بسفح الجبل بالشمس والفيه
ماشي زحف وبيلهتو جريي
وصخر اللي فوقي ولاد عندو كتير
كلما الرياح تهب فوق الشير
يبعت حجر تا يسلّم عليي
ولما الطريق لقيتها بعيده
ورافق طلوع الآخ تنهيدي
جرّبت عني خفّف الاحزان
حتى معي يتغير العدّان
كيس الحلو زتّيت للوديان
وضلّيت واقف تا شفت انسان
ياخد سلام الحاملو بايدي
اوفي ببحر الشعر ما امخر
وجودو بردّه واختها تبخّر
وعنّي وجع راسي ما عاود حلّ
وفيي لحالي ما لقيت محل
لما لعندي وصلت متأخر
ولما عرفت الهام مخفيّه
بعيون كانت نص مطفيّه
بقبشت عنها بين وين ووين
وعدت بحجر صوّبت عصفورين
القلتلها عا الراس فوق العين
هيي بذاتي ومش انا فيي
يا هلي معلقه برقبة يقيني
التقى قلبك بقلب الياسمينه
وقلّو عا بياض الفيك غنّي
لانو تنيننا من فرد طينه
انا جنّيت فيكي غصب عنّي
وبكل مجال بفرشلك حنيني
ولأجلك بالشعر سخّرت فنّي
وما كنتي عا المكبّر تقشعيني
بمتلي مخلص بقلك تهني
ببحر الحب ما بغرّق سفينه
ما بدّي تقبلي شروطي بعنّه
وبعنّه من ضميرك تشلحيني
اسألي الأيام بعدي متل منّي
فيكي بالظروف تسوكريني
مش معقول اني النفس دنّي
عا مين ما كان لازم تفهميني
اذا قبّلتك وجربت تنّي
تا اجبر خاطر شفافي الحزينه
ما لازم تزعلي مني لأني
انا ما جيت اعملك مشاكل
يا عيب الشوم ريتك تقبريني
لبنان ذكرو بيـلـقـط بطرفي
وبالشوق صوبو بنجرف جرفه
وقت البيقلّي عود باستمرار
بعنوِن الو بالعاطفه ظرفي
حركش عليي من سنه المشوار
تا زور بيت الشالحو خلفي
وشدّيت همه وزلغط الدبار
وجمّع وعود وكبّر الغرفه
وبكير لما وصلت عقلي طار
كانت عا بابو لاقيه الشرفه
والقفل كان معلّق بمسمار
وتا ينفتح بدو بقا الصرفي
وعا ارض صار وجودها ختيار
تمشورت لما شدّني ظرفي
ومنشان ما تهبط خشاب الدار
حملت العصا ومشيت عا حرفي
ولما صباح الخير قلي الجار
يسعد صباحك قلت وبلهفه
شباك بيتي وين دخلك صار
قلّي نقل من هون عا هونيك
لما العواصف سايرو الدرفه
يا مضيّعه مسافات مقدرتي
تا ترجّعي اللي راح ما قدرتي
سافر وجودي عا محل بعيد
وما بقيت اقدر احفظ مواعيد
مستأجر النسيان ذاكرتي
مطرح ما جمعِت بيننا الصدفه
يا ريت مِنك تاركي نتفه
طول المدى فارشلك الاشعار
ويوم التلاقي معلّقو بمسمار
وآخر زماني شاحط بكتفي
بدّو خيالي يطلّق المطلع
طالع شعر عا شفتو اصلع
اشعار مش رح اشتري ولا بيع
عم يطلع بايدي الطفر زرّيع
وما في قرش عم ازرعو بيطلع
ما بقيت مني بها الدني راضي
وما في امل تا جيب بعواضي
عا جهنم الحمرا السفر مسموح
ومعقول عا الجنه خليقه تروح
لكن انا رح روح عا الفاضي
رحت بأنا وما انهز ترجيعي
وصار السكت يشرح مواضيعي
ولما لحقني بقلتو التدبير
جرّبت قدّم ساعة التفكير
