حبي لكي ما اعلن الافلاس
قال الابانا بساعة القداس
من هيك لما جوّنا تطرَّى
طاف الحنان وخيَّم الايناس
عنك انا عا طول بتحرَّى
وعا ذكر اسمك بقطع الأنفاس
لا تسّجليني بايع وشرَّا
مقدَّم لكي من العاطفه أجناس
يمكن عليكي السحر متغرَّى
ووجهك متل ليمون انطلياس
وجودي بخيالك بعدما تدرَّى
كب الهموم وطلـِّـق الوسواس
بحيث القمر عا خدودك تمرَّى
ارض العليها بتمرقي بتنباس
ومن جهتي من الوهم بتعرَّى
كلما عليي تدلقي احساس
مش بس انو سمكتك حرَّه
"كركة عرق" وبجسمك الحسّاس
عا الجمر كلما تقعدي مرَّه
شفافك بيصيرو كاس بعيوني
وبصير بعيونك أبو النواس
يا مشغليلي البال يا فلانه
وقعت وما في انسان هدَّاني
لبست طريقي بالعمر مهوار
وحظي طلع بالسحب لبناني
شو صار ناديت الدني شو صار
مات الصبر والنحس هناني
ووزني سقط مع قيمة الدولار
وفنجر عيونو بخلقتي زماني
محتار من وضعي صرت محتار
سافر عا مدري لوين عنواني
وما ضل عندي للنجاح عيار
وشدّ العزيمه صار خلفاني
بالرغم اني فقست صوتي ودار
وصارت كلام الحنجره ملانه
ما قدرت غنـّـيلك باستمرار
واعرض بسوق الأوف الواني
بجرِّب تا اعمل عا الوحي مشوار
بشوف الحرف راكب على التاني
ان كان ما بيمشو معي الاشعار
عا الحيط بدي وقف التفكير
وعا البحص ركـِّـع سحبة لساني
يا حَلَّ ودِّي منـَّـك شويه
تا سفـِّـر هموم الحواليي
عا حالها ها الارض ما بتدور
بدها تا كون بقلبها مطمور
وليل ونهار بتبرم عليي
صفر السعاده والضغط ميه
ونِزلت عا خدي دمعتي وقيّه
ولما عرفت صار الوجع ختيار
وشفت النعس صوبي عمل مشوار
عطيتو وجه تا فسّدو فيي
بدِّي دهب تا جيبتي احشي
ومش عم يكبِّر عيلتو قرشي
ما قدرت قلو لحشرتي خلـِّـيك
وبالرايح من الهون والهونيك
واقف انا والكون عم يمشي
تلج وصقيع وقالب مويي
وصوب الشمس عم تهرب الفيِّه
وبالرغم انو خاطري مجروح
ما قدرت هوِّت للارض تا تروح
لقيت الوما وضيّعت ايديي
يا مدّوبيني البعد ما بريدو
عليي الوضع ساحب بواريدو
لا تحسبيني مطلـَّق الهمات
مع كل نسمه ببعت سلامات
ومنك اذا ما باخد علامات
صف المشي عا بيتك بعيدو
من شي شهر زرتك يا عينيي
وكل الهموم تجمعو عليي
ولما عا قلبي زادت الحرقات
حتى رجوعي تساقبو الاوقات
الدعسات صارو يعلـّـمو الطرقات
متيلة شو عمَّا يطلبو جريي
ضروري الهوى نشرح مواضيعو
وامر الخمر مش لازم نطيعو
بالمجتمع يا هند نحنا تنين
وقعنا بمشكل من سنه وشهرين
وعنا بيقولو الناس يخزي العين
كلما التقو عا الكاس بيضيعو
يا مربّحه الخسران منـِّـيه
لا تغيّري فصول الطبيعيه
قلي ضميري وقالت الاخبار
ذاتك هجرتي من بعد ما صار
ينق الزمن تا يقشعك فيي
حظي ما عاود يلتفت ليي
وحط الحيا بالارض عينيي
عا قلب قلبك كيف بدي فوت
وفصِّل لحالي بالحياة سكوت
تياب الصمت ما بيطلعو عليي
هلـّـي انكتبلو يضل يتوجع
تا يسمّعك أشعار ما تشجَّع
صارو بيوتو بدون طعمه ولون
شردو الحروف بقلب هون وهون
وما في حرف عا البيت عم يرجع
وما في قروش يسايرو جيابي
وعم يصرفوني كل احبابي
كيف بدّي شوف يوم مليح
وكيف بدّي كون فوق الريح
وتحت الارض عم يحسب حسابي
ماشي بقعودي وصارخ لهاتي
وبرّا الوجع والآخ جوّاتي
وعا درب جسما بالحفر منصاب
رايح نزول وطالع خواتي
