الصفحات

ننشر في هذا الموقع أشعار الشاعر الكبير عصام ملكي

إلى الشاعر سعيد عقل في عيد ميلاده

يــــــــــا سعيـد العقل كــلـــُّو فيك
وزن الشـعــــــر متـزوَّج قـْوافيك
ما في حَـــدا عـــــا سمعْتك غـَــبَّر
يــــا شاعـــــر الفيك الدنـِي بتِكْبـر
بعيدَك تَهاني مــــن القلب بهْديـك.

حـْــــروف الهِجـــا مِنعـدُّن وْلادَك
والشاعــــــــــريِّه إسمْها بــــلادك
إنت نزلتْ عـا وجُودنا مــــن فوق
عيـــد ميلاد الفكر والــــــــــــذَّوق
بينقال عَنُّو عــــيـــــد مـيـــــلادَك.

اسمَــــــك بقُول بكلّ حـــــــرِّيـــــِّه
عــــــــــــــا شِفّتي بيضلّ يَومــيِّــه
اسما لله عَليك وألف يخـْـزي العَين
عنتر زَمــانـَــك "منْسحِب وجهين"
سنين القليلــِـه مش إلك هِــــيِّــــي.

ويــــــــن متلك رح نلاقي ويـــن؟
بضربة حجر بتصيب عصفورين
الميِّـــــة سنِـــــه العدَّيتها مــا شـي
لمَّا إجتْ عـــــــــــا دعستَك تمشي
وضحكت إلــَـك حِمّلتــهـــا سنتين.

بدنا سنِه بْلا راس


بدنــــــــا السلام يعِمّ موطننا
وما يضلّ عِنَّا وضع يحْزننا
وبدنا ظُروف تْودِّع الإفلاس
وبدنا مــا يبقى الجِنّ ساكِنـَّا.

وبدنا محبِّه صادقَه وإحساس
وبدنا بِإيدو الحَــــــقّ يعجننا
وبدنا لِشمخة مستوانـا أْساس
وعا الرمل ما نبني مساكِنَّـا.

وبدنـــــــا علينا يخيِّم الإيناس
وبالمجتمــــــــع نحفظ أماكننا
وبدنا حُضور يدقّ كاس بكاس
وبدنا تـــــا نرْجَع متل ما كنَّا.

وبدنا اللي إلنا عم يدقُّو جْراس
دقِّة قلب مــــــــــــا ياخـْدو مِنَّا
وبدنا فَــرح بالمتر مــا بْينقاس
وبدنا سنِه مـــا يكون إلها راس
تـا نحطّ إلها راس مــــــن عِنَّا. 

من الشاعر عصام ملكي – استراليا الى ابو حبيب – لبنان 2

 
انقر هنا لقراءة الجزء الأول من القصيدة
70ـ
ونسيتْ إسم الفخاض حضرة إمّ زَين
ومرقتْ على اللحّام بعد الصيرفي
دلـِّتْ عا فخضا وقالت: اعطيني تنين
قلاّ: عا هيكي شكل وحياتِك ما في.
ـ71ـ
ولميا سماوي داهنه شعرا الطويل
بْلا ذوق صارت الف يبعتلا العمى
وقت اللي شافا عا الدرب بيُّو لخليل
قلاّ: البيبوسِك عم بيطلع عا السما
ـ72ـ
وبالإنكليزي جورج قالو ما انحشر
بيحكي بطلاقه عاش بين الإنكليز
ولمَّا رجع عا بلادنا ضحكو البشر
ما كان يعرف غير كلمة "ياس بليز"
ـ73ـ
ومرتا عا نِعمه قالت بطوفة جْنون:
بالراس عندو صار شِلْش مْن الخوات
كاتب عا المحلات: نعمِه بيضا تون
وبيضه ما عندو عم يبيع مرِطـَّبات
ـ74ـ
وهللي عِمل مختار عا ضيعة شْوِيت
سافر عا سدني بعدما نَجمو انطفى
حَطـُّو إلو عا مقعدو ها الديناميت
وعا الدرب هلـَّق عم بـْيـِمشي بْلا قفا
ـ75ـ
وكلمة صَلا ما كان يحْفظ بو هَلا
وما استفقدتْ مرَّه الكنيسه غـَيبتو
عا الدرب وقت الكان رايح عالصَّلا
وقـَّع أبانا والذي من جَيبتو
ـ76ـ
وكلمة الأولى لربـّنا هيِّي
ومسجّله عا صفحة اللاهوت
والتانيه صارت علانيِّه
شربل بعيني وفاطمه ناعوت
ـ77ـ
وبقلـَّك وهيدا حَكي يوصال
وبالعرض نحنا السلـُّم حْمـلـْنا
وجوزيف بو ملحم لشربل قال:
من عيون "فافي" خْلاص ما إلنا
ـ78ـ
ونَخُّول صارت قاهره ظروفو
وبلـَّش عليها يدخِّن سواكير
وجوزيف نادر نادر نـْشوفو
وشربل بعيني الحظّ عندو كبير
ـ79ـ
ساكن أنا بمْدينة السَّودا
وعا سْليق صرلي ستّ سبع شهور
قاعد بَلا لِيِّي وبَلا سَودا
وصارتْ خبر جمعيِّة القرقور
ـ80ـ
ودرب العا بيتي بشهر متل شباط
بالميّ ضاعت مع حَواليها
وجاري (بو صندل) ما لقا صبَّاط
تا يلبْسو ويدوِّر عليها
ـ81ـ
والشاعر دويهي عطانا المستحيل
وكتار قالو بالجميل المُرتجى
ومن وين بدِّي أنظم الشعر الجميل؟
ليل ونهار مشغَّل حْروف الهِجا
ـ82ـ
وعمَّك بوهاني دقّ باب المُغرَمين
الوجبـِه جَديده والعيون تشلـَّعو
لمَّا إجا تا يْعض رقبة ياسمين
ما ضل ّراكب سِنّ تا تساقب معو
ـ83ـ
ومسعود هالمفزور يبعتلو العَمى
بنتو الشنيعه بعدما مِدِّه نقع
كيّل مصاري وحطـّها فوق السما
ولمَّا عرضها لزيد بالنقطـَه وقع
ـ84ـ
وعالسطح "بالميُّو" كانت "جاكلين"
هللي بشوفتها العقول بـْتــِنْسبا
لمَّا بجسدها مَسْمر عيونو أمين
وكفـَّى المَشي راح بعَامود الكَهربا
ـ85ـ
وبالزُّور جاب شهادتو حنـَّا سلام
ويوم التلاتِه قبل ما حَسّ ودَرى
عا الكوع لما نـَخّ تا يشوف الفرام
يقبر صْحابو راح فايت بالمَرا
ـ86ـ
وها "المَكْسْيان" الحَدّ شِقِّة أستيناس
صلـّح إلي سيَّارتي وجَبلي الطفر
وولاد عبد النور: ميشو مع الياس
وسيمون عم بيصَلـّحو "الكار" بدولار
ـ87ـ
ووقعتْ "نظيره" ومين بـَدّو يْلمّها
بتـْقبِّن قـْناطير وببَطنا صبي
ووقت اللي صرخِتْ جان فات بتمّها
واليوم إسمو صار يونان النبي
ـ88ـ
وبالرغم إنـُّو أفلس السيِّد عماد
وقالو: انكمَش بالأبيض ومهرو كِبِي
لمَّا إجا خـَيُّو لِعندو من البلاد
دبـَّر إلو "عالدُول" قعدِه مرتـَّبه
ـ89ـ
"وحنِّه" اللي عندا فرد عَين عْلى اليمين
زوجا غرض للبيت ما بـْعمرو اشترى
ولمّا عا عيد الأمّ جات "الواش ماشين"
تمَّا انلوَق والعين صارت من ورا
ـ90ـ
ومبارح بْلا موعد اجتمعو العيال
وعن زيجة الأولاد عملو مؤتمر
وقالو "لخالد": رَوّج وزوِّج هلال
قلـُّن: هلال مبارح تزوَّج قمر
ـ91ـ
وقالو "لطيفة": الابن سمِّت شكسبير
ومِنـُّو الذكا هربان لا حَولا وَلا
والبنت إسما ناطره والبُو سمير
مْحيَّر ما بين "النتنياها" و"كربلا"
ـ92ـ
ورامز ابن "هلـُّون" شو آكل نِسي
عا الأرض نام وصرْختو بُوق الخطر
دخلِك يا إمِّي قال عا بطني ادعَسي
ولمَّا عا بطنو دعسِت بقوِّه انفزَر
ـ93ـ
وبالكنْفشه "سركون بو هادي" ابتدا
بإصبع بْيـِمضي وعا السريع بإصبعين
ومنشان ما تتقلـَّد الإمضا "ندى"
عا كلّ إصبع عم يْركِّب بصمتين
ـ94ـ
يا بو حبيب الإنتْ شاعر سندباد
وبحر الشعر بحرَك شو مشتقلك أنا
من قـْزاز بيت الشعر صار بها البلاد
من هيك ما لي قلب إكسر ميجانا
ـ95ـ
رح خَبّرك عن حضرة الشاعر فلان
قـَللي ضمير الشعر كم كفّ افـْقَعو
"ملحم فريد" مديّـنـُو "ومتري" كمان
وحتَّى الما معهم ياكلو إلهم مَعو
ـ96ـ
وقـَللي "نبيل" الياس مغروم بمَها
ودمعة عيونو بتشْبه عْيانة شباط
جَرَّب قصيده مْلونّه ينظـُم لها
طلعتْ معو متل الضراط على البلاط
ـ97ـ
ومن جهّتي ما بْقيت مرتاح الضمير
المصروف عندي زاد والقلب استوى
إبني عا بطنو صار عم يصرف كتير
تكبَّر عا صحن سليق تا ياكل هـَوا
ـ98ـ
وقلِّي كريم: الهَمّ شلشو ما انقـَبع
وما في أمل من حـَظّ غيري إنعـَدى
كلما القصيده بالجريده تـنطبع
بتطـْلع كأنُّو مْقوَّس عليها حـَدا
ـ99ـ
"ونزهه" بـِطول لسانها عنوانها
بتقول: شُوفو ما حَدا غيري ذكي
مبارح بـِحادث سير قطعو لْسانها
وفـَرَّخ عا كَعبو جُمّ... لـَحـِّقـْلا حَكي
ـ100ـ
وجرجي يا دِلـُّو مْشاكلو مش قـَدّها
من الهَمّ شـَعرو طار بحلِفلـَك يمين
سيَّارتو بتدُور وقت البَدّها
وما بتنطفي تا يطير منها البانزين
ـ101ـ
وبخَبرَك قصه  عا ضحكِه معمّره
بحَرب القديمِه العيش كان مغامَره
بسعر الخيالي الأكل ما عاد انشرى
"بودان" قلبو نشـَّف وصَبرو اهترى
ياكل حَشيش ويمْعَط شلوش الدَّرا
ومَرتو بهوني نهار طبختلو خرا
باليوم ذاتو كان طالع من ورا
ووقت العَشا كفيّن طعماها اللئيم
لما لقى بالصحن شعرَه زغيـَّره
ـ102ـ
ورَح خبّرك شو صار مع خالي مُعين
فلوسو عا حَوّا طيّر ولابس رقع
تحت الشتي شافوه لاحق جوزفين
ولمَّا زحط عا الدرب بالنقطـَه وقع
ـ103ـ
وتا خبّرك بالسوق شفتلـَّك لطيف
مْلفلف كفايه وقبل كلمة مرحبا
قـَللي عملت "بالكار" حادث يا لطيف
والحقّ كلـُّو عا عَامود الكهربا
ـ104ـ
ومتل القمر بالذات ابن المغربي
ومرتو عليها الناس قالو: تـْفرَّجو
من شهر متل اليوم جابتلو صبي
انْ شِفتو.. الشحن بتقول مارق عا وِجو
ـ105ـ
وعنّا بعض شعّار شو دمُّن تقيل
ما بيعرفو الذوق وما إلهُن مستوى
بالأرض حفّرو وعمَّروعالقال قيل
وعِلّة وجودُن ما بقا إلها دوا
ـ106ـ
وزوجا لهَنا ما فادنا وإسمو مفيد
من زيجتو المنحوس ما شاف الهنا
مْبارح قبل ما سمّعو نهارك سعيد
قـَللي إبن سلوم: حـَبَّلـِّي هـَنا
ـ107ـ
"وبشار" سبع متار أو أكتر بـْقول
"والاحمدي" بالطول مش عم ينحَسد
عينـَك تشوفو مبارح تطلـَّع نزول
وقت الإجا تا يسلـِّم عليه الأسد
ـ108ـ
و"ممدوح" مع "إلهام" ما حقَّق مرام
مبارح إكل كفـَّين منها على الغـَدا
"وسلطان بو العينين" واقع بالغرام
وبيقول ما لو عين تا يغـْمز حدا
ـ109ـ
وصارت لطيفه اليوم متل الإنكليز
بْـ "ياس" و"هواريو" كلامها صاير عَبي
من بعد هاك الـتـَّوْم قالتلي "دينيز":
ليعقوب جابت بنت بازقها صَبي
ـ110ـ
وسلمى يا ولـْدي شكلها صاير غريب
لمـَّا قالتلي: مرحبا فكري نـَتـَق
من كتر منها ناصحه يا بو حبيب
مبارح حملها جان واليوم انفتـَق
ـ111ـ
ومتري عا دربو قال: ما بـَدُّو سمير
بيحبّ وحدو يكون الله يقـْطعو
عا الدرب شفتو اليوم كذَّاب الكبير
رايح عا "كامسي" "وماشيه المعدِه معو
ـ112ـ
وحاتم ما عندو للشراكه مقبّلات
ومنشان ما يعمل لحالو مشكله
جاب لشَباب الحي أجمل بسكلات
وقال: المرا يا شْباب مش إلكم إلي
ـ113ـ
وسحبت حنان لسانها وأيَّا لسان
وقت اللي لقطتْ "أندرو" هـُوِّي ومرا
قــَلاَّ عا سبعه ونصّ نايم يا حنان
ها التحت مني "بنت كـبـَّا" مْكبَّره
ـ114ـ
وشو بعد بدّي خبّرك يا بو حبيب
لا قلام عندي ولا بقا عندي ورق
قالو الشِّفا موجود بالدير القريب
لكنْ أنا عم اقشعو بشرْب العرق