العقرب زمط من بين صابيعي
ومن بعد ما تكوّن معي كَوني
قالو اللي عرفو لهجتي ولوني
لعنا وصلت بكير منهنّيك
ولما رحت اسأل عن الهونيك
قالو مرق هونيك من هوني
وبالرايح من الآخ عا علمي
لما طلعت عا المنبر العلمي
تا دق عا باب النحو والصرف
كنت على نتفه دعست فوق الحرف
هللي وقع عن صهوة الكلمه
وصار الوهم يبرم حواليي
ولما الحراره اكلت الفيه
شدّيت همه وقلت الله يعين
وعا درب حملو كواعها جزادين
ضلّيت امشي تا وصلت ليي
ولى الشباب
وجاء الهم والوجع
واليأس صار على
الوجنات ينطبع
صبرا تقول ايا
اسماعيل اعذرني
والشوق صار
جذور الصبر يقتلع
اين الحياة التي
كانت ترافقنا
اين الزمان الذي
بالكأس يجتمع
صرنا بلا امل
والضعف اقعدنا
والعزم خيّم في
ارجائه الهلع
لم يبقَ منا لكبح الويل
شرذمة
والدم قال بأن الضغط
يرتفع
جالت سعادتنا
في غير متجه
والأه صارت على
اشكالها تقع
ان جاني ظرف
وفلتت من ايدي
بين الهونيك
وهون
بغيّر نظام الكون
وبشلح ورايي
كل تنهيدي
عنّ على بالي
هالسما قاضي
منو بقا
اسلوبها مرغوب
عليها الغضب
مصبوب
ما بقيت عنها بالدني
راضي
منها اجت عا الارض
امراضي
وبيضل فيها خاطري
مجروح
بحر الشعر طلق
سفينة نوح
وتشركلو الاوزان
بالالوان
وتقمّص الحاضر
فعل ماضي
ابقى اجي عا خاطري
مليان
وهلق صرت عم روح عا الفاضي
هلي بيقولو للشعر هِنّي
مفروض انّو يعرفو إنّي
حرف الهجا براسو القمل ربّيت
بالليل مش عم يطلع من البيت
من دون ما ياخد اذن مني
عا الشعر بدنا عين العنايه
تشلح نظر عا الرايح وجايي
كتار البيقولو وبالدني معروف
حروف الما اكلو بالحياة كفوف
عم يطلعو من دون تربايه
ضروري شرود القافيه نقاضي
تا يصير مِنا المستوى راضي
ان ما عطينا شعرنا من الذات
بيتجقّم التفكير بالكلمات
وبيصير بدها تروح عالفاضي
ضروري المعاني يحمّصو ويقلو
البدّهم عا جَو جديد ينتقلو
ان خيّم علينا بقلّتو التدبير
تحت الارض بالشعر بدنا نصير
انما كان عم يرخي الوزن تقلو
الفرح عم ينطفي والآخ شرقط
وحروق بكلمتي التفكير سقّط
تا قلّك شعر ما بيطلع بإيدي
القصيده مش رح بتطلع مفيده
اذا ما الحرف بالمعنى تَلقّط
انا وحياة من خالق بمزود
قماشي من قماش كتير اجود
لكن من زمن واقع بقلّه
ما بقدر بالهوى بيِّض سجلي
التلج لو بدقرو بيصير اسود
مرقت بها الدني عا ظرف قاسي
الوجع جنسيّتو آخد براسي
بيدقو القلب عا حبابي تخلّق
وصرت عم اقعد على السكت هلّق
وهني بيقعدو فوق الكراسي
السعاده شفتها من دون قيمه
البخل عم ياكل حجار الكريمه
اذا عم قول مش تكتير غلبه
التقينا الاربعا ودقّات قلبي
عملو الاربعا الجمعه العظيمه
قالت الي هل قاعده بذاتي
شو باك ما بتهضم مسافاتي
