شروقي
يا هند طقسك حلو عمر بقلبي جروح
وكلما ابتسمتي الي بيخف تنهيدي
الالهام سجل لكي بالابجديه فتوح
وصفيت كلي لكي شو بعد بتريدي
تا يعيش سوء الفهم بالحب مش مسموح
المدماك لازم يجي عا قافيه جديده
مفروض كلما الحبق ينهز عطرو يفوح
ويطلع عا منبر هوا ويجيب رديده
عندك ببحر الشعر مخرت سفينة نوح
وقطعت تذاكر سفر عا ارض البعيده
وبالرغم اني عرفت قلبك الي مفتوح
بوجه العزيمه بدي مشوار تزويدي
ضليت ساعه بجي ساعه ما بدي روح
عن على بالي معك اكد مواعيدي
روحي عزيزه وخفت لا تقربي عا الروح
وتقوى الشهيه معك وتروح من ايدي
شروقي
يا روح روحي اعرفي عنا الوهم اجناس
والحظ حسنة فرح ما حب يعطينا
وخز الضمير الحقي ولا تقطعي الانفاس
وقولي ابانا الذي وعا العين لاقينا
كنا بشرب الخمر نسبق ابو النواس
وكنا بطلوع الفجر نوصل ليالينا
واليوم ما في امل تا ندق كاس بكاس
منفزع بحالة سكر ننسى اسامينا
لما لحقنا التعب وتغيرّ الحلاس
قعدنا عا كرسة وجع وبآخنا بدينا
ما ضل منا حدا وما ضل النا اساس
ولما شلحنا نظر عا غيرنا عمينا
وبالرغم انو القوى عم تعلن الافلاس
وبالرغم انو الصلا والصوم ناسينا
قلنا لرب السما لما انعمل قداس
بحيث الجحيم انتلا عا الارض خلينا
وحياة مار الهوى ووحياة مار الياس
نحنا بحكم القدر مركب بلا مينا
كان بزمان الصبا كل الشغل للناس
وهلق لحقنا الكبر تا نشتغل فينا
شروقي
يا ساكنين البلد وضيوف من لبنان
هوني بدون الحكي عا السكت ما فينا
مفروض يمشي الغنا ولو كان كيفما كان
تا نقول يا بو الزلف عا العين لاقينا
الله عطانا ظرف اسمو عظيم الشان
ومشوار واحد فقط عا الارض عاطينا
بكرا بيروح الجسد عا الارض يا اخوان
وبتطير من ها الدني غبرة اسامينا
الكاسات عبو معي منا العمر هربان
وقولو يا رب السما من الآخ نجينا
مش بس انو الخمر بيسفّر الاحزان
بيقدر بكمشة وقت يعمل ابن سينا
لعنا ما جيتو اعرفو بقول بصراحه الآن
نحنا عا قول الحرف والبحر والمينا
ابيات شعر الوحي فيهم دلق الوان
ولما ارتجلنا الزمن عا بعضنا جينا
شروقي
حامل بفكري وحي وما في ورق وقلام
ومن صفر واحد نقل لتنين رسمالي
يا ناس صوبي تعو وجيبو صلا وصيام
صاير بسوء الفهم عم يرخص الغالي
ما ضل عندي جلد يستعرض الاوهام
وقتي حشرني والو عم دبر بدالي
وقدام عيني دني علامات استفهام
وكلما لحقني الهوى بيزيد بلبالي
طالب قصيدة غزل فشخاتها لقدام
تا قول فيها حملت للعالم رساله
لكن ما جاني حكي تا يساير الالهام
تخمين حرف الهجا صاير اوسترالي
مش عم تساقب معي تا ركلج الاحلام
من القهر ميّت كتر ما بموت عا حالي
كاتب عا خدي الدمع غنية الآلام
والآخ آخر لحن بالسوق ودّالي
قرفان مني صرت لا بسهر ولا بنام
وسنتين صرلو الضغط لابس كعب عالي
عم شيل حالي عرق ونبيد ها الايام
بلكي اجاني ظرف اطلع على بالي
شروقي
هلي عا شكل الحلو بعيونهم جالو
اهلا بربيع الدني ما سمعتهم قالو
من هيك جايي بشعر اطلبلن الغفران
وقلن عا نص الدرب تصريف اعمالو
