نحنا بسنه مش يسلمو ديها
لافي البرد مع عيلتو عليها
لعندي بيفوت وما معو مفتاح
الكرسي العليها بقعد وبرتاح
لبستها كلسات بجريها
من هل المصيبه ما الي مهرب
قلت لأنا رح ضل اتكهرب
ما بريد اقعد عا السكت ما بريد
بالكون قدي ما حدا برّيد
عن ضل اغلي مي تا اشرب
صاير كلامي بالفعل مبهم
وما ضل عندي من الصبر درهم
ومش بس ضهري من شهر مبروق
تمي لأنو من البرد ملووق
ان جيت احكي ما حدا بيفهم
مني انا من بعد ها الوقعه
صارو همومي بدمتي شقعه
وصرت البرد عن احسبو بزاق
لما لقيتو بيزحف على رواق
قلت ليولاندا كنسي الصقعه
**
من بعد غيبه رجعت عا بلادي
قطّف جمال وصرّ زوّاده
ومن ساعة الفيها زماني لقيت
بطوفة دموعي شطفت ارض البيت
المن بعد الله بعبدو عباده
وستّي الحنونه الكنت عا ديها
اتمرجح وابرم حواليها
صارت يا ولدي من الحكي تفزع
وما عاد فيها خلقتي تقشع
ضاع النظر بخراج عينيها
والشجرة اللي تحتها تدرّى
جيل الفلاني جسمها تعرّى
كبّوت بدها وما التقى كبّوت
وبإجرها ما في ارض بتفوت
الابهام نصّو طالع لبرّا
ودرب الأنا عبّدتها شويه
وشكرت فيها قلبت عليي
ما عرفِت تقللي الزياره عيد
بالرغم اني من زمان بعيد
علّمتها بدعسات اجريي
رح جن بدي نام وكوام القلق
وسودا الدني والحظ عا الزيرو حلق
وكلما بقلبي ثّبت وجودو الحنان
بوهم التلاقي بلبّس ظروفي حلق
عا الكون جيت وما اجا لعندي الامان
وظلم القدر عا القهقره فيي انطلق
ومني طلب تا كون مقطوش اللسان
كلما عليي وجّه وجودي طلق
ليي بحالي ما بقا عندي مكان
وباب التفاهم بينك وبيني انغلق
وصار الكلام الجوهري بلا ترجمان
وشهد المحبه صرت عم شوفو عَـلـَـق
كاس الفضي بالايد عم يبصر ملان
وهلي ما عندو عيون عا الوضع اشتلق
لا تاج ليي تفصّل ولا صولجان
هيكي انكتبلي كون سبحان الخلق
مش بس انو ضاغط عليي الزمان
ومش بس خدّي بدمعة عيوني انسلق
ومش بس هاجر من حياتي العنفوان
جوعي لكي يا ظالمه الله الوكيل
عا كل سفرة اخ عم ياكل فلق
عيونك ما بقو يا هند هنّي
عِنّي قد ما بدّك تعِنّي
ضجيجك ما التزم خط السكينه
وعا كعبو فرّخت أنّه عا أنّه
ما فيكي عا دروبي ترافقيني
اذا ما كان عا بالك تجنّي
انا خلقان بالجمعه الحزينه
وعذابي عاملو للوجه حِنّه
هلاكي رقبتو صارت تخينه
وزغر العقل رافق كبر سني
ومشو الاخات عا دعسة سنيني
وما عاد الابتسام يشوف سني
اعرفي ما بقيت استعمل حنيني
لأنو الضعف بلش يمتحني
وما بقدر قول ريتك تقبريني
عا وجه الارض مش معروف إني
بصراحه بلا دوا صرت اتركيني
وبلا اهداف عم بيّن كإنّي
الي شهرين ضايع صدّقيني
لو ما يبقبش عليي زماني
ما كنت عرفت إني طلعت مِني
قالت ضروري قهرنا نطمّو
والاهتمام لشوقنا نضمّو
صوبي تعا وجبلي معك دبّار
لشهوة جسد عم ياكلو همّو
قلتلها الاشواق عندي غمار
صرلي زمان البعد عم ذمو
