انا هربان من وخزة ضميري
وما بعرف وين بيصفّي مصيري
طلعت بالارض رعيوني المواشي
قبل ما الجو يعرف زمهريري
عبكرا يمكن بساعة حلاشي
قلك شبقي جناحك وطيري
وغطّي عا الهدا بسحبة حواشي
يا انو بتشتري يا بتستعيري
يا دلّي كنت منهل صرت ما شي
وعجيني ودّع بلاد الخميره
ولأنو زاد فيي انكماشي
تركت الصبر بتيابو القصيره
الطفر عندي الو شهرين ماشي
وخيالي تفشكل وواقع بحيره
وما بعرف وين رح لاقي معاشي
اذا ما بينفتحلي باب سيره
عا حالي من الضحك عم ضل غاشي
المشاكل بالعمر صارت كبيره
لحافي بايعو وبايع فراشي
وتا اقدر نام عا ذوقي دقيقه
منعت القط يقعد عا الحصيره
