لبنان لبناني

شروقي

عني يا سمرا ابعدي صار الخيال خيال

وكاتب عا لوح الفضا مش هون عنواني

شوقي لبلادي بكي تا لبّسو شروال

واشلح بخلقة ورا طقم البلخزانه

بجيبي عا ذمة انا شباب الفلوس قلال

وقرش اللي ختير معي المصروف نسّاني

وحظي بشرب الخمر عا نهايتو دلال

بالكاس صابب الي فراغات القناني

بقسمه وبجمع وطرح عم اضرب الامثال

واسأل بداية عمر عن آخر زماني

بدّل بيقولو الي "بمراكبه" الاحوال

وطرطش بلهت الحكي مسافات دبلانه

ما قدرت غني شعر عا منبرو خيّال

ودوّر بايد الحرف موتار المعاني

كلما فقست الوحي تا يزلغط الموال

بيصير شعر السكت يطلع على لساني

لا تسمّعيني تعا موجود استقلال

ولبنان تحت السما ما في الو تاني

وحياة حبي لكي يا عايشه بالبال

برجع عا ارض الوطن وبذكرياتي بعيش

وقت البيقولو الي لبنان لبناني.

إلى روح الشاعر مخايل ابراهيم مخايل

الشاعر مخايل ابراهيم مخايل من الشعراء المتقدّمين، ترك أثراً لا يُمحى في قلوب محبِّيه وعارفيه. عرفته عندما جاء إلى أستراليا وزرته في الوطن، فوجدت فيه الإنسان المحبّ والطيّب النبيل، صاحب الكلمة الجميلة، والشعر الراقي.

أتقدّم بأحرّ التعازي إلى أسرته وأقربائه وأصدقائه ومحبّيه في الوطن والمهجر.

الشاعر مخايل بعرفو مــــن زْمان

كلّو محبّه وعاطـــفـــــه وإيمــــان

شاعـــــر قدِر عالأبــجــديِّه يمون

بالشعر يمكن مــــن بَني "بدادون"

مش بسّ للعيله الـــعــزا بيكــــون

لقرايبينو هـــــَـــــــون وبلـبـنــان.

بْحَقل الــعـَــزيـــمـِـــه قايل القايل:

بالــعـــاطــــــفِـــــه بتعلِّم متـايـــل

عا أرضها مخايل بشرعــي كَـوْن

ومتل اللي قالــــو بْقولـهـا بالمَون:

من هالدني الما لها لا طعمه ولون

قــــــال الأبانا وسافـــــــر مخايل.

وبيقول بالعالي ابــــــــــــن مِلكي

وحقُّو معو إن كــــان عــم يشكي:

بغيبة مخايل راحت الأفــــــــراح

مـــن هالدني وتجمهرو الأتــراح

وهلّق لأنُّو بـــهــــا الطريقه راح

حقل العزيمه دمّ عــــــــــم تبكي.

مخايــل لطيف وجَبلتو مـِــنَّـــــــا

وإخْــــــــــــــوه إلــو وحياتنا كنّا

شاعـــر مربَّى وطعمتــو معمول

ومن قلب قلبي بقول عـا المكفول

بقدِّم تـــــعـــــازي لعيلتو وبقـول:

راح اللي متلو مــــــــــــا بقا عنَّا.

وضع تعبان

ـ1ـ

يا طالبين الحق صوبي عرّجو

بدّنا حرف عا حرف تاني نزّوجو

وبدنا محبه بها الدني وبدنا أمان

قولو لهونيك وهون ول أيا مكان

شربل بعيني قال كلمه من زمان

أكبر جريمه المستقيم تعوعجو

ـ2ـ

يعني على الخربان لا تتفرّجو

أمر المعقّد كل ساعه عالجو

ودخل السما لا تقطعو حبل الأمل

ولا تأجّلو لبكرا وبعد بكرا العمل

بيجوز بكرا وبعد بكرا ما يجو

ـ3ـ

صار الوضع تعبان لا حولا ولا

وجانا طفر أخلاق بسنين الغلا

قول وفعل منريد ما بدنا كلام

ومن قلبنا بدنا الأبانا والسلام

انكان الصلا تمثيل ما بدنا صلا

ـ4ـ

كتار العا غيرن بالدني حبّو السطو

وقلّن ضميرن تسلمو.. حقوق امعطو

وقلال قالو لصاحب القلب الكبير

هللي بيضل يسامح العالم كتير

بيكون عم بيقللهم ضلّو اغلطو

ـ5ـ

يا شاردين بها الدني لا تحاولو

تا تركّعونا بتطلع اللعنه ملو

ولا تزعلو ان كنت أكتر من صريح

عا الهيكل بكرباج "سيّدنا المسيح"

فات على هللي عا الديانه تطاولو

**

بدنا شعر

بحر "الملاحم" والدبح أسطول

السوق انضرَب بمْقوَّر ومحشي

يمكن مسيح الشعر عم بيقول:

كلّ البيكون مكرسَح بيمشي

زُمّوا المعاني وتخّنو العنوان

لازم يكون الشعر حزّورَه

تا يصير كلما يفصِّل الإنسان

يحمِل معو للشرح مازوره

"اعطوني جبَل تا إنفخو عصفور"

"ونتِّف رياشو وإعملو الله"

شو هالوحي؟ شو هالحَكي المأجور؟

وعا أيش يخزي العين واسمالله؟

وحياة عينيكم يا عينيّي

كلمن بعقلو بينزرع حقلو

هيدا شِعر من شَعر وشويِّه

بَدّو فرِق عالنصّ يلبقلو.