وبختُم هالرسالِه يا بو حبيب بذكرى أليمِه إلي، وبقول:
ـ115ـ
عا بنتي مش عم بيُوقف نَحيبي
راحت عا السما وناطِر عجيبه
ساره إسمها وزهره بخيالي
وإسم غيابها أكبر مصيبه
كلما جيت أكتبلا رساله
العقل بالجوّ بيشبّق جناحو
ودموعي بياكلو حْروف الكتيبه.

من الشاعر عصام ملكي، استراليا.. الى ابو حبيب، لبنان

ـ1ـ
يا بو حبيب اليوم تلفنلي الصبي
بدّو خمس تلاف تا يشمّ الهوا
والدَّين شبر وحقّ عيسى والنبي
مروّب خمس ليرات تا جيب الدّوا
ـ2ـ
ودَين العا خيّك حِمل مَنُّو حَبّتين
وان قلت حَلّ الدفع بتشوفو عبّق
بجزدان مرتو شاف هوني ورقتين
هندز شبابو وراح حطـُّن بالسبق
ـ3ـ
وملحم بو طنسا شغلتو لعب القمار
تا يكون متل الناس وحياتك نِسي
كلما رجع عالبيت بيدُور النقار
وبيدور عا النافوخ ضرب المكنسِه
ـ4ـ
ونعمِه بعدما شوَي طابت رقبتو
سلحب تا حتـَّى يشوف خيّو بو أمين
ولما عطس عالدرب طارت وَجبتو
وكسدر عليها شحن داعس بانزين
ـ5ـ
وعادل لأنـُّو خمس نسوان اشتهى
بدُّو الزواج يكون بعد التجربه
طلـَّق بعد سنتين حـَنـِّه ومنتهى
وطالب مرا عالحارك تجبلو صَبي
ـ6ـ
وطوني ابن مسعود بالطبخه دِري
بتضل مرتو تقول قالت أمّها
بالمعكرونه حط لـِحْماتو غِري
ومن وقتها ما عاد فتحت تمّها
ـ7ـ
ولولو وسليمه ضلّ مودالـُن عتيق
ما بيّنو مَرّه بعين المجتمع
لما إجو يتوَشوشو بنصّ الطريق
وتـْنيْنهم طرشان جنـَّزنا السمع
ـ8ـ
وأنور لأنـُّو تعوَّد يحبّ الجُلوس
وصاير متل جاموس ما عاود حلو
لما ركب "بالباص" تا يوّفـِّر فلوس
قامو تلاته وقدّمو مقاعد إلو
ـ9ـ
والشاعر الحفيان من مدِّة زمان
لهَوني وصل مخنوق هـُوِّي ومطلـَعو
وهلـَّق بعدما قرّش وقرّش كمان
بدَّك وساطه صار تا تحكي معو
ـ10ـ
بسدني النثر عالشعر عامل انقلاب
صار الضمير الحيّ بَدّو مراجـَعه
شربل بعيني قال: ما بطـَلـِّع كتاب
ما زالهم إخدو الحروف مقاطـَعه
ـ11ـ
ويا بو حبيب سألتْني وريتو عَفاك
للستّ "فنصا" الناس منها مأمـَّنه
عا ضهر شاعر عاطفي عملتْ ملاك
وعا ضهرها جلالـَين مودال السنه
ـ12ـ
وعمـَّك بو فوزي بعدما كاسو كرع
جنينِة لطيفه بهمـّتو صارتْ طحين
قلبين "قرّه" بسّ مش أكتر زرع
صارو بـِساعه خمسميّه وأربعين
ـ13ـ
وبطرس إبن شاهين وصّلـِّي خبر
إنـُّو عا ذوقو شغـْل ما عاود لقى
"عالدول" قاعد متل ملحم بو جبر
تا يحكّ راسو وقت ما عندو بقا
ـ14ـ
وزهره بتمـَّا سنّ واحد ما بقي
وهوني نهار التقيت بخالك سليم
ضحكت إلو عا كتفها لمَّا لقي
وهوِّي معو بالقلب جابولو الحكيم
ـ15ـ
ومرتو لـْبو حنـَّا يا ألف شحـَّارها
ما ضلّ عندا ربع نتفة عنفوان
ومش بسّ طالع "دمّله" بمنخارها
عا لسانها التالول عامل مهرجان
ـ16ـ
ويا بو حبيب اليوم قالولي "رَضا"
صهر العَليها كان غاضب باسها
كتبتْ إلو الرزقات عن حبّ ورضـّا
لما "الفـَرد" كان عْلى طاسِة راسها
ـ17ـ
وسمعان غازي بكبر بطنو ما حدا
من دعستو عا الأرض بتخاف الطريق
لـَكـْنـَيْن كبِّه كان سافق عالغدا
ولما إجا لعندي سفق كومة سْليق
ـ18ـ
و"بلقيس" عالسبعين حطـِّت كم سنه
وبتقول: بَعدي بطلعتي نعمة كريم
يوم التلاتِه طافت عليها الدني
وعينك تشوف الكحل دايب "والكريم"
ـ19ـ
و"نزهَه" يا عَيني راحت لعند الطبيب
وقالت إلو: من الحُب قلبي منحرَم
بدها بـِوَجبه تركـِّب سْنان الحليب
وضِرس العقل تا يْصير ياخدها "كرَم"
ـ20ـ
وجاري عن الشيطان صوره مصغـَّره
البسمه عا تمُّو بتنسَمى ورقة نعي
من النوم فيـَّقني بساعه مأخـَّره
تا يشوف كنـُّو خفـِّتْ السعلِه معي
ـ21ـ
وعن لحقة النسوان ما بطـَّل "كريم"
تخمين حسّب كلّ إكلِه مجدرّه
هلـَّق تعلـَّم كيف بيحاكو الحَريم
وتعلـَّم النافوخ كعب الكندره
ـ22ـ
وعينك تشوف اليوم كيف صاير خليل
حامل بايدو هاتف عْلى المستوى
قللي بو حنـَّا: شـُوف زَنـْكـَل عا التقيل
قرْش العا جيبو فات ما شمّ الهَوا
ـ23ـ
وإيمان صاير صيتها مْعبّى البلد
إخدتْ رجل أعمال من عيلة جحي
وضلـِّت شي عشر سنين تا جابت ولد
من زوجها لليوم بعدا بتستحي
ـ24ـ
وتا خبّرك عن مَرْت عمـَّك بو ربيع
بعد "النـِّزل" عم يطلع بدَيْها نسر
وقت اللي قالت: "أوف" بالصوت الشنيع
ما ضلّ صحن قزاز إلاَّ ما انكسر
ـ25ـ
ومرَّه بسهرَه حضرة الشاعر أمين
غنـَّى قصايد خضر وانهزّ الحـِما
ونسوان من "بَشتون" بحلفلـَك يمين
نظـْمو قصايد زرق من لون السما
ـ26ـ
وقللي بو حنـَّا بعدما الزيت احترق
بسيـَّارة ابراهيم طار البانزين
ولمَّا دلـَقلا بتمّها شويِّة عرق
صارت تطـَوْطِح عا الشمال وعا اليمين
ـ27ـ
ومن "أحمديـِّه" ما بقا يشكر أديب
شحْم الدني صارت عليها مجَمّعه
من كتر منها ناصحه يا بو حبيب
مبارح صرفـْها عا الطريق بأربعه
ـ28ـ
وطنـُّوس جَنّ وقال: ما عندي حقوق
عالدرب بَقـْبَش ضاع مِنـُّو المستوى
وبالبيت فرمة لحم مش ممكن يدوق
حَطّ القبض عا حْصان وتـْعشّى هوا
ـ29ـ
وعينـك تشوف اليوم كيف صاير خليل
بالنصح حتى يصير جاموس ابتدا
زعلان هلـَّق قال من حنـَّا جميل
كلـُّو لأنـُّو ما رِضي يْعِيرو ندى
ـ30ـ
ومرقت عا خـَيـَّك قال تا تسْطح زبيب
"نـَسطه" الما في إنسان بزمانو مدَح
ومن كتر منها مشَبْشله يا بو حبيب
نِسيتْ الوجبه عند خيـَّك بالقدَح
ـ31ـ
ونونو لإبن فيـَّاض ما دفعتْ حساب
ولا يوم قالت: خود دَين مْقيـَّدو
ولمَّا عليها تغالظو أربع شباب
بأربع خمس صابيع قالتلن: خـِدو
ـ32ـ
ومرتو لأبو طنُّوس كرهتْ سهرتو
بالرغم إنُّو بالشـِّعر فكرو حصَر
صحنـَين فـُّول كبار آكـِل حضْرتو
وقوّص عليها وداختْ بلمح البصر
ـ33ـ
وعا الانتخاب اليوم نازل "جوليان"
مش للنجاح الحظّ مش ماشي معو
تا يعيـّطولو مرشـَّح السابق فلان
وبجاليتنا يصير يرفع إصبعو
ـ34ـ
و"بكابراماتا" الشعب كلـُّو أنكليز
ولاد العرب أصوات صارو بْلا صدى
