راكض ورانا نهار المجاعه
وداب القلب والروح ملتاعه
التحديف لما جاب النا المقت
قرفو العقارب من عيار الوقت
ووقفو تا معهم توقف الساعه
من الدرب بيقول الفنا حيدو
الآخات لازم يبلشو يزيدو
ها اليوم شوفو راح عا الفاضي
ومنشان انو يصير بالماضي
مبارح رجع تا ياخدو بإيدو
قلت لدكنجي شويّ سايرني
وشي التفاته بالسعر عرني
نحنا عا وجه الكاينه أغراب
الله بني آدم بجوز تراب
وكفتا انت باطون خبِّرني
بنتفة قناعه الروح داويها
وكلمة زياده بدَّك انسيها
ما زال صاير لا صدى ولا صوت
وما زال بدُّو يشتريك الموت
بيع الدني شو معلّقك فيها.
صرنا بْلاّ طعمه والنعم "كلا"
وفينا بيضل الطب يتسلى
لقلوبنا منركِّب نباريش
الله ما بدّو للأبد تا نعيش
تا يضل بالدنيا فرد الله
من حيث عنا من النظر كمشه
منقول هيدا مش حدا ام شي
منتعب اذا قعدنا واذا منوقاف
وعند التكسدر كتر ما منخاف
منمسك بإيد الحيط تا نمشي
وبالرغم انو ادويه عنّا
مش رح منرجع متل ما كنّا
لو حالنا بالغير جينا نقيس
ومنا فرعنا كومة اليبِّيس
وشلنا العياري منستحي منّا
صوب العطس ممنوع تا نعدِّي
انما كان فينا بشي حدا نهدّي
بدنا اكل عا ذوقنا معمول
وعا اللي ما فينا ناكلو منقول
يقبر صحابو طعمتو حده
عنَّا الشهيه بحيث منحجبه
مش عم تساقب جوعنا وجبه
منضيع صرنا بين طول وعرض
وكلما سعلنا منوقع على الأرض
وانما وقعنا بتوقع الوجبه.
قلت لهنا بالمنطق الجدّي
تا سمعك أشعار ما بدّي
التفكير تاركلي خمس كلمات
ما بينزلو ولا بيطلعو أبيات
وبالمغط مش رح يطلعو ردّه
وقلت لأنا رح عيِّد بعيدي
لا تنكسر رقبة مواعيدي
ولما لعندي من غيابي جيت
من كتر مو حظّي قليل مشيت
اربع خمس ساعات من ايدي
طالع عا بالي فل من كوني
عوعد مصيري واختفى لوني
بالراس همي بيفلح فلاحه
وكلما سألت البال عن راحه
بيقول مش عم شوفها هوني
هلّي اجاني من الصبر ماشي
مع كل حاله حاطط كباشي
وعا كل ذكرى علِّم النسيان
وها الشهر منّو عن حدا سئلان
حاطط زماني بجيبتو وماشي
يا غايبين البعد جنَّنا
ومنّا من اللي بيسكتو منّا
منشان تا يصير الفكر فاضي
لعنا تعو تا نرجِّع الماضي
هلِّي سنينو بيسألو عنّا
عند الصلا عا ذكركم جينا
انتو أهل لا تحسَّبو نسينا
للحب نحنا حاطّين أساس
منشان نلبسكم بدون قياس
وحتى العري ما نفسَّدو فينا
بحلم الخمر عم تنتهي السكره
وسكرة اليقظه مية العكره
الكم زماني شاحطو بكتفي
ومش رح يضل من الدني نتفه
من بعد منّا ومن بعد بكرا
شو صار حتى تطلعو منّا
طول الوقت أصحابكم كنّا
تخمين انو الدم صار موَي
بقلوبنا عشتو عمر وشْوي
وكنتو تجو عا البال من عنّا.
