الى صديق الجالية رجل الأعمال جورج غصين

هريت مني

يا بيوت  شعري من قفا ايدي اطلعو
لا تفتحو شبابيك للي بيسمعو
من هالدني رايح، حروفي تقاطعو
وتكت السفر ما عرفت مين القاطعو
هرّيت مني قبل ما يطل الخريف
وجايي عبكرا ياخد شلوشي معو

دعس الهوا

اليوم الوحي لمواهبي أولم
وبحر الشعر بالقافيه تتلم
وانتي معي وسحر الطبيعه ديّر
وصلى علينا ربنا وسلم

عا شفة القهوه بجوانح طير
جيتي وسكوتك بالهوى تكلم
لا تهمّك اللهجه بحديث الغير
منك ضروري الناس تتعلم

شوفي خيوط الشمس جدو السير
وقوس القدح عم يلبس مقلم
والمرحبا هوني وصباح الخير
وهوني الندي نايم على الأزهار
ودعس الهوا عا رقبتو معلم

**

بدّي شعر

شعر صور والرب  عاطيني
وتا إقعد على السكت ما فيني
كفر البشر ما بينسمى ايمان
ومنها التلاته نص دزينه

بدّي شعر بيفتّح العميان
يخلي الجمر يغلي بشراييني
وبعد الهلا قلو باطرى لسان:
من شويعر ومشعور نجيّني

لما رجعت بالصيف عا لبنان
السهرات كانو عياد شعنينه
نشرب ونسكر والفرح طوفان
وكلمن بكاسو يصبّ قنينه

وبالمرتجل لما علي البنيان
عا مشارف الضيعه وبالمدينه
قلي السمع عا صرخة الألوان:
دخل السما بالبيت خليني

وبالرغم ما قالو عظيم الشان
 وبالسهل زينه وبالجبل زينه
مره إجو تا يغيّرو العدّان
وطلعو.بفكره طيّرت ديني

قالو: الحداثه اليوم  يا إنسان
عم تسحب على الوزن سكينه
وحطو بإيدي كتاب عندن كان
لونو رصاصي ورقبتو تخينه

فتحتو بعد ما هزني العنوان
لكن ما شفت كلام يرضيني
سألتو" سطورك وين يا ديوان؟
قلي: بقلبي تشرّدو الكلمات
وصارو متل شعب الفلسطيني؟
**

بدّي يفسرولي

أنا عملاق بالصف اوقفولي
خيالي بيقطع بحور الغميقه
لزماني بنظم الشعر الاصولي
وباذن الرب ما بوقع بضيقه

بقلب الضعف ولدت الرجوله
وبقلب التلج عم ولّد حريقه
عناتر هالدني لهوني ابعتولي
كبير الحظ بيضاين دقيقه

عا وزن وقافيه أربع فصولي
ولصيد الموهبه قاطع وثيقه
"بحديثي" الحرف بالنفس الخجوله
جبرتو يشلح تيابو العتيقه

انا عالارض من ساعة وصولي
قلت: مش قابل بغير الحقيقه
طريق النقد عالكلمه افتحولي
تا حتى تنزل وتطلع رقيقه

بحديث الشعر هلي طبلولي
وعا كوعي زمرو بخطه دقيقه
يا ريتن بالنثر بيفسّرولي
تا اعرف كيف قانون الحداثه
وانظم شعر عا ذات الطريقه
**

من كل وادي عصا

بينك وبيني وقعت الخلفه
ما بقيت لا دقدق ولا إلفي
رايح عا أرض مطلقه العنوان
وما برجع لعندك اذا ما كان
صدرك بيكبر بالعمر نتفه

صيفك هرب عا بلاد مجهوله
وأرضك من التفسيخ مخجوله
جايي شتي بخوات، يخزي العين
الغيمه بديها حامله سطلين
وبحملة السطلين مسطوله

يا عايشه جوّات عينيّي
ودّي الي من العاطفه شويّه
معلوم غيرك ما حدا حبّيت
عفارة أنا قدّام باب البيت
لا تقعدي ولا تدعسي عليّي

عا موطني الويلات مصبوبه
بس العلى ما بتحلقو صعوبه
باللون عمّر عالسما مداميك
وفوق الجبال الشامخه هونيك
حكاية زمن بالجوّ مكتوبه

حبي لكي بالواقع الحتمي
قابل حياكي ولبسو لتمه
بيضوي حياتي ساعة البيريد
وبينطفي انكان العذاب شديد
حامل بإيدو الضوّ والعتمه

بحالك عا حالك ليش منستفي؟
خلي الوعد مدماك عا كتفي
جايي لعندك عا بساط الريح
ان كان مش عم تفهميني مليح
اعطيني السمع تا ركلجو نتفه

كسدر يا صبر على المدى صوره
وصرّف حبق بوراق منتوره
وطعمي النظر ألوان عم تحكي
بلكي اذا صار الظرف ملكي
بضيّف هوى بخروق مقصوره

وهلي انا ولعتها فيّي
تا تضلّ فيّي تجنّ يوميّه
كلما النظر بخيالها تعمشق
بتعفّ  منو ريحة الزنبق
وبدوب بين خيالها وهيّي

قلي ضميري: الارض غنيها
عم تطعمك، أشعار طعميها
لا تقول: بدي ضلّ شدّ طلوع
بقلب السما بتخوّر من الجوع
ان كنت ما بتاكل هوا فيها

اوباما

بَرَك بالأرض مـــن مدّه "أوباما"

مشاكل هالدنـــي عنها تَعَامــــى

بضاعه من الحَكي معروف عَنّو

نفخ صَــدرو بعد مقتل "أُسامه".