و"بماركفيل" كلّ الخليقه "مالطيز"
ومنهم لهلـَّق بعد ما ترشـَّح حدا
ـ35ـ
ومع "بردقانه" ما حدا عندو مكان
الأصوات معها وباقيه بمحلـّها
وجرجي سليم الأحمدي مرشـَّح كمان
وحنـَّا محمـَّد عن "غرانفيل" كلـّها
ـ36ـ
ووجبه عا ذوقـَك قال سامي للطبيب
بدّي لأنـُّو طالبـِه منِّي المرا
ودخلك لا تنسى تركـِّب سْنان الحليب
بالعمر بدها ترجع شـْويِّه لورا
ـ37ـ
"وسالم" حياتو عا العذاب مطبـَّعه
البهلِه عا راسو كَبّ قهوه وكَبّ كاز
وعاود وقع بالأرض يوم الأربعا
وقت اللي حنـِّه صابـْتو بعين القزاز
ـ38ـ
ولما دبح شحتول صاحبنا سميح
وبالدبح مَنـُّو متل ما عم يدِّعي
مرتو قالتلو: اللحم لونو مش مليح
"عالسكت" قـَلاَّ "انفزرت الغـَمِّه معي"
ـ39ـ
وسلمى ما بدها سباق ومعلـَّق عفيف
يا دلّ دلـُّو الربح عَينو فـَرْجتو
حَطّ القبض عا حصان أعرج يا لطيف
وهلـَّق متل الحصان صارت عرجتو
ـ40ـ
ونجلا قويـِّه كتير مَنها من الضعاف
بالسهل شافا مرهِج وقلبو انأسَر
عليها هجم من وصلتو متل الخراف
و"بقّ بقّ" لمَّا قلـّها حنكو انكسر
ـ41ـ
يا بو حبيب بقول وحياة الصليب:
ورده ما همّا مين قلبو بيُوجَعو
صوفر لها عا الدرب من جمعه حبيب
ومن وقتها لليوم ما حِكيتْ معو
ـ42ـ
"ونزهه" بَدال البودرَه حطـّت طحين
عا خدودها وتـْتـَلوعو ولاد الزغار
وبالعمر زغرتْ نصّ ساعه جوسلين
وقت اللي لبست شعر أسود مستعار
ـ43ـ
واليوم لو بتشوف كيف صاير ميشال
صرلو حوالي شهر دَقنو ما حَلق
ومش بسّ رابط سنسله بإدنو الشمال
بتقول سعدى: بزِكرتو معلـَّق حلق
ـ44ـ
وريمون خالك عِيشتو صارت دَمار
عا السكت ماشي والجياب مصوفـَره
قضّى حياتو بالسباق وبالقمار
وعا كلّ دعسه لاحقو لسان المرا
ـ45ـ
وجبُّور أكبر مشكله عا البيت جاب
وصارت همومو بالدني ما بتنحَصى
تخلـَّق عا مرتو وقلـّها: "بنت الكلاب"
ولمّا ضربها كفّ راحتلو بعَصا
ـ46ـ
وبنت وصبي جابت "كومندينا" لرفيق
وبدها أسامي أجنبيِّه مرتـَّبه
ووقت اللي هيِّي وإمّها زادو النقيق
سمّى البنت "هشّ هشّ" و"غـْضاب" الصبي
ـ47ـ
وقلت لبو راجي عند إختو "سيسَبان":
فتـِّح عيونك "عالنصح" شوف الحَصل
حاجي بشوَرما تنفخ البقره جِهان
قـَللي: أنا عا سْوادها بزْرع بصل
ـ48ـ
ويقبر شبابو بْلا عقل صاير سمير
مبارح بعينو حصرمه إبنو فقـَر
وهوِّي متل فدَّان وبْيجْعر كتير
كهرَب سمانا ودرَّج جنون البقر
ـ49ـ
وإلنا و جع بالراس جابت "إيفلين"
حكيتْ لنا قدَّيش هيِّي معذَّبه
البرغش عا "لَهتا" قال: مَحلا المورتين
يمكن بتمَّا سْنان تـُوم مركَّبه
ـ50ـ
ولمَّا عا ورشة بو عبد حَوّل سميح
عا الأرض نخّ وبالجَمع زندو ابتـَدا
قللو نبيل: وحقّ يسوع المسيح
اللي بيشلـَحو الجيعان ما بينفـَع حَدا
ـ51ـ
وعاود رجع "هوّاش" عا نهب الفنون
سجـَّل بإسمو "يا قمر من مشغره"
أوقات عندو بيوت عم تاكل عيون
وأوقات عندو بيوت عم تاكل درا
ـ52ـ
وأربع خوابي من العرق شايل فهيم
ومرتو قالتلو: خْلاص حاجتها بقا
ووقت اللي داقـُن جان قال لبو نعيم:
عرقات متلـُن تحت باطـَك ما التقى
ـ53ـ
ووقت اللي مِرهِج  قال لمخايل سرور
صارت طقوسو بالحياة مغيّره
قللو: كنت زنتلـَّك اليوم الأمور
لو بيضِة القبـَّان مـَنها مْمَودَره
ـ54ـ
وسالم إبن سمعان عامل رعمَسيس
ومتل الأوادم طقم ما عاد اشترى
بالشورت راح عْلى العرس يوم الخميس
طقم اللي عندو قال: عا القعدِه اهترى
ـ55ـ
وعا "الزو" راحت حاتميِّه مَرتْ "جود"
تشمّ الهوا من بعدما فيها عفـَص
المسؤول لمّا شافها حـَدّ القرود
قال لرفاقو: رَجعّوها عا القفص
ـ56ـ
وبدنا بقا عا البيت يلفي بُوهـَنا
سنتين صرلو غايب وحقّ النبي
لبنتو الكبيره قال: رح إرجع أنا
إن كان فيها إمـِّك تخلـِّف صَبي
ـ57ـ
وعا النار حنـَّا الياس عم يغلي حصى
وعم يعزم على الشوربا خالك بديع
وهاني إبن يعقوب فاتح محمَصه
و"بنّ المراد" و"بنّ لادن" عم يبيع
ـ58ـ
وتا خبّرك عالسطح شو قالت هَلا
من بعد عشر ولاد والأربع سنين
دافي إبن بردان طلـَّق انجلا
وعلقان علقـَه بنت كلب بجوزفين
ـ59ـ
ودولي عا إكل الفول بتقلـَّك تعا
وعا الفضل نحنا من زمان معوَّدين
دعستْ عا كم مسمار يوم الأربعا
ويومين إلها منفـّسه إجر اليمين
ـ60ـ
وهوني الشعب قايم قيامة مجدولين
عملتْ فصل ما بينعمَل المْعصَّبـِه
عنها إلو سنتين غايب بو أمين
وكلّ تسع شهور بتجبلو صبي
ـ61ـ
وجابر إبن ممدوح دين الطبَّعو
عالناس خـُوِّه حضرة جنابو فرَض
مش بسّ إنـُّو عم بيـِمضي  بإصبعو
بيزّور تشاكات يبعتلو مرَض
ـ62ـ
وقللي بو سمرا مشكلة آخر زمان
بالبيت عندي وصرتْ متل المِنـْوَشر
سبعين كيلو صارت تجَرِّد حنان
ولسانها كِيلين بحْقوق البشر
ـ63ـ
ويا بو حبيب الناس صارو طايشين
ما في حدا للمعرفه جدّ وسعَى
وطوني عا مرتو كَبّ تنكة بانزين
وولـَّع حبلْ كبريت تا يمزح معا
ـ64ـ
ومرتا يا عيني صارت تقبِّن كتير
ما عاد فيها تفـُوت تحت القنطره
وعينك تشوف اليوم كيف صاير سمير
بياكل عا مزِّة كاس سَطل مجدَّره
ـ65ـ
ولا تفتكر مَمدوح ما بياخـُد قـَرار
ممدوح لو ما ينتهي كان ابتدا
ولو ما بسباق الخيل وبلعـْب القمار
يخرِب ديارو كان ما متلو حدا
ـ66ـ
وموريس تقـَّل دمّ شمسو عا الغياب
لـْحالو بيضلّ يقول وحياتو ذكي
بفول المدمس علـَّق وطار الصواب
وهـُوّي بدون الفول بيكتِّر حكي
ـ67ـ
وملحم همومو بالفعل ما بتنحَصى
تزوّج أمينه والحياة متلـَّجه
كلما حماتو تطلّ بيجيب العصا
وبيقلـّها عالبيت ما بريدك تجي
ـ68ـ
وخيُّو لبُو هيفا من الدني آكل فلق
صعبه لحماتو يقدر يقول: مْبلا
ناقم عليها كتير سبحان الخلق
غير على قِشر الموز ما قلاَّ: هـَلا
ـ69ـ
ومروان قلبو لكاس مليان احترق
كيف النهايـِه رح تصفّـِّي يا ترى
قللو طبيبو: لا بقى تشرب عرق
شاف الحنـَك ملووق والكبد اهترى
**
انقر هنا لمتابعة القراءة