مرقت عا حيي وصارت تحيّي
الحكيت عن التفاح والحيه
وقالت لعندي ليش ما طلّيت
جاوبتها ما تركلجو جريي
وقعدت قبالي حد باب البيت
وجبت العرق تا حمّلو مويي
وقلتلها ما زال ما تغدَّيت
رح آكلك هلق بعينيّي
وتا تسمعي قصة بريق الزيت
مبارح كنت عا الآخ يا بيي
وهلق تا تبلش سكرتي حبّيت
ما تزمطي من بين ايديي
ولما النظر عا خراجها ودّيت
جوع النفس همدر حواليي
وريقي نشف وبهمتي هدّيت
وقت اللي منها بيَّن شويه
وقلتلها متلك بعد ما لقيت
جايي الشعر عا الطاير تهيّي
والها عا وزن وقافيه غنّيت
وضلَيت احكي عا الوزن منشان
تسكر وترخي تقلها عليي
يا هلّي جوّكم ما انعدّ صافي
ومنكم ما حدا اسمو الرصافي
عا ابجر وهمكم انتو اعتليتو
ومعكم للأبد قايم خلافي
بوقاحه للملا "نقدي" شكيتو
وما قلتو منين بتجيبو اللطافه
بصراحه لشعرنا علّه انسميتو
وعا درب الوزن ضيّعتو القوافي
دخيل الرب قولو شو عَطيتو
منكم: للمنابر والصحافه
بكلام الما الو طعمه اكتفيتو
ما فينا نقول يعطيكم عوافي
قلتو نشَّف الالهام زيتو
وشعرو مناسبات وبس: ما في
"بلاغه" تعمِّر على الأوف بيتو
تا يقدر بالوحي يقطع مسافه
اسمحولي قلكم شهره اشتريتو
ومن الايمان بتكون النظافه
انتهيتو قبل ما انتو ابتديتو
تراث بلادنا قطعتو نصيبو
وثقافتكم بشرعي من السخافه
اللي بيعتدي ونادى على جروحو
فوق الرمل بيعمر صروحو
الحاضر بيقول وقالت الأزمان
التمثيل عندو اسم تاني "دهان"
وتنينهم بالحف بيروحو
يروح اللئيم الرب لا يردّو
اللي بيفهمو عم يوقفو ضدّو
بقلة حيا هل عاشر ونادم
لا يقول انو من بني آدم
انسان مش معقول تا نعدّو
في ناس غابو بس ما غابو
التاريخ فيهم زارك جيابو
منسمع كلام بأغلب الأحيان
فلان الفلاني يلعنو وفلان
مليون مره يرحم ترابو
بضاعة حكي انسان ما بشرّي
كفوفي لهل بيطالعو بقرِّي
ما بشلح الكلمات كيف ما كان
الله خلقني بها الدني منشان
جوِّي اهتمامي ودمتي برِّي.
الحاله يا لولو ما بقا هيي
والكان ليي ما بقا ليي
لليوم عا حالي بعد ما لفيت
علوّاه لنّي من بني كبريت
بقدح زمن وبولّعو فيي
مبارح عليي تدحرج لساني
ومني وقع عا الدرب عنواني
ولما لبطحات العرق غنّيت
ضيّعت ساعة رجعتي عا البيت
بالرايح من نهار الفلاني
ودق القلب عا تصوفر جيابي
وعم تطلع الألحان كذّابه
حبي عا شكلو بالدني ما لقيت
بالأمس عا حساب الهوى جنّيت
وهلق أنا رح جن عا حسابي
شرقت الشمس وقالت الظلمه
ما بتنتهي تا ينتهي حلمي
وهوني انا بين المضى والآن
بالبال عم يمشي الحرف عريان
وأفكار عم تركض ورا الكلمه
لا تسأليني لوين متقلع
بالشعر بيتي مقاطع المطلع
ماشي عا دعسة يمكن وتخمين
وحالي لبست من دون الله يعين
وطالع عا بالي حضرتي اقلع
رابط مصيري والفكر سارح
ولا بنعرف جامع ولا طارح
