الصفحات

ننشر في هذا الموقع أشعار الشاعر الكبير عصام ملكي

صرخة شعوري

شروقي

قومي تا نسحب سوى النا الربيع اشتاق
جاني ببريد الصبح مكتوب ازهارو
النسمات لبسو العطر ومفسّحه الافاق
ودمعات فصل الشتي تحت الارض صارو

شوفي بضربة شمس كيف الفرنقل فاق
وسجل عا خدّو النحل تصميم مشوارو
والورد "صوب الهدا" بدقة قلب خفـّاق
استفقد عراوي النظر تا يبكل زرارو

الاصفر عا احمر لقي وصار الجمال "بواق"
تصفر تا عود الزمن تنشد اوتارو
وتا كل عاشق يجي ويقطف بواق بواق
ويجمع براحة فكر شردات افكارو

صرخة شعوري اسمعي حبي لكي عملاق
عا كل جرحة وتر وصلتلك خبارو
حامل شهادة وفا من مدرسة اخلاق
وكبّش بريحة فجر تا يفصّل نهارو

اليوم الطبيعه شعر عم تنظم على رواق
العصفور جاب الحرف عا راس منقارو
وحولك ربيع الوحي فرّخ من الاعماق
ولهفة بلاد السمع وقوافل العينين
غفو عا بيت الشعر تا يبّوسو حجارو

اخت القمر

شروقي

وينك يا اخت القمر صار الدمع طوفان
هجرك بضرب الرمل ما عرفت اسبابو
بيتي بقوافي الشعر عا مفرق الاوزان
انما دق قلبك الو ما بينفتح بابو

طاير بقلب  "الهوى" متل الصبي الجهلان
عا كل شلحة نظر عم يكتب كتابو
يا ما عا موج العطر بظروف كيف ما كان
طابع الوف القبل بشفاف مزرابو

عالصخر لما انبنى صار الصخر انسان
سجّل عا "وجه الحجر" لمسات اعجابو
وعالحيط صورة زمن متشلع بلبنان
كبّش بخيط الامل تا يرّقع تيابو

وعالسطح صابب وحي الاشكال والالوان
ابيات متل القطر بحروفهم دابو
وبالسقف اخ الوجع والقهر والحرمان
وبالارض حظي نكش تا يقبر شبابو

وداير مدار الشقا وغبرة حلم هربان
عا اللانهايه وصبر عايش عا اعصابو
جيبي الحكيم وتعي مني الفرح زعلان
ما ضل عندي دوا غير الخمر والكاس
يا دل قلبي احترق تا يشوف احبابو

الصداقه سوق


صرنا عا آخر ما بقا ننفع
وساعة لقانا ما لها مرفع
يا رفاقنا بنادي بأعلى صوت
يا درّجو الزيجه يا مشو الموت
تا يصير فينا بعضنا نقشع
هيهات نرجع متل ما كنا
من دروبنا هربت اماكنا
ما في صداقه خدها بينباس
وكلما اتصل فينا حدا من الناس
بيكون بدو شي غرض منا
نحنا بهوّة كذبنا وقعنا
تحت الارض مش فوق موقعنا
منقول انو القرش النا روح
ووقت اللي نحنا من الدني منروح
ما في قرش عم ناخدو معنا
بدنا اللي راحوا قبلنا نتبع
بالموت النا متر المربع
الله بصقنا عا الارض تخمين
خلقنا تا حتى نضل جوعانين
كيف بدنا من الدني نشبع

صرخة

بلادي بالكفر أكبر غنيّه
ومن الضربات صارت مستويه
كل ما شعبها يخسر رهانو
بصرخه بتقلب الايام فيي

الارز عا جبالنا ضيّع مكانو
وحب الذات عاملنا ضحيه
وهللي وجودنا عا الارض هانو
بيقولو سَجّلو مواقف قويّه

يا ريت كلامهم بالحق زانو
وعطيو متل ما بدها الرعيه
تا قمح الشعب يبعد عن زوانو
ضروري يكون عنا مرجعيه

بعض نوّاب بالأمر استهانو
ومشيو بالحيا خلف البقيه
بشراهه (زَيْد) عم يبلع لسانو
(وعمر) بمواقفو صفر على ميه

كل جدودنا بالأمس كانو
يقولو بلادنا إلنا هويّه
ما كان الدين يفرض عنفوانو
بس اليوم بتقول الصراحه
مرض لبنان اسمو الطائفيه

نحنا شعب إن كان مَنْكم عارفين
اخوان لدروز ونصارى ومسلمين
بلاد الغرب أديانها  خمسه انسمو
وبالشرق عنا ألف رب وألف دين

بعد قنينه

يوم الفلاني شربت قنينه
متلت عرقها ورقبتو تخينه
وحسيت انو تنين راسي صار
لوما المرايه القاعده بالدار
ما قدرت أعرف حضرتي ميني

تياب السكوت استذوق كلامي
وعا كل مفرق تارك علامه
سيارتي عن قودها وسكران
ومش بس مطفي بالوهم غرقان
وخلفي البحر والبر قدامي

جرّبت اجمع من أنا نتفه
وبقيت معي الأفكار مختلفه
وبجوار تله قلت يخزي العين
عليي عريشه بينت جنسين
لما وقفت عا الدرب بالصدفه

وفي شلح طابب كان عا التله
هوي قبل ما اسألو قلي
مكهرب أنا وماشي على الطميش
عن قود عنقود وما بعرف ليش
طول الوقت عن ضل بمحلي.