إلى روح المرحوم الغالي جوزيف خوري في أربعينه

يا جوزيف الكنتْ عــــــــا عِلمي
تفسّر إلــــــــــــي بمْحبّتك حلمـي
ما نسيتْ مينك بالدني مـــا نسيت
متل الإجو عـــــــا أربعينك جِيت
وَدِّي لِروحــــــــــك عالسما كلمِه

ولادَك تْغدّو هْـــمـــــــــوم وتْعشّو
وحملو النعش ودمــــــوعهم رشّو
وكلّ اللي كانو تجمَّعو حْـــــواليك
ومــــن كتر ما بكيو الأهالي عْليك
الله الوكيل خْدودهـــــــــــــــم تَشّو

وأنجــــــــــــال عم بتقول بالمَوْنِه:
ها الكَون كلّو مـــــــــــا بقا كـَوني
وبدْموع عــــم تنزل على السكّيت
بــتــْــقـــــول كلما تْطّلّعتْ بالبيت:
كــــــــــــــــان هَوْني يقعد وهوني

المتلك لطيف بينسَأل عـَـــــنّـــــــــو
عـــــــــــــــادي رحيلك عندنا مَنُّو
وولادك الستّه بْلا كـــــان ومــــان
وقسطا وجليله وجوزفين كْـمـــان
بـدهُن يجِنّو انـــكــــــــــان ما جَنّو

بجنة عَــــــــدن عند الخلقها الروح
ونحنا ضحيّة خاطـــــــر المجروح
مش هَــــــــــون عيشتنا بِغير مْحلّ
ما في حــــدا عا الأرض بدّو يْضلّ 
كلّنا مــــــــــن هــــَــون بدنا نْروح

بلبنان قـــــــالـــــــــو بنؤمن وآمين:
جوزيف خوري مِنْجَبَــــــــل باللين
مــــــــــــن أربعين نهار راح حْرام
وعم تطـْلع الصرخه مــــــن بْطرّام
ويُوصَل صداها لكلّ بِشمزّيــــــــن.