ووقت اللي شفت الخمر صار مويّ
جربت روح على عبكرا شويّ
طِلْعِت بوجهي خلقة مبارح
حقي معي ان جيت اتخلق
لا مزوّج ولا بدمتي مطلّق
اول مبارح كان عين وزين
وهلق انا ضايع بهون ووين
ويمكن عبكرا موت من هلق
صفـِّـي حسابك بالهوى صفّي
وكلما عا بالي تطلعي تحفّي
عذرو معو هلي بحلاكي جنّ
تخمين انتي من بنات البنّ
وبيشربوكي الناس بالشفه
دقت هنا وقلتلها انّو
جروحي من الهجران بيعنّو
مشوار قالت يا عصام عمال
قلتلها عندي شغل بالبال
بشهرين مش رح انتهي منّو
اكتر ما بدّو الحب مشتقلِك
وانتي عا عقلِك ما انزرع حقلِك
بيناتنا صار الحديث عياط
وما ضل من عقلي ربع قيراط
وبالعمر عم يزغر كُبِر عقلِك
قالت قصيده مدوزنه بدّي
رده ما بدِّي بمنطق الجدِّي
وقت الغزل قلت الكلام بلاش
الناثر بيحمل مدفع الرشاش
والشاعر بيحمل فرد ردّه
وجرَّبت غنِّي متل ما غنُّو
من زمان هلي بحبها جنّو
ما قدرت لاقي للغزل معبور
قال الحرف طالع عا بالو يدور
بالبيت ما بيقعد غصب عنو.
كتبنا عن البيصير اطروحه
وصار النصب عا الناس مرجوحه
كل يوم بيقول بصياحو الديك
هونيك بالرايح من الهونيك
شقفة زمن عا الارض مشلوحه
ما منعرف المجرم من القاضي
وما في حدا من عيشتو راضي
منو علينا الحق عا الطليان
ايام عم بتروح عا النسيان
وايام عم بتروح عا الفاضي
فلِّت فلانه الجوها هاني
ما في دوا لجروح احزاني
خضره النفس وبشهوتي مغّيط
وكلما فقعت سكره انا والحيط
بشلح نظرعا جرين الخزانه
سألت الأنا بتهويت ايديي
عا لوين عم يهرب حواليي
طيَّرت عقلي بالشرق والغرب
ومن جمعتين عملت حالي درب
وناطر حدا تا يمرق عليي.
صارت يا لولو دمعتي وقيه
يمكن حياتي ما بقا هيي
مصران ليلي منوصل بنهار
وحامل عا ضهري من التعب قنطار
ونوم الهنا تا نام ما فيي
بدِّي شي ساعه تعيرني دقايق
همي حمل والجو مش رايق
لحالي بحالي ما لقيت محل
وعمري سهر طول الوقت بيضل
بيطلع الضو وبعدني فايق
ما قدرت لاقي للفرج معبور
الغليان ماشي والغضب بيفور
يا ريت كفي بتقدري تقري
بيضل بالفاعل شغل فكري
ولا مطرقه بيحمل ولا معدور
الراحه معي خسرت معانيها
وراحت الغفوه وصعب لاقيها
من ميل عم انقل لتاني ميل
تا شوف عتمه واقعه من الليل
غمض عيوني وانشلح فيها.
صرلي سنه دوِّر على ذاتي
بين المضى ومستقبل الآتي
وقعتها مني انا وسكران
بالدم كانو تقال عرقاتي
الراحه ضعيفه والوجع نصحان
ومبحبحه بتضل آخاتي
من عب صوتي هربت الألحان
وعا بو الزلف ما جات هيهاتي
وهلق أنا من همتي طفران
بابرة مشي معبَّر مسافاتي
ورايح بنزله مخلَّفه حجران
يمكن عليها يطلع خواتي
صارو عيوني للدموع جران
وما علَّمو بالرمل ضرباتي
وكيل الغضب عا ذمتي طفحان
ان كنت فيكي يا هدى موجود
هاتي شو عندك من انا هاتي.