لا تزكزكيني بالحياة بغار
البيزكزكو اوقات بيسمّو
وقلتلها شعلان قلبي بنار
وصار الفرح دبلان عا امو
وبتعرفي اني باستمرار
لبيوقع على الارض ما بلمّو
شو صار فينا بالدني شو صار
كان الزمان يقول منهمّو
وكنا بروض المعرفه ازهار
والمارقين نقللهم شمّو
عشنا سنين طقوسها بلا غيار
وزدنا الصلا تا وعودنا يتمّو
من هيك قالو بنشرة الاخبار
انو كلامي تجسّد الاخات
من ساعة الجرحي فتح تمو
البنت اللي نقلت حالها لحيي
لشلحة نظرها بقول يا بيي
فلتة زمنها وجوها غناني
وجسمي بلقاها بيقلب مويي
حبيتها وعدّيتها ديانه
وقلتلها عا الاعظم تهيي
ما شفتها ولا يوم زعلانه
برد وسلام بتمرق عليي
ست الحلا وبجوها الهاني
بضيِّع انا بعجقة حواليي
هيدي فلانه بنت الفلانه
اللي بقلها بعواطفي تفيي
يمكن اجت عا الارض منشاني
تفاحها بيبعد عن الحيه
بالذوق الها ما التقى تاني
ومتل القمر عا قول عينيي
لابس خواتم شعرها وحاني
عا كتافها شويّه ورا شويّه
وصاير بطولو يحاشر لساني
وفاتح جسدها مدرسة شهوات
علّمت فيها كفوف ايديي
انا انسان عندي جرح دامي
بسكوت الناس ما بطعّم كلامي
وما بقدر بالحكي انسان اجرح
وبمال الكون ما ببيع الكرامه
بعد ما كنت عم اضرب واطرح
عليي تكرّم الصفر بعلامه
ما بترك للزعل بالقلب مطرح
اذا من النوم بتقوم القيامه
انا للموهبه عمّرت مسرح
وبوجه الحرف عم خرطش قلامي
ولأني من الصراحه كنت اصرح
عقصني عقرب بساعة دوامي
عن اللي كان من يومين بشرح
لأنو صار ناصح اهتمامي
الاماني شاعله والشوق مبرح
وبريد الحظ ما وصّل سلامي
ورغم ما بشوفتك عا طول بفرح
بعدما نشّفت خلقة مدامي
لعندك ما قدرت بالليل اسرح
بحالي من السكر ضيّعت حالي
وطريق البيت هربت من امامي
الصمت عا الشعر عم يقلب شفافو
وعا موقف صار يجمع ائتلافو
وانا عم ساير بيوت المعنى
بليله جابت لفكري جفافو
المعاني قابلوني بحِّل عَنـَّـا
لأنو عا حياة اللحن خافو
ولأنو المستوى الشعري تدنى
ومعي ما بينلقط بالاوف زافو
ما حوّل عا السمع شعر المغنى
الوزن مع قافيه قايم خلافو
رغم ما قلت اني بستمنى
الوحي عا كلمتي يعلن زفافو
وجودو الحرف ما عاود تبنّى
بوجه المرحله بيّن نشافو
وتا حتى يكون ناجح ما تسنّى
قبل ما يجنّد الهمه الكبيره
باول تجربه قشطت كتافو
يا صارفه عمرك لا تنسي العمر دين
كبي الحيا وطعمي سكوتك كلمتين
بقلك انا وبعيد ما بحب النوى
كلما اجاني ظرف تا شم الهوى
بسمع بوقت الملتقى صفر اليدين
اليوم الخبر ماشي بجنازة مبتدا
ومش بس اني صرت صوت بلا صدى
صارت حياتي بين دين الزمهرير
ولما دعاني موقفي لوخزة ضمير
مرقت على حالي وما قدرت لاقي حدا
يمكن بنص الليل ما بيحضر ختن
اخر زمن عا الارض ما منعرف لمن
معروف حلمك بالدني وحلمي سراب
وما زال بدنا لاصلنا نرجع تراب
منها بعيده تنزرع فينا الفتن
سجّلت قلبي بدون ما اعرف لكي
