بقلّك يا خيي ودمعتي وقيه
بالبال عم بتضل يوميه
ضعت بانا ومش عارف الدبار
سجل غيابك اربعين نهار
وآخ الطويله تسجلت فيي
رحت وكنت جوّات عينينا
وتا نرجّعك منّو بايدينا
ريقك بنظره ان كنت ناوي تبلّ
حدفلك شي غيمه ومن وراها طل
وشوف العذاب مكوّم علينا
الجنه عندما توصل عليها
وتشلح نظر فيها وحواليها
غنّي "لابنك" بالدمع موّال
وان شفت "بنتي" حطها بالبال
"وامي" دخيلك بوّس جريها
وحظك اذا ما حلّق صفوفو
يمكن معك ما يِطوَل وقوفو
"الوالد" توفى من كوام سنين
بارض الوطن بظروف تعبانين
بتاخذ وقت تا تقدر تشوفو
وبلسان نحنا وكل المحبين
ان سألوك عنا اهل بشمزين
قلن عا وجه الارض ما تهنو
طول الوقت بالآخ بيغنو
جايين يا تاني دني جايين
صارو يا خيي همومنا سربه
وخيط الشقا عا خدودنا حيَّك
جابوك حتى تروح عا التربه
متحمم بدمعة شِعر خيَّك
رحت عْلَى «ملبورن» وهجرت قربي
وهلق لأنو نقلت من حيَّك
رايح من الغربه عَلَى غربه
فيها الك اصحاب ومحبِّين
وابنك «روبير» وامك وبيَّك
لما عا سيدني وصلت الاخبار
شك الحزن بقلوبنا سهامو
يوم النهايه ما الو دبار
ساعة ما بدُّو بيكسر صيامو
ما في حدا مَّنا ما عقلو طار
وقال الزفت من لون ايامو
زوَّار جينا عا الدني زوَّار
ما في حدا بيمشي عا وجه الارض
الا بيكون الموت قدَّامو
وبالرغم انك بطَّلت تمشي
دربك كنت عم كنسِّ برمشي
ولما المرض عا صحتك قرب
ما عدت لا تاكل ولا تشرب
وضليَّت تضعف تا صرت كمشه
وهربت وعود النافخه صدرا
وصار الزمن بمشاكلك ادرى
ولما قلت والراس عم تحني
دخلك يا رب الكون سامحني
شدَّت بايدك مريم العدرا
بالبال رح بتضل دايم دوم
الغبره ما شافت خلقة كفوفك
لهوني اجو تا يودعوك القوم
وتا تشوفهم ما ساقبو ظروفك
ومن جهتي مش رح بوجه لوم
عا الما اجا تا يرد معروفك
بيجوز وقتو ما سمحلو اليوم
لما العزيمه من السما بتوصال
بتاني دني رح يرجع يشوفك
