انا وحياة عينك يا نجيبه
تا عيش بهم مكتبلي كتيبه
جروح الختيره صارت غميقه
وتا عكّز عا العصا مجند كتيبه
بشبابي صرفت اغصاني الوريقه
عليكي وبعدما بلّش مشيبي
بسوء الفهم صرفتني الدقيقه
لأني ما قدرت ادفع ضريبه
انا شاعر بعينين الخليقه
فقير الحال وظروفي عصيبه
بيوتي يمكن تبيّن طليقه
بس الصوت منّو عندليبي
معي الاشعار عم توقع بضيقه
وما عندي مقدره تعمل عجيبه
هجرت المنبر بأهون طريقه
وصرت قول المراجل بالهريبه
ظروفي بالغزل صارت دقيقه
ونهاية كلمتي صارت قريبه
تا ادنك عضها الوجبه عتيقه
بعدما استشهدو سنان القوايا
صرت مجبور عضك بالكتيبه
يا ظالمه احترمي كبر سني
ما بقيت اقدر عض عا سني
حظي فرط ومهجّر التجميع
خلصنا بقا قوانين لا تسنّي
صارت حياتي كلها ترقيع
البقيو من العقلات هَو هنّي
وصدّى الزمان وما التقى تلميع
غارات دخل الرب لا تشنّي
ولا تاكليني بشهوة التطليع
ولا تعمليلي جهنم الجنه
مشّي السكت لا تفتحي مواضيع
ما بحب لا ساير ولا غنّي
بالرغم انو صار خيطي رفيع
ودمعة عيوني تقمّصت بنّي
ماشي عا دعسة خاطري وما بضيع
وبعرف انا وبتعرفي اني
عم بيع هلّي مش مقامو رفيع
وبعت الاجا عا المأتم يهنّي
ومش بس اني شو ما كان ببيع
بسوء التفاهم فاتح محلات
بالدين فيكي تشتري مني
درب العليها علّمو جريي
صفوف المشي عرّفتها عليي
منشان كلما يخطر على البال
شم الهوا ابرم حواليي
مبارح عليها ختير التجوال
وما قدرت قول لفرحتي تهيي
واعطي وصايه وآخد استقلال
بجهد التركني قالب مويي
جرّبت غنّي للحرام حلال
وابعد شمس عن خلقة الفيه
لكن ما جات الذاكره بموّال
يقدر ظروف القاهره يحيّي
وبالرغم انو تشربكو الاحوال
فوق المصير شلحت عينيي
تا شوف كيف بصرِّف الاعمال
وبخلص من الآخات يا بيي
ومن بعدما صال الخيال وجال
انقـّـرْيـِـت معي مزامير ايديي
وبدقيقة الفيها اجا البلبال
جبت الابانا وصرت صلّي وقول
يا ملايكة الله اركضو ليي
جايي لعندك تا العمر ديرو
عا خراجك وتضحك اساريرو
وبيت الشعر جايب بلا قرميد
وجايب سمع للناس تا عيرو
ما عرفت كيف بسايرك عا العيد
بظرف الوقع عا الارض تدبيرو
وما عرفت صف الحب كيف بعيد
بالذكريات البلشو يطيرو
بدي دوا تا يخفف التنهيد
علّم عا وجه الكيف تقصيرو
والقهر صرّ لحالتي زواويد
تكفي العمر عا حد تعبيرو
بزر المصاري ما طلع بالايد
وصار الطفر حلاق عا الزيرز
وغلبه عليي حرقتي بتزيد
وداوود ما انقريِت مزاميرو
عيفي الضيافه جوّها ما بريد
مشاريعها مسامير بيصيرو
ولا تقرّبي صوبي عرق ونبيد
كلما اجي تا اسكر التفكير
بالكاس عم يدلق شفاتيرو
تشْرَن زماني وصارت وراقو
تبرم عقارب ساعة فراقو
وصارو همومي حد مني كوام
يمكن لأنو لحضرتي اشتاقو
سهران وحدي والكفر ما نام
وغفيو القوافي وبعد ما فاقو
وماشي الفشل عا دعسة الايام
وما عاودو الاوهام ينطاقو
مش بس انو افلس الالهام
طوّل لسانو الحرف عا رفاقو
ولما الورق ما ساير الاقلام
شعر المعنّى كسدت سواقو
واليوم بنتو تحجبت بحرام
وجنّو معي اللي شفافها داقو
بيجوز انو اعتنقت الاسلام
ويمكن خسر انجيلنا سباقو
وبالرغم انو فشختي لقدّام
وما في ظرف ما سْحَبت معلاقو
ما قدرت قلك شعر يا الهام
المعنى عا ميل وكلمتي عا ميل
مش عم يجيهم وقت يتلاقو
أنا يا حبايبي بآخر زماني
ما بقدر للأبد إبقى مكاني
لزيد وعمر عم سمّع متيله
عا وجه الأرض إيامي قليله
عزيمه من السما الزرقا إجاني
الدني يومين بيقولو وتلاته
وما كل الناس من سكر نباتي
ضروري ان حدا عامل خطيه
يطلب معذره وعن صدق نيّه
لحالو يعير شي مره التفاته
أنا من بعد ما تفشكلت فيي
لحالي بكف قدمت التحيه
وورايي شلحت محروق الديانه
وأبو لسانين وفلان الفلاني
وأخدت علامة الميّه عا ميّه
بعنايه مواقفك يا إنت زنها
