يا ناعمه بقلك بَلا كلفه
كلمه ما فيها بهار او قرفه
بالامس كان الشوق سَيرو يجدّ
وكنت بالرقم القياسي شدّ
هل صرت عم شدّ بالنتفه
ان كان بدك تشتري سكوتي
عا قلب قلبي تفضلي فوتي
انتي الي من شقايق النعمان
كنتي عليي ميّتي من زمان
انشلله عليي بترجعي تموتي
عطيتك حياتي وما قلت هاتي
بيضل طقسك بالهوى شاتي
لمّا طلع موّال قال وقيل
جرّبت ذاتك من حياتي شيل
طلعو بايدي ذاتك وذاتي
لحالي قلت هلقدّ بيكفّي
ما في سلام بينقرا بكفّي
من كتر ما دم الزمان سميك
ماشي عا هوني ودعستي هونيك
وعارف ما بعرف وين رح صفّي
تعي لعندي تا قوم بواجباتي
قبل ما توقع عليكي الشماته
عيوني تجعلكو والدمع نازل
وحفا عا الجمر مشيو مخالفاتي
خيالك بالصراحه كنت غازل
قبل ما قلت مِنّك غمر هاتي
وكنت بالفكر عمّرلك منازل
ومن النسيان اسحب ذكرياتي
ولأني عاطفي وما بحب جادل
بنزلة آخ ما بطلـِّـع خواتي
فتحت ملفنا وتا كون عادل
عصرت الاهتمام لعصر آتي
ولأنو موقفك ما كان هادل
حياتك صرت زقِّم من حياتي
وتا اوصل للحلو سألت العنادل
اذا بيلحّنو سكّر نباتي
ضروي بأرضنا يطلع سنابل
وضروري تندمج ذاتك بذاتي
قبل ما يختلط حابل بنابل
واملنا بالهوى يضيّع صوابو
عا شهر زمان عيريني التفافه
انا راجع تا صلِّب بالتلاته
عا ارض ترابها سكّر نباتي
عزمني الصيف حتى استغلو
وعيون الظرف عارتني التفاته
راجع قول للآخات حلّو
قبل ما يطلع عليكم خواتي
وبيت العشت فيه سنين قلو
دخيلك وين صارت ذكرياتي
راجع عقرب البيدور حلّو
قبل ما يوصل لساعة مماتي
راجع قول للافراح طلّو
بعد ما لقيت ذاتي بعب ذاتي
من بلادي بعدما الغُرب فلّو
رجعت ملهوف من غربة حياتي
تا حتى موقفي بيِّض سجلّو
وتا حتى اقشع بلادي وحلاها
وصل شوقي لحد الاستماته
هوني انا وتا التقي فيي
عندي امل عشرين بالميه
الدمعه بعيني والقلب مليان
وحياة عينيكي يا بنت فلان
الضحكه الما فيها آخ مش ليي
منّي خبر عن صحتي جاني
من هيك عم قلك عن لساني
مش بس عم يركض ورايي الموت
وما لي قلب علّي عيار الصوت
بفزع لا توقع وجبة سناني
لعندي بقا المشوار لا تعيدي
من قزاز عن اعمل مواعيدي
وهمي عا قدّي والوجع طوفان
من كتر ما منّي صرت قرفان
عم سلّم عليي بقفا ايدي
وبيتي الهوا عم يضرب حسابو
هرهر عليي وفسّخو بوابو
اللي عمّرو تخمين كان حمار
بأرضو الخشب بيهز باستمرار
وصار السقف عم يقبر صحابو
انشالله الخلقني يرحمو شويه
بفصل الشتي عم اقلب مويي
الشباك راح يساير الجيران
واللي بقي من سلالة الحيطان
واحد مزادو واقع عليي
اجا تشرين من غربة مماتو
ومشي الخربان عا دعسة خواتو
وجمال الطقس قدم استقاله
بعدما شاف حجم مخالفاتو
وطلع من قمقم الريح الشمالي
وقال تيابكم يا غصون هاتو
وكتر منو رذيل بهيك حاله
الشجر بالزلط رقّص عا هواتو
