بدنــــــــا السلام يعِمّ موطننا
وما يضلّ عِنَّا وضع يحْزننا
وبدنا ظُروف تْودِّع الإفلاس
وبدنا مــا يبقى الجِنّ ساكِنـَّا.
وبدنا محبِّه صادقَه وإحساس
وبدنا بِإيدو الحَــــــقّ يعجننا
وبدنا لِشمخة مستوانـا أْساس
وعا الرمل ما نبني مساكِنَّـا.
وبدنـــــــا علينا يخيِّم الإيناس
وبالمجتمــــــــع نحفظ أماكننا
وبدنا حُضور يدقّ كاس بكاس
وبدنا تـــــا نرْجَع متل ما كنَّا.
وبدنا اللي إلنا عم يدقُّو جْراس
دقِّة قلب مــــــــــــا ياخـْدو مِنَّا
وبدنا فَــرح بالمتر مــا بْينقاس
وبدنا سنِه مـــا يكون إلها راس
تـا نحطّ إلها راس مــــــن عِنَّا.