يا عازمين العقل عا خواتو
الكاس اجمعو بجمهور مازاتو
صرلن زمان جروحنا يئنـٌّـو
وما في فرح قدم تحياتو
حاجي شرايع بالدني تسنـٌّـو
خلو العمر ياخد علاماتو
لازم لجو المعرفه تحنـٌّـو
ويا بو الزلف ما تضيع هيهاتو
نحنا بزمن عم ينهرب منـٌّـو
ما يسلمو ولا يوم دياتو
بيبين على الذوق لكـِّـنو
ما بيقدر يقوم بمهماتو
حاجي بقا عا الطاير تجِّنو
هاتو وعي من عندكم هاتو
وقولو الأبانا واعرفو انـٌّـو
متل الي عاشو قبلنا منعيش
ومنموت متل القبلنا ماتو.
طار الوحي وانشل جبروتو
وما في شعر يتعمّرو بيوتو
وبطّل عبير الشاعريه يفوح
ويعرض بصحن الأوف بسكوتو
ماشي عا همي وخاطري مجروح
وما في حرف بيطلِّع بقوتو
وما في امل بالجو عم بيلوح
تا يواجه القدّوس تالوتو
بالسر بدّي الاهتمام يبوح
ويعرض على الاسماع لاهوتو
امرو عا قسمه وعا جمع مطروح
بسوء الفهم بيبيعنا كروتو
هلّي لهم باب القلب مفتوح
يفوتو قبل ما اغلقو يفوتو
بكرا بعد ما الروح مني تروح
بدّو زماني يقول بالآخات
مات العليه الناس بيموتو.
من هالعصر ميتين بالميه
ما ربحت لا لوتو ولا منيِّه
ناشف لأنو صار عا المكشوف
حبيت اني اعصرو تا شوف
بالعصر كنو بيطلع وقيه
عليي ما بعمل بالعمر قاضي
تا كون غيري باصبعي ماضي
عني سالت وجاوبو الاخوان
عليك الدني بتدوَّر من زمان
منهيك عم تبرم على الفاضي
قالو تا يبقى في الو موقع
صحن الهوى لا تاكلو مسقع
قلتلهم لا تولّفو الزقفه
هلي انا حبيتها شقفه
وبالحب توبي بعد ما ترقع
وهلي ما بدها بالهوى لوني
قلتلها روحي اتركي كوني
ما بروح قالتلي عا غير محل
قلتلها وهوني انا ما بضل
رح روح مني واتركك هوني.
لآخي قلت من خلقتي حيدي
جايي عبكرا يعيَّد بعيدي
والشعر قال من السكت هربان
طالع عا بالي قافيه جديده
ومن بعد سحبة كان ياما كان
وصلت لعندي الكانت بعيده
وعلق عا صدرو واقعي نيشان
وعا الآخره هربت تجاعيدي
وحرف اللي كان من الوما تعبان
وما قال كيفك مرحبا سيدي
وقت اللي شاف المشهد الفتان
قلي الحكي رح يطلع بايدي
وصار الغزل يمشي شبه عريان
منشان تا يلحن اناشيدي
وقلي الوحي لا تتعب الأوزان
بيوَّقعو عا الارض قرميده
ولما الشعر سيطر على الميدان
وطلعت بنزله نغمتو جديده
دار الغنا بالشكل والألوان
ومنشان تا ارضي الوما والسكت
عملت الهمس واللمس رديده
عليي امرقيلك بالعمر مرقه
نزلت عا عيني موية الزرقا
طفران ما عندي دولار بالبنك
وجياب طقمي توحمو عا فرنك
وعم ابصر بنام الربع ورقه
يقظة وجودي ضيعت حلمي
منها زمام الأمر مستلمه
شهر المضى مكسور ما تجبر
وراس السنه من حيث عم يكبر
ما بينحكى معها ولا كلمه
ما قدرت عمِّر عا الصخر كوني
تا لبِّس الايام من لوني
يوم التلاته الاربعا طارح
وواقف عبكرا بدروة مبارح
خايف يجي وما يساقبو هوني
شو ها الدني افراح ما فيها
عا الوزن ما بتمشي قوافيها
فيها الي ما تعمر مداميك
صوب المدى انرحتي لبعد هونيك
وشفتي دني بتنعاز جيبيها
سكران كنت ببيت هيلانه
وفوق الجسد عم دحرج لساني
وعا نزل شلتو بدون كلفه مرقت
وعبيت عرقاتو بفراغ الوقت
لما عرفت ما عندها قناني
وقلتلها من بين ايديي
بزعل اذا بيزمط حواليي
يومين بدي بالحياة ملاح
تا صير امشي عا الهوا وارتاح
