انا انسان عم يكتر بلايي
ضروري بهالدني اقعد بلايي
عليها يا جميله جيت سايح
ما بدي تسأليني لوين رايح
عا مدري لوين رايح من عدايي
الطفر زرِّيع عم يطلع بكفـِّـي
وما عندي مقدره لترجيح كفه
صفر بيضل يعطيني زماني
وصارت ناقصه دعسة لساني
ما بقدر كلمتي بالحب كفي
بعدما ماتت النبره القويه
صارت دمعتي تنزل وقيه
وتعازي من البشر قلبي تقبَّل
وكتر ما بحالتي صاير مكربل
انا وعم كسدر تفشكلت فيي
عا وجه الأرض ما عندي مكانه
ولأنو الحظ محروق الديانه
لما زتني عا الارض الله
ولساني شبر من تمي تدلى
وصلت لهون بنهار الفلاني.
الأحباب يللي عيدهم عيدي
رنو الي وقالو بتنهيده
سمعنا يا ملكي عم بتضرب صيت
قلتلهم لما لعندن جيت
كنو ضربتو تنكسر ايدي
الهم على راسي مبارح عزمتو
ونوم الهنا بالراس نيمتو
اسملله عليي ما بقا ينقال
كان على نص الدرب ماشي الحال
لما بحرف سيارتي لطمتو
النقمه لعندي من ورايي جات
كلو لأنو بغازل الستات
هلي تا عنها غيب ما فيي
ميت تا حتى شوفها وهيي
قالت ما بدها تقشع الأموات
وهللي الف يا دخل عينيها
وشلح النظر بارم حواليها
عندو الحلا عا جسمها مسافات
وكلما عليها يعربشو الشهوات
بتعمل مزاد وبوقع عليها
لكومة همومي الشفتهم جلبه
ما لقيت ايجابي ولا سلبي
غب عْلَى قلبي والغضب نصحان
وقاعد انا والكاس والحيطان
بقلة حيا ومكتّر الغلبه
ما في وضع يستاهل الزقفه
وقفت وما شفت العز بالوقفه
ما قدرت اني كون فحل الوز
ما في وزن بالفكر عم ينهز
والقافيه صارت فرد شقفه
ما قدرت حقق بالشعر حلمي
ومنّي حدا صفّيت عا علمي
ولما الضمير الحي دق جراس
وقال الصمت عن جد كبر راس
اجتمعو الحروف وطلّعو كلمه
ومنشان افتح باب عا كوني
ويمرق عا وزن وقافيه لوني
طلبت الوحي تا يصرِّف الاعمال
ولما عا راسي شرَّف الموّال
قلت لسكوتي روح من هوني.
رجعت عا الشرق تا اكل كنافه
بعدما كنت صوب الغرب لافي
وصرت عا ضيعتي ادلق حراره
تا خلّي البرد فيها يصير دافي
بعيوني شفت جنّاز الحضاره
ونشاف محوَّم عْلَى نبع صافي
وبعدما جبت كم ذكرى عفاره
عزمت الهام تا يجنِّد قوافي
وتا حتى الشعر يبقى بالصداره
وما اقشع حرف فايق حرف غافي
عا كل الابجديه عملت غاره
تا رجع عهد معروف الرصافي
وبعدما مشيت تا شوف الخساره
العا ارض الواقع بابعد مسافه
وقفت تا ريِّح جرين الزياره
وعا اوف وآخ تتركلج شفافي
وشفت هونيك عا كعب المغاره
العليها تاكيه شوية حفافي
زهره طالعه بين الحجاره
لما نقلتها عا غير مطرح
فتحت تمها وقالت عوافي.
