عارض جنوني وحرقتي خافي
برحمة شبابك عا الوضع خافي
دوبي تا اعطي الحب لون جديد
وخلي شفافك تاكل شفافي
بدّي بحوارك ينطفي التنهيد
وتضوي العبر بالمنطق الدافي
آخي اغاني والوجع رديد
وما في قطر عا صدر الكنافه
مبارح قلت وبعيدها وبزيد
كاسك معي بيروح عا الصافي
وكلما سلامك يمرق على الايد
بقللو الف يعطيك العوافي
ما بريد وحياتك انا ما بريد
يحرق بنارو البعد سلافي
عا كل صدفه بوشّب مواعيد
وبالعين مش عم صيب اهدافي
عنـّك لقيت البعد ما بيفيد
ومشوار بالاسبوع مش كافي
جايي لعندك ذكرياتي عيد
وجرحي عا كتفي والطريق جبال
ورابط مصيري باجر المسافه
بشوب العمر يا منشفي حواضي
لسانك مشي بالقدح عرّاضي
لا تحسبّي ما غليت وانسميّت
وحق السما زعلان مش راضي
في ناس قالو ليش ما ردّيت
قلت الجدل حبيت ما قاضي
بالرغم اني الموقف تحدّيت
ما قبلت اعمل عا البشر قاضي
لما جهنم بالغرام لقيت
وصارو غمر وشوي امراضي
بابك غلقتو وعا الهدا فليّت
وقلت لخيالي يلملم غراضي
بينك وبيني عقرب الياريت
بساعة زمانو زارع اراضي
ودق القلب ماضي مع تمنيت
لكن لكي عا بياض مش ماضي
وتا تعرفي قصة بريق الزيت
لما عملت اسمك فعل ماضي
الفاضي فرشتو عا طريق البيت
منشان كلما تعملي مشوار
قلك طلع مشوار عا الفاضي.
يا طالبين الحق دقو جراس
وكونو لنظام وجودنا حرَّاس
لا يعد حالو آدمي الملعون
ولا يقول مش تيس اللي عندو قرون
ولا يكبر الراس الما عندو راس
المنو حدا ممنوع يتنادم
بالويل هللي نادمو تصادم
وبقول كلمه طالعه من القلب
من صاحبو ولا يوم طالع كلب
ومن صاحبو بيطلع ابن آدم
يا ضايع وراق الزمان قلاب
المنك بياخد ما انسمى جلاب
وبالمختصر قلنا بحكي يوصال
علواه "اوغست كونت" مره قال
لو بعض أصحابو بيصيرو كلاب
قولو الحقيقه وكترو مروِّه
كلمة ضعف ما تفسرت قوِّه
الشخص الحقير وقاشع بحالو
عنو اذا ابن الكلب قالو
بدو الكلب ينهان مش هوِّي
يا تقبريني نقلت من قربي
صارت بقربي منشفه التربه
وان كان منك عارفيني وين
بغربة خيالي لي سنه وشهرين
ومنتوف رح ارجع من الغربه
كاسك شربتو وزاد تنهيدي
ودقت البلا شو بعد بتريدي
دخل السما والارض دبّي الصوت
ما ضل عندي غير كاس الموت
وتا اشربو ما بيطلع بايدي
للحب بعدي حامل رساله
وان قلت فيي بجن ما بغالي
حبيت بوجودي الشمل يلتم
ومن كتر ما بحالي صرت مهتم
صبح ومسا ما بروح من بالي
ومش بس اني بأمر عينيكي
وضعي تركتو بين ايديكي
وحبي لانو من صميم الذات
كلما نزلت عا عالم الشهوات
سحبة لساني بتطلع عليكي
قلبي بعتلك بالهوى سلامو
وجايي لعندك فسر بنامو
وجايب حضاره من الشرق للغرب
ومنشان ما يضيع الوقت عا الدرب
حملت العصا ومشيت قدّامو
الغزل بمواهبي حمّى الحديده
اذا صفيّت ربو مش بعيده
خيالي زخرفه بينقال عنو
وصديقي اللون والاحرف عبيدي
عطيتو من القلب تا زاد فنو
ولمع اسمو عا صفحات الجريده
وتا متلي يبرعو رفاقي تمّنو
وانا تمنيت بمواقف عديده
