نحنا شعب للمعرفه كنّا
وفي ناس عما يطلعو منا
ما عاد فينا نحتمل يا ناس
عطينا الدني حب ووعي وإحساس
ومتل الخلق أصحاب ما عنا
مفروض انو نقول شو نحنا
من قبل ما نغيّر مطارحنا
بكرا بعدما يطلع التقرير
صفحه من التاريخ بدنا نصير
والأرض بتغير ملامحنا
شو صار معنا بالدني حكينا
من دون ما نذكر أسامينا
غفينا وعلينا ربنا سهران
نسينا تا منو نطلب الغفران
لكن قبل ما نموت ما نسينا
اشتاق الشمط لمناخ دينينا
ضعنا وما فينا حالنا لقينا
وبقول كلمه ام الها واب
معقول يترشح شي مره الرب
ويطلع عا بالو يبزق علينا
شفت مره يا عيني بعين دارا
عا شرفة بيت قدو قد حاره
سمرا ما لها بالكون تاني
فيها للحلا تفتح سفاره
عبكرا قلت رح اجمع كياني
ولجنه عا الارض اعمل زياره
ما زال الحب بسهامو رماني
وطلع عا البال موال الدواره
وانا بالحب مش عنتر وهاني
عليي نزلت دموع الحجاره
ولا مره قرش ربحني زماني
انا ربحت منيّه الخساره
قلت رح انقل على جو هاني
بهمه صافحت حسن الاداره
ولحن للهوى شوية غناني
والبس من وجوه المستعاره
ورحت بكير تا طيلق عناني
بحماها وشوف ميزان الحراره
ومعي خدتلها بطوفة حناني
عطر مسحوب من لهت العذارى
وبعدما الآخ سجّل اسطوانه
وحناني صار قاعد بالصداره
تركت الشوق يستفقد مكاني
تا اعرف وين صرت بها المساره
ولأنو الضعف محروق الديانه
لما وصلت حتى شن غاره
بلحظة واختها تخرسن لساني
اليا اهلا ومرحبا عا السكت راحو
وصباح الخير نقلت عا الاشاره
نحنا بعصر الما انعرف سرو
والعارفين بيرفضو يقرو
سنة الما فيها تحقق الاهداف
وفيها صباح الخير ما بينشاف
هزو الوقت تا فصولها يهرو
ساعة زمانو العقرب مطلق
ويوم الفرج عا الحيط متعلق
الاشهر عتيقه والخلنج بعيد
وكيف بدنا نشوف عام جديد
بايام منعازي قبل هلق
بدنا دني ما نبوس ايديها
واحوال ما نبرم حواليها
وبدنا سما ما يكون فيها غيوم
والها درج تا نطلع عليها
وبدنا حياة بحبها نعلق
وحكم الجمال يكون مش مطلق
وبدنا تحت ما يكون عندو فوق
وان كان هيدا صار قلة ذوق
بدنا بقلة ذوقنا نخلق
"قلت لانا" رح اسالك قبلك
كفتا عا عقلك ما انزرع حقلك
"قلي انا" بالطقس مش مغروم
مويي قلبت من هون مش رح قوم
بتكوي الحراره والهوا مجعلك
قاعد بقربي وغربتي موفر
وعني ما عاد الهم يتسفر
بالرغم انو العطر هاج وماج
مش عم بلاقي بالنسيم علاج
عم ضل اتنشق هوا اصفر
حدي حجر عا مطرحو مشفتر
بدون التفاته بس مش اكتر
للاهتمام بيبعت مراسيل
وعندو وجه منقوش بالازميل
بيبصر بنام الزيت والزعتر
نحنا بسنه من شرها احتاطو
فيها خريف مسوكر عياطو
ويا حيف عا فصل الشتي يا حيف
باعت ربيع على العصا والصيف
مش جايب مواسم تحت باطو
بدي سكوتي من الفكر اقلع
وغني نشاز وغيّر المطلع
هونيك قاعد بس فكري هون
محتار شو بزرع بقلب الكون
غير الخوات اليوم ما بيطلع
الفرحه العملنا لها حسابات يا إخوان
بكانون قالت من التأجيل هربانه
الكاسات إلها ارفعو هيدا عرس لبنان
