خراب

مكرسح خيالي والقلم خيّال

ورايح وجايي الهم والبلبال

ما في تفاهم ضل بمحلّو

كل اللي كانو بالفكر فلّو

ووحدي انا قايم بشغل البال

واقع بنقطه خاطري المجروح

وما في خلاص لحالتي مطروح

شو بعمل بها الكون متحيّر

كلمة يا اهلا لونها تغيّر

وصارت حياتي لعند غيري تروح

بأيّا لسان مواقفي بهنّي

ما بقيت عم بيِّن متل منّي

الايام جابو من الهموم حمال

وصعبه برضايي صرِّف الاعمال

ان كان ما بيوقف "غصب عنّي"

ما قدرت اهدا بين ايديي

وبعدو عليي بيبرم عليي

وكيف بدّي وصِّل سلامات

وفشخه ما عندي تلعْوِس مسافات

عا دروب عم تاكل من جريي