ولانو العمر تشرينو خيالي
ما عنا زنود تلجم انفلاتو
بيطلع متل شعر الارتجالي
بذات الوقت ومكبش بذاتو
وانا بتشرين مش عم شوف حالي
النظر ما عاد يعمل واجباتو
وعا قولو الحظ ما استذوق مجالي
بساعة مولدو اعلن وفاتو
تياب الآخ كلن شغل بالي
ومعي مستقبلي قاطع صلاتو
النهايه للجسد ودّت رساله
وخيالي فتّش بسوق العقاري
عا شقفة ارض تا يقبر حياتو
وين الدرب يا احمد وطوني
هيكي قلت لما هرب لوني
معلوم خوتا سكرتي معلوم
ودمعة عيوني نهر بردوني
بدي حدا من الارض فيي يقوم
مني ما بدي اطلب العونه
طالع عنادي غصب عني روم
وقبل الولاده مشاكلي جوني
قامرت فيكي وطلعت مسموم
كنتي بنت كبا بقلب كوني
وكلك قلب كنتي بوجه عموم
واليوم صرتي بنت بستوني
عودي الي وخلي الامر محسوم
وكلمه اسمحيلي قول بالمَونه
بعون السما بدها المحبه تدوم
وايام خير بتقشعي بعوني
لا تعاتبيني كتير ما في لزوم
فرنكين ما بسوى بهاالاونه
ولا تحمليني هموم فوق هموم
راسي انفدغ من جمعتين زمان
لما وقعت من جيبتي هوني
بحلمي شفتك بساعة رحيلي
عا ملبورن بالمهمه المستحيله
وصرت امشي وباجري شلش انسر
تا اعرف وين نصِّك بالقليله
ولما لقيت امري ما تيسر
وصباح الخير بندق بو فتيله
قلت يا حلم عا ذوقي تفسر
جميله شهوتي تربح جميلي
تا اشرح شو انا بدي تعسّر
عليي كانت الكلمه بخيله
وحتى بالهوى ما عود اخسر
عملت شمشون تا تكوني دليله
وصولي عا شفافك كان ايسر
الي من مشكلة حفظ المتيله
كنت حاسس بإنو العضم نسّر
وما عندي حظ تا اروي غليلي
ولما القلب عا حالو تحسّر
صرت قرِّب عليكي بكل حيله
وعا صدري بعدما نهدك تكسّر
صبر ايوب ودّعني لأنّو
يميني شاف رقبتها طويله
يا ندى بحياة الله يا ندى
لا تفزعي مني اذا الضغط ابتدا
غير اللطف بالكون ما عندي رفيق
معروف اني صاحب القلب الرقيق
غير المتل ما ضربت بزماني حدا
بجاه السما لا تعملي عليي حظر
تا كون اكتر ما انا مش منتظر
من هيك بدّي كون بكلامي صريح
خف النظر ما بقيت عم اقشع مليح
عليكي بعيون الشعر عم اشلح نظر
قلتي تعا وجيت بعيون مدمّعه
وما كنت ناطر غير تا تقولي تعا
وهدَّيت حالي بين دين الذكريات
ومن كتر منّي ضايع بقلب الحياة
وصلت الخميس وقلت جيت الاربعا
لا تزعلي مني اذا وضعي جني
بوجه الحياة مكبره راس السنه
حضوري لعندك كان من لون الغراب
هوني صحون مكسّره وهوني خراب
يمكن انا عا الارض وقّعت الدني
يا ناعمه بالمنطق الدافي
طاير صواب المرهم الشافي
قديش بدي عيش عا الهيهات
وقديش بدهم يعرضو كتافي
كلما سلامك تحملو النسمات
بتوصّلو عا ارض اهدافي
وبصير جنّد صوبك اللهفات
وبيصير يقوى مع انا خلافي
حُب الزرعتو بالوفا ما مات
حقك بيوم الملتقى وافي
ضلـّـي معي وخلّي التمنيات
تقلـّـي الف يعطيك العوافي
منـّـك ما بدّي اسمع حكايات