بدنا شعر متعمَّد بإيمان

وأوزان يوم العاصفِه يهَدّو

شبعنا من الأشكال والألوان

قولو الأبانا وعالبحر ودّو.

يا ناظمين الشعر

شعر المعنَّى فقَّس زرارو

ودوزن عا عود الفنّ أوتارو

والإذن صارت تجمع المحصول

وتترك صدى دعسات مشوارو

يا ناظمين الشعر عرض وطول

وعم تتركو الأوزان ينهارو

جنّو القوافي والحرف مخجول

وبيت الشعر عم يندب حجارو

اعطونا البيكون مسَوكر ومكفول

ومكفول إنُّو متلَّت عيارو

لا تبرطلونا بحبّ مش معقول

نرضى بكلام اليخرب ديارو

شعر المكسّر عالقحط مسؤول

ما في حرف عم يشكر بجارو

وبالرغم إنّو مقطّع وموصول

ماشي بدعايِه لحدّ زنّارو

ومنشان ما نخلّي الحديث يطول

بشعر الحديث الطارت خبارو

بلسان عصبة شعرنا منقول:

الشاعر إذا ما بينحفظلو بيت

بتكون خَرج الكبّ أشعارو.

ما في حدا شو بدّهم بدّو

يا مبوّسين الشعر عا خدّو

وجَزر الحكي عم تخلطو بمدّو

هزّو ضمير المعتدي عالكار

وقيمو القيامه وعالبحر ودّو.

هلّي بيضلّو يمثّلو أدوار

إنّو اللحن حاضر لا يحتدّو

تا نشدّهم نحنا أخدنا قْرار

كلما عا وزن وقافيه شَدّو

صفّ الحكي ما بينحَسَب أشعار

كلّ البيوت عليهم انهدّو

حاجي علينا يكسّرو فخّار

العم يفطْرو عالشعر ما تغدّو

مَنّو الشعر لعبة ولاد زغار

حاجِه بقا القانون يتحدّو

كرمال الله يريّحو الأفكار

ما في حدا شو بدّهم بدّو

المَعْنى عا نغمة قلّة الدبّار

واللون شاف الهمّ عن يدّو

والأبحديّه بقلب عرس النار

دابت قبل ماحروفها اسودّو

العم يكسْرو الأوزان صارو كتار

حَبّو عا نظم الشعر يتعدّو

وقال الزمن عا صفحة الأخبار

بهالعصر هلّي بينسمو شعّار

صارو على الصابيع ينعدّو.

ريحة الزعتر

قــُـومي تا نمشي عالمشي معوّد

بْجاه اللي نــــام شهُور بالمزوَد

غَطّو الطيور ونَقوَدو الزيـــوان

والسُّود مش غربان يــــا إيمان

بمَوت الدني عـــم يلبسو أسود

بنتفة غْطَيطَه الجــَـــوّ متستّر

ومعليش لــولا عـالشمس شفتَر

الفلاّح حامــــل سكّتو والنير

وعطر الورد عـــم يعمل مشاوير

بنسمة هــــوا مع ريحة الزعتر

قـالت: يــــا قلبي رَوّق شويِّه

راح الــوقت مـــن بين إيديّي

وراح الربيع وراحت الألــــوان

وكـــلّ التراب مشوّب وعطشان

وما في غيوم تْفَنتِر مْـــويّـــه

ورِجعِت تــقــول بشلح عينيها

لمّا صــرت إبــْــرم حَواليها:

خلّيِك هـــوني بألف عـين وزين

الطرقات عمَّا تْبوِّس الإجــريــن

ومـــا في حدا عـم يمرق عليها.