يا حباب شيلو الزير من بيرو
وفيي بشي فرحه دخلكم طيرو
المشكل لعندي قوام عم يوصال
وبالدم عم ادفع فواتيرو
شلحت النظر تا شوف وين العال
وان كان عم تضحك اساريرو
لا عم عندي بالدني ولا خال
وفي ناس خافو اوادم يصيرو
خف الحكي عا الهاتف النقال
وصوب السمع قلل مشاويرو
وما في وما بالايد عم ينطال
تا لحِّم الواقع بقصديرو
كلمة يا اهلا ما بقا تنقال
وجاب الضجر للقلب تعتيرو
لا تسلو ان كان ماشي الحال
واقف لانو في وجع بالراس
وما في شفا اقدر استعيرو
القالت لها عم انحسب اني
قلتلها قوانين لا تسنّي
عا وجهك التجعيد عندو رفوف
ووقت اللي قالت انت حالك شوف
تطلعت فيي وفزعت مني
والها قلت وحياتك كبرنا
وعم نحفر بدينا مقابرنا
جات النهايه بقلة التدبير
ومن حيث نحنا معترين كتير
مننسى بانو غيرنا صرنا
بيجوز شفنا من الدني كفايه
وعنا البدايه اسمها نهايه
عا كل مفرق درب دبي الصوت
بالبيت نحنا ناطرين الموت
وكل يوم عم بيقلنا جايي
وتا تعرفي اكتر يا انسانه
عنا الفرح بفراغ القناني
صرنا الدوا عم ناخدو بانبوب
يا تقبريني تنينا مطلوب
ننشال بالكركه وجه تاني
يا هند ايام الشبوبيه
صرلي عمر عم قول وينيي
تا روح ليها ما معي عناوين
ضيعتها والدرب ممحيه
لما كنت عم حاشر العشرين
كان الفرح تربيح منيه
وعا ذكر هجرو قلت الله يعين
بلكي الدني بتصير مش هيي
جيت على سدني وقلت بشمزين
منها الي بدموع بنيه
ولما لحقني عا الدرب تشرين
صار الوجع بالراس كميه
التقصير ثبت موقفو من سنين
وليي ماعاود ينحسب ليي
وصارت الدعسه ناقصه تخمين
بمشي عا مهلي بين هون وهون
لكن تا حتى فز ما فيي.
حبي لكي تعبان لكنّو
بالمجتمع كاشف على سنّو
البسمه لعندو عم تجي بالدين
العالم باني رحت لا يظنّو
يومين باقي من العمر يومين
متل الجرس بالادن بيرنّو
ولما بحجر ما صبت عصفورين
قلت لظروفي تفضّلو جنّو
من بعد ما ودّعت يخزي العين
قلت لجروحي بالهوى يئنّو
قانون حبي في الو حدّين
لحقو تلف ما بقيت عم سنّو
ما قلت ردة شعر من شهرين
وحياة عينيكي اعرفي انّو
هربو المعاني صوب آخر وين
وكل القوافي طلقو الأوزان
والحرف عاملها تحت منّو.
يوم الفلاني من بعد سكره
قلت لهدى لا تقبّطك دقره
بالحب لازم نكسر القانون
تفهَّين عا العيشه اذا بتكون
منشان حتى ناكل ونقرا
ما ضل عنا جو لبناني
القاصي عرف وبيعرف الداني
عنا المروّه للأبد نامت
وصاير الهاتف عندنا صامت
ما في حدا بيرنّ للتاني
اعطوني حدا الأسباب يشرحلي
وما يقول للدبور يا نحله
قلة خصيِّه عم تصيب القوم
زيارة البدها نص ساعه اليوم
بيحسّبوها عا الوطن رحله
وين الحنان ووين جبروتو
وعا قلوبنا اللي بدهم يفوتو
قايم وقاعد عندنا التشويش
من قلة الموت البشر بتعيش
ومن كتر بخلن ناس بيموتو
قالت الي بالمشهد الحامي
لعبة قمار الحب "يا سامي"
اعطيني شي سبعه تكون ذو القرنين
تفسِّر عا ارض الواقع بنامي
خْلَطْت اللقا وقلتلها دورين
لا تحسّبي السبعات منقامه
ان ما اجت سبعه بعين وزين
عا النص فيكي تقدري تنامي
حُبِّي عباده والصلا بالدين
وعا بياض ماضيلك بابهامي
مش عارفي انو الدني يومين
وتنينهم عا الارض قدّامي
انتي قصيده قايمه بوزنين
طارش عليها دموع الهامي
وكلما عا جسمك اشلح العينين
فوق الورق بيميدنو قلامي
لكن حضوري بكل هون ووين
