انا بالشعر مكتبلي كتيبه
تا قيم قيامتو وجند كتيبه
اطلبو مني قصيد الارتجالي
انا وبالمدرسه كرهت الكتيبه
اذا صوتي انطرح بيكون عالي
وسكوتي ضجة الصمت الرهيبه
شفت عا مراية التفكير حالي
ولحالي قلت: كيفك يا حبيبي؟
اللي قلبو منقطع مش من رجالي
بقطع الروس عم إقطع نصيبي
بدون مبالغة واسع خيالي
الحروف بيعشقو مروجي الخصيبه
ورجال الشعر هربو من مجالي
لاني كلما انزل واطلع
عا خشبة منبري بعمل عجيبه
انا ان قلت مني عم بكابر
عا رفع المستوى الشعري مثابر
لاني مارد وعا صحن كفي
بعصر الفكر عمرت المنابر
ضروري المدعي بالشعر صفي
وعا هل بيكسرو سد المعابر
حلفت عا منبري ما بحب لفي
الما عندو منزله بلفي الاكابر
ويا هل عم تسمعو كلام الموفي
ديونو وخاطر الالهام جابر
لازم تعرفو مش هون صفي
تا إقشع خلقتو عالجمر صابر
العا وجه الارض بعدن بالملفه
مع الصاروخ ما بتمشي الطنابر
اذا بدكم تا كفي يهز دفي
وبدكم تسمعو النبره القويه
قيمو الميتين من المقابر
وانا من مقلعي الجوعان عفر
بربيع المرجله ما كنت اصفر
مجال النسر ازغر من مجالي
تا حافظ عالمعنى فتحت مخفر
انا من ا رض لبنان الشمالي
خيالي كلمة المش خرج سفر
بوعي والهام عم اجبل مقالي
ومن الجولات عم اطلع مظفر
لما الرب شطب عالجهاله
وقال: وجودها الانسان كفر
فكر للشعر يعمل رساله
بعدما نفخ الشاعر وصفر
وتا يهدا اسعد الخوري الفغالي
ورشيد وروكز وكلمن توفر
قلن عالهدا وبصوت عالي:
ما بدي تنزلو عالارض عندي
عصام البعرفو شاعر غضنفر
اتركوني حلق بجوي اتركوني
لشعري من السما عم جيب مونه
ما بدي بين نقصه وبين هله
عني تسألو يا تقبروني
انا بالشعر ما بحتك باللي
عا خشبة منبرو بيطلب معونه
لأني شامخ وعملاق ظلي
وعا صدر الابجديه متل قونه
بكلامي ما لقو النقاد عله
لاني بحكمتي جبلت المرونه
وبشعر الارتجالي رويت غلي
وعيون الشعر بالواقع عيوني
الحقيقه بقولها وابيض سجلي
اصلبوني ان كان مش صح اصلبوني
كوني شاعر ومن غير مله
قبل ما الديك بالأوفات يطلع
هلي بيحسدوني ينكروني
انا بالشعر حاكم هالولايه
المعنى ما الو قيمه بلايي
بشعر المرتجل عندي مهمه
تا اطعم كل متمرد بلايي
قلت للابجديه: هون شمي
العبير العالدرب رايح وجايي
لاني صاحب الكلمه المهمه
ولاني من المدى آخد مدايي
اذا وجدانك تعرف عا ذمه
واذا بتشوف حالك عالمرايه
شوف اللي نزل عن راس قمه
تا حتى يعلمك كيف القرايه
قلت للنفس: دخل الرب امي
الربوع البلحلا ملها نهايه
عا كل مقاطعه وعا كل امه
ابعتي مشاوير تشرح مستوايي
لا بيي بعدك ولا انت امي
انت عا منبرك ابن الحكايه
لما صرت بالاخلاق امي
حرف الميم من اسمي حذفتو
تا علم جلدك متيلة عصايي.
قالت الي البتقول بالمونه:
بالحب لونك ما بقا لوني
اكتر من المكتوب ما بتعيش
عا صحتك عم يظهر التشويش
يوم النهايه كل حالو جاب
منشان بكرا يخبط على الباب
ويقول: يلله فل من هوني
جاوبتها: عارف انا من زمان
قولي لغيري هالكلام الآن
وقولي لهلي بآخر سنينو
ما عاد عم يعرف محبينو
بعرف انا يا طالعه بها الصوت
الانسان هوي وعا فراش الموت
بيصير كلو عاطفه وإيمان
السلم ما لازم تحملي بالعرض
ويكون حبك عالخليقه فرض
بكرا بعدما ضب حالي وروح
واترك ورايي خاطري المجروح
ان كان عندك عاطفه رقيقه
ابقي عا قبري اوقفي دقيقه
وقولي: يا دلو صار تحت الارض.