الى روح الصديق جورج خزامي

يا جورج رحت وكنت الخزامي

بروض الدني.. ومن عيلة خزامي

كتبت عليك الآدميه كتاب

"بالجوليا" الفيها الوفا نامي

عرفتك نبيل وللكرم مزراب

وعندك ما كان القُلب قوّامي

خدمت الجميع شباب مع شيّاب

وكلامك ملبّس على قضامي

تيابك أنا ما شفت متلا تياب

تفصيلها بيساقب القامه

كنت قلك لبسك من جياب

يا حاتم الطي على إيامي

بسيدني كنت للجاليه دولاب

وبكل برمه تترك علامه

تسحر بشر بكلامك الجذّاب

واسمك عا خد المجتمع شامه

يا جورج في عندك دني أحباب

وما في لزوم نعد الاسامي

ما في حدا إلا ما قلبو داب

ودلقت العيله دمعها الدامي

تا تتروح هلّق ما حسبنا حساب

غصّو بكتابة كلمتي قلامي

يا جورج وحياة الابن والآب

هللي عا شكلك بالحياة قلال

وين ما كنت بتضل قدّامي

**

ما في حدا ما قال يا ويلي

راح اللي كان على القلوب يمون

بقدّم تعازي لحضرة العيله

ولقرايبينو ولأهل عاصون

ختيار صرت

يـــــــــا نحْس خفِّف ضَغطَك شْويّي

مـــــــــن هَـــــــون لا تاخُد حَواليّي

صـار الأمَــــــــــل بالكَيْف خَبْريّات

وعــاش الطــــفـَـــــر بكفُوف إيديّي

وعندي مـــــن الأوهــــَــــام كَمّيّات

عالإنــــفـــــــراج بقلّـــهــــــا: تْهيّي

ومستقبلي شْلحتو بِيوم خْــــــــــوات

وحـــــاطِـط ورا قــــــــدَّام عـِيـنـيّي

وبَيت المعنّى مْسكَّـــــر الدرفـــــات

وجـــات العلامِـــــه صفــــر عامِيِّه

ويا بو الزلف هربتْ مـــن الهَيهـات

وشَهريـــــــن إلــْـهــا تــبْـــرم عْليّي

بْموس الصبر عــــم إقْطع مْسافـات

عا دروب عــم تاكل مــــــن جْريّي

خِتيار صـــــــــرت وماتت الهِمّات

ومنشان تـــــــــا عندي القيامِه تْقوم

بالزِّلــْـط مِشيو بْـــنــــــــــات دِينيّي.

قاعد بحالي

رح جن وحياة المار تمورا

ويا ما بصلاتي مضجر ديورا

بخراج عمري من سنه ضليت

وانتي بمدري وين مقبوره

فيي ما بعرف ليش ما توصيت

صرت بعيون الناس اسطوره

بصف المحبه همتي شديت

وقدي حدا مش آخد صفوره

يا ما بقلبي من شقا عبيت

دمعي بحر والهم شختوره

يا ريت ما بتبقي حجر يا ريت

العيشه درب والعمر كسدوره

ناطر عجيبة حب ترشح زيت

ومطرح ما عملت صرختي جوره

قاعد بحالي وبعد ما فليت

وعم ساير الحيطان والصوره

قدك يا ماري ما حدا حبيت

روحي الك بالفعل مندوره

وانتي ما فيكي تقعدي بالبيت

عا طول بدك تعملي مشاوير

وشم الهوا بحروف مقصوره

كنا تلاته

هوني أنا وما تقطبو جروحي

وبعدو عا حالو بيعرج طموحي

هلي كنت غنيلها موال

لبستها فستان شغل البال

وقلتلها تا تروح من روحي

حسيت اني محنط برمسي

لا حاضري بعرف ولا امسي

قلت لاخوها بين اخد ورد

كنا تلاته وواحد مننعد

واليوم صرنا اربعه خمسه

ندمان اني بها الدني ندمان

بالشعر بيتي ما الو عنوان

وشالح نظر ما بقيت عم عوزو

البصبوص عا عيوني برم بوزو

وصارت حياتي كلها احزان

يمكن زماني صفر عاددني

وممنوع انو الحظ يسعدني

دمعي عا خدي قصتي شارح

لما عليي حول مبارح

جرب على النسيان ياخدني

فرد وقعه

يا وعد فيي منشغل بالي

ختيار وبكذب على حالي

ما في نظر متل الخلق بالعين

وعندي طرش موجود بالدينين

والضغط عم يلبس كعب عالي

ومش بس انو مشلفط لساني

بالعد صارو اربعه سناني

وبكل واحد اربع زواريب

لبعضن عا طول بيبعتو مكاتيب

ما في حدا عم يقشع التاني

بالحلم خاطبت الارض مره

وقت اللي صارت سمكتي حره

وقلتلها عم اوقع عليكي

وشوف البلا وانسم من هيكي

مالي قلب تا اطلع لبرا

ولو كنت فيي ما شفت انه

بالمختصر رح خبرك اني

فيكي ما بدي ازرع بساتين

عن طاولة عمري اكلتي سنين

ايمتين بدك تشبعي مني

مسرسب صرت من بعد كم وقعه

وصرت الدفا عم احسبو صقعه

لا تقطعيلي سيرة الانفاس

قالت انا عم مزمزك عاالكاس

تا اكلك ارجع فرد وقعه