ممنوع يبقى الخمر قاعد بالقناني
"الغانم" حبيب الشعب ومهم ها الانسان
بهالحفل كيف السكت بيكون نسّاني
قنصل محامي وبطل عنا عظيم الشان
لو انكليزي انجبل بيضل لبناني
"وست البهيه" لها بالدكتره نيشان
وللشعر دعمه ولها بقلوبنا مكانه
الشعّار غنّو لها الأشكال والألوان
واليوم بدو الغنا يكون "بإسم تاني"
وحتى لباس الحرف ما يكون كيف ما كان
وخلي كلام الحلو يمرق على لساني
سحبت الحروف بعجل وجهين بالأوزان
وإلهم بدق القلب عم قدّم تهاني
منها قليله يخسرك لبنان
بعد الأبانا ونؤمن وآمين
لكل اللي قالوا ابن تنورين
قلتلهم انك من الديمان
ما كنت تفرق دين عن دينك
وانك عظيم بتشهد سنينك
لعند الخلقها رح تروح الروح
ومن بالنا ما فيك انت تروح
هنيال هللي بيعرفك مينك
تذكرت لما كنت متخلّق
وصبرك بيوم زيارتي معلّق
وفيك اتصلت بهاتف النقال
وبكرا قلت عا الضُّهر رح أوصال
بلمح البصر جاوبتني بالحال
بدي عبكرا اعملو هلق
لا شك كنت على القلوب تفوت
وللأبجديه كان شعرك قوت
معلوم منو عالمك مجهول
بقدم تعازي لعيلتك وبقول
بيضل ذكرك حي ما بيموت
**
ومن غريب الصدف أن الشاعر المرحوم ألبير حرب قد أخبر صديقه عصام ملكي عن تعبه من هذه الدنيا، وانه بشوق لرؤية الحياة في دنيا الآخرة، فجسد تلك القصة بهذه الأبيات:
.. وانت اللي مره قلت: يا لطيف
العيشه تعب لحق لها مصاريف
من ها الدني شفت اللي بدي شوف
تاني دني.. حابب تا اعرف كيف
**
لمــــــا حيــــاتــــي غيَّــــرت لـــونــــي
قلــــت لأنــــــا هـــا الكـــــون مـــش كوني
ولمــــا قمــــت تــــــا ودع الافــــــــراح
عليــــي مـــــرق لحظــــه زمـــان الراح
وقلــــي عبكــــرا نــاقـــــل لهــــونـــــي
ولمـــــا قلـــــت رح حقــــق الغــــايـــه
نمــــت وقمـــــت عا نهـــــار تــوصايـــه
بحيــــث المضــــى قلـلــــي انــا ويـــاك
طليــــت عـــا الدنيـــــا مــــن الشبــــاك
تــــا شــــوف كنـــو عـــا الـــدرب جايي
وقلـــت المضــــى رح رجُّعــــو كلــُّــو
ولغــــز الظــــروف المـــزعجـــه حلـُّــو
ومنشـــــان مـــا خلــــي عليـــي غبار
فـــرشــــت الـــرصيف بــاجمـــل الازهار
وولفـــــت رده تـــا هــــلا قلـُّـــــــو
ولمــــا اجــــا دغــــري عـــرفت انــــو
عليــــي سنينـــــي بلـَّشـــــو يحنـــــو
وصارت الفـــرحــــه تهـــــز عــا الميلين
ولمــــا عرفــــــت انــــــو وراهــا الديـــن
ولفـَّـــت حــــالــــي للهـــــرب منـــــــــو
حــــنــــه بحجـــــم الــــكــــون دمـــتهــــا
وصــــــارت بـــلـــــون الــــزفـــت سمعتها
فـــــوق الارض عــــا شكلهــــا ما لقيــــت
عـــا نهــــار أخــــدت وجبتــــي وضلـــيــت
نــــاطــــر شهـــــر تـــا عــــاد ردتهــــــا
كلمــــا التقينـــــا بتــــوقــــع الخلفـــــه
وبـــلمهـــــا بــــظــــروف مختلـــــفــــــه
