سركيس كرم بالفعل عنوان الكرم
حاضر وجودو انعدّ مش ماضي انصرَم
وصيِّة شو هوّي بالقلوب مسجّله
ومَنها بعيده يعيّطولو المحترَم
بيقدر بكلمه يحلّ أكبر مشكلِه
وها الموقع الممتاز بكلامو انغرَم
ابن الكرم والمعرفه قدرو عِلي
ولكلّ مصدر حقّ دولابو برَم
ولا شكّ مُرّ العيش بوجودو حِلي
ومن عطف الله ما بحياتو منحرَم
للصدق مرجع، للخطيّه قنبلِه
معروف إنّو كلّ ساعة ربّها
وبطلّتو منشوف يوسف بك كرم
مش من زمان تعرفت عا الشاعر المخضرم الاستاذ عصام ملكي، بعد ما كنت بالسابق ألتقي فيه بقصايدو المزيني صفحات الصحف، وأفرح بأسلوبو المستحب في معالجة القضايا يللي ما بيقدر يعالجها إلا اللي بيحملوا قلم ما بيشبه بشجاعتو إلا سيف الحق، وما بيعزف بحنينو إلا ترانيم المحبة.. أكتشفت فيه هاك العاشق للكلمة المتجددي البعيدي عن التصنع والتزلف واللي بتتناول الأمور بلوحات شعرية أنرسمت بأسلوب شفاف غير تقليدي.. وجدته هاك الأنسان المفعم بالأحاسيس الوطنية والانسانية والغرامية.. كلماتو بتنبع من أعالي قمم التواضع الانساني .. من صلب ثوروية الأحلام وسحرها تا تدخل القلب والعقل وتتبادل معن مصداقية العطاء الفكري وجماليات الروح.. فتحية محبة من القلب وشكر من صميم التقدير والاحترام للشاعر الصديق الاستاذ عصام ملكي مع تمنياتنا له بطول العمر والمزيد من العطاء الشعري المرموق..
