شروقي
وينك بايا دني يا مشغـّـله الأفكار
مفحَّم عليكي صرت لا تمغطي صيامي
من بين دين الزمن عم يهرب الدبار
وصاير غرامي لكي عم يدفع غرامه
تقمّص سكوت الحكي وما ضلّ عندي نهار
يدلـِّي عقارب أمل عا ساعة دوامي
وما قدرت فوق الورق مشّي الحبر مشوار
ريق الكتابه نشّف عن شفة قلامي
مش عم بلاقي معك بالحب استقرار
وهيدا الصحيح وانا بوقف على كلامي
قلتي السعاده بتجي والحبل عا الجرار
وتا شوف ساعة هنا فتـّحت ايامي
قلبي بـِـدقـُّـو شلح عا مسمعك انذار
ومنك ما جاني حدا تا يفسِّر بنامي
انكانت دروب العمر فيها بحص وحجار
مش كل فشخه بتجي ملبس على قضامي
ميت علينا الفرح والهم نشله صار
بدنا شي نسمة هوى تا نقيم القيامه
ان كان مش رح تجي تا نحط فوق النار
بشلح ورايي العمر وبموت قدامي
شروقي
كنت بزمان المضى اعطي الشعر الوان
وتشرين لما اجا تا يغيّر الحاله
تشرين تاني شحط خلفو على الميدان
وعا الرقص لقطو سوا وصار الضغط عالي
حسيت انو الظرف من مشيتو تعبان
وماعاد ريق العلم يطلع ارتجالي
تا يصير فوق الورق يحكي بدون لسان
ويمشي عا وجه الارض تصريف اعمالي
من هيك قلت لأنا من جمعتين زمان
رح غط حرفي بحلو تا يروح بلبالي
بلكي بيصير الوحي يتقبل الأوزان
وبيصير بيت الشعر يركب بلا سقاله
ما قدرت طعمي السمع لقمة شعر رنان
ومنها عا ذوق الهوى جرحات موالي
شالح ورايي الحكي وصوب السكت هربان
ومش عم بلاقي وما يطلع على بالي
شروقي
بهند اتصلت وقلت ما بركلج مشاوير
لعندك لأنو الهوى كترت مطاليبو
ما ضلّ عندي نظر للشلح والتصدير
يوم النهايه الي سوكر مكاتيبو
مش بس اني الك عم احفظ التقدير
آخ اللي عايش معي بوجودك بسيبو
انتي بذاتي حلم ما بيلزمو تفسير
كلما عا ذاتي اجي التفسير ما بجيبو
بالرغم انو الزمن عنك طلب تقرير
وبالرغم اني الهدف بالشعر عم صيبو
رده ماطلعت معي من قلة التدبير
والوزن لما انعرض ما انهز تجريبو
طلق وراقي القلم والهم صار كبير
والارتجالي بدي يغيِّر اساليبو
وهربو حروف الهجا من خلقة التفكير
وما ضل الاحرف قاعد بحضن البال
عزمتو تا يمشي معي نفـَّـس دواليبو
شروقي
هوني بقرب المضى وهونيك حد الآن
لاقي عا حيط ومعي كومة سلاماتي
وذكرك عا فكري اجا من آخر النسيان
لما فتحلي الهوى درفة ملفاتي
كانو الليالي لنا عا ذمة الوجدان
وعن جد كنتي جمر والنار جوّاتي
والحق كلما اندقر يوقع على الطليان
وكلما عطيتك شعر قلك قبَل هاتي
تغيّبت عنّك سنه وما عرفت يا "ايمان"
بالوزن انو السنه رح تطلع تلاته
لكن لحالي قلت لما بيجي نيسان
بيدور شمّ الهوا بمستقبل الآتي
حبك عطاني دني فيها زماني كان
لما بحكم القدر ضاقت مجالاتي
وسفـّرت كل الكفر من خلقة الايمان
وصرت لأبانا الذي قدّم تحياتي
عشتي بذاتي عمر من دون استئذان
ومن دون ما تسألي عن درجة خواتي
وما قدرت اعرف أنا انتي بأنا من زمان
لو ما اجاني ظرف ارجع على ذاتي
شروقي
مقطوع عني الهوا وما في هوى موجود
جيبي الجمال وتعي بمواقفي طيري
صبري عا آخر رمق والجمر عا البارود
وشنكحت كبر العقل بضروب تعتيري
البوسه الشلحتي الي يمّ العيون السود
فيها استقام الفكر تا يولـّد الغيره
ومش بس راسي اندوخ حنّ القشر للعود
وهربان حلم اللقا من درب تفسيري
ماشي برفقة انا والطقس منـّو برود
وكلما خيالك طلب تا تنفتح سيره