شيلي الارض من تحت اجريي
لازم طريق وفاقنا نشقو
ونعجن تفاهم نقدر نرقو
عا ضهر كلمه بيركبو الأشعار
ومسمار بيهدي الدني مسمار
ان كان فينا نعرف ندقو
هَيْ ها السما القدّام عينينا
هلي عليها ناس ودينا
عندي ثقه وعا ذمة التقدير
منهم نجوم البسما "مْسامير"
من هيك مش عم توقع علينا
يا اهل الشعر عيروني التفاته
انا للحرف عم ارهن حياتي
تا حتى كون بوليس الاشاره
وبراحة بال اعمل واجباتي
اللي هني مش حدا اخدو الصداره
البلاغه رايحه والجهل آتي
مزاجي تعكَّر وصبري توارى
وعذاب الفكر عم يقطع لهاتي
ما عطيو لطلعة الكلمه حراره
تا يوصل اهتمام لذكرياتي
وعا وزن وقافيه منهم غيارى
لحالن بالدني جابو الشماته
عنهم كلما عبّي استماره
الرياح بتعصف بأربع جهاتي
وعا هون وهون لحقتني المراره
عقلي طيرو ولحدّ هلّق
ما جاني ظرف تا اعلن خواتي
قصيد
قلتلها يا نور عينيّي
الجنه تركنا من ورا الحيّه
والأرض النا تقبريني "ام"
ولا شك لو بيكون الها تم
بتقول حاجي تدّعسو عليي
وكمان بيقولو الحواليي
ها الام لازم نرحم شويه
ببدال كلمة دخل عينيها
كل الزبل عم نفرشو عليها
ومنطير عصافير الموّيه
معنِّى
وقالو اللي قالو لا بقا تجعّد خُصَل
خيط الحقيقه بكذب مش عم ينوصل
عراف الزرع بالارض مش لعبة ولاد
لوما التراب منخلطو بكومة سواد
لا خيار عم ناكل ولا مناكل بصل
بحيث الارض الها طقوس مغيّره
فيها الزرع بيكون اسمو مسايره
مش بس انو الزبل اكتر من مليح
قلتلهم يعني اذا هيدا صحيح
عن يدّها منكون عم ناكل "درا".
هلي لها عم اشلح تيابي
ومش عم تخلي قرش بجيابي
قلتلها لا تلعبي دورين
بلكي لعندي بيرجع شبابي
واحد انا لا تعمليني تنين
السلبي ما عمرو كان ايجابي
وبالرغم اني مش انا بلونين
ما قدرت معها اضرب حسابي
وما قدرت فتح عا الهوى العينين
واكتب عا شلحة عينها كتابي
ورجعت الها قلت عمري دين
وفيي نقص ما زاد اعجابي
أرض الفرح ما قدرت أعرف وين
صارت حياتي بعين منصابه
رحتي عا ذاتك من سنه وشهرين
وهوني انا بالرايح من الهون
رايح عا مدري لوين بغيابي.
ليكي يا ماري مغرمك ليكي
بعدي انا وحياة عينيكي
عايش عا كلمة دخلك ويا ريت
مش عارفه اني النظر غريَّت
تا اشلحو ويلزق عليكي
وتا انتهي بالحب من ويلي
وخلي العزيمه تشد عا حيلي
عزمت الحرف تا يشرف باسلوب
ومن دون ما قلو الوصف مطلوب
لقيتو لعندي جايب العيله
غنِّيتك وحظي برفع الخيط
وعملت اوفي من بني المغّيط
وعندك لأني نويت كفِّيها
ما لقيت ساعه تا اجي فيها
ومش عم بتمشي ساعة البلحيط
لازم زمام الأمر اتولِّى
علينا الزمان باصبعو دلّى
لطفك مساطر ما شفت منو
مفروض انك تعرفي انو
عبدتك عباده وزعلت الله
يا حظ علـِّـي بنفرج علـِّـي
من الارض قوم وعا السما علـِّـي
ضايع بحالي والوهم اجناس
وعم حسب الآخات بتسِّلي
كل يوم بعمل عن انا قداس
وقديش بدِّي عا النبي صَّلي
منوين بتروح الدرب عا الناس
ناطر جواب وما حدا قلـِّـي
عايش عا همي بجيرة الافلاس
وربطة خلاصي ما لها حلـِّـه
وكلما وقفت تا رجِّع الأنفاس
بشوف المشاكل قعدت محلـِّـي
هلي شفافن ما بقا تنباس
عم يتركوني من عدا غلـِّـه
وهلي معي عم يقعدو عا الكاس
مني ما كانو بيطلبو أشعار
لوما سكوتي صرت عم غلـِّـي.
