض كبو السفر ورجوعكم هاتو
واللي ما بدو يجي يفسر حلم هربان
بالظرف يبعت الي خلقة سلاماتو

عودو تا نبني شقق بشقايق النعمان
وبالورد نفرش حبق تا يدوخ جواتو
ما زال النا انكتب تحت الارض عنوان
وعالسكت جايي الفنا يقدم تحياتو

الانسان ضحكة قدر شو قيمة الانسان
عالارض مالو خبز وموي وحياتو
من هيك صبح ومسا بيرافق الاحزان
العا قلب قلبو غصب عن رقبتو فاتو

بالكفر عيشو معي وبالنار والغليان
ماتو اللي حكيو لنا عن ربنا ماتو
وما عاد يعزم حدا عا جنتو رضوان
كلما عليها نزل عم يطلع خواتو

فيكم شلحني الهوى بين الانس والجان
وقلت على ذكرو بعدما رفعت راياتو
يا عاشقين افهمو بلغو زجل لبنان
هلي بساعة قهر دمعو سكب عالذات
مش متل هلي سكب عا دمعتو ذاتو

صرخة عناقيد

هجرتك يا ضيعه من زمان بعيد
وبعدو عا ارضك عايش زماني
نهارك منابر بلبل الغرّيد
وليلك عرس كاسات وقناني

مشتاق ارجع شوفك من جديد
ودحرج عا قمة وصفك لساني
واسحب عرق من صرخة عناقيد
بكروم فيها الشمس عرقانه

ومشتاق ارجع حط ايدي بايد
العم يحصد ويدرس قسم تاني
وشوف الشفق من خلقة القرميد
مفصّل الو التوب الارجواني

وتمشي العتابا والصدى الرديد
بالجو يخلق جو لبناني
ولون الطبيعي يفضح التقليد
العا سفرتو الالوان جيعانه

ما بريد وحياة السما ما بريد
شوفك ببحر الدمع غرقانه
عهد المضى طالع عبالي عيد
آخر خبر عن صحتك جاني

شفتك بحلمي مرافقه التنهيد
وطرقاتك من الناس حفيانه
للغرب صارو ولادك مواليد
وكلمن بيقلك شو انا مشتاق
يا ضيعة الفيكي الهوا غناني

شاعر ونجار

جربت صلح منبر الشعار
وردو متل ما كان بزمانو
جبت البضاعه من خشب وحجار
ورفعت فوق الارض سيقانو

ومش بس اني هلكت، عقلي طار
وصفـّى على المرّيخ عنوانو
ما قدرت لاقي بوقتها منشار
تقدر تهدي وجبة سنانو

ولما عا فاره سألت ابن الجار
تكرّم بعد ما تغيّرو لوانو
الفاره ما كانت تنفع ولا الفار
عن على بالو يسحب لسانو

وزاد البلا قدّوم عزمو خار
كلما ضربتو تزيد احزانو
وصارت الخشبه تفسخ المسمار
وهونيك كل مشاكلي كانو

ولما العزيمه بلشت تنهار
والشعر جنز كل اوزانو
زتيت خلفي عدة النجار
وقلت الكسر ما في الو دبار
كل الحروف بكلمتو انهانو

يوم استقلال

شروقي

يللي عشقتي الجفا بعدك بقلب البال
وبعدو حنيني لكي بيشد اوتارو
جايي بطوفة دمع تا سمعك موال
مهندز عا درب السمع دعسات مشوارو

اعطيني شي شلحة نظر من موسم الاقبال
جنز ربيع العمر احلام ازهارو
عا حساب قصر الفرح صارو الهموم طوال
الكاتب كتابو الشقا يا الف شحارو

مش بس انو الجسد للغير رزق حلال
صار التفاهم معك مجهول دبارو
لا سلام عم تبعتي ولا بتبعتي مرسال
ويا ريت بيت الشعر عم تدفعي اجارو