ولما عرفت انو الحضاره "غاب"
غل الغضب بحروف كلماتي
وقلت الزمان العايشينو غراب
لابس عتم عا الزلط وحياتي
تذكرت لما شفتك بمعراب
وتجعلكو بايدك ملفاتي
وعا الحظ صرتي تعملي اضراب
لما الطفر عرَّم عا دياتي
انتي وانا منعيش عا الاعصاب
وبيعرفو سلامك سلاماتي
انما كان عندك للظروف خطاب
هاتي شو عندك من سكت هاتي
خلفك شلحتي عيشك الما طاب
وخلفي شلحت مستقبل الآتي
وعا الارض صرنا تنيننا اغراب
انتي هجرتي حالك من زمان
ومنفي انا من زمان عا ذاتي
يا ناعمه عا بياض مش ماضي
من حاضري هربان عا الماضي
بغير العرق ما بحب ريقي بلّ
بدك انا وفاضي تا صوبك طلّ
وان ما كنت مليان مش فاضي
بشرع المحبه قايم بحملي
منك دقيقة صمت لازملي
لا توجهي صوبي العتب واللوم
اعطيني شفافك بالمفرّق يوم
ومني خدي شفاتير بالجمله
وهلق الك عم قول بالمونه
حابب تا وصفك اطعمو لوني
بدو شي ساعه بيوصل التفكير
ان كان عندك طشم عا بكير
هدي الوقت لا يروح من هوني
من واجباتك تعرفي اني
بوقت اللقا بشلح كبر سنـّـي
وبالرغم اني شخص تاني بصير
بيضل همي بالحياة كبير
وبضل خايف اكتر من كتير
لاقوم اوقع عا الأرض مني
شدي الهمم يا مطالعه كتابي
عليكي الزمان بيكتب كتابي
طفل المحبه حاشر السنتين
ورايح لكي "طرانزيت" بترابي
عرفتك معي ما بتلعبي دورين
وعندك سؤال يساقب جوابي
بالأمس آخي جبتها بالدين
واليوم عندي آخ عا حسابي
طالع عا بالي صيب عصفورين
بشقفة حجر تا يدور دولابي
ووقفة حياتي تكون عين وزين
ويصير بيني وبينها قرابه
دخلك عليي فتـّـحي العينين
فارشلك على الدرب اعجابي
حابب تا اني فسِّر الحلمين
وقول الأبانا واطعج ركابي
يومين بيقولو الدني يومين
طلـَّـي قبل ما اقبر صحابي
انما كنت هوني بين وين ووين
بيجوز اني بشغل بالي كون
هونيك بالرايح من غيابي
يا تقبريني العز بالوقفه
وكلما بيجي عم تلحقو زقفه
اعطيني عرق لا تشلـّـحيني الكاس
تا يصير فيي اهرب من الناس
من نص وجهي واقعه شقفه
عطيتك من الالهام غنـِّـيه
وبالحب خدتي صفر عا ميه
من وين جبتي لغتك من وين
زعلان منك والزعل كيلين
وجيتي بعذر ما بيطلع وقيه
ختير ما عاود ينعرف كوني
وشاف الخريف مساطرو بلوني
خايف صراخي يطلع من جديد
وخايف لا قلبي يفلت من الايد
وخايف عبكرا ما يجي لهوني
من تراب بيي والارض امي
وعا ها الكلام بتشهد الامه
وباختصار بقول يا الهام
عليكي ما بدِّي كنت ارمي سلام
وقعت صباح الخير من تمّي
قالت يا ملكي حوّل على الدار
الليله تا ناكل بعضنا مقدَّر
قلتلها ماشي على البومار
شكلي بطاطا وطعمتي شمندر
لا لا قالتلي انت مش ختيار
شرّف الساعة 11 وتخدّر
للحب فينا نفصّل استمرار
انت وأنا للعاطفه بيدر
وعا بيتها لما عملت مشوار
نسّم هواها والهوى تصدّر
وقالت لا تفزع والفزع قنطار
ومعروف انو زوجها المصدر
وغلّ السكت باللمس يا ستـّـار
وما كان صوتي من السكت اجدر
وصارو القبل يحكو بلسان النار
ومنها حياها بضاعتو صدّر
ولما بسكون الليل عقرب دار
وصارت الساعه 12 تتغندر
وقعنا بمشكل ما الو دبّار
شهواتنا بالليل صارو ديوك
ونحنا ما بدنا نفيّق اسكندر
يا ناقله من حيّك لحيي
صرلي زمان خيالك بحيي
بشوف الوجع والهم مجتمعين
وما بيعرقو بصابيص عينيي
عندي عواطف بالهوى مجانين