بغنـّي عتابا إلو ومخمّس المردود
وهوّي بيقلك سمع للعاشقك عيري
حيطك بوجهي علي لكن ما حط قيود
مدماك منّو جبت لشموخ تفكيري
بطبشور فوقو كتبت وين الكرم والجود
وفاتت بفسخ الحجر طعمة طباشيري
بحبك لانك كرم ما بيبخل بعنقود
وصوبك بقلة حيا بتكتر مشاويري
قلبي فتحتو لكي وبطلتك موعود
وما زال حبي لكي متل العباده صار
بكرا "ابانا الذي" عا الارض بتصيري
شروقي
بالرغم انو القلب عا موطني شعلان
وبالرغم انو الدمع عم يعمل عيانه
بارضو تا كفي العمر مش وارد بها الان
بعدو بنوبة ضعف والجرح جوّاني
الغربه ملانه قهر والمنفعه اطنان
فيها لقينا عمل يرفعلنا مكانه
وقلنا الشموخو انعرف ببلادنا ربيان
لو استرالي انجبل بيضلّ لبناني
يا مهاجرين الوطن يا حباب يا اخوان
كلما اتصلتو بحدا قولو عن لساني
عنا بسدني وطن بالشكل والألوان
ولكل حاله وظرف ابره واسطوانه
وعنا حديث الشعر واللي إلو اوزان
وماشي لطلوع الفجر موتار الغناني
وبالسوق عنا عرق شرّف عرق قازان
حكايات عنو انحكى بفراغ القناني
وعنا مرابع سهر فيها الطرب طوفان
وعا كل مفرق درب دكانة سمانه
وكمان عنا ضيع تشبه ضيع لبنان
لكن ما عنا قعد تحت السنديانه
شروقي
أقام رجل الأعمال السيد سليم الشدياق سهرة وداعية للشاعرين العملاقين زغلول الدامور وموسى زغيب دعا اليها بعض أصدقاء الشاعرين والأقارب.
وبالمناسبة ألقيت بعض القصائد الزجلية التي وجهت للصديق سليم والسيدة عقيلته بينما ألقى الشاعر عصام ملكي قصيدة مازح فيها الشاعرين قائلا:
تصورت موسى اجا بألفين وثلاثين
"وبو لياس" شرّف معو والريش عالزيرو
وقالو دعسنا سوى عا رقبة التسعين
وكلمن رسول الشعر عا حد تعبيرو
وهنـّي ما عندن قوى ولو بيّنو شياطين
قالوا منام المشي ما حل تفسيرو
نصن عياري بقطع ولزاق موصولين
بدون البراغي حدا مش ممكن يصيرو
موسى ما عندو عصا ومهرهرو تشرين
وجوزيف منو وقع عا الارض تفكيرو
و"شدياق" قلـّن تعو ها "الاجر" هيدي لمين
ومين الموقـّـع "اذن" عا حفة سريرو
وبالحال تلفن الي عا خراج بشمزين
وقلي يا ملكي العمر دخّن سواكيرو
موسى الزغيبي وجوزيف الهاشم مساكين
تا يصير فيهم شعر يحكو بها الايام
لساني ولسان المرا لازم يستعيرو
شروقي
من بعد غيبه رجعت عا موطني لبنان
تا شوف كنـّو الزجل عم يلبس جديدو
وكنـّو عا قلبو بتجي متحمسه الألوان
والارتجالي اذا بيحمل بواريدو
ولمّا عا بيتو برمت بالسهل والوديان
لقيتو عا آخر رمق هوّي وتقاليدو
وما كان يحكي معي باللحن والأوزان
الشبّاك هوّت الى مره بقفا ايدو
ولما سألتو بدمع شو ركـّع البنيان
قلـّي لأنو الضعف خاطب عواميدو
وبالسوس قلـّي السقف صاير عظيم الشان
عامل قبيله الو وكترت مواليدو
والباب عندو قفل صاير بدون لسان
الستره لحالو طلب تا يخف تنهيدو
بيرقص بنسمة هوا وكل الخشب تعبان
فارط عا آخر مدى وبعيد توحيدو
وهونيك قلت بغضب للشعر شوف الان
منك حروف الهجا مش رح يستفيدو
بلبنان بيتك صعب يرجع متل ما كان
حجارو بتاني دني وعا الارض قرميدو
شروقي
سدّت بوجهي الدني جيبو فتح وحماس
غاطس ببحر الشعر والأوف غرقاني
بلكي بيحلو العقد وبعطف مار الياس
بيصير كاس العرق يستورد قناني
حاسس بانو الوضع قايم على الوسواس
ومن حيث انو الطفر ما في الو ديانه
طيّرت آخر قرش من جيبتي عا الكاس
وسفـّرت ضرس العقل من وجبة سناني