وهلق لحالي من وجودي بشتكي
وحياتك على المسك لما العطف مات
علّقت رسمك فوق حيط الذكريات
ورايح من الآخات علّقت البكي
قاعد ما بين الشمس والفيّه
وبعد النظر جوّات عينيي
ومش بس عندي زاد حب الذات
بقيّد عا ذوقي عا الورق كلمات
وما في ورق بيقيّد عليي
ولما التقى بتفسيرتو حلمي
قلت لحياتي تفضلي استلمي
بس اللي الها ناعمه بينقال
مرقت تا حتى تقول كيف الحال
ووقفت عا راس لسانها الكلمه
وهلي عليي كانت خياطه
حبت الي تا تصير خياطه
ولما عرفت معها التفاهم مات
ما قدرت صرّف ضحكتي ببسمات
كان الوقت مش حامل فراطه
وبسمه لأنو ما التقى لسنّي
وما بيحمل مشاكل كبر سني
ومن حيث انو خاطري مجروح
هلق انا طالع عا بالي روح
عا بلاد ما فيها حدا مني
يا قابضه شلحات عينيي
لا تصرفيني روّجي ليي
عذابي لانو بالحياة شريك
ضيعت حالي بآخر الهونيك
وصرلي شهر عم ابرم عليي
جيبي شي همه وجودها سارح
تا نعمل مشاوير عا مبارح
ودغري صفوف المرحبا عيدي
راح التفاهم عا دني بعيده
وما ضل الا المنطق الجارح
ما بقيت اقدر قلك بحلمي
مني عا وزن وقافيه استلمي
شو بعمل بحاله ما الها لسان
الالهام عنكش والحرف هربان
وبيت المعنّى ناقصو كلمه
راسي تا حتى يروق بيهمّو
بالرغم انو ما فتح تمّو
عندي من الاخات مجموعه
وبينك وبيني الدرب مقطوعه
والملتقى دبلان عا امّو
مبارح بنص الليل مشواري انقدح
عا بيت هلي جوّها بشعري انمدح
ومن بعد جلسه خيّم عليها الرواق
قلتلها للخمر زاد الاشتياق
جيبي القناني وفسّري بنام القدح
ريقي قالتلي ابن معصور العنب
ان ما قمت بالواجب بتعمل ذنب
احسن ما يوقع بينك وبيني خلاف
يلله تعا تا نفسر بنام الشفاف
وخلي القناني والقداح على جنب
بهالسن قلت الحب منو منتظر
عا صرختو التفكير عم يعمل حظر
مني انا وما بقيت خرج بها الزمان
يا تقبريني راح كل العنفوان
وبالمختصر عندي الفواكه بالنظر
قالت الي شو باك عم تغلي حصى
وعندك مواقف بالغزل ما بتنحصى
قلتلها من دون كان ودون مان
ان كان بدك اوصل عليك بامان
جيبي المقوّى ودبريلي كم عصا
يا دعد بدي يوم عا قياسي
تا البسو واقلع وجع راسي
واجمع براحة فكر شغل البال
وشيلك نبيد وادلق بكاسي
فوق الورق عندي قلم خيال
عزمو النصر تا ينصب قواسي
عا السكت ما بيقعد بدون قتال
وبالضغط مابيقعد عا الكراسي
ومن كتر ضعفو صار صبري خيال
وصاير وجودو بها الدني ناسي
وتا اسألو كيفك بها الاحوال
قطعت العرق ووصلت انفاسي
حابب بوصفك اخد استقلال
ومرق جمال اللون عا حماسي
وزوّج دني الافعال عا الاقوال
وابعت عا غير بلاد وسواسي
صرتي على شفاف الهوى موال
وعا شط ريقك مركبي راسي
ومن حيث انو طعمتك اشكال
شفافك بيقولو بساعة الشهوات
ما بتقبلي عا الخد تنباسي
يا حضرة المستأجره بالي
واقف معي تصريف اعمالي
مش عم بكيل فول بالمكيول
رايح انا من هون عا المجهول