ماشي وورايي ساحب العتمه
والحظ قلي: ما إجا رقمي
وحق السما من حرقتي عم دوب
والسوق فاضي من صبر ايوب
مش بس صارت دمعتي طوفان
شايف زماني من الدني هربان
وعا راس صابيع الغضب نقمه
هوني جهنم هون والجنه
يلله تعي موال تا تغني
ضيعت حالي بين وين ووين
بالرغم إني مفتح العينين
ولما خيالك دخن سواكير
عزمت الحكي عا شهوة التفكير
تا إسألك: شو سامعه عني؟
وقلتلها: فيي الف انه
ان كنت بدي جن لا تجني
إلنا المنيه عم تقدم كاس
وانتي وانا صرنا بدون أساس
وما زال نجم الحظ عنا غاب
وما زال بكرا رح نصير تراب
شو ما قلت، لا تزعلي مني
حاجي بقا يا فاقعه نعسه
اليوم القدر غنيتو معسه
قدام عيني وقفت الآلام
تخزق بديها اجمل الاحلام
وهلق حياتي بين تلج ونار
وكلما عا صوبك ساقب المشوار
عم يوقف المشوار بالدعسه.
أذن الشاعر عصام ملكي موسيقية لدرجة قصوى، فما من بيت شعري واقف، كي لا أقول مكسوراً، إلا ويلتقطه رغم محاولة الشاعر تغطيته بصوته الخلاب، وبموسيقى الدف والطبلة وتصفيق الجمهور.
كبار الشعراء تمكن عصام من أن يكشف هفواتهم الشعرية، التي كان من الممكن تفاديها، وكان يتصل بي ويسمعني على الهاتف ما يغني احد الشعراء (الكبار) فاقول له: هذا شعر مكسور، فيجيب: مظبوط.. وما عليه سوى استبدال كلمة بكلمة كي ينساب الوزن كشلال ماء. ومن وحي محادثاتنا كانت هذه القصيدة:
يا عاشقين الشعر شربل بعيني قال
بدولة زجلنا الحكم منو ديموقراطي
بيت العا موجه سبح تا يجيب شوفة حال
ومنو زياده هرب من خلقتو الشاطي
مش كل ردة شعر منقول عنها عال
وقديس ما بينسما اللي منعرفو خاطي
هلي ما منو نوى صارو حروفو تقال
عا السوق كلما نزل عم يطلع عياطي
وقت اللي طق الحنك بالجو جال وصال
ما ضل عند الصبر غبرة احتياطي
شعر اللي هوي "شعر" عا الحفظ ما بيوصال
عزمتو تا حتى يجي ويمرق تحت باطي
فلانات الهم قلت انو الوزن بطال
وعشرين مره كنت رح اسحب قشاطي
من هيك كلما طلع عا منبرو القلقال
وللناس قدم صور منها الوعي مفقود
بتعلق حروفو الهجا بلسان صباطي
ـــــــــــ
التعليقات
**
جان مفرّج يقول:
شربل كلامك عا الصدق باني
مقالك جميل بحضرتو تهنى
السبعه ما فينا نقلها تماني
ولا أحمد محمد أبو حنّا
**
انور سليمان يقول:
يا عصام الحق عم تحكي
حقك اذا من غيرك بتشكي
للجاليه ساعة ما بدك قول
ملكي أنا وشعر الزجل ملكي
**
جورج خوري ـ لبنان يقول:
كلامك يا شربل للمطالع عيد
المنهم حدا عن ضهرنا يحلّو
بقول بصراحه والكلام بعيد
موضوعك بشرعي دهب كلو
**
ميشال يوسف يقول:
منّك يا ملكي صوت صارخ بالودا
وما في خبر بتقول عنّو مبتدا
حقّك بشرعي تقول وتعيد الكلام
المنهم حدا لا يعملو حالن حدا
**
نزيه نجار ـ كندا:
يا شربل بعيني البلاغه وين
كترو اللي عما يعملو ضجه
واحد لحالو قال يخزي العين
والراهبه بيقلها حجه
وواحد عن الخمسه بيقول تنين
وكلمة اذا ما بيعرف يهجّي
كتار اللي بدهم شمط بالدينين
من ها المصايب ربنا ينجّي
**
روكز روكز ـ لبنان:
يا ملكي عندك بسيدني سفاره
بعباره مش عم بتبدل عباره
و"بعيني" للمدى وصّل سلامو
بمجله كلنا عليها غيارى
فيها الحرف عم يحفظ مقامو
ولكل مناسبه بيعمل زياره
عطى الايام دمعو وابتسامو
بلسان الحال ما بيعمل تجاره
البيقولوا المرفع بساعة صيامو
لقلب المجتمع جابو المراره
شربل قال وبقدّر كلامو
ما فيهم يطلعو فوق المنابر
"الغربه" هون بوليس الاشاره
**
اصفريّت والهمات هو هني
ولما كنت رايح عا مدري لوين
تفشكلت فيي ووقعت مني
وعا لم حالي تكسرو الايدين
ما قدرت غنيكي بشعر الامس
لقيت القصيد مغير العاده
وشفت المعنى مع غياب الشمس
عم ينقل على بيت قرادي
عا طول عنك بسأل البسمه
العا شفتي حلت محل الآخ
حاجي عليكي تطملي الرسمي
بيلبس حرير الاطلسي برداخ
ما بحب الا سايرك بالهمس
بغير الهمس ما زمّر بنيي
وان كان بدك إقشعك باللمس
لعندك بجي من دون عينيي.