بها الظرف صار الصبر عم يعلن الافلاس
ومدري عا ايا دني عم يهرب زماني
حظـّي عا درب العمر ماشي بدون لباس
وكلمة "ابانا الذي" من العطف عريانه
هبط كياني وصرت هلق بدون أساس
وهمه ما عندي بقا والضعف هجّاني
بسحبة لساني كنت جيب الفزع للناس
وهلق يا ولدي صرت افزع من لساني
شروقي
مره دعاني الجبل تا اقدح مشاوير
بين الدروز بعجل عا حد تعبيري
وحظي جمعني ببنت فيها الحلا قناطير
وصرت على كعبة شعر علـّق تقاريري
ومن بعد أخد وعطا وقعده عاكتف الشير
قلت الحياة اعرفي دخنة سواكيري
لما النهايه بتجي بيتفشكل التدبير
ومنروح من هالدني شحمة على فطيره
ضحكت وقالت الي التقميص دورو كبير
بعد المنيه سوى منرجع عَلَى الديرة
ومنعيش عيشة هنا ومنقبر التعتير
هيكي بيقولو الكتب بحساب تقديري
ووقت اللي قالت الي صلـّي تا عجل تصير
تطلـّعت فيها وقلت عا فتحة السيره
عجل المسمّن لكي برجع عَلَى بكـّير
عا شرط انتي ارجعي بكـّير بكيره
شروقي
طوفان صار الهوى جيبي سفينة نوح
بتمشي عا بحر الشعر ان كان لبناني
احسن ما عيف السما وابكي عا حالي ونوح
وتصير نص الدني آخات مليانه
تا حب غيرك حدا ممنوع مش مسموح
فيكي الجمال التقى والهَم نسّاني
زهره بروض الدني والعطر عم بيفوح
وبيضل جوّك حلو وعا ذمّتي هاني
عا طول باب اللقا بيناتنا مفتوح
وهلق بقلك انا وعم ركلج لساني
بالبال انتي معي وللروح انتي روح
بإيدو غرامك زرع بالحبّ ايماني
مش بس يوم السبت كان الاحد مطروح
اعمل زياره لكي برفقة دملجانه
ولما لقيت السبت للشغل بدّو يروح
ومنشان يوم الاحد ما يلحقو طراطيش
عطيتو لجام وركب عا ضهر الخزانه
شروقي
جيبي الزمان وتعي يا ساكنه بالشام
ولو كان حصة اسد عندك بالمدينه
بلبنان فوق الورق بيمَيدنو الاقلام
وغمزة عيون الشعر يا رب نجيني
ريقي النشاف اعتنق رح جن يا الهام
شفافِك بتمي ادلقي من بعيد واسقيني
ما قدرت لاقي عرق عا الظرف يرمي سلام
ولاطي مصير القدح بخيال قنينه
بالحلم كنتي معي وكان الحكي بلا كلام
وصارت الشهوه حِمل لما غمرتيني
ولما عيوني فتحت ولقيت بصر بنام
قلت لخيال النـعـس عا العين لاقيني
وما زال شوقي لكي ماشي بدون فرام
دخلك عيار الشرح تا زيد خليني
صوبك ما بقدر اجي ما بينفشخ قدام
الصدفات مني استحو والشغل عاميني
وما في فراطة فرص والوعد مش بسّام
وما قدرت عملة وقت اصرف انا وفيني
تا تَوب ابعت لكي مطرّز بريش نعام
وقول الجميل البسي ريتو الف مبروك
ومليون مره الف ريتك تقبريني
شروقي
هربان مني وانا من ها الدني هربان
الايام عتقو معي وساعاتهم ناحو
عنّ عْلى بالي الغنا تا سفّر الاحزان
العا الضحك قعدو سنه ولليوم ما انزاحو
ناديت بحر الشعر تا يدبّر الطوفان
وعا البيت يبرم اذا موجود مفتاحو
تا جيب كمشة وحي من عالم النسيان
بلكي بيصير الحرف يوقف عَلى سلاحو
وجرّبت غنّي صور لشقايق النعمان
النامو عا كتف الدرب تا شوي يرتاحو
تا شوف كنّو الهوى بيرجع متل ما كان
وموّال دخلك تعي بيقطّب جراحو
ولما لقيت الحكي بعدو بدون سنان
عِزمو عيوني الوما تا يشبّق جناحو
وضاعو القوافي معي عا مفرق الاوزان
وزعلو حروف الهجا وعا بيوتهم راحو
شروقي
لحالك بسرعه ارجعي يا مقمّصه كافور
وبفرنك حاجي بشر عا ذوقك تبيعي
ودّع حضورو العطر وتبخّر البخور
وقلبك اوامر عطى ومش قابله تطيعي
بالامس قلتي الي انّو الوضع مشكور