بعز البرد عم اقلب مويه
وبالرغم اني محاشر السبعين
حَب الشباب متوّر عليي
وقعت بغرامك والدني تشرين
وقلت بخيال عواطفي تفيي
ومن هيك وقعه تغيّر التكوين
وبالقلب صارو يفتحو ديي
وصار الأنف افطس بضاعة صين
وصارو بدون خواص اجريي
وصرت على حالي اعمل قوانين
ومني الي اشلح حواليي
قصدت العياده بعد خمس سنين
وكل الاطبا قرّبوا ليي
وبعد الفحص قالو الوصيه لمين
هلق دماغك تحت ادنك صار
وصار العقل بالرايح شويه
بعد ما بحبها قلبي تهنـّـا
عذابي للهوى موّال غنـّـى
وشموخي هرّ مني ومستوايي
انشلح عا الارض والغبره تبنـّـى
صارت بالغنج رايح وجايي
تقلي شوف احمد شوف حنـّـا
مصاري بيحرقو وحكمو الولايه
ونحنا رح منبقى متل مَنـّـا
نِسيت كم أنا منشـّـف دوايه
عليها كل ما وصفي تأنـّـى
المصاري عندها لأجل الشرايه
وأنا عندي المصاري بالمعنـّـى
ولما لقيت عم يقصر مدايي
وتا حتى جنّ مش عم استمنى
قطعت السكت تا ينسّم هوايي
واشرح عا المذكـّـر والمثنـّـى
والها قلت بتكهرب سمايي
لأنو عندها قدري تدنـّـى
كنـّـو هيك بتريدي النهايه
انتي هون ضلي بلا مظله
وأنا رايح عا آخر ما تسنـّـى
يا تلج العا فم الميزاب غنـّـي
سيول وربِّـح الايام منـِّه
جايي بروعة الشعر الخيالي
تا حتى شبشب الكلمه المسنه
انا من جوقة النسر الشمالي
اللي فيها جو يقدر يحتضني
وانتو يا رفاقي بصوت عالي
قلتو للدني بالجوق جني
براحه بقولها وبشغل بالي
فيكم ما التقيت بربع انه
انتو قبة الزرقا بمجالي
وأنا بوجودكم مارد كإني
جايي لهون عنـّـي بالوكاله
وبلهفه لبّس الالهام بنـّـي
تا حتى يقول لدموع الدوالي
أنا للكاس مين بيمتحنـّـي
معي بها المرحله كفـّـو الرساله
الحرف قلـّـي ما عندك غير هنـّـي
ما بدي يروح مني راس مالي
تا روح الشعر تبقى مطمئنه
فيكم عا المنابر شفت حالي
وعا راس السطح بقدر قول إني
أنا لبنان شعر الارتجالي
بحياتي للزرع ما بعود اصلح
اذا بيروح شبر تراب مني
يا عيد واحه اسمك بصحرا الحياة
وعا قواعدك صرح المحبه بينبني
نحنا الك منعير كل الالتفات
ومش فارقه ميلاد أو راس السنه
بالرغم انو عاملين مخالفات
لرسالتك عا طول نحنا مننحني
مش بس انو طعمتك سكر نبات
صاير سفارة ها الدني لتاني دني
معلوم حب الذات عا العالم سطي
ولا شك انو أسس الشر وبنا
قلنا لهلـّـي بدروة خيالو لطي
يغيّر سلوكو بيقدر ينال المنى
معليش لولا حيطنا مره وطي
عا طول أرض الواطيه بتشرب هنا
"الأعياد حتى نسامح المعنا خطي"
"ونغفر إلو تا ربنا يغفر لنا"
شعب اللي مجّد خالقو وسنين صام
للبنان صلى ومش رح يوقـّـف صلا
بعون السما رح يرجع يعم السلام
وتهرب غيوم السود من وجه الفلا
اليوم على كل الأرض ماشي الاهتمام
وعنا ثقه بدها الحقيقه تنجلى
ومتل ما "ليعازر" من القبر قام
لبنان بدّو يقوم من قبرو مبلا
بلبنان لا يقولو تخاوينا
يقولو خنقنا حالنا بدينا
خربنا وطن حنا وحسن وحسين
ودَينا على الحسنات مدّينا
حصدنا الخساره وكيف النا عين
نحكي بنصر وتكسّرو جرينا
بيجوز نحنا جيل بو ضرسين
وبيشهد علينا حوالينا
سنتين النا بالجدل سنتين
والحلحله قيراط ما عطينا
وصلنا لسن بسن عين بعين
وصوب الورا لبنان ردّينا
منوين بدنا نشوف عين وزين
مات النظر جوّات عينينا
وصعبه تا نعرف دربنا من وين