كوني صريحه ولا بقا تخافي
الصدفه بتجي بغفله من الغفلات
وصعبه علينا وجودها نكافي
انتي الي الخمره مع المازات
بدربك انا ما بهبّط حفافي
بالرغم انو حبك من الذات
وبالرغم انو جوّنا صافي
لا تطلبي اشعار يا "ايفات"
اعطيني وقت تا ركلج شفافي
شعر الغزل منو بخود وهات
حروف اللي نزلو بقالب التفكير
بدهم وقت تا يطلعو قوافي
العالم عا بغضن ما بقا يحنو
كبو العقل منشان تا يجنو
وخف الصلا بالجامع وبالدير
ويلعن ابو عملو صباح الخير
وما في ضحك بعدو متل منـّـو
من جديد يا رب السما اخلقني
التقصير صرلو زمان سابقني
والفكر بدو قطعتين غيار
وبعدي انا راكض ورا الدولار
وبعدو الوجع بالراس لاحقني
بكرا قلت رح اعملو هلّق
ما زال صار برقبتي معلّق
ولما العقل ركّب لحالو جناح
جرّبت اني بالسكت ارتاح
صار الوما بالسكت يتلولق
يومين بدّي من الدني يومين
من وين بيجيبو الشفا من وين
بسعر الفجل عم سفِّر الغالي
وان قلت مَنّي هون ما بغالي
هربان من حالي ومعي حاله
متل الزفت والآخ بالحالين
فلّو الاماني بعدما القلب انفجع
والبلبل الغرّيد متقمص بجع
ومش بس انو بيننا دبّ الفتور
لما غيابك طيّر صواب الحضور
الوضع استقام بآخ تا يخلّف وجع
حبي لكي غلّ النشاف بمنبعو
وخيط الصله بيناتنا رح يقطعو
لما غرامك تشرَن بفصل الربيع
جسم الهوى هزّيت عا الخط السريع
تا شوف كيف عْلى الهدا بمشي معو
ما في شِعْر بالبال عم يطلع غني
وما في شَعر عم يطلع براس السنه
"مبارح" بوجه المعرفه سد الطريق
وهلق لأنو للامل ما في بريق
صوب الأنا هربان وهمومي دني
ما في امل تا اصطفل مني لكي
غب عْلى قلبي ويمكن يدور البكي
عا رقبتي عم تطول كتير السما
يمكن كلامي يضل يطلع بالوما
تا صير اعرف كيف بيكون الحكي
بيت المعنى بعدما تغرّب
صارت لعندو نهايتو تقرب
ما ضل عندو للجدب مغـَّـيط
وساعة زمانو واقفه عا الحيط
تا تلتقي بتحريكة العقرب
وعندو حروف الضعف عاجنها
وعا الارض ما بيمشي توازنها
والعنكبوت مخيّطه تنانير
والبرغش البيكون راسو كبير
بيموت حتى يشتري منها
واربع قناطر عا الارض نامو
وعم يبصر التصليح ببنامو
والسقف عقلو طار عا المريخ
وفي حيط عندو اربع فساويخ
والريح عم بتعِدّ ايامو
واللحن ما عاود متل مانو
والوزن منّو هرّ عنوانو
بوجه النظر ساحب فرد مزراب
والقفل عم يلدغ بفتح الباب
بالرغم انو ساحب لسانو
يا مطيّره بالجو احساسي
شفافك يا ريت بتدلقي بكاسي
طالع عا بالي اشرب واسكر
خلقة انا ما بقيت اتذكر
ومن وين جايي عا الدني ناسي
لما طلع بالآخ موالي
بغفلة انا تعرّيت من حالي
والقلب صار من الغضب مليان
وصارت الذكرى بدمة النسيان
والسكّري ركّب ضغط عالي
هم وعذاب شربت من كوعي
وغبت وخيالي ناطر رجوعي
متل الصنم قاعد على التلفاز
وجوعي لكي يا ظالمه من قزاز
وبعدو لهلق ما انكسر جوعي