انا شاعر بيوتي غيبوها
حكاية شو انا مني خدوها
جدار الصمت ان كنتو اخترقتو
الليالي بألف ليله بتسمعوها
سبقني العمر ما مره سبقتو
عا مدري لوين اجرو سيروها
العقارب ما اجو عا حل وقتو
ولا ساعة زمانو عيروها
اذا عا شوفتي يوم احترقتو
المروه تزوجو ولا تطلقوها
وعا ذكري بالغلط كلما مرقتو
غصوني من المشاكل ورقوها
عمري من الفنا يمكن سرقتو
الحقيقه بعملة لساني اقبضوها
ضروري تعرفو ان ما اشتلقتو
باني مش انا اما وابوها
على النافوخ تفكيري طرقتو
والآخات فيكم تسألوها
اذا المجهول شي مره طرقتو
دخيل الرب ودولي حياتي
اذا كنتو حياتي بتعرفوها.
يا شعر مش عم اوصل لموقع
يخليك مني سحر تتوقع
مش بس ايجابي عملني السلب
حرف الهجا صاير معو بالقلب
واوقات بالنقطه عم بيوقع
كل الوحي عا موقفي شفتر
والاهتمام بكلمتي تعتر
ما في نحو بيهزني ولا صرف
وما في حرف عم يركب على حرف
تا الابجديه نسلها يكتر
هم الدني عا حالتي تكوَّم
حظي فركها ومرفعي صوَّم
كيف بدي سجل أساطير
وقت البيكون ملولق التفكير
ما في كلام بيطلع مقوَّم
حظي برقبة صرختي معلق
ونام السكت عا كلام الملولق
مش عم بلاقي للحكي دبار
عا البال كلمه جبت بالايجار
تا كون قادر قولها هلق.
البجي عا ذكرها وبروح غافي
القطر عا صدرها موَّج كنافه
وقبل ما يعمِّر التفكير بيتو
لساني نمَّل وخضرت شفافي
وقبل ما يعمر التفكير بيتو
زمان مضيعو فيها لقيتو
وحناني تقدمه الها عطيتو
تا اسمع فرد يعطيك العوافي
الها قلت تا اهمد ما فيي
العواطف طالعه مني عبيه
وعا درب العمر لحقتني الشهيه
ونهار الجوع من عنق الزرافه
تا غني شعر عارتني سمعها
بعدما زاد بالكلمه ولعها
وتا حتى كون متل الناس معها
عملت معروف عملتني رصافي.
يا شالحه عا الارض مشورتي
لا تعَّلقي وجودك بخاصرتي
بالجو طرتي بجانح الخوتان
وكلمه ما فيكي للسمع عرتي
صاير غرورك بالدني طوفان
تا تدنكزيلي الراس ما حزرتي
ماشي الحكي عا شفتك عريان
وتا تدبريلو تياب ما قدرتي
من ها الوضع صاير شبه قرفان
سباقك معي وحياتك خسرتي
نهار الفرح من خلقتك هربان
وتا تكمشي الساعات ما قدرتي
ماشي زمانك عا الدرب حفيان
ومش بس انو بعمرك كبرتي
حايم عليكي عالم النسيان
وهيكي الي بتقول ذاكرتي
حبي لكي صاير خبر للكان
بشرع الحلا منك حدا صرتي
كنتي الصلا والصوم والايمان
لكن بعدما تغير العدان
فيكي صرت عم شوف آخرتي.