قلت الحكي بها المرحله مطلّق
دالق قصيده عا الهوى وهلّق
عم لملم فراغات كلماتي
ما في امل مستقبلي راضي
جدول حديثي راح عا الفاضي
من هيك واقف بين جيل وجيل
وعم حفتر النسيان بالازميل
تا الذكريات تفيق عا الماضي
حبي حْمْل وعواطفي مجانين
مين البعقلك عم بيلعب مين
مش عم تلمّي سلام يا نهلا
قدّام بيتك مرحبا واهلا
عا الارض الهم شهر مشلوحين
وبالمختصر مَني متل مَني
ضابب لساني وما بقا غنّي
تا شوف حالي بالدني موعود
قاعد بآخر ما أنا موجود
وناطر تا اسأل شي حدا عَني
كلك حلا وبيشهد المظهر
خيالِك عيوني للصبح سهّر
وفصّل ربيع العمر اشواقو
وخيّط امل واخضرّت وراقو
لما الهمس عا شفتك زهّر
صوب النهايه عا الهدا سارح
عنّ عْلى بالي غيِّر مطارح
طلبتي لقا والشغل هالكني
لا تسمّعيني لمين تاركني
بكرا بجي من غربة مبارح
وصفتك ولكن قلت مش كافي
بها الوصف مش عم تقبل شفافي
لما استقام الوزن بالتفكير
صار الوحي مِنو لحالو يطير
ورفرف جناحو وولّد قوافي
وهلق لأنو الجو ارهابي
ما بقيت اعرف اضرب حسابي
بدولاب عم ابرم عا تاني كون
ومنشان ما اوقع بهون وهون
رح حط حالي اليوم بجيابي
يا ريت بقدر جيب بعواضي
ما بين راضي وبين مش راضي
ماشي ورايي والمشي تعبان
وحدّي رصيف من البشر هربان
وفوقو دعْس مشوار عالفاضي
بهمزة وصل ما بوصل عليي
ولما ضياعي نمرد شويه
قلت لزماني ليك حظي ليك
طرقات عم تحكي بهيك وهيك
وما في درب بتساير جريي
وقلت بصراحه لخاطري المجروح
التغيير بابو ما بقا مفتوح
بكتر الحكي ما تمهّدو اراضي
ولليوم بالرايح من الماضي
بعدو الفعل بالزاويه مشلوح
بإيد الوما عم ينجمع قوتي
بتمي قنابل آخ موقوتي
الراحه اللي غنّت للتعب موّال
يوم الفلاني راحت من البال
وزرّيع عم يطلع صدى سكوتي
نعسان صبّي قهوتك نعسان
يمكن ببصمه ينقرا الفنجان
جوّات قلبك عم تعبّي كَون
وقاعد انا بالرايح من الهَون
عا الارض عم فضّي قلب مليان
اعطيني حضور يساقب عليي
يلبس مدى ويقلع حواليي
عم ركلج عيوني يمين شمال
وعمّر لكي عا شفتي موال
يقلك دخيلك روّجي ليي
من حيث اني ضايع من زمان
بفتش عا حالي بأغلب الاحيان
لا تسمّعيني الحق كلو عليك
الماضي لقطني برقبتي من هيك
ما بقيت اقدر اوصل عْلى الآن
كلما النظر عا خلقتك لزّق
بخلّي الحكي بالسكت يتحَوْزَق
وبالمختصر رهن الاشاره بصير
وكلما قطعلي رزقتي التفكير
بكبّ الصبر وبصير اتخزّق
يا هم خفّف حملك شويه
الاخات ليش موجّهه ليي
مفروض تعرف قبل خود وهات
الاخات الها بالدني قياسات
مش كل آخ بتطلع عليي
كاسي فضي والوعد جنّني
وما بقيت لا لحّن ولا غنّي
وهلّق بعدما الدين فتّح عين
بيجوز اهرب من انا عا لوين
وهونيك ما يسمع خبر عنّي
صار الكلام من الضرب اوجع