سهران وحدي والقهر نامي
وانتي عا سبعه ونص بتنامي
ما عاد ينفعني دوا ولا طبّ
ان كان بدك تطعميني حبّ
حطّي "قبل" بالصحن قدّامي
فيي دخيلك لا بقا تجنّي
ساعة مصيري واقعه مِنّي
ومش بس انو خفّت الهمات
عم يلدغ التفكير بالكلمات
الجايي تا حتى سمّعك هنـّـي
عبد للحب يا الهام منـّـي
الو عا منبري بطلت غنـّـي
لأني من الهوى كفّين اكل
بدّي مع انا اعمل مشاكل
اذا العنّه ما بدها تحل عنـّـي
انا من ارض لبنان الشمالي
ما عندي للتفاهم صوت عالي
غريبه كتير عم تطلع فصولي
شو بقدر اعمل بها الكون قولي
اذ ضيّعت حالي بقلب حالي
ما بدي شوف خلقة دملجانه
اذا بفراغها بتبقى ملانه
زماني بجيبتي الله وكيلك
شو بقدر قول للعالم دخيلك
اذا من جيبتي بيوقع زماني
انا عا الفكر لفـّـيت الخطيه
وما عندي للخلاص معلّميّه
الاماني ضيّعت احسن طريقه
بعدما نفـّـست منها الحميه
وعا قول الآخ بجروحي الغميقه
الامل مفقود عند الفرمشيه
وزماني ما قدر جبلي وثيقه
تا صيب الضعف بالنظره القويه
وغرامي ما قدر ولـَّـد حريقه
لأنو علامتي صفر عْلى ميّه
وخيال الكذب سيطر عا الحقيقه
وعطاها اسم مريم مجدليه
ابعتيلي بشي ظرف خطه دقيقه
قبل ما تروح مني القابليه
تيابي بالغزل مَنْها عتيقه
اذا رقّعتها بتضيق فيي
متلك ما شفت بين الخليقه
اسمحيلي قلك بلهجه طريّه
انا من البال ما شلتك دقيقه
اذا همومي بيروحو عا التقاعد
عبكرا بكون عندك من عشيه
طل الربيع وسافر الجو الردي
والعندليب بأوف عا الطاير بدي
وصار الجمر عا سلامتو يعرق رماد
ويقول عم تبلع لسانو الموقده
الشاعر لبحر الشعر صار السندباد
موّج خيال لكل فكره مجمّده
وصار الطقس بحلاوتو يحاكي الجماد
ويطرش وجودو عا الجمال السرمدي
والناثر العندو قوافل اجتهاد
وقت اللي شاف الزهر عم يشرب ندي
خلّى القلم عا ورقتو يرغي مداد
ويكتب حقيقه باهتمام مزوّده
بلهفه الطبيعه قلعت تياب الحداد
وصارت نسيم ولون اخضر ترتدي
والغيم فصّل للسما فرحة عياد
والعشب حلمو تفسّر ببرج الجدي
ولما الوجع بالراس ما خلّف ولاد
صارت البسمه لكل شفه تهتدي
وقلب الغرامو قاتلو بين العباد
وقت اللي مرقو الناعمين عْلى الطريق
صار بلا ريشه يدق ما عاود هدي
اتركيني التقي شي يوم فيي
تا افتح سيرة اللقمه الطريه
ما بدّي توجّهيني صوب بكرا
لاني بسمع وعم ضل اقرا
إنو لهون جايي من عشيه
اعرفي يا شاغله بالحب بالي
الك غنّيت شعر الارتجالي
وانا وحياة عينين الحقيقه
تا حتى التقي فيكي دقيقه
لطلوع الضو سهَّرت الليالي
ما فيي قدرت حقق مستحيلك
لانك صايره من غير جيلك
عا درب الحب ضايع عنفواني
ما بقدر للحكي اسحب لساني
لأني بالعو الله وكيلك
لهلق ها الشهر ما شربت كاسو
بعين الناس ساقط من اساسو
وعبكرا بقبضة التأخير صاير
وما بعرف وين عم بيضل داير
