الصفحات

ننشر في هذا الموقع أشعار الشاعر الكبير عصام ملكي

من فرد أوف

لعندي انقِلي يـــــــــا قاعْـدِه بْحِيره
بفرُش إلك عالأرض تقديــــــــري
المشروب عندي من كذا أجناس
ولا تفزعي إن صار فاضي الكاس
بـِدلِـقْـلـك بْــقــلــبــو شفــاتــيــري.

وبِشْلح ورايـــــي كلّ تقصــيــــري
وبسْحَب لسانــي وبفْتـَح السيرِه
والصَّـــبـــر حتَّى ينعرَفلك كِـــيـــف
مــــن طُول بــالي بْعِيرك شْقاقيف
إن كـــــــان بتـحبِّي تستْــعــيــري.

مش عارفي يـــــــــا نفس الكبيره
بُــــوجــــــــودِك بدخِّن سَواكيري
بضجِّة نــــَهـــــــار بحب شِدّ الحَيل 
إن جـِيت تـــــــــا غني إلِك بالليل
مـــــن فــــَرد أوف بْقَلِّق الجـِيــــره.

وبَـعـد الهمس واللمس بتصيري
منِّك لحالك بالهوا تْـــــطـِـــــيـــــري
لكنْ مـــــــا بقْدر عضِّك بلا سْنان
الوجبه كْسَرتْ من جمعتين زْمان
وحالف أنا مــــــــــا بْعَضّ عالنيرِه.

عدنا انتهينا

شروقي

سيرة هوانا افتحي تا نغلق النسيان
ونوقف بوجه الدني البتحب تمحينا
ما زال قال الطفر ما بتقشعو لبنان
وعا الارض ما في حدا حسنات يعطينا

لما هجرنا الوطن كان الوعي غفلان
ومنا انتهينا بعد ما بعضنا لغينا
هجرنا مروج الخضر وتصوفر الوديان
وللدمع قلنا تعا عا العين لاقينا

يا ريت نوح بيجي ومنروح بالطوفان
ويا ريت رحنا قبل ما لعندنا جينا
عشنا حياة القهر والدهر مجرم كان
وما عاد يحكي السهر كلمه بليالينا

عا قزاز درب العمر ماشي الامل حفيان
ونسيت حروف الهجا خلقة اسامينا
عرفنا وعود البشر اول شهر نيسان
وقلنا يا رب السما من الكذب نجّينا

بالنار كبر العقل عم يشلحو الخوتان
ونحنا ما عنا عقل عا الخير يهدينا
مفروض تحت الارض نبقى عيان بيان
وتا نكون فوق الارض شي يوم مافينا

ترانزيت

شروقي

صدّام حبك الي يا ساكنه بتكريت
وحظ الكمشتو زمط من بين صابيعي
بساعة برود اطلعي الله الوكيل غليت
وعشرين شقفه صرت وبعيد تجميعي

اعطيني عقارب وعد تا عيّر التوقيت
واقطف مواسم هنا بايدين تطليعي
بالبال عشتي معي وطعم الحلو ما نسيت
بسوء التفاهم بشر لا تجرّبي تبيعي

ماشي ورفيقي الوجع والمقدره فتافيت
ووهمي بيقول الدني باخر اسابيعي
ويمكن عبكرا السفر يطلع معي ترانزيت
واوقع بايد الفنا ويدوب ترجيعي

جسر التفاهم معك بالاهتمام بنيت
تافرد فشخة حكي تشرح مواضيعي
وتا بكل نسمة هوى يطلع عليي صيت
وخللي شفاف الجمر تبرع بتوليعي

مني جنيتي الوفا ومنك محبه جنيت
التفاح عنو ابعدي واوامري طيعي
حالك لقيتي بانا لما لعندك جيت
وخايف لعندك تجي وبحالك تضيعي

رح صير طلياني

شروقي

انطفيت لياليي الجمر وتشرّدو الاحلام
وسجل غيابو الخمر بفراغ القناني
وبعدي بحالة سكر والقلب صار قوام
وقدّام شدّي طلع بالعمر خلفاني

حبك عطاني الوجع والحق بالاعلام
كلما عليك وقع عم ياخدو زماني
من هيك قلت لانا هلق يا مستر "سام"
من الدرب حيّد قبل ما تصير طلياني

ما بقيت متل الخلق وتغيرو الايام
وبالعين ماشي النظر عا ذوق عمياني
ان جيت اشكي لكي من الحب ما بنلام
مهما طعمت النفس بتضل جوعانه

وقت اللي قلتي الدني ركوع وصلا وصيام
زتيت خلفي الكفر ولحقت ايماني
وبعدو حديثي معك لغة ورق وقلام
وببلاد فكرك بقي مجهول عنواني