ومش عم بلاقي للسكت مرجع
والعقل مش عم يلتقالو ضراس
وصار الضغط متل الوجع بالراس
ساعه بيروح واربعه بيرجع
الرجفه اجت عا خراج ايديي
للغمر مش رح قلك تهيّي
من البير مش رح شيل آخر زير
غب عْلى قلبي وقلت يا تعتير
لما عليي شلحت عينيي
بشهر المضى قلت السنه سنتي
بماري التقيت وقلت وين كنتي
لعندي تعي تا نحلل الممنوع
وكانت البوسه متل يوم الجوع
وقالت يا ملكي ربها إنتي
وحتى الي يتفسر بنامي
الها قلت لا تقعدي نامي
غيرك وغيري ما حدا بالبيت
بالقعد راحه ما بزماني لقيت
وما لي قلب اوقف على كلامي
وكل ما معك عم ينشرب كاسي
بالحجم عما تكبر حواسي
عا الراس انتي والكلام بعيد
من هيك وحياتك أنا ما بريد
خلي مشط يتفسد براسي
بالذوق انتي ما الك تاني
القاصي عرف وبيعرف الداني
غيري أنا وقت المعك ما بكون
وكلما الك اكتب شعر موزون
ببري القلام بشفرة لساني
طارو الوعود وسيطر الوسواس
وهربو القناني من طريق الكاس
الجابو وجع للراس معروفين
وحياة مار شربل ومار الياس
بمطلع شبابي هجرت بشمزين
وجيت على سيدني قبل قمة فاس
واليوم عمري تنين وتمانين
وصارت قريبه ساعة الافلاس
بعد البدايه الما لها قوانين
جايي نهايه تقطع الانفاس
ومن ساعة اللي وصلت عا تشرين
راح اخضراري وبلشت ايباس
باقي إلي ايام معدودين
براحة فكر حبيت فيهم عيش
وامشي عا ذوقي مش عا ذوق الناس
لا تسأليني وين ساعات الهنا
ضيعتها بضجة وداعك يا هنا
خلفي زماني وشارد بأربع جهات
ومن كتر مني بعيد عني بها الحياة
ضلّيت امشي نهار تا وصلت لأنا
لا تواجهيني بالزعل عني افرجي
كل العمر عا الارض ساعه مبهجه
شوفي عا درب العمر ضيعت الوجود
وعريان رايح بالدني لاخر حدود
ومش عم بلاقي توب عا قياسي يجي
حبك عباده وما الى عنو غني
حسي معي لا تسأليني شو بني
ولا تسَّمعيني انت صاير اختيار
مش عم بلاقي نهار يصلح للبدار
حتى عا ذوقي للهوى اعمل سنه
لزهرة شباب الحب سمَّيتك ندى
وصار اشتياقي صوت صارخ بالودا
مبارح معك بالحب ما صرلي مكان
صوتك بايدو كان حامل صولجان
لما طلع عا الدرب شلَّحتو الصدى.
هلي الدني بقشع بعينيها
حبي لها استاجر حواليها
قلتلها علينا القمر ما هل
ساعة لقانا راكضه بتضل
طالع عا بالي كسِّر جريها
لمين بدي لحِّن وغني
وعا كل عنه مفرخه عنه
جرَّبت حط بها الحياة وشيل
ولما زماني صار دمو تقيل
منو طلبت تا ينقبر عني
فوق الورق ما ميدنو قلامي
ومش بس عندي القـٌـلب قـٌـوَّامي
ماشي الجدل بين الجسد والروح
مش بالغلط صوب الورا عم روح
بحسِّب ورا اوقات قدَّامي
عا الارض باقي من انا نتفه
مع بعضها بتضل مختلفه
كنت حالي شوف بالعشرين
وهلق بعدما فشخت عا السبعين
حالي صرت عم شوف بالصدفه.