تــــا تصيـــــر متــــل النـــاس مــا بتصيــر
ان جيـــــت عيـــــرا اهتمــــــام كبيـــــــر
وحــــــق الـــســـمـــا بتــــرجعــــو نتفـــه
مـــــا شـــفـــــت مـــــره جـــوهـــا هـــادي
ومــــا فـــــي امـــــل تـــا تتغيـــــر العاده
بــــالـــرغـــــم انـــــو الأخــــد ما لو حــدود
عقلــــــي مــــا فيهـــــا اخـــدتـــو مــوجود
بـــــراس الانـــــف مــــن يـــوم الــولاده
لازم مــــرضهـــــا ينعـــــــرف حـــــــدو
صــــارو عليــــــي شلــــوحهـــــا يمـــــدو
بيضــــــل بــــدهـــــا غــــراض دايـــم دوم
بخـــــاف السمـــــع لا عيرهـــا شـــي يوم
ومـــــا يعــــــود فيهــــا تقـــــدر تــــردو
هلــــي كنــــت كـــرِّم بـــالبـــدايــــه
وكنـــــت عـــــا بيتهــــــا رايـــــح وجايــــي
وكنـــــت عيطلهـــــا الســــــــت الـرزينــــه
ومعهـــــا بالهـــــوى ينســِّـــم هـــوايـــــي
وهلـــــق بعــــدمــــا صــــارت بدينــــــه
عـــا بالـــــي عــَّـــن اشلحهــــــا ورايــــي
وصـــــار الــــوجــــه يشبــــه صحــن صيني
وصـــــارت تستحــــــي منـــهـــا المـــرايـــه
ولأنــــــو صـــــارت الــــرقبـــــه تخيــــنــه
عليهـــــا صـــــرت امـــــرق مـــن عدايـــي
والهــــا قـــلــــت مــــش عـــــم تعجبينــــــي
صــــرتــــي بـــالــــدنـــي مصــــدر بلايـــي
مـــا بــــدِّي كـــل ساعــــه تـــلحقـــينـــــي
لـــهـــــون وهـــــون حــلـِّــي عـــن سمايي
ودخيــــل الـــــرب عــــا دينــــي اتركيني
وبعــــدمـــــا بــــوزهــــا ســـديـــت صــارت
بقلــــب المـــجتمــــع تــحكـــي بقفــــايــــي
يا حاتم على شموخك بهنيك
مين الما حقّك بالدني عاطيك
سنتين صرلي متابعك سنتين
اسمحلي تا قلك للفصاحه ديك
وين متلك رح نلاقي وين
بشعر الفصيح معمر مداميك
وعا نثرك الممتاز يخزي العين
رب الشعر والنثر منسميك
انشالله عليك بيمرقو العيدين
وراحة فكر عا حدودها تدليك
لأجل الدراسه مش ها الكتابين
هديه إلك راحو تا حتى تشوف
إنو عصام كتير معجب فيك
يا بيار هدهد سكر.. حبايب
عندك كتير.. وسكرك دايب
رابح إلك عمك عصام جميل
من كتر منك شاطر وشغّيل
بيطلع بإيدك تعمل عجايب
بسحب أنا الأصحاب عا الكركه
مع اربعه وخمسه عملت عركه
وإسمك إنت بالمجتمع بخور
العيله اللي عندك صيتها مشهور
مليون مره يطرح البركه
هلي بيضلو يربعو نواقيس
سحبة لسانن بالشبر لا تقيس
صعبه تا يعطو للوضع حله
منهم شو بدك تنتظر قلي
ما زال هني ولاد عم بليس
ما بيطلعو عندي فرق عمله
وصارو عا ضهرك بالدني حمله
ما بقول الهم غير عيب الشوم
ويا بيار يا هدهد الف معلوم
بشري إلك بتقول تسلملي
عليك البشر يا بيار بيدلو
هللي عا شكلك بالدني قلو
بقلك ابن خيي على التأكيد
قاعد بملبورن من زمان بعيد
وانتي بسدني آخد محلو