وهزّيت جسم المدى تا اوصل لبرهان
يقلي بأنو الدفا بحالو قشع حالو
وهونيك قلي الهوا هوّي وشبه عرقان
هربان مني البرد هوّي وابن خالو
وراعي بسحبة سهل شفتو مع القطعان
شارب دموع الفجر والهم رسمالو
وبالجو شفت النحل عم يندب القفران
وكلما لهتلو الطقس يفزع من خيالو
ووقت اللي قال النظر صار العشب نصحان
بلّش نسيم الصبح يتغندر قبالو
ومنو لحالو الكرم عيّط على سمعان
تا يشوف كنّو اجا عا البال موّالو
ولما الربيع انعجق باللون والالحان
بلهفه لأمو الارض قدّم شغل بالو
وبالزهر خيّط لها عا عيدها فستان
وقال لخيوط الشمس تا تلقط ديالو
شروقي
غيّر مزاجو الطقس تا يساير الحالات
الفيها زماني اجا من آخر بعيدو
ومع كيف حالي رحت بالحال عا "حالات"
بقبش عا حب الترك عا الارض تنهيدو
ولما خيالي بدي يبقبش على الهمات
بيت المعنى اجا وركّبت قرميدو
وهونيك غنّى العطر لجوانح النسمات
ولزّق عليها حلا يحفظ تقاليدو
وجات على بالي "هنا" ومن بعد خود وهات
صف الحضانه صرت لغيابها عيدو
وبنزول طلعت معي يا بو الزلف هيهات
وهزّيت جسم الوحي تا يبعت جديدو
وعا الصدر لما الصبر علّق ميداليات
قلبي بدقه شهق تا امسكو بإيدو
وفيها اتصلت وقلت عم يكترو اللهفات
وتا يكون هيكي الظرف تعبان ما بريدو
ووقت اللي قالت تعا لا تبعت سلامات
العملو مشاكل لنا من الدرب بيحيدو
ما ضلّ عندي جلد اقعد انا والذات
سحبت على هاك الدني تا اسكر من جديد
وافلت عا كرم الهوى وحبحب عناقيدو
شروقي
لبنان قلي تعا قعدلك شي خمس شهور
وقال المعنى الي بالصيف حفلاتي
ولما بطاقة سفر زوّجت عا البسبور
رجعت على ارض الوطن تا التقي بذاتي
وهونيك غنو الاهل والجو دق سرور
وصارت بحكم الوضع طوفان لهفاتي
ووقت اللي صار الحكي منو لحالو يدور
خليت جوع السمع يهضم حكاياتي
وتا شوف كيف الدني بلّشت مد جسور
ومن بعد كاس فقست موتار جولاتي
وعا الكرم لما رحت شفتو بلا ناطور
عناقيد منو قطفت وزركت جواتي
وهلي بحلاها كنت اكتر من المسحور
واخدت شهادة هوى وربيت عا ديّاتي
جات عْلى فكري والي ظرفي فتح معبور
تا عود فشخه لورا وبيّض سجلاتي
للخير كانت مسا وكانت صباح النور
ومنشان قدّم لها خالص تحياتي
دوّرت حالي وقلت تا زورها مجبور
ودرب اللي نامت سنه عالوعد يا كمّون
لما عليها مرقت فاقت عا دعساتي
شروقي
لاقي عا هوني عصا وآخي بدون عيار
ودرب الخطبها المشي من الناس حفيانه
وداعس ورايي التعــــــــــــب ومصـــفرَن المشوار
وكوع اللي فيي برم شو كنت؟ نسّاني
رايح تا غنّي لهنا وناسي قطع الغيار
لا الشعر جبتو معي ولا وجبة سناني
ولما لقيت العمر واقف عا خط النار
همّي عا تاني دني ترانزيت ودّاني
ووقت اللي شفت الوجع دبّر الو ادوار
فيها اتصلت وقلت الها عن لساني
لا تنطريني بقا رح ارجع على الدار
حظي نجوم الضهر بالليل فرجاني
وعا البيت لما رجعت تا ركلِج الدبار
قلت الخلاص بيجي بكعب الدملجانه
وبلّشت اشرب عرق تا نص عقلي طار
وما عدت اعرف انا من فلان الفلاني
شروقي