تشرين خلفك مشي وصارو السنين قلال
ويوم النهايه بدي بتجميع افكارو
اعطيني دخيل السما شي يوم استقلال
تا يصير كاس العمر يتلت عيارو

التجعيد فيكي انغرم وتبدلو الاحوال
منك بعهد الصبا خدودك درج صارو
تلتين عمرك مرق شو ناطره ما زال
كرت العزيمه اجا ويوم السفر عالباب
البيروح من هالدني عم تنطفي خبارو

من الارشيف

انا شاعر انا "الاحرف" ولادي
الوزن والقافيه بعبد عباده
خيالي لصرخة الالوان أولم
لأني للحلا فاتح عياده
زمام المقدره فكري تسلـّم
وبلمح من البصر جاب الشهاده
اذا شي بيت عن يدي تألم
القيامه بقيمها وبعلن حدادي
الي عا كل جبهة شعر سلـّم
ورفع ايديه "المرفـّخ زيادي"
وزخم كفي عا كبر الروس سلم
تا حتى يحفظو دروس المبادي
عليي ما حدا بالبصم علـّم
بشرع الموهبه صاحب سياده
بصراحه بقولها والله اعلم
اذا بضرب جبل بيصير وادي
الشموخ بمدرسة شعري تعلـّم
وسقط بالصف تبويس الايادي
وبكل مناسبه حضوري تكلم
ولأني بسبح ببحر المعنى
صرت معروف شاعر سندبادي

ولأني للزجل باني المباني
بطلوع الاوف عم دحرج لساني
بشعري عالم الكلمه تهنا
وبعصر الفكر سجـّل اسطوانه
بدي للمعنى نقد بنا
تا كاسي يدبك بعرس القناني
ما بدّي فلسفة احمد وحنا
اذا بتقوم عا حساب الديانه
وهللي للأرض قدرو تدنـّى
وببيت الشعر صاير مخرباني
شو بدو بشاعر كلامو تحنـّى
بخيال الواسع وسجّل مكانه
بسرعة خاطري العالم مغنـّى
"صبر ايوب" ما بيعرف مكاني
على المريخ وصّلت المعنى
وكيانو صار شقفه من كياني
بكل مواقفي معروف جنا
ما بخلط بين ارزه وسنديانه
عا كتفي الكون وبإيدي الأسنه
زماني بشلحو وبمحي المقدر
اذا ما كان عا جبني زماني

جوانح الدوري

شروقي
يا روح مني اطلعي وروحي على لبنان
النسمه الطريه العا كتف جبالنا زوري
وقولي لبيتي الهشل من سيرتو العنوان
حبل الرجوع انقطع عن خلقة حضوري

قلبت عليي الدني وصار الرضا زعلان
وسحّب وجودو العمل من واجب ضروري
ولما الفراغ انوجد صار القلب مليان
ونكح نهار الفرج بجوانح الدوري

دخلك يا رب السما يا صانع الانسان
اعطيني خيال ووحي تا تفتّح زهوري
كلما ببحر الشعر تتكسر الاوزان
بترغي دموع الحرف عا موجة سطوري

عا دروب فيها الشقا ماشي الامل حفيان
وما عاد يفضى الفكر تا يسهّل اموري
بكفر الحياة انضرب وتشّوه الايمان
وعقرب مصيري هرب من ساعة فجوري

عا الشوق داب الصبا وما ضل سنة زمان
توقف بوجه الغضب وتجند سروري
من يوم هاك الوقت وبأغلب الاحيان
عم قول يا موطني هوني النهايه هون
لما ما عاود لفي عالشط بابوري

العين جيعانه

شروقي
مرقت عليي وقالتلي مرحبا يا جار
رقصت عيوني وقلت شو اسم جيراني
قالت بيقولو الي ست الحسن انوار
والام بنت الغرب والبي لبناني