بهمة كولومبوس اكتشف حالي
نحنا بدني من ولاد الحكايه
فيها النهايه اسمها بدايه
وايامها بالقلب صارو قوام
مبارح اجا مأخر خمس تيام
والحد يوم الاربعا جايي
وقلتلها عا ذمة الخمره
بغنيلك حروف الهجا زمره
ولما بجسدها تفسّد التدليك
ضحكت بوجهي وقال اهلا فيك
وكانت الضحكه ملوته حمره
وبنفس خضره قرّبت ليها
وشفت الجمال مفصّل عليها
ومن بعد موال الهمس واللمس
عا شط ريقي تشلقحت بالشمس
وبحر الشعر موّج حواليها
لما لعندي بعد غيبه جيت
مسحت الضحك عن شفتي وبكيت
ولما العذاب تكوم قبالي
ولقيت ما بيوقف شغل بالي
سلمت حاله مزعجه لحالي
وشلت الصدى من صرختي ومشيت
ولما وجودي هرهرو كروزو
عليي اللي سقطو بلشو يفوزو
من هيك لما شفت جيل جديد
حبيت اعمل للتلاقي عيد
ومنشان تا يحكي سلام الايد
عطيتو لسان الحال تا يعوزو
مَنـِّـي عا ذوقي بالفعل مَنـِّـي
حتى وجودي مع انا هنـِّـي
العينين عم غمض عا قوم وقوم
وبقول كلما يصح عندي النوم
يا ناس قولو وين صرت اليوم
عنـُّـو شي عنـِّـه واسألو عنـِّـي
قديش بدِّي عا الارض هدّي
شدّة حياتي صايره مدّه
من هيك لما تعرفت عا الذات
لحالي قلت من بعد خود وهات
علوّاه لو كل الدني مرايات
تا شوف حالي وين ما بدي
يا هند مَنّو جونـَّـا بريمو
الواقع ما فيي من الارض قيمو
بدِّي رضا ما بريد استنكار
منو بايدي حارب الاقدار
خشمي انكسر وبعيد تلحيمو
من زمان قلت الكون مش كوني
هونيك عم يطلع معي هوني
وما بقيت اعرف كيف لوني كان
شلحة عيونك صايره من دهان
لما التقينا غيرّت لوني
منها بعيده عواطفي يجنو
وبالمختصر رح خبرك انو
حلمي بيقظة اهتمامي مات
وبعدو زماني داعس فرامات
الديّوس ما بيبعت حدا منو
يمكن وجودي الختيره نادم
خايف انا بالذات اتصادم
بدِّي شي فرصه مزوَّده باحساس
وبدِّي نهار يكون متل الناس
تا صير عيّطلو بني ادم
يا عايشه بالفكر عا حسابي
لما مرقت عا الحي بغيابي
عرفت الطقس ما عاد اسمو برود
وانو الطفر مستأجر جيابي
راح الهنا وصار الفرح محدود
الضحكه بمرض آخات منصابه
وراحو اللي كانو يعملولي وجود
ومن يومها عايش عا اعصابي
ضيعت حالي صاير بلا حدود
ولابس حضوري خلقة غيابي
وكلما شربت من خمرة العنقود
بصحرا حياتي بصير اعرابي
رح جن ما بقدر عا حالي عود
وعند المشي عم يطعجو ركابي
قاعد عا منبر خردق وبارود
وعا راس دنبو واقف خطابي
يا تقبريني صرت متل العود
قولي لا تنسي لكل احبابي
اني عا كعب الكاينه موجود
بيجوز ارجع فرّخ من جديد
ان جاني وقت اطلع من تيابي
حظي انطعج! بالنفخ جلّستو
ولما برم بالقلب نفّستو
كان على ضهرو جايب الأنّه
وكيف المدح بيكون درّستو
ما بقيت اعرض عا حدا فني
مبارح تياب الحزن لبّستو
وصارت العنه تلحق العنه
وكاسي تا فاضي يضل حمّستو
وهلق انا منـِّـي متل منـِّـي
راسي من التفكير كنّستو
بتضل تبرم بوزها حنه