عقلي زغر من بعد هالكبره
ومش بس اني قاعد بلايي
شالح تيابي ولابس الغبره
وما بنعرف رايح ولا جايي
صارت حياتي بدون طعمه ولون
وصار القعد عا السكت يتعبني
قلت لخيال مشرَّدو بالكون
غِط الحرف بالآخ واكتبني
فضيو القناني وسيطر التلبيك
وما ضل عندي كاس يسكرني
ووحدي انا رايح من الهونيك
ويوم النهايه هون ناطرني
وهلِّي معي عنقودها ما انطال
قالت مصاري بجيبتي دحشلي
فكَّرت فيها وقلت كيف الحال
صار الحيا عا خدودها نشله
ولما عا حبي خيَّم التعتير
ما رحت بمفـَّرق ولا بجمله
وكلمة هوى هربت من التفكير
فزعت لا اني حطها بجمله.
قديش بدي بالهوى هدِّي
غيرك حدا بالكون ما بدي
شاعر انا وعندي قلم خيَّال
كلما مرقتي عا طريق البال
بتطلع عا نغمة دعستك رده
عرفتك لطيفه وللوفا دعمه
العمرو صيام ولاحقك طعمي
وقت اللي شفتك رايح من الآن
بشلح النظر ما تحبحب الرمان
حتى عيوني يقشعو الطعمه
هجرتي حياتي والضغط عالي
وصار الوجع بالراس رسمالي
واليوم صبري جايبو بالدين
ومن وقت ما رحتي عا آخر وين
لليوم عم ابرم على حالي
عا بياض قلبي لحضرتك ماضي
ورايح انا ومليان عا الفاضي
ومش عم بلاقي للحلم تفسير
وكلما براسي ينقر التفكير
عا الحاضر بجيبك من الماضي.
يا دعد مني ضجرت الساحه
حظي ورق والظرف قداحه
مش بس عندي هموم فوق هموم
مش عم بتطلع راحة الحلقوم
تا جيب منها للجسد راحه
حلِّي تا اشطب عا الوجع حلِّي
بقلب الحياة مضيَّع محلي
ما بنعرف جامع ولا طارح
عليكي كنت رح امرق مبارح
راح الوقت من دون ما قلي
طلِّي عا هيكي وضع مش راضي
تا تسفّريلي كل امراضي
ومش بس اني بطبِّق القانون
قيس الملَّوح كل ساعه بكون
وبسحب من الماضي فعل ماضي
حتى لعندي تشرَّفي بدِّي
ببيع الدني تا اقشعك حدِّي
وبقلك وهيدا حكي يوصال
حاطط الك عا الدرب كيف الحال
وعا الباب اهلا ومرحبا قدِّي.
انا انسان عم يكتر بلايي
ضروري بهالدني اقعد بلايي
عليها يا جميله جيت سايح
ما بدي تسأليني لوين رايح
عا مدري لوين رايح من عدايي
الطفر زرِّيع عم يطلع بكفـِّـي
وما عندي مقدره لترجيح كفه
صفر بيضل يعطيني زماني
وصارت ناقصه دعسة لساني
ما بقدر كلمتي بالحب كفي
بعدما ماتت النبره القويه
صارت دمعتي تنزل وقيه
وتعازي من البشر قلبي تقبَّل
وكتر ما بحالتي صاير مكربل
انا وعم كسدر تفشكلت فيي
عا وجه الأرض ما عندي مكانه
ولأنو الحظ محروق الديانه
لما زتني عا الارض الله
ولساني شبر من تمي تدلى
وصلت لهون بنهار الفلاني.