تحت الأرض

علينا الكفر يا رب لفينا
وعاش الحسد جوات عينينا
مشينا بظرف يمكن عيونو حول
وضعنا وما فينا حالنا لقينا

ما في حدا منا ظريف الطول
أقزام نحنا من ورا دينا
وللعز وقفه بعالم المجهول
وعم يبصرو بناماتها جرينا

مسوكر فشلنا بدون ورقة بول
والبهدله بتبرم حوالينا
تا نكون متل الناس مش معقول
ربينا عا كلمة روّجو لينا

بخلق المشاكل فكرنا مشغول
عصر الهمج عا الكون ردينا
وعا كل منبر بالدني منقول
نحنا شعب تحت الارض منضل
حتى حدا ما يدعس علينا

عيدك يا امي

شروقي

امي يا موج العطر يا قبلة الانظار
الله شلحلك قبل لمي القبل لمي
انتي صفاوة نغم متزوج الاوتار
خلقتي برحابة صدر تا تقدري تضمي

بعيدك حروف الهجا طلبت من الاشعار
تنام على فرشة سحر وتقوم بمهمه
تا يطوف فيها البحر عا نشرة الاخبار
وتشوف عين الزمن قديشك مهمه

الوجدان جايب لكي ودمه عليها بغار
منشان كلما التقو الوجدان والدمه
يقولو بقلب القلب انتي بكل نهار 
وتغار امه اذا ما تغنجت امه

ما قبلت جبلك معي باقه من الازهار
زهرة شبابي جبت تا ريحتي تشمي
ومنشان تا تشمخي وانتي بقلب الدار
طالع عا راس الجبل تا جبلك القمّه

ما بحب قدم لكي الا شعر مختار
وبيطير عقلي اذا ايامك مغمّه
من بعد جمع وطرح عنك اخدت قرار
انتي بوقت المسا اسمك مسا الخيرات
وبالصبح انتي صباح الخير يا امي

ذكرى ابنتي المرحومه ساره


نعشك حملتو والوجع حمله
وساعة مصيري الدهر قدملي
وتا ترجعي عا البيت مش مطروح
حكم القدر برهان قدّملي

غيابك ما خلى للاماني صروح
وما في ظرف عا الحظ سلملي
لتاني دني رحتي بقلب مجروح
وآخي عا كتفي عملتها شمله

بينك وبيني الخط مش مفتوح
وما في لقا بالجو نسملي
وجودي كتبلي ضل ابكي ونوح
وشن الشقا عا عيشتي حمله

متل المكرسح لا بجي ولا بروح
ختيار لا شغله ولا عمله
لما طبيبي قال جاب فتوح
مشّى الامل عا دعسه النمله

لما يا "ساره" الموت مد شلوح
وعمرك ملاك الموت ترجملي
جسمك لعند الرب ودى الروح
ومن يومها تسجلت ضرب خوات 
وقلت العقل ما عاد يلزملي 

الاربعين

شروقي

امي بغيابك ضعت والراس حمله صار
وعا درب بيت الشعر ضيّعت اوزاني
هالسبت خمسه المسا عا الاربعين نهار
بدنا عا ذكرك نجي بقلوب شعلانه

وقت اللي بيي هجر كنا يا امي زغار
وخدتي محلو بدني ما في لها ديانه
ولما حضورك طلب عا ذمة الاخبار
قلتي عبكرا السفر بنهار الفلاني

ولما المنيه اجت وبايدها انذار
الساعات فلو وبقي من عمرك ثواني
وجاتك بطاقة سفر وتعيّن المشوار
وسافرت متلك انا عا تمرمر زماني

رحتي عا تاني دني وموتار حزني دار
وخلـّى خدودي جور بالدمع مليانه
وغب على قلب الوعي واستشهدو الافكار
وصارت عا اخ الوجع تمشي الاسطوانه

وهلـّق يا امي انا بين الثلج والنار
الاخوات وقفو معي مع كل اخواني
وقلنا ما زال البشر فوق الارض زوار
لعندك عبكرا منجي واحد ورا التاني

عرابتي

المرحومة بربارة مرعب حكيم

عرابتي 
امي الثانية
غيبها القدر
ابعدها عن هذا العالم
انتقل بها الى عالم ثان
الى حياة ابدية
ماذا اقول في وداعها الاخير
جحافل الاحزان تداهمني
ثياب من الجليد
تلبس افكاري
كالينابيع تتفجر الدموع 
والذكريات القديمة
تظهر كالاحلام
كوميض البرق
ماذا اكتب 
وغضب الاقلام على اصابعي
والفشل يعتري جميع المحاولات
في ذمة الله اصبحت عرابتي
سطا عليها خريف هذه الحياة
**
عرابتي يا دمعة عيون الصباح
صيت الحميد حكاية سنينك حكي
صرنا بغيابك مثل طير بلا جناح
وهللي بحياتو ما بكي عليكي بكي

بدمعة لورانس تفتـّقو كل الجروح
وصهرك نقولا من الحزن قلبو احترق
ولما برثاكي زرعت روح بقلب روح
دابت حروف الابجدية عالورق

وفوزي ودولي وميشلين تضعضعو
واخواتك من الهّم صارو دايخين
وعينين ايليا عليكي دمعو
وقرايبينك والاهالي اجمعين

الانسان زاير هالدني بالاختصار
لمحة بصر عمرو بعينين اليقين
ساعة ما بدو ربنا عاطي العمار
ياخد بياخد والعمر كمشة سنين

محتار شو بقلك بها الوضع الدقيق
ما لقيت ردة شعر يطلعلا صدى
يا ناعمه يا صاحبة قلب الرقيق
انشالله تكوني عن بني آدم فدا

في وداع امي

امي ما فيكي تطلعي منا
منبقى بوجهك وين ما كنا
مش ممكن تموتي يا ام وبي
بالفكر رح يبقى خيالك حي
وروحك ما فيها تروح من عنا

يا عين شنـّي بالبكي غاره
وخلـّي الدمع للرمش اسواره
ساره الزغيره بآخر الستين
راحت وبكيت دم بشمزين
واليوم راحت امنا ساره

لساني برقبة كلمتي معلق
وحرف الهجا عا القافيه تخلق
اوقات عم يطلع حديثي صراخ
الجمعه نقلنا من الفرح عا الآخ
وامي عا ركوود ناقله هلق

وانتو يا هلي بعدّكم اخوان
وواحد منبقى بأغلب الاحيان
بلسان نحنا حضوركم ممنون
انشالله فدا عنكم وعنا تكون
وايامكم تبقى بلا احزان

وانتو اللي معكم اكبر مهمّه
تا تدفنوها وكلكم همّه
شوقي لامي ما قدرت اخفيه
صدري احفرو وحطو جسدها فيه
لا تطمرولي بالأرض امي

الى روح الفنان الكبير وديع الصافي




في لحظة الوَداع يصعب الكلام، عن الذي شرَّف الكلمة، وأسكن الشعر على أرجوحة الكواكب. شمس لبنان لا تنطفئ، وأنت يا وديع شمسه وعطره ومداه. الموت لا يغيِّر شيئاً، لأنَّ المحبَّة هي الحياة. وأنت قدِّيس المحبَّة في الزمن الصعب. أنت الخلود كالأرز، وصوتُك العذب في السماء لا تمحوه الأيّام. 

سافــــــَـــر وديع البطـَل وتيتـَّمو الأبطال
وعا حَرف يعْطي صُور عم تبرم شْفافي
التصوير زِرُّو فقـَس عا الهاتــــف  النقـَّال
وعَجقه وإذاعـــَـه وحَكي بالمنطق الدافي

متلو ما شاف الزمن إنسان جـال وصال
شو مــــــــا بيقولو إلو بيكون مش كافي
غير الكلام الحلو ولا يـــــوم عنـُّو انقال
وقالو المنابر إلو: يعطيك العـْوافـــــــــي

مش بس بَيّ الغِنا مَحسوب عَـــــمّ وخال
البيكون متلو الشعب مــــــا بْيقـْدر يْكافي
أوفو عَا أبعد مَدى بْلمح البصَر تُوصــــال
واللحن متل القـَطر عـــــا صدر الكـْنافه

شْموخـــــو بسابع سما بالحلم ما بينطال
وبالعمر كاسو بـِقي طُول الوقت صافي
لبنان كلـُّو بِكي وقــــــــال بلِسان الحال:
تـْعـَوكر مزاجي عنـْد مـا ودَّع الصافي.

ريق وعرق

مرقت على هوني بلاج تا شوف الحلا
ومن حسن حظي كان موجود بهلا
جرّبت احكي تفشكل بتمي الكلام
ولما عليها بالوما رميت السلام
بالجو رفعت ايدها وقالت هلا

شو عم بتعمل قلت عم اغلي حصى
ومشاكلي بالحب مش عم تنحصى
تا انشلح بالزاويه آن الأوان
بركض ورا الحلوين تا دوق الحنان
وكلما لحقني الجوع عم آكل عصا

وبحلف إلك ما زال موضوع انطرق
الداعي تا يعرف طعمتك قلبو احترق
وسكران لم قالت قلت سكرة فقير
وبنت الكلب عا ذمتي يمكن تصير
وحده بريق شفافك ووحده بعرق

يلله اطلعي من البحر قالتلي اجل
وكرجت عا وجه الرمل كرجات الحجل
وقلعت تياب المي لهبوب الهوا
ووقت اللي صرنا تنيننا ببحر الهوى
وصار الحيا عا حسابها لِبْست خجل

من جمر دربي

هونيك بعد الهون بشويه
كان الوجع عم يبرم عليي
وجايب الي من عالم المجهول
يا دل دلّي وآخ يا بيي

والدمع بحر وصرختي اسطول
ومن جمر دربي وقالب مويي
يا مصيبتي لحالي شو بدّي قول
وكل الحكي صاير بإيديي