قرّبت ليلها وقلت عقلي براسي طار
من هالجمال الما لو اول ولا تاني
قامه رشيقه وخصر ما بيلزمو زنار
وزنود عاج وشعر اطول من لساني

ولما قالتلي شو عندك بالقلب اسرار
نسّم عليي الهوى وقدمت عنواني
كانت بوقتا المرا متغيبه من الدار
والخمر غاشي الضحك جوّات القناني

ولما ابتدينا سوى نشرب "جوني ولكار"
دوّر عا ايدو السكر آخر اسطوانه
وعالبيت جات المرا من بعد هالمشوار
وعلقت مشاكل لحد اليوم علقاني

جرّبت اضحك قالتلي لك الف فزّار
ودقت لـ خيها وقالتلو اليوم عمراني
ما شفت الا وصل بيهب متل النار
وحامل بايدو عصا نص السنديانه

ما خفت منو صرت ارجع لخلف وصار
يهجم عليي لقاني رجعت خلفاني
وما قدرت برهن باني الفارس المغوار
سبحان الله ما في انسان هداني

وهونيك دار القتل والضرب يا ستار
وقلبت تحتو لأنو ما بيلقاني
وبلشت خبّط بربو وحارب الاقدار
تا تحت منو صرت متل البذنجانه

حاله ما الها دوا وما في لها دبار
وشفرة لساني من الاعذار تلفانه
وقلال صارو ما عادو المصلحين كتار
والنفس اضعف ما يمكن والقلب خفاق
والعين تقبر صحابا العين جيعانه
 

زيوان بلدك

شروقي
الفبرك بإيدو الدني من جبالنا بينطال
لبنان اول وطن ما في الو تاني
النا ترابو دوا وهيدا حكي يوصال
وبقبال ليرة دهب قلب "العرقبانه"

بوجه الغريب اوقفو عذاب الاهالي طال
بلبنان صار الحكم تفصيل "عثماني"
نحنا ما بدنا وعد ينزان بالارطال
وعنتر ما بدنا اذا بيشد خلفاني

اخوان نحنا وبحب بلادنا ابطال
خلقنا عا ذات الوزن بنفوس شبعانه
المش ابن عم انحسب محسوب ابن الخال
وعا كل سحبة فرح ابره واسطوانه

لو خي خيّو ضرب بيضّل حسن الحال
ولا يوم منا حدا تسجل مخرباني
المجروح مهما انوجع بيضل جرحو عال
ولو كان حد القلب بيكون برّاني

من زمان قال المثل والقول مش بطال
وبعيد قولو تا تبرى شفرة لساني
زيوان بلدك ولا قمح الصليبي انقال
لو كان ابن الوطن عم يقطع الطرقات
ويدبح بظفرو البشر بيضل لبناني
 

جوع النفس

شروقي
مشتاق شم الهوى عا خدودك الحلوين
وباللمس احكي معك تا يزبط حسابي
بفزع يجيني شهر من نمرة تشارين
ويطير عقل الورق عن زهرة شبابي

جايي بجوع النفس وشفاف عطشانين
بقبش بعب الزمن عا ريحة خوابي
ان قلتي ما بدّك اجي لعندك بقلة دين
بقلك يا ست الحلا ست مية كذابه

انتي عبير الورد مين قال مي وطين
عشتي برغد وهنا وعايش عا اعصابي
قلبي بهواكي انعمد عا الدق والتلحين
وبيقول دخل السما منوين عرابي

للحب كنتي دوا ومن بعد خمس سنين
صرت بحضوري معك استطعم غيابي
عصر العتابا مرق قبل الوقت تخمين
وعالعين يا بو الزلف بالعين منصابه

الشهوه ضربها الجفا وعواطفي مجانين
عا كل شلحة نظر عم اكتب كتابي
ما عاد تفرق معي بطيخ عا السكين
البيهم انو البدن عالهينه ينسم
تا ضل صبح ومسا اطلع من تيابي

