أربعون الشاعر حنا عبيد

"حنون" راح وصارت الدمعه غدير
حقوقو بيوت الشعر منها وافيه
بنت المعنى بهمتو لبست حرير
والأبجديه عليه كانت لافيه

مش بس انو كان شاعرها القدير
فسّد عطش فكرو بمناهل صافيه
وما في حدا ما قال يا خي الامير
يعطيك الله كل همه وعافيه

انقلنا عظيم الشأن عنو مش كتير
كلمة عظيم الشأن منها كافيه
من جهتي للشعر عدّيتو عبير
 وشميّت عطرو بالوزن والقافيه

قلبو حمل اخلاص جواتو
والشعب قدّملو تحياتو
ومتل المزار اليوم قبرو صار
بينسى عليه الزايرو ذاتو

احباب "حنا" من البدايه كتار
وعا قلب قلبو كلهم فاتو
ومتريت بعرف حبها قنطار
هاتو ضيع عا شكلها هاتو

ومن ام يوسف شو انا محتار
ومن يوسف وشارلي ومن بناتو
حالي سألت وسألت باستمرار
كيف بيجو عا الاربعين نهار
وخمسين مره بغيبتو ماتو

الى روح الشاعر الصديق حنا عبيد




صورة تاريخية تجمعني مع الشاعر المرحوم حنا عبيد

 زْمانك يا حنا عبيد سايرتو
وفكرك عا وزن وقافيه عصرتو
كنت الوفي ومشيت عا القانون
رفيقك عا صيحة ديك ما نكرتو

الا انت ما ردت مرّه تكون
وقرش اللي هوّي حْرام ما دقرتو
عليي وعا غيري كان فيك تمون
الشفتو خرج بالعاطفه غمرتو

وربيّت عيله حبّها من جنون
ومستقبلك عملاق صيّرتو
ووقت الصرت تعبان يا حنّون
خدموك بعيونن اهالي البيت

هلّي لهم عا الحب عمّرتو

وهلق "يا حنا عبيد" جينا نودّعك

ونحكي معك لكن ما فينا نسمعك

من دمنا منعطيك عا اهون سبيل
ان كان فينا عا الحياة نرجّعك

مشينا سوا وكنا على مجال الطويل
نغنّي زجل ونجاوب عْلى مطلعك
وبكل رده تقولها تجسّد "خليل"
وعا كل خطوه بالتفاهم نتبعك

"ريّس" عا جوقه كنت بالماضي الجميل

وبكل دقة قلب تعرف موقعك

من رقبة الالهام جبت المستحيل

وكان الحرف يمشي بهزة اصبعك

وبالارتجالي تسجّل عيارك تقيل

المش قدّها ما بيقدر يغنّي معك

بالامس كنا نشوفك ونروي الغليل

وهلق لأنو تشقلبو ظروف الحياة

بمراية الذكرى عا طول منقشعك

ويا ام "جو" وام "شارلي" "والبنات"

شو كنت عنكم قول للناس اسألو

بقدّم تعازي من صميم الواجبات

وبقلكم يا كبار بكلام المَلو

دلقتو عا "حنا": اهتمام وحب ذات

والله دخيلو شاف شو كنتو الو

حنا رحل يا اهل يا اخوان
وبدموع سيدني تغسّلت متريت
ولا يوم بنسى كيف معنا كان
وكيف كان بطرس آدمي ما نسيت