صارت همومي من البرد شقعه
وعريان لا كنزه ولا رقعه
والسقف عم يدلف حمال موي
والنسمة الكانت جمر وشوي
مرقت عليي محمله صقعه
وهوني انا عم ادرس الحاله
وسعر الفرح اغلى من الغالي
صباغ التعب لما عليي حل
وما عدت لاقي للطموح محل
من تحت راسي علقت مع حالي
طالع عبالي هالزمن بيعو
بعقاربو الساعات بيضيعو
فيه الكذب اسمو ابو الهمات
بطوفة حكي بيمرق مع الكلمات
كلما مشي عا راس صابيعو
رح جن لا مكفى ولا موفى
باجري نعل والدرب متحفى
بعيده المسافه والدمع طوفان
وما في امل اوصل على لبنان
حظي بيوم ولادتو توفى
الرجعه برقبة درهمي معلق
والظرف لا مزوج ولا مطلق
يمكن عا حالي صرت شاهد زور
ومن كتر ما فيي الارض بتدور
بعدان صرت محسبو هلق
شاعر انا وبفراغ ايديي
عبيت اوراق الحواليي
عندي الطلاقه والوحي بالدم
بنظم الشعر والله ما بعتل هم
حروف الهجا بيتقاتلو عليي
التقينا من بعد ما نسيت حالي
عا مفرق بيتها وزاد انفعالي
وبنظره واحده رويت غليلي
ونقلنا الحب من حاله لحاله
جميله اسمها وهيي جميله
وجميل بوصفها تسجل مقالي
ونظملي شعرها بوزن الخليلي
مقاطع من صميم الارتجالي
قالت بعشقك قلبي دليلي
وانا قلتلها زهره بخيالي
وصرت شمشون تا تعمل دليله
وبساعة حب تشغل كل بالي
هيي بالغزل منها قليله
وانا مش هين وصاحب رساله
الها قلت ما بعبر سبيلي
عصير شفافك دموع الدوالي
ما بدي عجّل بساعة رحيلي
ولا بدي كون واحد انعزالي
تا حتى تضل ليلتنا طويله
وصوت الضو ما يطلع علينا
تعي عا الفجر تا ندلق ليالي
مطفي بزر بلوزك اضويني
شارب طلوع الضو قنينه
وطاير صوابي وللعما سكران
يا تقبريني لشوفتك جوعان
شلحة نظر عا الريق طعميني
قولي شو بدّك خلقتي بقلع
صوت المشي عا السكت ما بيطلع
رحتي قبل ما تزهري بنوار
وما زال ما تلعوس معي المشوار
كيف بدّي غيبتك ابلع
لهت الخساره طيّر المربح
وشلحة عيونك موسها بيدبح
تا عيش بالاوجاع ما بيجوز
كلما معي تكوني حبق مهزوز
الريحه عا صهوة دمعتي بتسبح
مبارح بحلمي قربت ليكي
ولقمة حنان طعمت ايديكي
ولما العرق منك عليي فز
وشفت الهوا من مطرحو ما انهز
دفشتو تا حتى يوقع عليكي
يا مربعه بالفكر تربيعه
غنيتك بابيات لميعه
ولما لقيتك زخرفه والوان
خيوط النظر حيكتها منشان
تالبسك عا العيد تطليعه
حناني بدمعة عيوني تألف
وقبل من نار لشفافك مولف
صباحي بالدني صرتي ومسايي
ونصيب الملتقى بوعدك مغلف
كبر همي متل ابن الحكايه
وتا حظي يقوم بالواجب تخلف
وما بقدر عيش ايامي بلايي
وجودي كتير عا وجودي تكلف
تا عكزّ ما قدرت لاقي عصايه
حياتي زحف والمشكل مسلف
وكفوفي ما التقو بساعة قرايي
وعذابي بلا استقامه تنين خلف
غريبه كتير لغة مستوايي
وما جاني من السما مترجم محلف
وزماني طلق عيون العنايه
ومن الضربات تكفيري تجلف
انا ورقة خريف بظرف جايي
وتا حتى اوصل لعندك مكلف
بعدما تطالعيني بالنهايه