ومعها انا «الايّون» مرستو
جربت غنـِّـي قال لا تغني
بالرغم اني الصوت نوّستو
وما قدرت احكي بالشعر عنـِّـي
قالت تا حتى اقعد على السكت
ولما قعدت عا السكت فطّستو
لا تسأليني عن انا بظني
عندي جلاده خبرك اني
مبارح قلت للحظ وينك ليك
ان كان بدو الوضع يبقى هيك
بها الهون ما بخلي حدا مني
خلقت بسنه ويلاتها دسمه
ولما عطوني شهرتي واسمي
مشيت وورايي صرت جر سنين
ووقت اللي صارو اربعه وسبعين
بلّش يغيّر موضتو جسمي
بنص الدرب ضيعت احلامي
ووقفت عقارب ساعة دوامي
وما ضل عندي للكلام حروف
وقدّيش بدي من حياتي شوف
صارت ورا والموت قدامي
قياس الدني يا نور عينيي
ما بيطلع عليكي ولا عليي
فيها بعدما نصير لحم ودم
منعود نرجع بالارض ننطم
حتى علينا يدعسو يا عم
"هلي بيجو" ويطيرّو مويه
علق عا صدري الفقر نيشانو
وصارت قميصي من خبر كانو
وطقمي الو بخاويش تحت الباط
ومش خرج دعسه ناقصه الصباط
بوجه المشي عم يسحب لسانو
تمي العرق من شهر ما ناغش
وكلما ليتر عم اشتري بنغش
المن شهر جبتن نصّهم مورتين
بكاسين رحت اليوم الله يعين
ومن فرد بّه تشنكح البرغش
ما قدرت شن على الدني غاره
واعمل لحالي نتفة زياره
بيوم الولاده منلقط عا الياك
والحظ ما قلي انا وياّك
بطلب دشش وبجيب دوباره
لما قلت هاتو فرج هاتو
صار الزعل يمغط مسافاتو
شهرين صرلي مودّع الافراح
واليوم عقلي عا التقاعد راح
حاطط محلو بربح اللوتو
انا سكران مع اخر زماني
وبدمة كاس صالب دملجانه
اللي كان بقلبها ما ضل منو
وسكوت فراغها بيقول انو
قبل ما تشوفني كانت ملانه
تا هوني ضل قاعد مستمنى
الفرح قنطار ووجودي تهنا
صرت عم نام ببيوت المعنى
وعا وزن وقافيه دحرج لساني
وبجنه من بعد ما عرفت اني
صارت تمرق البسمه عا سني
واجا بلبل عا شجره حد مني
وطرش عا وراقها سحبة غناني
واجت عا البال افكار الصبيه
وصارت تفرش مسافات فيي
وكلما تمرق النسمه الطريه
عا عود اليابس تقسم هواني
انا عم قول شرب المي منكر
ضروري يعرفو «انثى ومذكر»
وين ما كون بدي ضل اسكر
وعمّر بيت بفراغ القناني
يا كاسره رقبة مواعيدي
نطرتك انا وشو بعد بتريدي
وبالرايح شويه عا خط النار
تشلقح عا طلعة اخ تنهيدي
شو صار تا رجعتي لورا شو صار
لقدام دخلك فشختك عيدي
مش رح بتطلع ريحة الاخبار
عا القلقله بسحب بواريدي
جربت غنيكي باستمرار
بسقف الحنك ما لقيت قرميده
ولما طلعت عا منبر الاشعار
ودّى السكت للأوف رديده
حاجي بقا تحطي بطريقي حجار
ونقص الوقع بيناتنا تزيدي
نزهه السعاده والعمر مشوار
وعا ها البنا مشيت تقاليدي
من تحت راسك من انا عم غار
قعدتي بقلبي وبعدك بعيده
بالغنج ضلي مثّلي ادوار
ومن جهتي عاالسكت بدي ضل
ناطر تا افلت يوم من ايدي
غابت وعودي وطل سرسابي
وصارت حياتي بعين منصابه
وما ضل عندي للمشي اجرين
بدمة انا عايش عا اعصابي