بايدي يا امي الارض هديني
وحدي تا امشي ما بقا فيني
مش بس اني بالشقا غرقان
ما في حدا افراح يعديني
مبارح معي كان الغضب نصحان
البيت تركت وحملت قنينه
ووحدو قلت انو العرق قدران
يجيب الهنا ومن آخ يحميني
وصرت امشي وساير الحيطان
وقول الصبر يا خالق اعطيني
ومنشان حالي شوف عا الجيران
ندهت النظر عا العين لاقيني
وبساعة الفيها صرت قصران
ركعت وقلت لا يحترق ديني
يا مريم العدرا انا وسكران
مني رحت عا لوين من يومين
لعندي دخيل الرب رديني.
هم على همي لا بقا تزيدي
صارت بعيدي فرحتي بعيده
بيني وما بيني قايم التلبيك
وهوني زماني والدني هونيك
وساعة لقاكي واقفه بايدي
مش بس مطفي محترق ديني
ومن جيبتي عم يوقعو سنيني
وحياتك انجنَّيت ما بنلام
مش عم تجبلي منفعه الايام
ضياع الوقت رح يطلع مدينه
قاعد متل شي اطرش بزقفه
ومش عم بشوف العز بالوقفه
لعندك ما بقدر وصِّل الآخات
الدعسه العليها بعيِّر الفشخات
يا تقبريني ناقصه شقفه
حابب تا كفي عيشتي بمعزل
عن ناس فيهم كنت اتغزل
وحياة عينك خاطري مجروح
لا تسأليني لوين بدي روح
طالع عا بالي وما بقا انزل.
يــا شاعـــر عليه الوحي تصلَّى
وسعـر الكـــلام الجوهري غلَّــى
شعــرك دوا للخاطر المجروح
بالابجـــديه ضلَّك تســـلَّـــى
كـــاســــك شـــربنا كلنـــا عـــا سطوح
بيــــوت المعنــــى والـــزمـــن دلـَّـــى
عـــا عطـــرك الطــــول الوقت بيفـــوح
بساعــــة حضورك والحلـــــو حلـَّـــــى
لبنــــان قلــــك مـــد فيي شلـــوح
فيــــك الوعــــي والنــــور متجلـــــي
البيكــــون منــــك جائــــزه ممنــــوح
لا شـــــارده ولا وارده مخلـَّـــــى
مــــش بــــس قلبـــــك للـــدنــي مفتوح
ومـــش بـــس جنحـــك بالفضــــا علاَّ
منقــــول انــــك للسفينـــه نـــوح
ومنقـــــول عــا تلاميذك اسمللـــه
مجــــدك علـــى النسيـــان ما بيـــروح
حيثــــك زمــــام الامـــر متولـــى
الخالــــق بعـــد مـــا حط فيك الروح
جبلــــك عقـــل حتـــى سعيــد تكون
وتكــــون وحـــدك للشعــــر الله.
الفيها انغرمت وبيتها مقفي
مبارح عليها مرقت بالصدفه
ضويت الي عا بابها ببونجور
لما لقتني بالعرق مطفي
ولما لأوفي تسهلت الأمور
قلت لهمومي تفضلي انصرفي
وصرت القوافي زوّج على بحور
ونام الجمود وفاقت الالفه
قلتلها يا "ورد" يا "منتور"
الضحكه "دوا" من تمك بتشفي
خبارك لعندي بينقل العصفور
شوقك الي مش هين اعترفي
عرفتي انا عا محورك عم دور
وباقي الي من همتي نتفه
هيدي الصراحه وبالصدق مشهور
وبهار مش حاطط ولا قرفه
عليي وعليكي ما حدا بيشور
كل الجدل من بالنا مننفي
زرعتك بقلبي يوم سبت النور
ولما عا كتفي حملتك وغنيت
حسبت انك طالعه بكتفي
من بعد جوله جابت نهايه
بأرض الوطن ما تحققت غايه
ظرفي ما ساير خاطري المجروح
وكنت وقعت بالآخ لولايي
لمرتي قلت ودّي سفينة نوح
وشلحة نظر لعيون العنايه