القوافي بروعة المعنى تهنو
وقصيده عمّرو بضهر القصيده
كأني مرجع الكلمه وكأنو
المعنى زوّج البنت الوحيده
هلي المستوى الشعري تبنـّو
وقالو بيعشقو النكهه الجديده
انا قلتلهم ها اللون غنو
وللي بحبها قلت بنهيدي
اعرفي يا ساكنه بالبال انو
عا وجه الارض عم اجمع رصيدي
ما بدّي عا السما اطلع لأنو
اذا بدي قمر ببعت وراكي
واذا بدي النجوم بمد ايدي
يا مدوزنه عالآخ تنهيدي
كبّش زمان الختيره بإيدي
ولما عليي باخت الالوان
جلـّدت حالي بالصبا، منشان
ما تبيّن سلالم تجاعيدي
ما بقيت عنك يا دني راضي
بايد الزمن عم ضبضب غراضي
متل العتم مستقبلي بها الكون
وصّلت حالي بالعذاب لهون
ومن هو رح إرجع على الماضي
من هالسما هالأرض مسلوخه
وما بين مدووخه وما مدووخه
لا تلالها بينقال عنها تلال
ولا جبالها بينقال عنها جبال
يمكن من الانسان منفوخه
عيوني بشوفة حال ما تهنو
وبكل حاله منعرف إنو
ضايع ما بين الكفر والايمان
وإسمي اللي ضاع بعالم النسيان
مبارح سألت الذاكره عنو
بشوب المحبّه قالب مويّي
وعا شفتي آخات يا بيي
وحياة عين شقايق النعمان
حاطط براسي وقلتها من زمان
ما بموت إلا بين إيديّي
ماشي وورايي عالأرض حلمي
وما عاد ينفعني كتر علمي
بجرّب تا حلق بالخيال وطير
وكلما معي يتجعلك التفكير
بتطلع بتمّي ملولقه الكلمه
من بعد ما عني انصرف مالي
بقلة عقل صرّفت أعمالي
ومش بس موّال الطفر غنيت
كرمال عينين البشر جنيّت
وما في حدا بيجن كرمالي
عا شط ريقي نامت "اسمللا"
وصار الجسد بالشمس يتقلى
ولما بهاك الوين
صوتو الضغط علا
عن على بالي أسرق العينين
وشفافها، والصدر، والايدين
بس فزعت لا يشوفني الله
هللي بجنوني بلتجي ليها
ومتل البرق شلحات عينيها
بتحكي عسل، بتدوّب الحرقات
الشهوه بجسدها مصلـّبة طرقات
الكذب وانا عم نمرق عليها
عمّر لحوا بالقلب اوضه
انكانت عا صحن البال معروضه
وطبّل اذا كانت من الحلوين
وزمّر اذا مش عاملي قوانين
وان كانت الستره بورقة تين
بيكون صار اللبس عالموضه
مبارح بعد ما خيّم الارباك
قلي الوجع لا تفتكر بنساك
وعني ما فلو جيوش احزاني
لوما العرق اخلط مع الكونياك
ومن بعد سكره ما لها ديانه
عن درب فكري راحت الاشواك
وغنى القدح عا فراغ القناني
لما قلت بسهر انا وياك
ولما الصبح عا سلامتو جاني
وصارو النجوم يودعو الافلاك
عن على بالي زور هيلانه
الالها شهر مش قايله شو باك
ولما ورايي شلحت عنواني
قلت لخيالي يوصل الاسلاك
عا حساب يسواها ما يسواني
بحاله عليها دخن التنباك
ولما وصلت والشعر بلساني
عمّر لها عا القافيه مدماك
قالت تعا عا الطابق التاني
قلتلها ما بدق باب الدار
تا تدندلي شفافك من الشباك
الهمه هجرها قدرها السامي
وصار الضعف مندوبها السامي
وشلح النظر من خلقتي هربان
وعا درب فكري مارد النسيان
بيمحي صور وبياكل اسامي
حلو الزمان يشوفني حلو
كل اللي كأنو بجيبتي فلو
عليي ولا يوم بها الدني راضي