ما بريد انو يكون الزامي
عند العشيه ساعتي بميتين
وعند الصبح يا تقبريني بكون
لبقوة انا عم عد ايامي
نتفه التفاهم والوجع قدِّي
وكف الزمان تعلّم بخدي
بدِّي عا بالي يمرقو الستات
ومتل "الصبر" صار الصبر بالذات
وقديش بدّي بالصبر هدِّي
نازل عذابي وطالع عياطو
والمشكله جايب تحت باطو
رايح لعندي وما بقا اوصال
وكلما معي عا الدرب يمشي الحال
بيطلع شعر عا لسان صباطو
عنّ عْلَى بالي شوف عاكسمي
وقت اللي صارت حاميه النسمه
ولما مرقت عا ست بنت فلان
بدوني وبدون الاصفر الرنان
صارت تلبِّس ضحكها رسمي
ولما اجت عا عينها عيني
جرَّبت اجمع وينها بويني
وغب الطلب بالحب معها صير
ولما قالتلي عم تلز كتير
حطت ما بيني وبينها بسينه
قلت لهدى عا هون قدّامي
صارت بلون الزفت ايامي
مع كل حاله بالدني تعاركت
قبل الضهر عم اقعد عْلَى السكت
وبعد الضهر بوقف على كلامي
وتا تعرفي عا سيرة صيامي
صار الكفر مندوبك السامي
ميّت عليكي من زمان بعيد
وتا موت مره تانيه ما بريد
الا بعد ما تقوم القيامه
القاصي عرف وبيعرف الداني
ظروف العمر آخات مليانه
وحياتك الايام تعبانين
كانت الكلمه تلبس فساتين
صارت تجي عا البال عريانه
وبعد الجدل والكان والماني
الها قلت بتدحرج لساني
شوقي بقلبي عمّر مداميك
قالت انا بلاقيك كنو فيك
الساعه كذا بنهار الفلاني.
قالت يا ملكي ارتجالي هات
ويا بو الزلف دبرلها هيهات
قلتلها التفكير ما لقيتو
وما في حرف عم يقعد ببيتو
حتى عا ضهرو يركبو الردات
ردت وقالت للخيال أساس
الخمره بيقولو صبها بالكاس
الشاعر اذا بيشرب عرق ونبيد
بتقوى الشهيه والوحي بيزيد
وبيصير عندو ست سبع حواس
وبعرف انا شعَّارنا كانو
يعطو الغزل بالشرب عنوانو
جاوبت واللي ما معو فرنكين
بدِّك تا يفقع سكرتو بالدين
ويطلع شَعِر عا سحبة لسانو
واللي نسي موضة كبر سنو
وصارو عظامو بوقعتو يعنـُّو
تا يغط عا الباطون منو طير
عندو زحف عا الارض جد السير
وتمو إنلوق كلمة صباح الخير
با اللفظ يمكن تستحي منـُّو
إلك يا دعد مبروك التجلـّي
حياتي مسبحه بإيدك تسلّي
شي حسنه من كرم حبك اعطيني
تا ريشي يطلع وبالجو علّي
مشاكل ها الدني صارت بدينه
حلّي اخلص من الآخ حلّي
عا درب العمر ضيَّعت السكينه
وما بقدر طعمة الأيام حلّي
اذا بغلط حرام تواخذيني
ضميري من قبل ما قول قلّي
انك عارفي ما بتعرفيني
وبدِّك متل ما بدَّك تضلـِّي
لعندك جيت وهجرت المدينه
وعارف ما الي من هون فلِّه
زمانك بالتفاهم سلّميني
وعن الأوهام بحياتك تخلِّي
معك للموت ماشي تقبريني
ولغيرك ما بقا اركع وصلّي
جريمه ان كان بدك تصرفيني
النحو والصرف ما هضمتو دقيقه
ومن الاعراب مش عارف محلِّي
قالت يا ملكي بخبرك اني
لقيت العواطف ما بقا هِـنِّي
جاوبتها عمري عا آخر صار
وفزعان لا يمرق شهر ايار
ويطلع عا بالو يا خدو منِّي
راحة فكر ما لقيت والدرفه
انغلقت عا نحوي وانتهى صرفي
ما في امل تا كون فحل الوزّ
الآخات مشيو والدوا ما انهزّ
وتا يوقفو بدِّي بقا الصَّرفي
ساعات عمري عم بينعدُّو
والموت مجرم ما حدا قدُّو
مش بس انو عارني للكون
بيقدر بلحظه يشيلني من هون
ويخرب دياري ساعة البدُّو
اسم النهايه عالم النسيان
وعا ها الكلام بتشهد الأزمان
والأرض حوت العالم بتبلع
عا بطنها البيفوت ما بيطلع
مش كل واحد بالدني يونان.