علقت بمبارحه من تحت راسو
قلتلها هاتي عطف هاتي
تا توقف على الحد آهاتي
فشخه ما عندي توصل لقدّام
ومن كتر منها مفشكله الايّام
صاير نهار الاربعا تلاته
بالحب بدّي دروب مختلفه
بحب الوفاق وبكره الخلفه
الايام عندي عا الارض بالدَّين
وباقي الي شي شهر او شهرين
اعطيني شي شلحة عين بالكلفه
قالت عا قلبي بحسبك غالي
بأقرب وقت مندبّر الحاله
قلتلها شو رأيك ببكرا
قالت عبكرا عيد للذكرى
البيضل فيها ينشغل بالي
ورجْعت قالتلي الحد توصايه
ويمكن السبت يحقق الغايه
قلتلها عيفي السبت والحد
المشكل وقع بيناتهم عن جد
ومش رح يجو عا جمعة الجايي
يا واقفه عا كلمتك وقفه
سلوكك معي ما استاهل الزقفه
كيف بدك تقنعيني كيف
قلتي بغيابي صايره شقاقيف
وبالملتقى شفتك فرد شقفه
صارو همومي ولاد الحكايه
وآخي بدايه ما لها نهايه
ان كان بدك تسمعي اشعار
عا الفكر كلمه عاملي مشوار
يمكن بتوصل جمعة الجايي
حامل عصا تا اضرب حسابي
حتى بغلط ما صيب احبابي
وهلق لأنو خفِّت الصرخات
ما بقيت ضيّع بالهوى ساعات
صاير بحط الوقت بجيابي
مخزّق انا وهربان ترقيعي
لا تشتريني وترجعي تبيعي
مني عليي من عيونك غرت
لا تزعلي بعد السلام ان صرت
اضرب عا راسي وعدّ صابيعي
وينك بأيا بلاد موجوده
عنك سألني الجمر ببروده
وبالحال ضاعت لغة التعبير
كلو لأنو مسرسب التفكير
وبدها عقارب ساعة وجودي
ما قدرت حقق بالشعر حلمي
وقلّك قصيده ملحّنه استلمي
الالهام قلّي من عدا غايات
هلّق ما عندي للغزل ابيات
وما في حروف بيطلعو كلمه
مَني بقا عن عيشتي راضي
حابب تا اعمل حاضري ماضي
ويا ما ببالي خيّل المشروع
لكن ما بفتح سيرة الموضوع
بخاف الحكي لا يروح عا الفاضي
هوني انا والآخ يا بيّي
ومنّي لعبكرا تارك شويّه
ما قدرت اسهر بالدني ولا نام
اوقات عم امرق عَلى الايام
واوقات هنّي بيمرقو عليي
التقينا بعدما الاحلام شابو
بموقف للوعي مفتوح بابو
قالت طل صوبي من عشيه
قلت بمرق اذا بيكون فيي
واذا التفكير بيغيّر تيابو
قالت شرِّف ولا تكون جارح
واذا حبّيت تا تعمّر مسارح
بدون الخمر ما بدحرج لساني
قلت يا تقبريني الدملجانه
ملانه فراغ من اول مبارح
غرامي قالت بعهد المجاعه
قلت لا يهمك وجودي جماعه
قالت انت غنّيلي معنّى
وانا المشروب مصروفي تبنّى
قلت بوصل لعندك بعد ساعه
ولما رحت وتخدّر كياني
عليها صرت ادلق من حناني
وصارت صوفتي بالحب حمرا
وقبل ما يندلق بالكاس خمره
شفاف الكاس دلقِت عا القناني
شبرق شبابو الصيف والبلبل بدي
يشلح عيونو عا الجمال السرمدي
وكلما اللحن يوقف بسقسقة الغدير
يطلع بأوف يحف عن جسمو الصدي
وحلّ الرواق وفلّ آخر زمهرير
وفضّى غيار الطقس بال الموقده
ونسمات فوق كتافها حملت عبير
وتركت بتم الشوب طعمه مبَوْرَده
وبالكرم شلعة نحل جايي من القفير
تجمع رحيق وتشرب دموع الندي