وراق، وأنا، وقلام مبريه
وساعات ضجرانه من الايام
ومواسم الافكار رجعيه
وبيت القصيد بحالة استسلام
للقافيه ما قدرت دق جراس
واكتب بسفري ملاحم جديده
الاصبع بوجهي عم يكبر راس
بدو تا إفرك رقبتو بإيدي
جرّبت فصّل للظروف تياب
طلعت معي قياسات مختلفه
ولما عليي الليل دق الباب
نكزت الغفا تا فيّقو نتفه
اعطيني عطف، لا تحرميني القوت
عطشان .. كبي شفافك عليي
بلمح البصر عندي العطش بيموت
كلما عا راسو يدلق مويه
هاتي جواب ويسلمو الديات
وضبي جفاكي وعالقلب جني
جوعي لكي عم يقطع مسافات
تا يشوف كنو بتشبعي مني.
ردي السلام، الرب يحميكي
ما زال همّي صاير شريكي
جنيت فيكي، والجنون فنون
وما ضلّ عندي للدموع عيون
انتي قصيده طالعه من البيت
بساعة لقاكي عقرب اليا ريت
من هيك مش عم التقي فيكي.
شاعر أنا والنظم توصايه
ما بكسّر الأوزان عن غايه
بكسّر عتابا وميجانا بفنون
وبالحب بكسر رقبة القانون
وجوع انتظارك بكسرو بجايي
**
قال القلم عا منبر الورقه
جايي تا سجّل بالحبر مرقه
جيبو وحي بيساقب التفكير
وصوب السما خلو الخيال يطير
ويغط عا طرابينها الزرقا.
**
خفّ النظر بخراج عينيي
وكل الدروب تمرجلو عليي
موعود إطلع عالسما موعود
لعندك يا إمي الأرض مش رح عود
مهما التراب يبوس إجريي
يا بيوت شعري من قفا ايدي اطلعو
لا تفتحو شبابيك للي بيسمعو
من هالدني رايح، حروفي تقاطعو
وتكت السفر ما عرفت مين القاطعو
هرّيت مني قبل ما يطل الخريف
وجايي عبكرا ياخد شلوشي معو
اليوم الوحي لمواهبي أولم
وبحر الشعر بالقافيه تتلم
وانتي معي وسحر الطبيعه ديّر
وصلى علينا ربنا وسلم
عا شفة القهوه بجوانح طير
جيتي وسكوتك بالهوى تكلم
لا تهمّك اللهجه بحديث الغير
منك ضروري الناس تتعلم
شوفي خيوط الشمس جدو السير
وقوس القدح عم يلبس مقلم
والمرحبا هوني وصباح الخير
وهوني الندي نايم على الأزهار
ودعس الهوا عا رقبتو معلم
**
شعر صور والرب عاطيني
وتا إقعد على السكت ما فيني
كفر البشر ما بينسمى ايمان
ومنها التلاته نص دزينه
بدّي شعر بيفتّح العميان
يخلي الجمر يغلي بشراييني
وبعد الهلا قلو باطرى لسان:
من شويعر ومشعور نجيّني
لما رجعت بالصيف عا لبنان
السهرات كانو عياد شعنينه
نشرب ونسكر والفرح طوفان
وكلمن بكاسو يصبّ قنينه
وبالمرتجل لما علي البنيان
عا مشارف الضيعه وبالمدينه
قلي السمع عا صرخة الألوان:
دخل السما بالبيت خليني
وبالرغم ما قالو عظيم الشان
وبالسهل زينه وبالجبل زينه
مره إجو تا يغيّرو العدّان
وطلعو.بفكره طيّرت ديني
قالو: الحداثه اليوم يا إنسان
عم تسحب على الوزن سكينه
وحطو بإيدي كتاب عندن كان
لونو رصاصي ورقبتو تخينه
فتحتو بعد ما هزني العنوان
لكن ما شفت كلام يرضيني
سألتو" سطورك وين يا ديوان؟
قلي: بقلبي تشرّدو الكلمات
وصارو متل شعب الفلسطيني؟
**