باب الرجوع لعندكم مفتوح
حظي اندبح وحكايتي حكايه
ولما عا سدني الوقت قلي روح
ما قدرت مني اخد كفايه
لبنان شلـَّـحني الجسد والروح
ومش بس اني غصب عني جيت
كانت لهوني رجعتي بلايي
بلبنان همي الدم نشـَّـفلي
وقلبي عا نتفه كان وقفلـِّـي
كانت الحفله بالف عين وزين
والواو صارت طه عا غفله
العريف دشرني قبل يومين
من الموعد وعا مصيبتي حف لي
وحظي اللي جبتو يومها بالدين
بايا دني صفيت ما شفلي
خيالك لحقني بالشكل ذاتو
وصمتو مشي عا حروف كلماتو
ما كان عندو غير شقفة تم
وسحبة لسانو بمشكله جاتو
بيو اجا تا يساعدو والام
ودَّت ورا شقاقيف اخواتو
وعملو لها زندين حتى تضم
وهوِّي طرش عا خدودها لهاتو
ولما افتكر انو وجودو مهم
غنى المشي موال دعساتو
وحتى اللي هر على طريقو يلم
ما ساقبو صابيع ديّاتو
ولما الحبق هزيت حتى شم
جنون الهوى قدم تحياتو
وصارت الساعه بالصقيع تزم
والعقربين بقلبها ماتو
وبالرغم انو ها الوضع بيسمّ
ما جرَّب يفلفش ملفاتو
ووقت اللي صار الزاف حد الكم
ببدال ما يخلِّي الرواق يدور
حطو بنزله وطلَّع خواتو.
صدفه التقينا وقرَّبت ليها
وبعد السلام عطيتها ديها
وقلتلها حنـِّـي اعملي معروف
وصرت بقبش بالجسد تا شوف
كنو الحكي بيعلـِّـم عليها
ووقت القلت مش بايع وشرَّا
عليكي انا صفيت متغرى
قالت اسملله الف مره عليك
من البقبشه ما بيتعبو ايديك
ختيار صرت وعينك لبرا
ورِجْعِت قالتلي منعرف انو
اللي بيكبرو بالعمر بيجنـُّـو
مش بس انك يا قليل الدين
شالح وراك الاربعه وسبعين
قانون تحت السن بتسنو
قلتلها يا ست يا لبقه
ضلي بعين العاشقك حبقه
سن اللي راكب بالحنك من فوق
بالمختصر منّو باجري طوق
من هيك تحت السن عم ابقى.
اتركيني جن متل العم يجنّو
عليي بطلو العالم يحنّو
وهلي كنت شوفن عا الهويه
بدمة هاتفي مش عم يرنّو
حياتي اليوم صفحه منطويه
وبدون مبالغه معروف انو
همومي استعملو النبره القويه
وغاره خلف غاره عم يشنو
وبعدما كانت زنودي قويه
لحقها الضعف ومبيَّن كإِنو
الي بالبال فاتح صيدليه
وجروحي من دواهم عن يعنّو
قبل ما بحبنا نعمل خطيه
ونجي بقانون ما منقدر نسنّو
ضروري تعرفي شو صار فيي
عا درب العمر كان الأمر واقع
وأنا حطيت حالي تحت منّو.
فيها اتصلت بيوم الفلاني
وقلتلها الاحوال تعبانه
طار العرق والقرش دمو سميك
وعم تنعدى فراغ الدملجانه
قلبي انقطع ما بقيت متل الديك
مبارح خبر عن صحتي جاني
قلي حكيمي ناقصك تدليك
هر الصبا بتشرينك التاني
عمري عا وهمي عمَّر مداميك
وبدِّي زمان يفسر زماني
شو بعمل بيطلع عا بالي فريك
وحكم القدر عا الآخ ودّاني
ضحكت وقالت ربنا يخلـِّـيك
بعدو عيارك عنتر وهاني
شوقي وحناني عا الهوا بهديك
سجِّل براسك وين عنواني
وشد العزيمه وشرِّف بدلـِّـيك
منين الدرب عا جوك الهاني
ولما التقينا وبلش التشنيك
لسانو سحب عا الكندره الصباط
وعا الصدر صار يميدن لساني.