وصولي لعندي ما بقا مكفول
بالرغم اني قبال عينيي
تخمين صرت مقطع وموصول
وما بقيت عم اقشع حواليي

ومش بس فيي الهم صار يجول
حسيت انو اتاكلو جريي
وبظل شجره عم بتشمط طول
جرّبت اني بورد وارتاح
لقيت الشمس عم تاكل الفيه

جنون فنون

رايح عا مدري لوين من دوني
بجرين ما فيهم يحملوني
وعم حطّ هوني بسحبة التفكير
تا شوف كنو هون بتكوني

ضيع لساني اصدق التعبير
وصارو عليي يدلفو عيوني
لما عا حالي جيت بالي دير
وكبّ الجمود وحرّك سكوني

فوتي عا قلبي وسفّري التعتير
حبك عباده صار وجنوني
من كتر ما عم يعمل مشاوير
بيقول عا الطرقات خلوني

ما في صدق من بير شالت زير
ومواقفك آخات عديوني
ومن درب حلمي هارب التفسير
تخمين غيري بدون كلفه صرت
وصاير جنوني من بني فنوني

العياره

انا بالمعرفه قدري وجاهي
الفصول الاربعه أربع وجاهي
اعرفي يا ناسيه بكلام جدي
لحروف الأبجديه صرت طاهي

ما برضى شوفك ولا يوم حدي
عندي موقفي وعندك تباهي
تا حتى اعبدك لا تستعدي
لا مريم عدرتي ولنك الهي

عرتك طاوله المرحوم جدي
اشتراها من رجل صاحب ملاهي
وكرسه عرتك ومن بعد مده
التفاته عرتك وعلّيت اهي

حاجي للأخد إيدك تمدي
معك حبّيت غيِّر اتجاهي
لأنو بتاخدي ومش عم تردّي
بكون بلا عقل وحياة ربي
اذا شي يوم عرتك انتباهي

ليالي النار

عيدي صفوف المرحبا عيدي
تا يصير عيدك بالهوى عيدي
صار التفاهم بيننا بطّال
وعم يكترو سلالم تجاعيدي

لا عم عندي بالدني ولا خال
وصارت ليالي النار برِّيده
وما في حكي عا الادن عم يوصال
والسكت صارت نغمتو جديده

ما في فرح بالإيد عم ينطال
ويا ريت قلتي أيش بتريدي
وصار التفاهم بين قيل وقال
وعا الواقع انصليو بواريدي

لعندي سلامك ما بقا يوصال
من هيك عم قلك بتنهيدي
لما لقيت العال منو عال
مدّيت إيد على السما تا شوف
ان كنت بدي روح من ايدي

بو ديب

مغلي الهوا، وعقل السواقي طار
والزارع تهجِّت مَـــــــــواضيعـو
النبعه اللي كانت تدْفق استمـرار
 نْقاقيطها بالسّكْر بيضِــــيــعـــــو
بْعروة سهل مـــا ضلّ زِرّ خيار
ومــــــــات البطاطا نْهار تقليعـو
وعا الخسّ خَفّ تْشرْبُط الشومـار
 فقعو الهوا كفَّين عــــــــــا نيعـو
وبو ديب جَوْجَل للصباح قـْـرار
بالشدّ مــــــــــــا بينهزّ ترجيعــو
المنجل بـِـــإيدو، والهموم كتــار
وبْيلدغ الضعف بمَشاريـــعــــــو
وبالرغــم إنُّــــو مجعْلك وختيار
خَلَّى السنــابـــــــل كلمتو يْطيعو
شْماليّتو سحبتْ لسان الـــنـــــار
وصـــار القمــح عرقان تجميعو
ولمَّا  بْعيونو فـــــات غمر غبار
دَرْس الكــفـــر بلَّش بتسميـعـــو
وعـــــا فرد إجْـــر بْجَوّ استهتار
الموسم جَـــمَـــع تا بْكلفتو يبيعو
بو ديب مــــــا عندو قلم جَـــرَّار
الإمضا اتَّكل عـــــا كلّ صابيعـــو
بيتو بو درجِه وغرفتين زْغــــار
بهتشِة زمـــــــان الفقر تقطيعو
ودوَّار شمسو طبعـــــة المسمـار
 والزنبق بْآخـــــــــــــــر أسابيعو
ومن وين بدُّو العطر يرمي بْدار
ويفْرض عَا جوّ السحر توزيعو؟
عا الياسمينـــــــــه دعسة المنشار
ومْنَتَّر المنتور عَا رْفـــيــعــــو...
لو كان حَظُّــــــو مكمَّل المشوار
والنار مـــــــــــا بتفرَح بتوليعـو
ما تعمشق الدوري بنسمه وصار
آخــــــــــر خبر عا الطاير يزيعـو
بو ديب ماشي بمأتم الأزهـــــــار
ووجــــه الأرض همّو بْتقاطيعـو
كلّ التِري لابس تياب حْـــجـــــار
وعــا حَفِّة الوادي ضمير اللون
عا السكت عــــم يندب زراريعو.

بطن وضهر

قلعت الحزن ولبست أفراحي
ورحت على سكره وما رجعت صاحي
زورب بسدني وقول وين "جبيل"
وعا كل خمره مطيلق سراحي

ومرقت "هدى" وما قدرت شدّ الحيل
وقلتلها من شهوتي ارتاحي
وعا البيت رحنا بضو نجم سهيل
والبطن فاضي وطافحه قداحي

وراح الضهر عا النخ صوب الويل
وقللي مسايي يلعن صباحي
ولما اجا براحه بنص الليل
بقلة عقل حسَّبت اني ديك
وفاقو أهالي الحي عا صياحي

وجه العرق

شروقي

عا وجه أرض الأنا من بطنها جايي
رايح عا طول المدى تا أعرف نهايه
وتا شوف وين الدني الفيها زماني كان
وقول لحياتي ارجعي لا تقعدي بلايي

بها العصر زاد الكفر وتبخر الايمان
وصارو سنين العمر من دون تربايه
من هيك صار اللمس عندي عظيم الشان
وخفف عيارو الحكي والهمس توصايه

ما قدرت لاقي انا بين المضى والآن
لو ما عا حالي برمت قدَّام المرايه
ولو ما خيالك يجي من عالم النسيان
ويكون ضحكو ملو ويصير مولايي

مربَّى عا ايدي سهر أشكال مع ألوان
ومنشان امحي الضجر بركض عا القرايه
وكاسي بايدي صرت عم احسبو انسان
وما ابيَّض وجه العرق بالمي لولايي

دين بالحكي

يا قاطعين دروب المسرَّه
يلله اطلعو من وجودنا لبرَّا
لحقتو الكفر ما بتعرفو تصلُّو
خلُّو التفاهم ياخد محلّو
عا الأرض بتعيشو فرد مرّه

الموت انطرح تا ينجمع قوتو
والأرض قالت عا القلب فوتو
شو ذنب شبان وصبايا زغار
وشو ذنب ختياره وذنب ختيار
وشو ذنب أطفال العم يموتو

متل الخلق ما عادت الأيام
بدها الديانه تعيِّن الحكام
دخلك يا رب الكون سامحنا
كل الشعوب تقدَّمو ونحنا
ما في أمل تا نفشخ لقدّام

الظالم بقلبو عطف خا خلَّى
بقتل البشر بيحب يتسلّى
"الشاشه" شو صار لسانها خبّر
بيقول الله حضرتو وأكبر
وهوي من الما بيعرفو الله

نعم انتو

يا عاملين من النعم كلا
عليكم غضبنا بإصبعو دلّى
عم تعملو جهنم من الأوطان
لا شك انو بتعبدو الشيطان
مين قال انتو بتعبدو الله

من أيش جيتو عا الدني من أيش
وقديش بدنا نحتمل قديش
مين اللي منكم ربنا ما لام
الدنيا اللي كونها بسبع ايام
بنهار بدكم تخربوها ليش

عا الكون جينا من زمان ضيوف
وقديش بدنا نعيش مش معروف
بعين الشعوب الواعيه رخصنا
حاجي كفر آخات ناقصنا
ولا يوم متل الخلق عما نشوف

الانسان عمرو للشقا مرهون
وكل الجمال البلحياة دهون
النا الابد لا تحسبو مطروح
قولو عبكر من الدني متروح
وتحت الأرض مش فوقها منكون

كيماوي وكيماوي

يومين بيقولو الدني يا عين
وهني بصراحه تنينهم بالدين
كلام المتل منقدس حروفو
هلي بعين بيقشعك شوفو
بتنين ما زال الدني يومين

قلة الهيبه ما لها مطرح
منو ضروري فصولها نشرح
بحيث النظافه من ورا الإيمان
قدام بيتو انكنس الانسان
الشارع بيصير نضيف ومنفرح

ما في تفاهم عم يجي بسلاح
نحنا عا مسرح ها الدني سواح
عند الحقيقه بمنطق العلمي
من كل واحد لو اجت كلمه
فيها إفاده العالم بترتاح