ما قدرت اعطي قبل لشفافك ولا نام
غطه عا اول صدر ما في الو تاني
من الاجر باخد كنت بالامس يا "الهام"
ولما التقينا صرت آخذ من لساني

"سام" الاسم باللغة الانكليزية

الشاعر

شروقي

الشاعر قضاء وقدر متجسد بانسان
وعن جد حرف الهجا واحد من رجالو
كلما برده انطعج من ضربة الاوزان
من الابجديه حرف عم ياخد بدالو

وهلي بطوفة صور بيرجّح الميزان 
بيمشي عا لمح البصر تصريف اعمالو
انكانو دروبو جمر ومفحمين كمان
بيقدر ببيت الشعر يكسر عطش بالو

ولا يوم همو الشقا وباغلب الاحيان
الضحكه عفارة بكي والليل مشعالو
تلتين عمرو عطى للكاس والنسوان
وصار بحساب الهوى "المش عال مش عالو"

كلما عا منبر طلع عم ينسمى جهلان
مش بس وحدي قلت كل البشر قالو
بنت المعنى الو جابت حمل صبيان
وقت اللي خلى الوحي يتزوج خيالو

منها عجيبه اذا منو عصر الوان
وبالآخ خلى الصنم يتحرك قبالو
ومنها غريبه اذا كرم على دربو كان
"الشاعر بيوم العطا بيشيل من حالو"

لبنان لبناني

شروقي

عني يا سمرا ابعدي صار الخيال خيال
وكاتب عا لوح الفضا مش هون عنواني
شوقي لبلادي بكي تا لبّسو شروال
واشلح بخلقة ورا طقم البلخزانه

بجيبي عا ذمة انا شباب الفلوس قلال
وقرش اللي ختير معي المصروف نسّاني
وحظي بشرب الخمر عا نهايتو دلال
بالكاس صابب الي فراغات القناني

بقسمه وبجمع وطرح عم اضرب الامثال
واسأل بداية عمر عن آخر زماني
بدّل بيقولو الي "بمراكبه" الاحوال
وطرطش بلهت الحكي مسافات دبلانه

ما قدرت غني شعر عا منبرو خيّال
ودوّر بايد الحرف موتار المعاني
كلما فقست الوحي تا يزلغط الموال
بيصير شعر السكت يطلع على لساني

لا تسمّعيني تعا موجود استقلال
ولبنان تحت السما ما في الو تاني
وحياة حبي لكي يا عايشه بالبال
برجع عا ارض الوطن وبذكرياتي بعيش
وقت البيقولو الي لبنان لبناني.

إلى روح الشاعر مخايل ابراهيم مخايل

الشاعر مخايل ابراهيم مخايل من الشعراء المتقدّمين، ترك أثراً لا يُمحى في قلوب محبِّيه وعارفيه. عرفته عندما جاء إلى أستراليا وزرته في الوطن، فوجدت فيه الإنسان المحبّ والطيّب النبيل، صاحب الكلمة الجميلة، والشعر الراقي.
أتقدّم بأحرّ التعازي إلى أسرته وأقربائه وأصدقائه ومحبّيه في الوطن والمهجر.

الشاعر مخايل بعرفو مــــن زْمان
كلّو محبّه وعاطـــفـــــه وإيمــــان
شاعـــــر قدِر عالأبــجــديِّه يمون
بالشعر يمكن مــــن بَني "بدادون"
مش بسّ للعيله الـــعــزا بيكــــون
لقرايبينو هـــــَـــــــون وبلـبـنــان.

بْحَقل الــعـَــزيـــمـِـــه قايل القايل:
بالــعـــاطــــــفِـــــه بتعلِّم متـايـــل
عا أرضها مخايل بشرعــي كَـوْن
ومتل اللي قالــــو بْقولـهـا بالمَون:
من هالدني الما لها لا طعمه ولون
قــــــال الأبانا وسافـــــــر مخايل.

وبيقول بالعالي ابــــــــــــن مِلكي
وحقُّو معو إن كــــان عــم يشكي:
بغيبة مخايل راحت الأفــــــــراح
مـــن هالدني وتجمهرو الأتــراح
وهلّق لأنُّو بـــهــــا الطريقه راح
حقل العزيمه دمّ عــــــــــم تبكي.

مخايــل لطيف وجَبلتو مـِــنَّـــــــا
وإخْــــــــــــــوه إلــو وحياتنا كنّا
شاعـــر مربَّى وطعمتــو معمول
ومن قلب قلبي بقول عـا المكفول
بقدِّم تـــــعـــــازي لعيلتو وبقـول:
راح اللي متلو مــــــــــــا بقا عنَّا.