الصفحات

ننشر في هذا الموقع أشعار الشاعر الكبير عصام ملكي

وجع بال

عطشان بدّي ميّ قلت لميّ
فحّم زماني اليوم آخرتو
ووقت اللي قالت ميّ ما في ميّ
شلحت العطش عالارض وكسرتو

دغشو عيوني وغبّشو الأحلام
وعا باب قلبي واقفه الحرقه
وعين البصيره بغفلة الايام
نزلت عليها مويّة الزرقا

الايام منـّي بيهربو ومطلوب
لاقي لحياتي شويّة مطارح
اليوم انكتبلو ينتهي ومكتوب
لبكرا السفر عا اول مبارح

مني الوطن عم ينتظر مشوار
ومش بسّ فقري معلق بكوعي
معلق رجوعي برقبة الدولار
وعلـّق رجوعي برقبتو جوعي

بنكزه صبر ايوب ضبّ وراح
واللي بقي من العقل هو هني
اخضرّت همومي ويبست الافراح
وآخر انا عم هرّبو مني
 

حب قد الهم

غيرك يا ام عيون ما بدّي
لعندي تعي، سلامات لا تودّي
صباحك صباح الخير عندي صار
ويسعد مساكي عاملو مخدّه

كنا عراوي مبكـّله بزرار
وكان القطر عا شفافنا يندّي
ولما سوا وقفنا عا خط النار
لقينا التفاهم طعمتو حدّه

بوصفك تا اقدر كمل المشوار
بدّي حروف تساقب الردّه
تا كل كلمه تدوزن الأوتار
كلما الخيال بايدها يهدّي

جايي عبكرا اقطف الأزهار
بالرغم إني قلت ما بدّي
لا تشلحيني خلف باب الدار
بلبس غبار الأرض وبصدّي

حبّك تركني جن باستمرار
وكل اللي فيّي صار عن يدي
وتا تعرفي اكتر بها المضمار
لو ما لقيت الحب قدّ الهم
ما عرفت انو كبير هلقدّي

حبّ التركني

جنونك قصيده والقرايه خوات
واوفك عا كتف الآخ مشلوحه
وكلما خيالي يشكل الكلمات
عم تطلع الضمّات مفتوحه

رسمتك بريشه غمستها بالذات
ووقت اللي حبّك صار حزّوره
قلي ضميري  سفـّر اللهفات
ولا تزوج البرواز عالصوره

جابك لعندي خاتم اللبيك
ولما قلت لعواطفي جنـّو
قعدتي ولا كلمه وقتها من هيك
عصرت السكت تا طلعك منو

رح زتّ حالي بكعب آخر وين
وارتاح مني مشاكلي زادو
حب التركني مكتـّف الايدين
حاكم عبكرا عيد ميلادو

استأجرت ذاتي، ونقلت بكـّير
عاشقة اللي فرشتها أسامي
تا غطّ فيها بذكرياتي وطير
بحلم اللقا ما استطعم التفكير
وهرّو الصدف عن جسم إيامي

بدّي شي ورقه

طل الصباح من الغنج قومي
وقولي: لسان الحال ما ببلع
صاير درج وشويّ زلعومي
وفوق الدرج آهات عم تطلع

لمّا انضربت بقلة التدبير
تمّي انلوق عالداير شويّه
وطلق خيالي سحبة التفكير
وصار السكت يتفلسف عليّي
آخر قصيده بآخر الايام
والابجديه جنون حرقتها
وعم يركض الالهام بالاقلام
تا ينشّف من الحبر خلقتها

ما ضل عندي من المعنـّى بيوت
تعرضلك مساطر صفا نيّه
وميّت تا شوفك مع أنا وبموت
كلما ظروفك تجمعك فيّي

ما قدرت اكتب كلمتي من جديد
ورشّ الحلا فيها وحواليها
بدّي شي ورقه يكون إلها إيد
تقدر تهدّي البكتبو عليها

الحرف قال

الحبر صفق
والقرطاس يبتهل
والحرف قال
على الاوزان اتكل
فالشعر يدعو الى
ارساء قاعدة
فيها البحور
بشط الريق تتصل
تدعو الثقافة لاسترجاع
هيبتها
النثر صار صفات
الشعر ينتحل
والشرح يلهث والأقوال
مبهمة
وكل ملحمة بالذبح
تحتفل
اين الذين لهم
اصواتنا وصلت
بالوصل همزتهم لليوم
ما وصلو
الكفر زاد وصار
الهم قبعة
والشعر شعر على
الوجنات ينهدل

هيـــا

الليل هرّول
والاضواء تنبثق
والفجر صار
خيوط الشمس
يمتشق
والطير لحن
للانسام أغنية
والنحل قال
الى الازهار
انطلق
هيا لنجعل للاحزان خاتمة
واللانهاية بالافراح
نعتنق
الشوق يدفعنا في كل متجه
والصبر جمّر
والاحلام تحترق

الى روح الشاعر الدكتور عصام حداد

سافر على الجنه عصام حداد
 كانت حياتو كلها استشهاد
انجينا تا نحكي بمنطق العلمي
ولادو حروف بيسمعو الكلمه
غيرن ما عندو بالدني اولاد

قدّيش قلبو من الخلايق ساع
صرلو زمن بالآخ والاوجاع
يا (جبيل) شو بقدر الك احكي
وكيف بدها ضيعتو تبكي
ما ضل فيها دمع (عين كفاع)

عصام اصحابو الو احباب
بدمة حياتو كل شخص كتاب
"لسلوى" "ولسامي" "ولسمير" بقول
وعن كلمتي طول الوقت مسؤول
عصام عا عصام قلبو داب

الجنه قالتلو فتحت قلبي فوت
وانظم شعر تا نطَعّمو بلاهوت
عصام عدّيتو صديق وخي
بقلوب كل العارفينو حي
البيكون متلو مستحيل يموت

سميي عصام وصاحبي من زمان
راح وتركنا ودمعنا طوفان
ودمع الاهالي تقمص البنـّي
بقدّم تعازي لعيلتو منـّي
ولقرايبنو وللوطن لبنان

لقمة الرحمه

لقمه الرحمه وحق مار الياس
اجناس صارت عند ناس وناس
فيها الغني بيشوف حالو كتير
وفيها الفقير بيلحقو التعتير
وقت البيدفع كلفة القداس

بيقول بدنا حسابنا نصفـّي
صف الغني ما بحسبو صفي
منـّي اعرفو يا حباب يا اخوان
لقمة الرحمه شقفة القربان
ومعها صلا من القلب بيكفي

في ناس صحن الاكل بيكـّبو
منو اذا ما بيقدرو يغبّو
وواحد بيقول الصحن فاضي كان
وواحد بيقول معرّم ومليان
وواحد بيقول الاكل ما بحبو

الحاضر عا خط النار وقفني
وتا اشرح الموضوع كلفني
كانت العاده يقدمو الدمات
للي بيجو من ابعد مسافات
عا "دواب" حتى يحضرو الدفنه

واليوم بدهم تكبر القاعه
وبدهم اكل من احسن بضاعه
لازم لها العادات نعمل حِدّ
ها العصر منو عصر جِدّ الجِدّ
القاعد بعيد بيوصل بساعه