موت العرب

شروقي
دخلك يا رب البشر شي ضلع تاني شيل
من صدر آدم تا نكشف اول بتاني
الاول بكفرو اغتنى بلكي بتاني جيل
منكتب عالوح الزمن لبنان "لبناني"

كلمن حبيب الوطن ببراعة التمثيل
وعند الحقيقه عبد كم قرش براني
القرآن قالو غلط وبيلحقو الانجيل
شعب اللي منو تقي مش شعب انساني

احمد "محمد" قتل ولياس دمو تقيل
كرمال اكلة حلو قوّس عا سرياني
"وهاني" عا خيو بطل لكن عا اسرائيل
قلو تا يعمل بطل بيصير مش هاني

"قايين" قالو التقى ودو ورا "هابيل"
تا يعود عهد المضى وتقوم الخيانه
مخلص ما بدنا وابي تا تضل قال وقيل
عا شفاف زيد وعمر نيران شعلانه

كلما التقينا بظرف تا نوضعو مقابيل
ظرف العطانا الم عم تنزل عيانه
صارو رجال الحكم للهدم والتعطيل
فضّو الخزينه ورجع يوم المخرباني

مش هيك بدنا شعب بدنا شعب بيميل
صوب المحبه الوطن بقلوبنا امانه
قالوا بكتاب الصلا موجود عزرائيل
وبالراس عنا التقى يا مرمر زماني

ايمتين موت العرب قال وربحنا جميل
الاسمو "تزار" وعطى انذار "قباني"
شعب العراق اندبح والكهربا قنديل
صارت عا ارضو وبحر اطفال جيعانه

صرنا بطق الحنك عم نسمع مواويل
ولا يوم الها انكتب تا تنسمى غناني
يا رب بدنا حدا من البير زير يشيل
نحنا بغربة قهر والصبر جمرو داب
ومنا سنين الفرج بتضل هربانه
 

وينك

شروقي

وينك يا رب السما يا خالق الانسان
بلبنان مات العدل والحبهم ماتو
بقلبو الخراب انتشر ردو متل ما كان
ورد العبير الهرب من درب نسماتو

بلبنان حلو بقا يتجسد الايمان
ولازم نهار الفرج تقرب مسافاتو
المشوار صوبو انعرف ريحة حلم هريان
تفسير اجمل حلم يا ربنا هاتو

الرجعه ما الها حدا صار الامل حفيان
وحضرة عذاب النفس قدّم تحياتو
مشتاق شم الهوا لشم الهوا بلبنان
ومشتاق كاس العرق تا يشوف مازاتو

يا رب حل العقد والحق عالطليان
بيجوز كبر العقل عا مفرق خواتو
كلما نظمنا الوعي عم نكسر الاوزان
الانسان حبّو انسلخ من مسطرة ذاتو

تخمين صار الهمس من لغة الطرشان
والحل لما انعزم ضاعت مهماتو
لبنان قلبو انقطع وتهدم البنيان
كرمال عين الدني لا تشلحو بالنار
"لو كان هوي الصلب ابنك عا خشباتو"

ربيــــع

وصول الربيع الكون بترابو انتظر
وفوق البساط الاخضر المشهد مشي
فله عليها معلقه شلحة نظر
وورده عا خيط العنكبوت معربشه

ولحنو ورياشو الطير عالنسمه نشر
ولهّمتو الفلاح ولف دردشه
ولابس نهار الجوع مشوار البشر
وايد الطريق بكل دعسه مكبشه

والشاعر العا كلمتو علامة خطر
عبّى البلاغه بقلبها وكب الحشي
وعا كل سحبه ملونه فكرو خطر
وقطـّف جمال من الظروف المدهشه

وعا كل تله السحر للمارق صفر
ولمح البصر وصّل خطوط مقطشه
ووصى البرد تا يحمل جواز السفر
ويقطع الو عا كل نسمه ملولشه