ويمكن بحكم الهوى تنجح مشاريعي
لكن بتاني لقا عمّر حياكي سور
تا يكون طول الوقت بالارض تطليعي
صارو شروطك حمل والراس عم بيدور
وهمّي عملني شقف وبعيد ترقيعي
انغلقت بوجهي الدني وما بينفتح معبور
ورحت عْلى حالة شقا وما انهز ترجيعي
وما زال جايي انا برفقة صباح النور
افتح حديث الهوى واشرح مواضيعي
اعطيني شي ساعة زمن تا عدّل الدستور
ومرّق سطور الجسد عا لهت صابيعي
شروقي
عصفت رياح الشقا وصار العتب جلاّد
وعلقم مصيري اجا تا يمرمر زماني
والخمر لما انتهى جابو الهموم ولاد
والكاس بوزو برم عا فراغ القناني
دقّيت الها وقلت بدّي وعود جداد
ما بقيت متل الأنا غيّرت الواني
مجبور قاضي البشر لا تسمّعيني هماد
ما ضل عندي جرح ينعدّ براني
مَني امير الإجا راكب عا ضهر جواد
انسان عادي ومعي باسبور لبناني
ان كان بدّك هوى «الملكي» على استعداد
يغيّر نظام الدني ويدرس قسم تاني
عطيتك مسافة شرح بس الحكي ما فاد
وجرّبت خلي الوَمَا يعمل ترجماني
وحرزان كان الشرح والاهتمام بلاد
لكن ما كنتي معي بالحب حرزانه
لا شك انو الكذب بيضلّ عندك زاد
والصدق ما في الو بحسابك مكانه
لعندي ما جيتي ركض لما حنانك زاد
جيتي تا خدتي حكي طالع عن لساني
شروقي
وينك يا واقع تعا وسفّر بني الاوهام
بلكي الوعود بتجي وبيروح بلبالي
دلّيل صار الفرح والآخ عندو جمام
وتا شوف وين الضحك عم اسهر ليالي
ضيّعت حالي بأنا وجاب القلم آلام
وما عاد يطلع معي شعر الارتجالي
ولما جبرت الحرف يقعد بصف كلام
تفشكل بنقطه ووقع تا يتشّ موالي
ووقت اللي صار الهوى علامات استفهام
ما قدرت لاقي وضع ينهزّ كرمالي
وساعة ما قالت ندى ما بقيت ارمي سلام
شقاقيف فوق الدرب زتّيت من حالي
وهلّي عليها الحلا علّق لحالو وسام
راحت عا تاني دني وما ودّت رساله
وهلق بكمشة وَمَا عم اسأل الايام
ايمتين بدها تجي مشوار عا بالي
شروقي
الشهوه بلاد وانا ما بعاشر الاوهام
كلما دقرني الغزل عم روح بترابي
معليش لولا غلطت شي يوم يا الهام
عا طول شلح النظر بيطيّر صوابي
كلما بحقي طلع حكم البشر اعدام
بيفتح بوجهي العرق للشرب بوابه
وبتصير عندي القوى علامات استفهام
وساعة لزومي الي بتستفقد غيابي
ليلي بنهاري انوصل متل الخلق ما بنام
صاير بطرح الحلا عم اضرب حسابي
عطيت لصبايا العصر ايام استسلام
من هيك طول الوقت بيصوفرو جيابي
شو صار فيي اعرفي مع خالتك بالشام
لما عا غفله رجع من غيبتو شبابي
صارو بيقظة زمن يتفسرو الاحلام
وصرت بهبوب الهوى اطلع من تيابي
شروقي
شيلي غشاوة سهو من خلقة التفكير
وجيبي صباكي وتعي تا الوقت نصطادو
النا المحبه دوا وايامنا سواكير
ولا يوم كنا الصنم ننعد عبّادو
ما بريد انو الحيا يقدح معي مشاوير
لما بيكون الهوى عم ينفلش زادو
ودّي شي شلحة نظر تا جن فيها وطير
وخلّي زمان القهر يرجع على بلادو
صارو همومي حمل من قلة التدبير
وغيّر مزاجو الفرح تا يعلن حدادو
خلّي بصيص الامل ما يضل طفل زغير
حتى بسباق العمر يركب على جوادو
حظّي قطعلي الدرب عا لغّة التعبير
بكلمه حروف الهجا ما عاودو تمادو
وكلما استقام الحكي بيخلّف حزازير
وبيصير وقت الشرح يبرم على ولادو
وهلّق بقلك انا صاير عا كتف الشير
ونقص العزيمه بدي ومشاكلي زادو
بلا جرين حلم اللقا راكض ورا التفسير
وعا السكت جمر الصبر عم يلبس رمادو