وبكل مناسبه ضل امتحنها
وإذا عم توقف بوجهك إعاقه
بسعر الفجل موجوده صداقه
اشتري شي أربعه بفرنك منها
يا مشوهين المجتمع حيدو
جبرتو الشعب يشلح تقاليدو
طعمو الفقير ولبسو العريان
بيتو أرض والجو قرميدو
لازم عا غيرو يشفق الانسان
ويبكي معو ويعيّد بعيدو
نحنا ما بدنا تفرقة أديان
ونص الشعب ناكل زواويدو
لا تكنفشو عا فلان وفليتان
وهم على هم الناس لا تزيدو
الفوضى بوطننا مشلشي من زمان
ونحنا الوضع مش هيك منريدو
من بعد أللـه عندنا لبنان
ممنوع فضلو يروح عا النسيان
حروف الهجا كلن شغل إيدو
عا قلبي تفضلو يا رفاق فوتو
كلام الجوهري ودّع سكوتو
همي عا قدي والدمع مزراب
وتجنس الأوف ببطن حوتو
تا شوفكم ضارب بطرحي حساب
حتى حديثي ينجمع قوتو
لعندي تعو بجاه ألإبن والآب
بوزنو الشعر عم يشطف بيوتو
عابد مصيري الهم والسرساب
ويوم الفرح مجهول لاهوتو
بالقلب عندي بيبرم الدولاب
ومضيّع القدوس تالوتو
لا تقاطعوني من عدا أسباب
صبري مشي بجناز جبروتو
وهلّق لأنو الشوق حالو جاب
وصار الصبر بخراج تابوتو
الباب انفتح يا رفاق يا احباب
ولا تفزعو بخلي القيامه تقوم
عا شوفتي ان كان بتموتو
انا انسان طالع من ترابو
همومي خلّفو مشاكل وجابو
سألت العمر عن اخر مدايي
وعا جمر الصبر مستنظر جوابو
بيقولو الناس ضاع من البدايه
ووصل لنهار مش حاسب حسابو
وقالو للطفر عامل حمايه
وبوجه القرش عم يقلب جيابو
شو بعمل كنت رايح صرت جايي
وتركت الجرح يتسلّى بعذابو
اللي متلي بتلزمو ايد العنايه
لوحدو ما قدر يلبس تيابو
شلحت المشط وكسرت المرايه
لأنو الضعف اعلن انقلابو
بعد ما كنت فارس يا ضنايي
ما عندي سيف يطلع من قرابو
اتركيني عكّز وعيشي بلايي
حضوري بالدني بيشبه غيابو
انا ختيار عا درب النهايه
جمالك مش رح بيحصد نتيجه
اذا بالختيره بيقبر شبابو
يا مكبره بعرف انا انتي
وقت اللي قلبي داب ما حزنتي
كنتي بعيده وعايش ببلبال
ولو ما تركتك تقعدي بالبال
بآخر ما عمّر ربنا كنتي
ان كان بدك تعرفي كيفي
لا تحملي الصابون والليفه
صفّ الحكي ما عاد بدو عَيْد
حروف الهجا غسلتهم بـ "التايد"
منشان تطلع كلمتي نضيفه
الصدفه ما عاد انهز ترقيعا
وضعفت حياتي وصارت رفيعه
بالحب يمكن اعلن الافلاس
من كتر ما بشلح نظر عا الناس
باقي بعيوني فرد تطليعه
يا دل عينيي يا عينيي
ما بقيت عم اقشع حواليي
جايي تا اسهر عندك بهاالآن
وما لي قلب امشي انا ونعسان
بخاف الدرب لا تاكل جريي
اجا تشرين كوني واقعيه
سكوتك طالع بنبره قويه
بلانا من الهوى وافضل بلانا
عا جمر الصبر متلي مستويه
ما بدي تعتبي ان قصّر مدانا
تيابو من عبكرا ومن عشيه
بمسا الخيرات عم يكفر مسانا
وصباح الخير مريم مجدليه
انا بالمرحبا محقق منانا
ما عندي سلام مجهول الهويه
التحيه عقرب بساعة لقانا
واذا انسمّيت ما بضرب تحيه
ما فينا بحبنا نرفع لوانا
اذا بتكون صفرا القابليه
وما فينا نلتقي بخلقة دوانا
اذا بحمل عا ضهري الفرمشيه
عا درب الحب لو نسّم هوانا
بطلوع الآخ بيسجل وصيّه
اتركيني صلّب وقول الابانا
الخطيه بالهوى جوره غميقه
وانا فزعان اوقع بالخطيه
انتي من الطهر يا نور اطهر
والك طله والك عا طول مظهر
انا حبيتك وانتي الوحيده
وكلامي مش عم بيطلع مبهّر
ورايي بالدني شلحت الحسيده
بعد ما الواقع قبالي تجمهر
والك بالآخ عم سوكر بريدي
ولعندك واصل كلام المجوهر
ما بقبل اقشعك عنّي بعيده
لأنو قلبك الاخلاص اظهر
انا جايي لأنو اليوم عيدي
وخيالي للغنا ابيات ظهّر
صديقي الخمر والفستق عبيدي
وعا راحة كاس طول الليل بسهر
دمي عا العرق ماشي بوريدي
من النواس صرت كتير اشهر
لها الازهار الوان العديده
تا حتى ساحره للعين تظهر
وزهر الخمر عم شيلو عا ايدي
تا حتى كل ما تودّي ورايي
لعندك يا هدى اوصل مزهّر