لما لحقني الشقا والطقس جاب غبار
ودّا ورايي السكت تا اعملو غناني
ركّبت ركوه ومعي ما تلقمو الافكار
تا شوف ابرة ظرف تعشق اسطوانه
عني لتاني دني عم توصل الاخبار
وما بقيت اعرف اذا عا الارض عنواني
ما ضل عندي الي من ضحكتي تذكار
ولا قدرت عيش بصفا ولا الرب خلاني
هربت عراوي العمر لما لحقها زرار
واول عذابي اجا من اخر زماني
وما لقيت صدفه تجي تا اطلع بمشوار
وعا السوق يطلع معي طقم البلخزانه
ودعت كل الهنا وتشرين فيي طار
وتالوت قدسي انا وحيط ودملجانه
وبالجو صوتي سبق صوفيرة الانذار
وقبة شفافي من الاخات بريانه
الدوخه قويه معي وبضل متل النار
بدي شي نقفة دوا ويكون انساني
مش عم بحاكي حدا وبيضل عندي دوار
وبيدوخ كل الحكي البيدور عالساني
شروقي
بلبنان وصّى الحجر تا يوقف العمران
وكلما التقينا بفرص للحل بيضيعو
ومش بس ما في امل انو العدل ينصان
كل اللي اسمو غلط عالدرب تشريعو
البيقول بكرا الفرج اكتر من الغلطان
اخرس عبكرا بيجي وما بينفتح نيعو
بهالظرف ما في حدا الا الفشل ربحان
البيحب يبني ثقه بتروح صابيعو
ساعات متل الخلق ما بيلتقى سبحان
رب العطانا الدني وفسّر مواضيعو
الاجرام صبح ومسا ومنطلب الغفران
وتوب الوفاق اهترى وما طل ترقيعو
كلمن بيشد لورا وبيضحكو الجيران
دويلات صار الوطن وبعيد تجميعو
وابيض بلون التلج ما بيطلع الدخان
اللي راح منا غصب ممنوع ترجيعو
الميّات قالوا الي صار الغضب نصحان
والموت فوق الارض كترت مشاريعو
الاوطان مَنها لنا مَنها لنا الاوطان
البيحب يقني وطن "لبنان منبيعو"
شروقي
سلمى بشرع الهوى منبع لطافه ولين
وحاكم بذات الوقت مع عيدها عيدي
بتضل هيي بأنا وفيها انا تخمين
معنا التفاهم مشي عا قاعده جديده
من حيث قالت الي اهلي من "بعقلين"
عقلي عطيتو لها مع ايش بتريدي
الله جبلها بدهب من مي مَنها وطين
انكانت بآخر دني ما بشوفها بعيده
فيها لقيت الصلا ما شفت قلة دين
ردت صبايي الي وفلّو تجاعيدي
بالفعل شكل الحلو علّق لها نياشين
ونسيِت نظام الدني وحفظِت مواعيدي
مش بس فيها شفت ارض وسما وتكوين
كلما عطتني قُبَل عم قلها زيدي
هيي بقلب القلب من ست سبع سنين
وفزعان طول الوقت لا تروح من ايدي
شروقي
قومي تا نعمل سوا مشوار عا لبنان
منا بكرم الهوى مطلوب ابّيله
ولو كان فكري فضي بعدو القهر طوفان
ما بشوف غير النحس قاعد مقابيلي
حبك عا قول الوفا اسمو عظيم الشان
خسرْت بوجودو الوجع تا اربح جميله
وما زال قلبي لكي يا شقايق النعمان
دخلك شي نتفة عقل بالراس خليلي
بحلف عا شكلك بعد ما خلّفو النسوان
مِنّك جمال الخلق متعلم متيله
مش بس فيكي حلا الاشكال والالوان
فيكي بكلمه الدني من كعبها تشيلي
مفروض انتي وانا نحكي بفرد لسان
انرحت على طول المدى تا عود وصّيلي
بشوفك بوقت الصلا بطرك من الديمان
وبَوس الايادي بيجي مرافق تراتيلي
قولي شو بدك الي بْلا قافيه واوزان
منِّك ما بزعل اذا شيطان قلتيلي
مضعّف حروف الهجا كيلين عا الميزان
تا تصير يلعن ابو ما تطلع تقيله