فيها التقيت بنفس دبلانه
الساعه حدعش بنهار الفلاني
وحاطط حياتي كنت بالتصليح
وشاحط انا وحامل دملجانه
قالت تعا نهرب من التطويح
بيتي ورا هاك السنديانه
ورحنا سوا تا ننصب مراجيح
ونطلع متل ابره واسطوانه
ولما عرفت مش حاملي مفاتيح
وما في حدا بالطابق التاني
قلتلها عندي تخت من شيح
ولما ما سألت: وين عنواني
قعدنا تا نعطي لبعضنا توضيح
ومنّا العرق نازل بلا ديانه
وبالرغم انو الطقس منّو مليح
لما الهوا تحرك مع لساني
قلتلها يلله تعي تا نزيح
من الدرب يمكن تبلش عياني
قالت الي ما في هوا ولا ريح
هلي يا ملكي عم تشوفو هون
نسمة هوا من الشوب هربانه.
يا ريت فيكي تمرقي مرقه
عا كعب آخي مفرخه حرقه
لما بايدي نشفو القلام
عملت الارض فرشه تا حتى نام
وغطَّيت حالي بالسما الزرقا
ويا ريت في عندي بقا مني
نتفة صبا تسند كبر سني
الايام راحو متل شيح بريح
وباب السعاده ما الو مفاتيح
واني فقير بتعرفي اني
حاطط عليي باصبعي علامه
تا يعرفوني الغيبو كلامي
صارو همومي للصريخ ضيوف
وعمري القصير نهايتو عم شوف
رايح من الهونيك قدامي
بدي عا غيري اليوم اتطلّع
وجودي قبل ما اعرفو تشلَّع
يمكن انا بكعب الدني مشلوح
والابجديه نزول عم بتروح
وما في حرف عا البال عم يطلع.
مبارح قلت لمشاكل الجَوْني
مطرح ما غيَّر لهجتو لوني
حامل صلا بالراس والايدين
وحابب تا غير مسطرة كوني
الاحباب راحو من ظرف يومين
وعطيو نصايح حب بالمونه
وقالو الي منرجع بعد سنتين
وبعدي انا عم عيش بالاحلام
هونيك بالرايح من الهوني
وبالرايح الرايح من شويه
بعدي انا عم بقبش عليي
شهرين صرلي بعالم المجهول
ومشوهه خلقة حواليي
مشتاق افلت عا صدر معمول
وأوصل لمس بخراج ايديي
ولكل حلوه بالصراحه قول
بوقت الغزل عا ذمة الشهوات
ما بيلزمو بصابيص عينيي.
وحياتك على المسك يا فوفو
شعري بوصفك ما انغزل صوفو
ما لقيت رده تحرَّك الاحساس
حتى بحور الموهبه يطوفو
مش بس مَنِّـك خرج مازه وكاس
قلبك ما عاد استقبل ضيوفو
وبحلف الك وحياة مار الياس
فيكي الاسم مستضيع حروفو
براسك يجوز استوطن الوسواس
وخش على منبر عمرك دفوفو
ولما جمالك اعلن الافلاس
صار الطفر شبرين عا كفوفو
شلح النظر بالمختصر أجناس
بيمشي حسب ما تساقب ظروفو
لا تفكري كلو بفرد قياس
وجهك لأنو غير وجهك صار
شلحت النظر منشان ما شوفو.