واشنطــن غيبتو قالت تمنّو

بدّو يْروح لــــــــو مهمـا تسامى

وبعد مــــــــــا مواقفو عالم تبنّو

انكتب عنّو بصفحة بانورامــــا.

وأوبامـــــــا قدّهـــــا لا شكّ مَنّو

وبطل مـــــا انعد عا ذمّة دراما

إلـــــو مواويل مــــــا لازم يغنّو

انحسب بالطاولِـــه لعّيب دامـــا.

وبَزاري بينْسَمـــى بالـفـعـل بَنّو

"فرنسا" قال أصغر مـن "بناما"

مــــا فينا نقول: يـــــا عالم تهنّو

الأصيله مش عم بيمْسك لِجاما.

عطى أقوال مِنها الــنـــاس جنّو

إذا بْيترَسّم بـيـلـبـس بِيجـــامــــا

مِــنّــــو تقرْيَفو وكتار عَـــنّـــــو

مـــــا فينا نقول: يـــا بابا دخيلَك

ولا فينا نقول: دخْلينِك يــا ماما.

تهنئة الى البروفسيرة فاديا غصين

يا ريت عندي صوت تا غني

منّي من البيلحنو منّي

كلك دهب يا فاديا كلّك

وحقّ السما. وبعيد وبتنّي

"ست السنه" قالولنا محلّك

وبيتك بعين المجتمع جنّه

يا بروفسيره فاديا بقلّك

يا ام وديع الغاليه وجوزيت

مش بس مرّه ألف تتهني 
*******

صبر مجمّر

ناطر عا طلعة آخ احبابي
وقدام عينيي فكر متعوب
وحاطط سلام الايد بجيابي
وبالقشر عم آكل صبر ايوب

جربت خشن منبري برده
فيها صقيع يخفف الغليان
سقطو الحروف بصف شو بدي
وكسرو القوافي رقبة الاوزان

قلت لضميري بعد خود وهات
ما في خيال بلون يجمعنا
ببيت المعنى فسّخو الكلمات
ومش رح تهدي مويّ المعنى

من كاسة الحلوين بدي غب
وما في حدا بيصب عا علمي
وما بقول اني بالحياة بحب
ان كنت مش آخد هوى الكلمه

دقيقة عذابي خلفت سنتين
وصارت الدمعه مطعمه بني
وهلق انا رايح عا مدري لوين
وشاحط ورايي هل بقي مني

عطشان ليكي

اعطيني تا إشرب نفس اركيله
صارت ليالي الكيف دليله
وهوني انا خلف الزمن مشلوح
كم يوم ببقى هون عديلي

تا ضلّ هيكي دوب مش مسموح
بدقات قلبك مطرح احميلي
وغطي ببالي بالجسد والروح
وضلع البقي بالصدر هديلي

بصف الهوى صار الجمع مطروح
خيالك تا الغي الآخ وديلي
ملزق عا حالي بالضغط ما بروح
وعم انزل نزول بمواويلي

يبست شفافي الهجر مش مسموح
عطشان ليكي شفافك ارغيلي
من جمر انتي وبالبرد عم نوح
منك شي بصة نار خليلي

ان كان بدك تكسري المفتوح
ومش قابلي تتعلمي متيله
بقلك يا قلبي من قلب مجروح
بالحب كنو رح بتبقي هيك
من درب وجهي خلقتك شيلي

سوء التفاهم

جيتي عا بالي بقلب طوفة ذكريات
ومنشان اعرف شو عليي وشو لكي
من الموت قمت وصرت بقبش عالحياة
وعلقت حرف بحرف وفقست الحكي

إنتي وأنا ما منشرب مناكل دوا
والأرض قالت: صار لازم ترجعوا
سنين اللي بقيو للهوى مش للهواء
علينا بمزاد العمر لازم يوقعو

يا تقبريني فسّخ شفافي الحريق
اعطيني شي بوسه تكسر قزاز العطش
صرخة عذابي مشيت بجرحي الغميق
لما كلام الجوهري لسانو انقطش

بين الجبال السمر ممنوع المرور
وعا كل نظره معلمه بصمة ضجر
وسوء التفاهم من سنه واربع شهور
مفنجر عيونو وساحب عليي حجر

حبي لكي عا دقة القلب انطبع
من قمقم المجهول بالسحب اطلعي
وقفت جوعي وشهوتي بصف الشبع
تا تغيّري المودال وتجني معي

صرخة حبر

بصحن الربح عم آكل علوبه
وروحي عا تاني بلاد مطلوبه
ضيعّت ذاتي بين خود وهات
وعقرّب مصيري بساعة غروبي

يا معلقه لحالك ميداليات
حاجي بقا تتصيّدي عيوبي
عندي ببيت النار ضرب خوات
وشالح ورايي صبر أيوبي

لما بحالي إهتمامي مات
كبّ العمر عالأرض أسلوبي
وصرت السما ابعتلها سلامات
وهزّ المدى تا يجيب أعجوبه

شبّاك بيتك مسمر الدرفات
وفاتت عا قلب المرحبا صعوبه
وقبال حولك بصمة اللهفات
وصرخه بحبر الآخ مكتوبه

وهوني أنا بين الأنا والذات
عم ابحث مواضيع مشروبي
وكلما لعندي تحضر المازات
ويطلع عبالي إسكر من جديد
بشوفك بكاس الخمر مصبوبه