أبيض يكون الزفت ما بيصير
وكتر الهموم بقلة التدبير
شبعنا نصايح حاج بيكفي
كيف الكيماوي الناس بيصفي
وللزرع منو عم نعوز كتير

بالبال انتي كرم

شروقي

طالع عا بالي مشي وشاحط ورايي الان
وبالبال هيي وانا التأخير ما بريدو
وجودي بوهم القوى حامل جسد تعبان
وتا يجيب راحه الو ما بيطلع بايدو

وداير صريخ الهوا وشعري اعتنق احزان
ما قدرت رجع الو قوافل تجاعيدو
ختيار مشط المعي ما بينحشالو سنان
وكلما عليه انضغط بيفيق تنهيدو

تغيّر مزاجي معي وتغيّر العدان
صرت بعيار الفحم والآخ عم عيدو
وكلما جقرني حدا قلو انا انسان
لا تخاف مني الوجه غير تقاليدو

وبالرغم انو الفرح متل الخلق ما كان
نكوز خيالي الغنا ومعلوم ما بجيدو
وشنكلت كوع الدرب من دون استئذان
وبيت الشروقي ركب بالأوف قرميدو

وساعة وصولي قلت الها عيان بيان
مفروض درس الغزل نحفظ مواعيدو
للحب انتي كرم والعاشق الولهان
جايي بجنون الهوى يحبحب عناقيدو

حسنة دخيل السما

شروقي

كبرو جروح الهوى وساقط بصف كلام
وما ضلّ مني خبر تا جادل سنيني
بسمة شفافي اجت من جمعة الآلام
مزروك فيها الشقا والآخ فليّنه

صاير فراشي وجع والهم صار حرام
وبكل نسمة هوا بترجف تكاويني
يا ريت فشخة ورا عم تطلع لقدام
تا كنت صلي قبل ما يحترق ديني

شوفي بلمح البصر عم يمرقو الاعوام
ومن ايش خافو وانا ما سحبت سكينه
وكلما عزمت الورق عا مسرح الاقلام
بترجم حروف الهجا غيرة شراييني

جنيت فيكي قبل ما ريّشو الاوهام
وتا ضل خلف الفكر مشلوح ما فيني
كلما اجاني ظرف يستنطق الايام
تا شوف ريح اللقا منوين جاييني

ضيعت بيت الشعر عا مفرق الالهام
وما قدرت لاقي حدا عالبيت يهديني
وغلّ بعيوني الغفا تا يفيّق الاحلام
ويقبر عذاب السهر ريتك تقبريني

ومال زال صدرك صور من ريشة الرسام
حسنه دخيل السما من حضرتو اعطيني
قرنه بجبال الالب حد القلب تا نام
وان صرت متل التلج بالنار غطـّيني

مساحة لمس

شروقي

الله وكيلك الك ماضي وجودي صكوك
وكلما غلقتي الحكي عم افتح السيره
عندك بحكم الهوى صار الملك مملوك
وهيدا اللي صاير معك بحساب تقديري

بابك طرقتو بحما شهادات حسن سلوك
ومعروف انو معي ما عاشت الغيره
وبالهمس قلتي الي يسلم ابو الربوك
وصرت على يسلم ابو دوزن مشاويري

شعر النظمتو لكي بعواطفي محبوك
غط على ذوق السمع تا بجانحو تطيري
وقلبي وهبتو لكي وهلق الك متروك
تسهيل امري قبل ما يزيد تعتيري

لعندك بروح وبجي وتعلم المكوك
مني دروس المشي وبتشهد الجيره
ودخان همي طلع مني بشكل مسموك
وشنكل عا نص الدرب دخنة سواكيري

حبك يقيني هدم والراس عبّى شكوك
وكلما جمعنا الزمن عم اوقع بحيره
عا الكاس قلتي الي كل الجسد مبروك
وما في مساحة لمس عم تطلع كبيره

غبرة زمن

شروقي

الانسان لعبة ورق عا محورو بيدور
والموت خلف العمر فالت اواشيشو
ومنوين بدو الربح يفتح الو معبور
ما زال جبرو القدر يحمل خرافيشو

عا الكون لما اجا برفقة صباح النور
حسّب بانو الابد بيكون بخشيشو
ولما سنينو التحو وبيّن عليه كسور
هوّي وحياتو انعزم عا نهار تحويشو

لكن يا حلوه انا بالوهم مش مأسور
عمري بسحبة مدى رح يلعب بفيشو
عندي ببحر الشعر ما بيغرق البابور
وبيضل عندي غزل ياكل مناقيشو

حابب عا شلح النظر عمّر خيم وقصور
وخلي عليكي العصر يشلح طراطيشو
وبالريش خلص اذا كان الامر ميسور
ولو كان ما في حدا بيخلص بريشو

ولما النهايه بتجي بلا حاضر ودستور
وجسمي بكمشة صلا بيروح عابيشو
بطلع عا وجه الارض من بعد تسع شهور
وبصير غبرة زمن وبغلّ بالحلوين
الموتى اللي تحت الارض ما بيعرفو يعيشو

سوزي

شروقي

بسوزي اتصلت وقلت: كان الغضب مفلوش
وما كان عقلي معي لما برمت بوزي
بيصر زماني امل لما كنت قاشوش
وهلق ليالي الجمر برماد مهزوزه

ما بقيت إحمل وجع حطي عا جرحي رشوش
نبال العيون الخضر بالقلب مغروزه
وغمر الهموم المعي اكتر ما بقدر حوش
وما ضلّ مني حدا تا تقدري تعوزي

الشلحو عليكي النظر قالو برف رموش:
جبالك جبال الألب والدمغ فيروزي
جايي لعندك، صرت عا مفرق "بحبوش"
مطرح ما كنتي معي عالحيط مبروزه

وعالبيت لما وصلت والوقت كان دغوش
دقيت باب الفرج وصرخت: يا سوزي
طالع عا بالي اللحم فاقع بطن فتوش
وغيرك يا ست الحلا ما في الي اوزه

بابك يا حلوي افتحي، جند غرامي جيوش
عليي بهمس ولمس مش ممكن تفوزي
قالت: يا روحي انا هلق بنص الدوش
جاوبت: يللا افتحي وخلي الصدر عريان
من قماش ريقي الحلو بخيطلك بلوزه

زيّاح

شروقي

قودم عليّي الفنا يوم النهايه لاح
وقلب العوافي انقطع لمّا انقطع قوتي
حصدت الخساره أنا وعم غنـّج الأرباح
وقت اللي طلعت معي زيتونتي توته

همّي كتبلي الشقا، صارت حياتي نواح
ما قدرت طعمي الصبر عالهم فتفوته
شفافي ما قدرو يجو عا موسم التفاح
كلو عا إمو اهترى وما وزع كروته

مع كل طلعة فجر بعمل الي زيّاح
والروح لبست ضجر من شرح لاهوتي
وهرّو رياش العمر ما ضلّ عندي جناح
انزرعت طريقي فشل والحظ حنتوتي

ماشي بعتم الدني ومرافق الاشباح
مطلق حريم الحكي ومزوّج سكوتي
غابو اللي كانو معي وقت الكنت مرتاح
وهلق بغيبة انا فزعان اني موت
وما يكون عندي حدا يحمل تابوتي

لابس سناني

شروقي

هالعصر عصر الشقا نص الشعب بقرون
وكلما الغلاظه تجي بتدرس قسم تاني
والضيف قلبو حجر تا يفدغ القانون
"النازل بقفه" معي بيطلع مخرباني

شهرين عندي قعد بالبيت "بو انطون"
ويا ريت خلـّى طقم يقعد بالخزانه
دبّغ تلاته وجلف صباط افلاطون
جاني هديه عا عيد البيّ يا زماني

وكبّوت حقو حمل صار بشحم مدهون
وكنزه بلون التلج صارت باتنجاني
ورباط عنقي خزق من كتر مو ملعون
وقمصان جنس "الارو" صارو بلا ديانه

وقبة جاكاتي جوي ووحياة مار مارون
ضليّت صابر رغم ما كنت عم عاني
سجّل غراضي الو من الطقم للكلسون
وفنجر عيونو وانا انسان انساني

منو نجوم الضهر شفت ولحقني جنون
لكن بحقو الاحد ما قصّر لساني
ولما قالتلي المرا رايق ما فيك تكون
هزّيت راسي وقلت لك كيف بدّي روق
تضحّك عليي ابو انطون بسناني.