وبالداليه عنقود عم يعرض عصير
وتحتو عا خيط الشمس تمعيقة جدي
وانسان رايح يجمع الخير الوفير
وحامل عا راسو سل بالحرفه هدي
يغنّي شروقي ويطلع لسانو قصير
"يمكن انا" الانفاس عندي معَوْعده
ومرقت عا هاك الدرب ست من الحرير
غير الما عندو كم مش عم ترتدي
منها كيان الجاذبيه بتستعير
وجوع النفس من دون ما يقلو حدا
قطّف زرار الورد تا يقلاّ خدي
هلي بحبها بنت الفلاني
وبقلب القلب في الها مكانه
عا فتره هجرتها لكن بلاها
ما بقدر عا الارض حقّق اماني
وغيابي بالفعل حطـَّـم قواها
وعطاها آخ محروق الديانه
ولما للقا رفعت لواها
التقينا وعملت الدمعه عيانه
نجوم الضهر شوفتني بسماها
وصرت اتحمّص ويعرق مكاني
وصارت شهوتي تلعوس حلاها
وانا عا حسابها ابلع لساني
ولما الشمس غابت من علاها
وصار العتم ينغل بالمباني
عليي لِقـْـيـِـت وطلبت عشاها
وقصدنا هون مطعم اميركاني
ولأنو الجوع باللقمه تباها
بدي معروفنا يلحّن غناني
وبغفله الطيشنه اخدت مداها
وجيابي بالهم للست فضّو
وانا فضّيت بال الدملجانه
دخيلك قلت قالت انت دخلك
قلّي بالهوى شو صار دخلك
هجمت وقلت عندي قابليه
قالت ما حدا تذاكر قطعلك
صرت العتم عم تعمل مطيه
زمانك جملة مشاكل شقعلك
ما بدك لا نصيحه ولا وصيه
غرورك سيرك ونهجك نزعلك
المحبه فيك صارت مستحيه
الغرام بشفرتو قلبك قطعلك
وجوع النفس ولـَّـدلك شهيه
لانو عن وعي ما زرعت حقلك
قلّي ليش عايش بالخطيه
وما بدك بالهوى تمشي عا مهلك
لاحق "نورما" ولاحق "بهيه"
كأنو تنينهم خلقو لأجلك
وكفتا وليش كبشّت بنقيّه
وخزقت تيابها وزغّرت عقلك
قلت عم دوب والشهوه قويه
وانتي مالكي من هون طلعه
قبل ما يصير فسطانك مجعلك
انا انسان ووجودي تهوّس
ما بدو يقشع على الارض مومس
بعدما موقفي بغيرو تقوى
عليي الما الو وجدان وسوَس
وبعدما ديب جوع النفس عوّى
خلاصي عرفت انو صار اهوس
وقلت يا قلب عا دقك تروى
وجع راسي ما بعرف ليش جومس
لحد اليوم امري ما تسوّى
حياتي تدهورت والضهر قوّس
وخلطو الناس برّا بقلب جوّا
وبقلب المجتمع حقّي تدعوس
ما عاد يهمني خصر التلوى
النظر قنديل والقنديل نوّس
وعيوني قزقزو والشعر ضوّى
ولسان الحال ما عاود مروّس
الغزل رح طلّقو يا ست حوّا
ما عاود خلقتو التفكير بوّس
لأنو صار عايش عا المقوّى
ولأنو كبّ بدها الابجديه
الحرف من طلعتو بيطلع مسوّس
انا وحياة عينك يا نجيبه
تا عيش بهم مكتبلي كتيبه
جروح الختيره صارت غميقه
وتا عكّز عا العصا مجند كتيبه
بشبابي صرفت اغصاني الوريقه
عليكي وبعدما بلّش مشيبي
بسوء الفهم صرفتني الدقيقه
لأني ما قدرت ادفع ضريبه
انا شاعر بعينين الخليقه
فقير الحال وظروفي عصيبه
بيوتي يمكن تبيّن طليقه
بس الصوت منّو عندليبي
معي الاشعار عم توقع بضيقه
وما عندي مقدره تعمل عجيبه
هجرت المنبر بأهون طريقه