رح فل من حالي عا مدري لوين
كل الوجع والهم بسبابي
صفيت عم طوطح على الميلين
وبلش يفت على الهدا ترابي
يومين بدي من الدني يومين
فيهم تا حتى روح عا حسابي
راسي انطَوَش من جيل بو ضرسين
البيسابق الغزلان عا الدابه
صاير حجر ما بين شاقوفين
وتجنّس الافلاس بجيابي
وصارت حياتي كلها بالدين
ما بقيت اقدر كون هون وهون
حضوري فضي واستأجرو غيابي
يا احباب الزجل ومناصرينو
انا مني اللي انتو حاسبينو
انا عم نشّف دموع القناني
تا خلّي الجرح يهرب من أنينو
حياتي بالوجع صارت ملانه
ومع التنباك عمري مسوكرينو
وطقمي ختير بقلب الخزانه
الهوا ما شم من اول سنينو
اتركوني للفشل وجّه اهانه
قبل ما العمر يخلص بانزينو
سألت عني الرعيل الاولاني
لأني ها الأنا ما عرفت مينو
وسألت ملايكة الله العطاني
المحبه وخصني بعطفو وحنينو
كفتا وليش تا عقرب كياني
بساعات الوجود مقدمينو
ما بدي يروح مني عنفواني
تا حتى موقفي يقرِّص عجينو
انا بيجوز مش هوني مكاني
ضروري الناس ما يخبّو عليي
اذا كانو زماني شايفينو
عطل سيارتي ودّا سلامو
لمصلّح تا يجي بساعة دوامو
ويعطي سعر ويقدّم شروحو
عن دواليبها العا الضغط نامو
عا نتفه سقفها بتطير روحو
عا درجة قُلب عم يطلع قوامو
والفيتاس ما حقّق طموحو
عا درب البيت طلّق التزامو
وبقايا اللون صارو عم ينوحو
وعليها فقرها تارك علامو
ودركسيونها اعلن نزوحو
ومكان الزيت ما بيخلص صيامو
وصدي موتارها نزفت جروحو
وطلع سجادها واطي مقامو
ومقاعد للتقاعد عم يروحو
وما فيها بلغة المفتاح تمشي
ولها موتار واقف عا كلامو
بالشوب كانو حمر خديها
وعم يدبكو عا الصدر نهديها
قلتلها تنعاد ها الاعياد
وصوتي وصل لخراج دينيها
ودار المشي وكانو الظروف ولاد
ومن بعدما كبرو على ديها
صار الحكي يفبرك حروف جداد
ويعمل موسيقى دعس اجريها
وعا المرج رحنا بدون استعداد
والنبع وصلت شفّتو ليها
عا وتار ميي دوزن الاعواد
وطرطش لحن حولي وحواليها
قالت بحوش تين عا الميلاد
لراس السنه وشمرت عا زنديها
وصارت تنط وتكمش الاعماد
وفستانها يشمّر عا فخذيها
قلتلها الاخات صرّو زاد
وما تحركو بصابيص عينيها
ولما الضحك معها عيارو زاد
فرقع جنوني عا السريع وصرت
كيل هموم وادلق عليها
لهلي طيرت عقلي وصوابو
زماني جرّب يرجّع شبابو
قالت اسمها بالليل ماري
وعيوني لشلحة عيونا استجابو
وعا حفلة رقص رحنا وكان ساري
التفاهم والحكي شرّع بوابو
وعا بيتا مرقت تا اجمع غماري
وسؤالي بالهوى ياخد جوابو
ولأنو الحب طلّعلي قراري
تا خلّي القلب يخلص من عذابو
قلت تشلقحي لهالانجباري
قبل ما الشوق يعلن انقلابو
الوجبه قلعت وشعر العياري
وبعد ما جسمها ودّع تيابو
برغت ايد طابعها بزاري
وادن حروفها من الدقر دابو
وشلحت بعد بحثي واختباري
صدر جفصين مش لابس حجابو
والها قلت تا يكمل نهاري
ما زال الشلح داير تقبريني