ضمه وفتح وسكون

شروقي

يا  عاشقين الشعر صار الجنون فنون
ما ضل عنا كرم يصفـّر عنقودو
مش بس مل الشعب صار الظرف ملعون
وما عاد بدو حدا يوقف على حدودو

نحنا عطينا الشعر ضمه وفتح وسكون
وخردق زمننا التقى بنهار بارودو
واللي بكسر الوزن عم يكسر القانون
بدنا فدائي برسن عا المعرفه يقودو

كتار البيقولو لنا بدهم شعر موزون
وهني لعهد الدرج والعرج بيعودو
الشحرور وصى الحرف عا منبر بدادون
تا يهز جسم الوحي ويشمّر زنودو

منحب نقشع زخم بتراثنا معجون
ونشوف لون وصور بتحّمر خدودو
ان كان بدنا حدا بقلب الحياة نكون
ضروري اسود الشعر نعرف من قرودو

حرب تحت الأرض

يقول خبير عسكري ان الجيش الاسرائيلي يستعد لخوض حرب تحت الارض لا فوقها خصوصا ان حزب الله يمتلك عشرات القواعد المحصنة تحت الارض التي يستخدم بعضها لادارة المعركة وتوجيه المقاتلين.

صولو يا ناس بها الدني وجولو
يوم الشقا رح نعلن وصولو
طول الحكي ما منعرف من العرض
كتار البيقولو حرب تحت الارض
وقلال فوق الارض بيقولو

نحنا عا ضهر خيولنا سرجنا
واللي مشي بلا قاعده حرجنا
منقولها هلق عيان بيان
صوت الحرب تحت الارض ان كان
احسن ما فوق الارض يزعجنا

راحة فكر يا عالم اعطونا
ومن تقل دم الحرب عيفونا
كلمة حرب افعى لضخ السم
بتجوي السمع وبلفظها مننسم
بلا حرب دخل الرب خلونا

حرب ما بدنا

اعطينا الصبر يا ربنا اعطينا
بلبنان نحنا قلوبنا نسينا
لا كهربا عندو ولا عندو موي
والخي عم بيصير ضد الخي
وتا نقول هوني خي ما فينا

نحنا جماعه ربنا عبدنا
وصوب المحبه الدرب عبّدنا
عليها الارض بتقول نحنا ضيوف
جينا على الغربه تا راحه نشوف
مشاكل ما بدنا و حرب ما بدنا

هموم وشقا عا كتافنا حملنا
والمستحيل بها الدني عملنا
والنا زمان نقول بالصرخات
كلمة حرب بتجبلنا الآخات
والسلم بيجيب الفرح النا

منـّا من ال بيكنفشو منا
لا فرق بين الاحمد وحنا
اعطونا بدايه ما لها نهايه
وعا الدرب ان شفتو الحرب جايي
قولو الو تا ينقلع عنا

من احدى الحفلات

يا  عشاق الشعر يا تقبروني
اذا صرفتو الضجيج بتقبضوني
بزماني الحرف ما شاف المصايب
فنوني عارض بعارض جنوني

الوحي ولا يوم عني كان غايب
والالهام ما بيمشي بدوني
تحت باطي جمال اللون جايب
وتا حتى شوفكم جايب عيوني

كلامي مر ساعه وقطر دايب
الجرايد بالطقس بيشبهوني
اذا بيكون فيي الظن خايب
عن المنبر من شلوشي اقبعوني

رفاقي بحيت عندي فكر صايب
من بحور المعنى تصيدوني
وتا حتى يصير شعر الليل شايب
مع المشروب صارو يقدموني

كنار الروض ما قلي قرايب
وبلابل ها العصر ما بيعرفوني
قبل ما بكلمتي اعمل عجايب
بلحظه واختها من هون بنزل 
اذا بدكم عا صوتي تحاسبوني

يا رب نجينا

نحنا بشر عا الكنفشه ربينا
وما في حدا أخلاق يعدينا
منعشق الليره منعبد الدولار
والذوق ما بيعرف اسامينا

لساناتنا عا بعضنا منشار
وكبر الدني ما عاد يكفينا
ببيع الضمير مننحسب تجار
وتا ننجرّ خوازيق ما نسينا

لا تفكرو جينا بتقل عيار
ما في حدا منا ابن سينا
الله بصقنا وقالت الأخبار
عا الارض من جنة عدن جينا

ما في حدا للكذب مش سمسار
مطرح ما نحنا مننتهي بدينا
منحكي بليونه وقلبنا من حجار
وما في زمان دروس يعطينا

بالشر فينا نكمل المشوار
وتا نكون متل الناس ما فينا
مش بس انو ما لنا دبار
جوينا الدني وتقنشح التفكير
منا يا رب الكون نجينا

وعود الطايره

يا نخوة شعبنا من القبر قومي
البليّه شلحت علينا بلاها
لأنو بالوطن عنا حكومه
عا ذكر "الافضل" الافضل بلاها

رئيس بلادنا فصّل طقومه
لحالو ولبّس الأعين عماها
ما فينا ناكل البنج العمومي
بسنين المية ألف يحرق سماها

الفقر بيقول عم تكتر همومي
ما داقت علتو طعمة دواها
ووعود الطايره منها خدومه
تا تعطي الصبر اكتر ما عطاها

ما بدو مجلس النواب يومي 
لطريقه تحط عالقدره غطاها
لأنو مزوّر ومثل فلومي
وحكاية سعلتو الراوي رواها

الزراعه بموطني صارت لغومه
يمين الزارع تقطش مداها
بساعة مرفعك يا جياب صومي
انصرف رسمالنا بدرب الكرامه
وغريب الدار حطـّم مستواها

عدّيت أصحابي

روحي بجروحي والجروح تلام
وفراغ مليانه الدملجانه
بدّي شي بحصه تسند الايام
البدّو عليها يمرق زماني

لما المشي ما ساير الطلعات
لآخر أنا سافرت بعذابي
وصارو العقارب يعقصو الساعات
وصار بحضوري يورّم غيابي

رمشي بذمة دمعتي ما رفّ
ولما انعرف مجهول عنواني
الكاسات لقيو شفافهم عالرف
والرفّ صفّ تشفتر قناني

ما قبلت كون بعيشتي ممقوت
وكرمال زيد وعمر إشرب سمّ
رح ضل إمشي برفقتي تا موت
مش منكتبلي إزعل وإنسم

لما ضميري استفقد صوابي
وفيي الحياة تطلعت بالورب
عن على بالي عدّ أصحابي
طلعو انا بعد الجمع والضرب.

نقبر صحابنا

حان الوقت تا نلتفت لينا
ضعنا وما فينا حالنا لقينا
نحنا شعب بيعيش بالتمثيل
بدها شمط عا طول دينينا

منقول يا  الله وجعنا شيل
ونحنا وجعنا شغل ايدينا
القرآن ما منعرف ولا الانجيل
ومنقول قبل الضو صلينا

لطق الحنك نحنا ولقال وقيل
وعا قلوبنا الشيطان لفـّينا
والمنفقه الها ربحنا جميل
فيها دروب العمر كفـّينا

بيجوز بو ضرسين اسم الجيل
وعاش الحسد بفراغ عينينا
ولما البكي بيكون للتضليل
بصابيصنا بتبرم حوالينا

منضل نطلب للشرف تحصيل
ونحنا انتهاك العرض مشينا
بالاسم نحنا منكره التدجيل
وانما اجانا ظرف نكذب فيه
الله الوكيل منكذب علينا

بوشّب مواعيد

عارض جنوني وحرقتي خافي
برحمة شبابك عا الوضع خافي
دوبي تا اعطي الحب لون جديد
وخلي شفافك تاكل شفافي

بدّي بحوارك ينطفي التنهيد
وتضوي العبر بالمنطق الدافي
آخي اغاني والوجع رديد
وما في قطر عا صدر الكنافه

مبارح قلت وبعيدها وبزيد
كاسك معي بيروح عا الصافي
وكلما سلامك يمرق على الايد
بقللو الف يعطيك العوافي

ما بريد وحياتك انا ما بريد
يحرق بنارو البعد سلافي
عا كل صدفه  بوشّب مواعيد
وبالعين مش عم صيب اهدافي

عنـّك لقيت البعد ما بيفيد
ومشوار بالاسبوع مش كافي
جايي لعندك ذكرياتي عيد
وجرحي عا كتفي والطريق جبال
ورابط مصيري باجر المسافه

مشوار عا الفاضي

بشوب العمر يا منشفي حواضي
لسانك مشي بالقدح عرّاضي
لا تحسبّي ما غليت وانسميّت
وحق السما زعلان مش راضي

في ناس قالو ليش ما ردّيت
قلت الجدل حبيت ما قاضي
بالرغم اني الموقف تحدّيت
ما قبلت اعمل عا البشر قاضي

لما جهنم بالغرام لقيت
وصارو غمر وشوي امراضي
بابك غلقتو وعا الهدا فليّت
وقلت لخيالي يلملم غراضي

بينك وبيني عقرب الياريت
بساعة زمانو زارع اراضي
ودق القلب ماضي مع تمنيت
لكن لكي عا بياض مش ماضي 

وتا تعرفي قصة بريق الزيت
لما عملت اسمك فعل ماضي
الفاضي فرشتو عا طريق البيت
منشان كلما تعملي مشوار
قلك طلع مشوار عا الفاضي.