مبارح فركها الضهر عا الماضي
وبكرا ما بدو ياخد محلو
فسّرت حلمي وفرشت علمي
وللحرف قلت بخلق عا علمي
المعنى ارض للشعر عم ينعد
انضيّع صوابو بين مزح وجد
عا ايش بدها توقف الكلمه
لساني بغياب الكيف عم ابلع
قاعد عا اوف وواقف المطلع
صارت حياتي تكمش بديي
وما عدت قادر فرّخ شويه
بسهل البقاع زرعت اجريي
تا شوف كنو بالارض بطلع
قلت لرفاقي بعدما تسرق
عليي العذاب وبلشت اعرق
رايح ما بدّي تركضو ليي
حامل عصا بتعكز عليي
وناطر تا تمرق درب عالمفرق
كلما إسهر على الشعر ليله
بدون مبالغه بيمد ليلي
مرهون قلبي للزجل مرهون
وحفيت عا ارض الموهبه خيلي
حابب تا اوفي الشاعريه ديون
ما زال باقي من العمر شيله
ممنوع عندي ينكسر قانون
بميله القبايح والحلا بميله
عا درب بيتي مسلح الباطون
وشربت طيور الفكر من سيلي
وبالحرب سيفي عا العدا مسنون
وكلما انقطع عم ينوصل حيلي
قلي زماني عا الحرف بتمون
ويلي اذا ما برافقك ويلي
معروف منـّي مكحّل ومدهون
وبرافق البيكون من جيلي
شاعر انا وبالمقدره معجون
بيضل طافح بالشعر كيلي
شعري طعام الحرف عم بيكون
ومالي قلب خلي الحروف تجوع
كل حرف برقبتو عيله
عني عذابي بالضغط ما حل
وطالع معي ضغط السكت عالي
لحالي بحالي ما بقا لي محل
طالع عا بالي فل من حالي
حلّ المشاكل بالوعد موصول
وناطر عبكرا يوصلو ليي
وبكرا بحالو ملبك ومشغول
يمكن ما يقدر يمرق عليّي
غنيّت ليّي من المعنـىّ بيت
ومن بعد كم أوف، عرفت إنو
تفجّم صدى صوتي بحيط البيت
وصارو القوافي يفزعو منو
وما قدرت أكتب للدني شو صار
كلّ الحروف بدمعتي تشو
وعا فراش صمتي تشلقحو الأفكار
الكانو عا درب البال يتمشو
ولما عرفت رايح عا مدري لوين
قلي ضميري: برحمة شبابي
جرّب صرفلك عالوقت قرشين
لقيت الطفر مستأجر جيابي
الدني يومين والفرحه تلاته
دخيل الربّ عيريني التفاته
زماني هربت الافراح منــّو
ومحي النسيان صفحة ذكرياتي
شفافك للقبل مش عم يحنو
وانا مشتاق للسكر نباتي
كأني مشكلة عصري وكأنو
العذاب تفصّل لدورة حياتي
بعد ما مشاكلي آخات غنو
ما عادت تنعرف أربع جهاتي
تا إقدر قول لسنيني تهنو
وعا سفرة حب شوف مقبلاتي
اعطيني منك عواطف يجنـّو
قبل ما إنسحب من عبّ ذاتي
انا ما كنت تحت الارض لنو
السما تقبل تا إعمل واجباتي
غرامي بلا جدل معروف إنو
لعيونك عم بيشرح ميزاتي
ما بدّي عواطفي منك يئنو
ضروري تفتحي باب التفاهم
قبل ما ينزل ويطلع خواتي
يا خالق الانسان نجيني
من ها العذاب بآخر سنيني
ما بقيت اتحمّل كذب ونفاق
والبغض صارت رقبتو تخينه
عا كل كرسة حكم ماشي سباق
وقال العدل طارت قوانيني
عم يشترو الأصوات بالأسواق
تا تحكم جماهير دزينه
ومش بس عا الموت الشعب منساق
ما وفرو ضيعه ولا مدينه
الوفات راحو والجروح غماق
من موقف الروسي ومن الصيني
زاد البلا وعالم بلا أخلاق
وكلمن بيقلك دينك وديني
العيشه عا وجه الأرض ما بتنطاق
انكانت الحاله رح بتبقى هيك
دخلك لتحت الأرض ودّيني.