اشلحيلي شي غرض بضرب حسابو
انا بالآخ والآخ بشهيقو
لجروحي قال عا الاوضاع فيقو
راحة بال حظي ما عطاني
وما عندي ظرف يعجنلي دقيقو
عا مدري لوين عم ينقل زماني
وإلي مش تارك مواقف يليقو
عا كبر الهم بتقبّل تهاني
الوجع بالراس حاسبني صديقو
طعمت الوزن زهري وبردقاني
تا خلّي اللون يبعد عن عتيقو
واذا بدحرج كلامي عن لساني
عا منبر شعر بيزلغط عقيقو
ضروري الشعر يبقى عنفواني
وضروري عا العرق يدلق بريقو
انا فضّيت بال الدملجانه
تا بالي يشتغل عا بل ريقو
لما جيت اعمل مهرجاني
ورجّع للحرف لونو وبريقو
وقف بالفكر موال الغناني
وعا قول الاوف مش معقول يمشي
تا حتى السكت يبعد من طريقو
لعندي ما بدي ملوّن يعدّي
عايش عا ذوقي متل ما بدّي
عني ابعدو الاشكال والاجناس
الشفتو من الاصحاب بيقدّي
من حيث انو صاير بلا قياس
كذب البشر والفاصله مدّه
بحقل الشعر رح اقطع الانفاس
جاني وجع عا الراس من ردّه
لحالي قلت ممنوع احمل كاس
وساير حدا بالمنطق الجدّي
منشان ما يقولو ابو النواس
ماشي طلاق الكاس عن يدّي
جابت قممنا للتفاهم فاس
لقص الشجر ومزنجر مصدّي
وقمه ما شفنا متل قمة فاس
فيها بايد الواقع تهدّي
ارضي ما بدي من حدا تنداس
وغيري ما بدي بالدني حدّي
وقت اللي عني بيسألوني الناس
بقلن انا رايح من الهونيك
سلامات ما باخد ولا بودّي
ماتو يا هند عواطفي ماتو
والهم قدملي تحيّاتو
لا تطلبي مكاتيب باستمرار
خطّي لأنو متل خطّ النار
وقت القرايه بيطلع خواتو
كل الفرح وحياتك مطلّق
وبعدي بحالي لهلق معلّق
الفالج اجاني من عدا انذار
وتمّي لأنو حد ادني صار
كل الحكي عم يطلع ملولق
بحقّي جريمه ليش مرتكبه
ما بتدعميني وواقع بنكبه
ما بقيت عم ديّن صرت مديون
ومن حيث ما عندي بقا صابون
عم غسّل بصابونة الركبه
منك ضريبه ما قدرت اجبي
وعن يد حظي ما اجت وجبه
مبارح بوقعه تكسرو عضمين
واليوم كتفي جالفو محلين
وضرس العقل واقع من الوجبه
يا هند راحت لغة التعبير
تشم الهوا والهم صار كبير
شايف خيالي ملبّك بحالو
وحد الوحي رايح من قبالو
كلمات عم تهرب من التفكير
بأيا سما الالهام بدّو يطير
وكيف بدّو الشاعر الجبّير
بالارتجالي يشرّف زمانو
حروف الهجا اللي عناتره كانو
بساحة علي عم يلبسو تنانير
لعندي تعي تا يرجع الاحساس
وقَودم عا آخي وصير متل الناس
وحياة الله ومريم العدرا
نفس اللي هيي بعدها خضره
ان ما بتجي عا الطاير بتيباس
عرفتك لطيفه عرفتك رقيقه
وحياة عينك واقع بضيقه
ان جيتي لعندي بغيّر التكوين
وبشلح ورايي الاربعه وسبعين
وبرجع ابن عشرين بدقيقه
لحالي قلت إنو الأمر مفهوم
الزفره لذيذه ليش حتى صوم
ضروري معي تتصرف الأعمال
كتار البيقولو ان ختير الرجّال
بوجود حوّا قيامتو بتقوم
معها يا ويلي مواقفي حرجه
وبرج الحمل عا سلامتو برجي
كرمالها دقّات قلبي جراس
عا طول إلها بضل إحني الراس