ونحنا بربيع العمر عبيّنا الضجر
بقلوبنا من كل نتوفة ما – شي
هجرنا طيور الارض وطيور الشجر
ومن يومها لليوم وخزات الضمير
بتبرم علينا والطبيعه مشوشه

يا عام جديد

انا للهم عم سوكر بريدي
تا اطلع راس ما بيطلع بإيدي
كلما تصرخ بيوت المعنى
بشرشف آخ عم غطي القصيده

بعدما كنت للافراح بنـّا
وحروفي تصف صفحات الجريده
الوجع بالراس للايام غنى
قوافي بكر ومقاطع جديده

بكل مجال رسمالي تدنى
ومع الاعياد ما بينقام عيدي
تا علي وكون شامخ ما تسنى
السنابل قابلو مناجل حصيده

يا ريت الحب مشروعي تبنى
تا اقطع رزقة الضربه الشديده
بدمع عواطفي الحاضر تحنى
وتركني واجه مشاكل عديده

يا عام جديد بعذابي تهنـّا
الحبايب عبدو دروب البعيده
تا قلبي يقطـّب جروحو تمنى
قبل ما الدم ينشف من وريدي

زميلك كان للاحزان جنـّى
جمعلك نخبة مساطر نهيدي
وتا حتى يحطّم وعودي تأنى
وعصرني بقبضة العصر الحديدي

يا عام جديد لا تنسى وطننا
احترق من كلمة خواجا ويا سيدي
ما بدنا يختلف احمد وحنا
وما بدنا تفرقة اديان بدنا
المحبه تعيش وتموت الحسيده

بشمزين

ضيعتي بلبنان مبنيه
عا مساكب زهور الربيعيه
طرقاتها عالعاطفه بتروح
مهما تجي هزّات ارضيه

قطف الخيال بجوها مسموح
وفصولها اخلاق مرضيه
فيها اليا اهلا عطرها بيفوح
وللمرحبا خلقه طبيعيه

تلقـّب صنوبرها البيمّد شلوح
شمسية الفكره الخياليه
ودرب السما عا حدودها مفتوح
بيقول من هون الألوهيه

وشلة بواب بيوتها عن نوح
بتحكي بلهجتها الخصوصيه
وعا غبرة شبابيكها البتلوح
بصمات ايام الفينيقيه

ان ما عطاها الشاعر من الروح
غنية البتقول هي هيي
منلـّبس الكلمه نغم مجروح
وحرف الهجا بسحبة لسان النار
بيخبز لها عالصاج غنيّه

الى روح المرحوم سليم يوسف

طاف الدمع تا يغـّسل الجرح الأليم
وقت اللي قالو ودع الشهم الكريم
وجايي تا قلو حبك بقلبي نما
كنت المحب وكل عمرك مستقيم

عرفناك شاطر كنت تفهم بالوما
واكبر شهاده جاب ماضيك القديم
عطيت الصراحه حقها وقدرك سما
قال المهاجر قبل ما يقول المقيم

المتلك سليم لشمخة الارز انتما
وولادك بلا شك متلك يا سليم
تحوّل علينا كنت وتفور الدما
ان شفت ستي صوتها منو رخيم

ستي قالتلي ابن اختي ما انسما
الا ابو الهمات اكتر من عظيم
وقالت سليم واخوتو بيحمو الحما
ساعة ما بدّي بيحضرو متل النسيم

عندك قرايب ناطرينك بالسما
والمرحبا عا باب جنات النعيم
لعند "السمّيه" روح الله يرحما
والكل هوني بيطلبو الرحمه الك
يا سليم وصاحب القلب السليم

قدام نعشك هون هلق بنحني
وبقول نؤمن قبل ما ارسم صليب
من ها الدني عم تنقل لتاني دني
بقدّم تعازي للغريب وللقريب