وصرت قول المراجل بالهريبه
ظروفي بالغزل صارت دقيقه
ونهاية كلمتي صارت قريبه
تا ادنك عضها الوجبه عتيقه
بعدما استشهدو سنان القوايا
صرت مجبور عضك بالكتيبه
يا ظالمه احترمي كبر سني
ما بقيت اقدر عض عا سني
حظي فرط ومهجّر التجميع
خلصنا بقا قوانين لا تسنّي
صارت حياتي كلها ترقيع
البقيو من العقلات هَو هنّي
وصدّى الزمان وما التقى تلميع
غارات دخل الرب لا تشنّي
ولا تاكليني بشهوة التطليع
ولا تعمليلي جهنم الجنه
مشّي السكت لا تفتحي مواضيع
ما بحب لا ساير ولا غنّي
بالرغم انو صار خيطي رفيع
ودمعة عيوني تقمّصت بنّي
ماشي عا دعسة خاطري وما بضيع
وبعرف انا وبتعرفي اني
عم بيع هلّي مش مقامو رفيع
وبعت الاجا عا المأتم يهنّي
ومش بس اني شو ما كان ببيع
بسوء التفاهم فاتح محلات
بالدين فيكي تشتري مني
درب العليها علّمو جريي
صفوف المشي عرّفتها عليي
منشان كلما يخطر على البال
شم الهوا ابرم حواليي
مبارح عليها ختير التجوال
وما قدرت قول لفرحتي تهيي
واعطي وصايه وآخد استقلال
بجهد التركني قالب مويي
جرّبت غنّي للحرام حلال
وابعد شمس عن خلقة الفيه
لكن ما جات الذاكره بموّال
يقدر ظروف القاهره يحيّي
وبالرغم انو تشربكو الاحوال
فوق المصير شلحت عينيي
تا شوف كيف بصرِّف الاعمال
وبخلص من الآخات يا بيي
ومن بعدما صال الخيال وجال
انقـّـرْيـِـت معي مزامير ايديي
وبدقيقة الفيها اجا البلبال
جبت الابانا وصرت صلّي وقول
يا ملايكة الله اركضو ليي
جايي لعندك تا العمر ديرو
عا خراجك وتضحك اساريرو
وبيت الشعر جايب بلا قرميد
وجايب سمع للناس تا عيرو
ما عرفت كيف بسايرك عا العيد
بظرف الوقع عا الارض تدبيرو
وما عرفت صف الحب كيف بعيد
بالذكريات البلشو يطيرو
بدي دوا تا يخفف التنهيد
علّم عا وجه الكيف تقصيرو
والقهر صرّ لحالتي زواويد
تكفي العمر عا حد تعبيرو
بزر المصاري ما طلع بالايد
وصار الطفر حلاق عا الزيرز
وغلبه عليي حرقتي بتزيد
وداوود ما انقريِت مزاميرو
عيفي الضيافه جوّها ما بريد
مشاريعها مسامير بيصيرو
ولا تقرّبي صوبي عرق ونبيد
كلما اجي تا اسكر التفكير
بالكاس عم يدلق شفاتيرو
تشْرَن زماني وصارت وراقو
تبرم عقارب ساعة فراقو
وصارو همومي حد مني كوام
يمكن لأنو لحضرتي اشتاقو
سهران وحدي والكفر ما نام
وغفيو القوافي وبعد ما فاقو
وماشي الفشل عا دعسة الايام
وما عاودو الاوهام ينطاقو
مش بس انو افلس الالهام
طوّل لسانو الحرف عا رفاقو
ولما الورق ما ساير الاقلام
شعر المعنّى كسدت سواقو
واليوم بنتو تحجبت بحرام
وجنّو معي اللي شفافها داقو
بيجوز انو اعتنقت الاسلام
ويمكن خسر انجيلنا سباقو
وبالرغم انو فشختي لقدّام
وما في ظرف ما سْحَبت معلاقو
ما قدرت قلك شعر يا الهام
المعنى عا ميل وكلمتي عا ميل
مش عم يجيهم وقت يتلاقو