مش احترام وبس للفرجه
إلها السمع ما بقيت رح عيرو
شهرين إلها علامتي زيرو
متل الخلق ساعات مش عم شوف
الصابيع عشره والأمر معروف
من فرد غمره حدعش بيصيرو
هيهات أوصل للهدف هيهات
بدون الهدايا وصرف مصريات
بدي مصاري وواقع بحيره
مزوج دولار عا حضرة الليره
تا شوف كن بيخلفو فرنكات
**
انا بالعرض عم احمل صليبي
ومن الآخات علقان الهريبه
ما بدِّي مسايره بكلام مبهم
اذا للشرح ما عندك كتيبه
انا بالحب فارس فوق ادهم
لطلعة كلمتي كوني مجيبه
عا جرحي ما حدا بيحط مرهم
تا عيش بهَم مكتبلي كتيبه
بأنك حصتي قلبي توهّم
وانا عا محبتك قاطع نصيبي
بوصفك بعدما التفكير اسهم
عليي مرقت ظروف العصيبه
يا ريت وجودك الموقف تفهّم
تا قول نهاية المشكل قريبه
انا شاعر عا قول الحرف ملهم
ما بدِّي كلمتي تطلع غريبه
اذا عم اشحد من الحظ درهم
اتركيني آخدو وادفع ضريبه
شعوري ان دقرتي بقول هم هم
طلبتي من السما نزّل عجايب
وانا عا الارض ما بطلّع عجيبه
شروقي
بلهفه اتصلت بهدى تا اطلب الغفران
وآخ الشلحتو بغضب من دربها شيلو
وتا قول إلها أنا بمشاكلي غرقان
ويا ريت كنت السبب اعرف تفاصيلو
مبارح جبرني السكر سلّم على الحيطان
واغراب هني وانا ما رضيت احكيلو
عا جريه ما في شرب عن يوقف البرهان
"هوي" بأني العرق عن جيب بالكيلو
ما قدرت لاقي حدا من حضرة الجيران
بليله ما فيها قمر عن يشعل فتيلو
ولما خيالك شفت بعدو معي سهران
بالحال صرت العرق بالكاس عبيلو
ووقت اللي قلي انا بدي قبل جيعان
بلهفه شفافي صرت بالريق ارغيلو
قلي طبيعي انت منك قلت طفران
لاعب حصان بسبق تا اربح جميلو
خلصنا بقا يا فاقعه جهله
كرمال عينيكي زعلت اهلي
شوفي الحكي عا شفتي منشـَّـل
ان كان جوّك هيك بدّو يضل
بوقع انا والآخ بالسهله
خلـِّـي زمانك يعرف صباحو
وطير الغرام يعيّر جناحو
لسانك كأنو اخد قطاعه
واقف انا وعقارب الساعه
ومش عم تقولي تفضلو ارتاحو
ورْجِعْت قلت بتفرض الكبره
عا سمعتي ما توصل الغبره
بالرغم اني صرت بالسبعين
ومبين عليي ختم تشرين
بيضل في عندي نفس خضره
وبالرغم اني باخد مقوّى
وصاير عا بعضي مطعوَج ملوّى
الكلمه بتجي كلما الشمل يلتم
ان خربت ان عمرت ما بقا اهتم
بيهمني الكاس وجنس حوا
يا مسلطه عا الوضع قانونك
وبتعرفي مَني حدا بدونك
ما بقيت القى من الهجر عم دوب
شلحة نظر ودّي الي بمكتوب
مشتاق اقرا لغة عيونك
لغيرك انا يا ناعمه مَني
ذكرك ما بقدر ابعدو عني
كلما بصدفه يمرق على البال
بيمشي عا نغمة دعستو الموال
وبركلج الاوفات وبغنّي
شفتك بحلمي عاملي زينه
وقلتلك على العين لاقيني
ولما علينا خيّم الايناس
خمر دلقت من شفتك بالكاس
العم يبصر بنامات قنينه
عا منبري ما بقيت عم هدّي
اللي بيقعد على السكت بيصدّي
بيقظة شعر عم غمض العينين
من وقت ما رحتي عا مدري لوين
نايم انا والحرف بالردّه