يا شعار المعي قيمات قيمو
تا غصن المعرفه يصافح نسيمو
تا اقعد عالسكت ما عاد فيي
الزمان ترجَّل وطلـَّـق حريمو
انا اسمي رسول الشاعريه
جديدي بالشعر خاوى قديمو
بعطي الموهبه خلقه بهيه
وتا يشفى جرحها بعمل حكيمو
الزجل تا تصير ابياتو غنيه
وتا حتى كلمتو تطلع بريمو
اخدتو عا السماوات العليه
وتركتو يقعد بجنة نعيمو
انا انسان مش متل البقيه
من الالهام عم الحق عظيمو
اذا التفكير عم يكتب وصيه
حياتو بردها وبعمل نديمو
قلت عا منبري يا ابجديه
الوحي بيعدني موسى كليمو
بدوني تأكدي ميه عا ميه
ما فيكي تخلفي ردة معنى
اذا كل الحروف بيستقيمو.
أنا عا الكاس عم عرِّف قناني
بدمة كم انا مني اناني
اذا بدكم حياتي تواجهوها
ضروري توقفو بخلقة زماني
تعو صفحة وجودي طالعوها
وشوفو وين عم يحكم مكاني
صارت فارغه من الرافقوها
بعدما كانت مواقف ملانه
النصيحه بلاش عن يدي اقبلوها
بنات العصر ما الهم ديانه
اذا النظرات صوبي بيشلحوها
بصير بهالدني انسان تاني
الحقيقه الناس لازم يعرفوها
انا خلقان عا كعب الغناني
ولأني بنسما اما وابوها
ما بقبل عا الهوى غمض عيوني
اذا بيكون قايم مهرجاني.
يا ملحنـَّـه للقلب دقاتو
خلـِّـي اللقا يقوم بمهماتو
انو تا نبقى هيك مش معقول
هلي حياتو عم تشد نزول
منها بعيده يطلع خواتو
قاعد باخر وين عا علمي
وشالح ورايي المعرفه وعلمي
ما قدرت غني للهوى موال
بعدو الصمت قاعد بحضن البال
هونيك بالرايح من الكلمه
يوم الشعر ما انهز تحريكو
عا الآخ عم عمر مداميكو
وبيت القصيد مضيع الاوزان
وبيت العا وزنك بالمعنى كان
بوجه الزمن غالق شبابيكو
وحياتك التقصير ما بريدو
وما بريد صفـِّـي بالدني عيدو
بتعب تا حتى متل غيري صير
ماشي الوحي عا دعسة التفكير
وما في ظرف عم يمسكو بإيدو.
انا عمي الشقا والهم خالي
وزماني من عطف عا الناس خالي
بفرحه بتنذكر ما قدرت شارك
وعليي بيشهدو سنيني الخوالي
ما عندي مقدره تا الوضع دارك
ونهار الحل صاير انعزالي
بحياتي ما كنت اربح معارك
لحقني النحس وتجنس خيالي
الابانا قلتها وما قدرت بارك
لأنو بالصلا ضيق مجالي
ولأنو رقبتي التقصير فارك
الكفر بيضل يطلع ارتجالي
بعد ما كنت شغـِّـيل الجمارك
عا درب العمر لحقتني البطاله
وجيابي بالفراغ اليوم زارك
عا حالي بس بقدر شوف حالي
وظايف ما التقى بكل الفبارك
ومقام الضغط صار كتير عالي
والو التفكير عشر شهور بارك
وما بعرف مين جبلو جرين حتى
ليل نهار يمشي شغل بالي.
ابعدي عني يا هند الدملجانه
اذا بفراغها كانت ملانه
لأني صاير مطعْوَج ملوَّى
ما بقدر عا الدبق القط زماني
حياتي معتمه والشعر ضوَّى
واذا دوَّرت موتار الغناني
الفضل بيكون لحبوب المقوَّى
العليهم واقف تدحرج لساني
اذا برا كنت او كنت جوَّا
ما فيها البقبشه تلاقي مكاني
ولا مره موسمي بالحب سوَّى
وتا اشرب كاس عم عفِّر قناني
اذا تخلقَّت لا تقولي تروَّى
خبر مني لهلق ما اجاني
منِّي من نسل آدم وحوا
لما الأرض بالصدفه استقامت
طلعت زرِّيع تحت السنديانه.