الأحباب يللي عيدهم عيدي
رنو الي وقالو بتنهيده
سمعنا يا ملكي عم بتضرب صيت
قلتلهم لما لعندن جيت
كنو ضربتو تنكسر ايدي
الهم على راسي مبارح عزمتو
ونوم الهنا بالراس نيمتو
اسملله عليي ما بقا ينقال
كان على نص الدرب ماشي الحال
لما بحرف سيارتي لطمتو
النقمه لعندي من ورايي جات
كلو لأنو بغازل الستات
هلي تا عنها غيب ما فيي
ميت تا حتى شوفها وهيي
قالت ما بدها تقشع الأموات
وهللي الف يا دخل عينيها
وشلح النظر بارم حواليها
عندو الحلا عا جسمها مسافات
وكلما عليها يعربشو الشهوات
بتعمل مزاد وبوقع عليها
لكومة همومي الشفتهم جلبه
ما لقيت ايجابي ولا سلبي
غب عْلَى قلبي والغضب نصحان
وقاعد انا والكاس والحيطان
بقلة حيا ومكتّر الغلبه
ما في وضع يستاهل الزقفه
وقفت وما شفت العز بالوقفه
ما قدرت اني كون فحل الوز
ما في وزن بالفكر عم ينهز
والقافيه صارت فرد شقفه
ما قدرت حقق بالشعر حلمي
ومنّي حدا صفّيت عا علمي
ولما الضمير الحي دق جراس
وقال الصمت عن جد كبر راس
اجتمعو الحروف وطلّعو كلمه
ومنشان افتح باب عا كوني
ويمرق عا وزن وقافيه لوني
طلبت الوحي تا يصرِّف الاعمال
ولما عا راسي شرَّف الموّال
قلت لسكوتي روح من هوني.
رجعت عا الشرق تا اكل كنافه
بعدما كنت صوب الغرب لافي
وصرت عا ضيعتي ادلق حراره
تا خلّي البرد فيها يصير دافي
بعيوني شفت جنّاز الحضاره
ونشاف محوَّم عْلَى نبع صافي
وبعدما جبت كم ذكرى عفاره
عزمت الهام تا يجنِّد قوافي
وتا حتى الشعر يبقى بالصداره
وما اقشع حرف فايق حرف غافي
عا كل الابجديه عملت غاره
تا رجع عهد معروف الرصافي
وبعدما مشيت تا شوف الخساره
العا ارض الواقع بابعد مسافه
وقفت تا ريِّح جرين الزياره
وعا اوف وآخ تتركلج شفافي
وشفت هونيك عا كعب المغاره
العليها تاكيه شوية حفافي
زهره طالعه بين الحجاره
لما نقلتها عا غير مطرح
فتحت تمها وقالت عوافي.
يا حباب شيلو الزير من بيرو
وفيي بشي فرحه دخلكم طيرو
المشكل لعندي قوام عم يوصال
وبالدم عم ادفع فواتيرو
شلحت النظر تا شوف وين العال
وان كان عم تضحك اساريرو
لا عم عندي بالدني ولا خال
وفي ناس خافو اوادم يصيرو
خف الحكي عا الهاتف النقال
وصوب السمع قلل مشاويرو
وما في وما بالايد عم ينطال
تا لحِّم الواقع بقصديرو
كلمة يا اهلا ما بقا تنقال
وجاب الضجر للقلب تعتيرو
لا تسلو ان كان ماشي الحال
واقف لانو في وجع بالراس
وما في شفا اقدر استعيرو
القالت لها عم انحسب اني
قلتلها قوانين لا تسنّي
عا وجهك التجعيد عندو رفوف
ووقت اللي قالت انت حالك شوف
تطلعت فيي وفزعت مني
والها قلت وحياتك كبرنا
وعم نحفر بدينا مقابرنا
جات النهايه بقلة التدبير
ومن حيث نحنا معترين كتير
مننسى بانو غيرنا صرنا
بيجوز شفنا من الدني كفايه
وعنا البدايه اسمها نهايه
عا كل مفرق درب دبي الصوت
بالبيت نحنا ناطرين الموت
وكل يوم عم بيقلنا جايي
وتا تعرفي اكتر يا انسانه
عنا الفرح بفراغ القناني
صرنا الدوا عم ناخدو بانبوب
يا تقبريني تنينا مطلوب
ننشال بالكركه وجه تاني