عا مفرق التفكير ضلـّـينا
نحنا ما جبنا بمعرفه صفرين
كل الصفوره بيركضو لينا
لقينا قطع نقدي وقطع بالدين
لأجسادنا ما بين هون وهون
لكن قطع للعقل ما لقينا
اليوم الشعر ما انقام قدّاسو
بوجهي طلع دخان افلاسو
وفوق الورق بتمَيدن الاقلام
وما في حرف عم يعرف قياسو
الجو الخيالي ناقصو صمّام
وما في ظرف عم ينشرب كاسو
عا الأرض صاير هيكل الالهام
وكل الحلا رايح من أساسو
سهران وحدي والورا قدام
وما استفتح التفكير بحماسو
وعسكر وحي بيمرق بدون سلام
وطفل الحكي ما بيّنو ضراسو
راح الفرح عا حالة استسلام
وجاب الوهم عا القلب وسواسو
ان طعميت حالي كف ما بنلام
حقوقي ما لازم هيك ينداسو
ساعة زمن نمت بخمس ايام
صار النعس مقطوع أنفاسو
وكيف بدو بالحياة ينام
العا باب قلبو صورتك بتضل
وهم البراسو من تحت راسو
جينا يا أمي قبال رسمك ننحني
والناس جايي لهون من باني وبني
بستي تا حتى تلتقي طلبنا الك
وبالاربعين اليوم جينا نسألك
كنـّـوا التقيتي بامك بتاني دني
ولادك يا امي الدمع بعيونن ملو
وولادهم عنك عا طول بيسألو
وبكيو عليكي كتير من بعد الوفاة
صهر اللي عنك قال احلى الامهات
وصهر اللي كنتي ام محسوبه إلو
فراقك يا امي شلـّـع الافكار
وخلى العزيمه العندنا تنهار
خيالك بحضن البال دايم دوم
وبغيبتك عندي الدقيقه يوم
والنص ساعه اربعين نهار
الامّات مَنها هينه يفلـّـو
العمر بغيابن هَم ما حلـّـو
ما في امر قد الامومه يهم
هنيال هل بيكون عندو ام
وهلي ما عندو ام يا دلـّـو
كلما عيوني بالحياة تجول
بلاقي عذابي عم بيشمط طول
كنت كلما اوقع بهمي
وتقفل بوجهي قول يا امي
وهلق اذا بوقع شو بدي قول
اسمك يا امي بالفكر منحوت
وما بقيت عم اقدر عا قلبك فوت
صاير لكي سلامات عم ودي
كنت شوفك ساعة البدّي
وهلق ما بقدر اقشعك تا موت
امي ما فيكي تطلعي منـّـا
منبقى بوجهك وين ما كنـّـا
مش ممكن تموتي يا ام وبي
بالفكر رح يبقى خيالِك حي
وروحك ما فيها تروح ما عنـّـا
يا عين شنـّـي بالبكي غاره
وخلي الدمع للرمش اسواره
ساره الزغيره بآخر الستين
راحت وبكيت دم بشمزين
واليوم راحت أمنا ساره
لساني برقبة كلمتي معلـّـق
وحرف الهجا عا القافيه تخلـّق
أوقات عم يطلع حديثي صراخ
الجمعه نقلنا من الفرح عا الآخ
وامي عا ركوود ناقله هلق
وانتو يا هلـّـي بعدّكم اخوان
وواحد منبقى بأغلب الأحيان
بلسان نحنا حضوركم ممنون
انشلله فدا عنكم وعنا تكون
وايامكم تبقى بلا أحزان
وانتو اللي معكم أكبر مهمّه
تا تدفنوها وكلكم همّه
شوقي لامي ما قدرت اخفيه
صدري احفرو وحطو جسدها فيه
لا تطمرولي بالأرض امي
بفصل الصيف عم نقدر نداوي
الشهيه الصوتها بيضل داوي
عا ذوق الناس بيفصّل تيابو
وغيابو للقلب جاب البلاوي
نحنا منعشقو ونحنا حبابو
علينا مشعلو بيضل ضاوي
لأنو للدفا بيندقّ بابو
ولغير فصول موجوده العداوه
ما بدنا تنطوي صفحة كتابو
قبل ما جسمنا يحس بحماوه
وزجل لبنان أعلن انقلابو
عا كل البرد بيحب القهاوي
وهلق عا السكت وارد حسابو
بشفاف الكاس وشفاف الركاوي
اجانا مأخر وزارك جيابو
لطبيعه بصحن عم تاكل هراوي
وقبل ما يغط ويشبرق شبابو
وسماها يلقـّـم بأزرق سماوي
اجا تشرين ومطيّر صوابو...
وقميص النوم خزّق عن جسدها
وما خلـّـى زرار تقعد بالعراوي