عا صدرك علقيني ربع ساعه
قبل ما ترجعيني عا المغلف
ـ1ـ
كلارك البعيني ما هجر عيني
بشحطة قلامو بينعرف ويني
بشربل بأقلامن طلع جبّار
عنّي حكي ودلاّ عا ناس كتار
مليون ألف عليه يا عيني
ـ2ـ
عطرو بيضل بهالدني فايح
عليها متل غيرو إجا سايح
البيكون متلو مستحيل يموت
ولو كان جسمو سافر بتابوت
لعند القرايب بالسما رايح
ـ3ـ
علينا المنيّه ساحبه لسانا
وصار الفرح عنّا خبر كانا
قنديل عمرو قبل ترمو ناس
وقت اللي قالو انقطعت الأنفاس
طاف الدمع بعيون روزانا
ـ4ـ
ومن وين بتجيب الصبر راحيل
آخات صارت دون قال وقيل
عا كلارك هلّق دمعها جاري
وقلبا انسلخ من قبل عا ماري
ليل ونهار بتحمل الإنجيل
ـ5ـ
فراقو ترك شربل بغيبوبه
وعندو الكلام تقمّص صعوبه
مش بس إنّو عواطفو جنّو
الأبيات هللي قالها عنّو
مش بالقلم بالدمع مكتوبه
ـ6ـ
كلارك البعيني جبلتو إيمان
صاحب قلم والمقدره طوفان
شاعر ما هوّي بس هالإنسان
ببيت الشعر ما بيقبل فساويخ
بشربل بأقلامن عمل تاريخ
دقّه بقلوب العارفينو كان
بقدّم تعازي لعليتو ولبنان
**
الرجاء قراءة التعازي تحت القصيدة
صورة تاريخية وجدتها في ألبوم الشاعر عصام ملكي، فطلبتها منه كي أنشرها في موقعه، نظراً لأهميتها الأدبية، خاصة وأن بعض الشعراء قد رحلوا عن دنيانا، ولم تبقَ غير الذكرى. والصورة تجمع الشاعر الكبير حنا موسى "ابو الطربوش"، بالشعراء السادة من اليمين: مخايل عيد القزي، جميل داغر، عصام ملكي، زين الحس، حنا عبيد ومطانيوس القزي.
رحم الله الشعراء موسى وداغر والحسن وعبيد، وأطال بأعمار عصام ملكي ومخايل ومطانيوس القزي.
لم يشأ الشاعر عصام ملكي أن يهدي والدته المرحومة سارة هذه القصيدة لوحدها، لأنه يعتبر أمي بترونله كأمه تماماً، فشملها بمحبته في عيد الأمهات، كما أنه رفض أن تنشر صورة والدته ان لم تتعانق صورة والدتي معها. وأن تكون القصيدة مهداة باسمه وباسمي الى الوالدتين الغاليتين. فهل من شعور أسمى من هذا الشعور. شيء واحد آلمني جداً، كونه تعرّف على والدتي ولم يسعفني الحظ كي ألتقي والدته وأغرف من حنانها. كل عيد أمهات وأنتما أحلى الامهات:
مرقت على حنه عطيتها قلقاس
من عند نزهه القاعده بحيي
صبحتها قالت يا ملكي خراس
هاليوم نحس تملخو ديي
قلتها ملكي ابو فرَّاس
وشاعر كبير لكلمتو تهيي
شو صايبك قولي الدني اعراس
وافراح ليشك قالبه مويه
همي قالتلي بالمتر ما انقاس
مخلوع باب البيت يا خيي
هالمنطقه لازملها حرَّاس
بيتي بلا باب وكلفتو عليي
ركَّبت الها الباب والاجراس
وقلتلها تا تفرح شويه
ووقت للي قالت خشبة العا الراس
مش رح بتركب من عدا مسامير
ونحنا ما عنا: "قلت عنا كتير"
وفرجيتها مسامير اجريي
بيار هدهد سكر، اسم ذكره أمامي الشاعر عصام ملكي عشرات المرّات، وكان يحلو له أن يناديه: ابني بيار. وكم كنت محظوظاً حين التقيت به في حفلة جوقة المسرح الزجلية، فوجدته كما وصفه عصام وأكثر.. وها هو يسجل محبته له بهذه القصيدة:
من شوفتك يا بيار عم اسكر
ما شفت منك بالدني منكر
بحبك كتير كتير وحياتك
وذاتي انا عم دوّب بذاتك
يا "بيار" "يا هدهد" ابن "سكر"
اسعدلي المسا وبالخير صبحني
ومن بعض ناس وناس ريحني
بقلك انا وبعيدها عن جد
اكبر محب ومخلص بتنعد
وحياة الله بحسبك ابني
شاعر انا الما بيشتري بشري
ويا مصيبتو اللي بيوقع بشري
عصام ملكي ابن بشمزين
بيقول عنك منجبل باللين
مليون يا هنيالها بشري
معلوم انو المر بتحلي
وبقلب قلبك بعرف محلي
عنك بيقولو الناس ابن حلال
هللي عا شكلك بالحياة قلال
كل القلوب عليك بتدّلي
يا بيار هدهد ضلّك معلّا
عاللي النعم بيقلها كلاّ
منها طريقك بالحياة كواع
مش متل هللي بالحكي بينباع
وبيعد حالو عا الارض ألله
شروقي
كترو جروح الهوى وصار الوجع موال
تا صير غيري انا عن دبر بدالي
ساحب لسانو الغلا وصارو الفلوس قلال
وعا السكت جايي الطفر وصريخ بالعالي
وانتي يا ست الحلا ما بيعجبك رجال
ديالك لقطتو قبل ما تلقطي ديالي
ما ضل عندي لحم بالفعل صرت خيال
وبليس وين ما قعدت عم يقعد قبالي
عليكي ما علم كبر والبدر منّو هلال
بعدك بعز الصبا وبشهد عا اقوالي
كلك لطافه وحلا ومحققه الامال
بيضل يلبق الك شعر الارتجالي
غيرك ما عندي حدا تا يصرّف الاعمال
وبالرغم اني انا عاملك وكاله
ما قدرت صوبك اجي يا قاعده بالبال
لهلق ما جاني وقت اطلع على بالي
شروقي
وينك يا لولو تعي شوقي لكي قناطير
وبيحب شم الهوا طقم البلخزانه
ولو قال ضيق الوقت لا تعملي مشاوير
شدي العزيمه وتعي تا تفل احزاني
انتي بشرعي حلم ما بيلزمو تفسير
عند الما خلى دمع بعيون القناني
مش بس كلك حلا فيكي العقل بيطير
وبيغط كلما تجي عا جو لبناني
خلفي شلحت الوهم والهم والتعتير
لما جمعنا الهوى وضيفت عنواني
بحبك لاني انا بلاكي ما بقدر صير
وتا صير غيري اعرفي بيشفتر زماني
لا تواخذيني اذا مني حصل تقصير
وما قدرت قلك شعر ما في الو تاني
مش عم بلاقي حرف يمشي مع التفكير
من كتر ما في شعر طالع على لساني
رحت الاحد حفيان تا حيي
ست الهدى المش قاعده بحيي
ولما لحقني بقلتو التدبير
انطعجو باجري اربع مسامير
وصارو الجور يتضحكو عليي
ولما وصلت قلتلها التعتير
ماشي معي والهم صار كبير
مش بس عما يحترق ديني
ما بقيت اعرف يا هدى ميني
بدون العرق عصام مش رح صير
قالت تعا اشرب عرق قاضي
عا الهم واللي شايلو قاضي
عالرف في عندي غلن مليان
ولما قلت فاضي يا بنت فلان
قالت الي شو باك يا انسان
المليان بالرايح من الفاضي
ولما لقتني صاير نتاتيف
لجوع المحبه حسبتني رغيف
وقالت تفضل بوسني يا مسن
ولما شفت انو ما عندا سن
قلتلها ما بقيت اعرف كيف
ووقت اللي قالت ما وصل حقي
ما بقيت رح خلي ولا بقي
ولما التفاهم صار ضرب خوات
عا العيد جبتلا سبع وجبات
وقلتلها عا ذوقها تنقي
