شيش طاووق

زوقـــــي شــــي مــــره بــــالغلـــط زوقـــــي

وخـــلِّــــي الــحــنــــان يـــرٌّق مــــرقــوقـــي

ودُقِّــــي مـــعــــي عــــا العــــود والــقــانون

بـــلــعـــوس زمــــان بيــهــضــــم حقـــوقـي

كــــونــــي مـــعــي اطــــرى مـــــن الهليون

وغـــبــــي الـحــيـــاة بــســاعـــة شــروقــي

وان كـــــان بــــدك مــــن انــــا مــعجـــــون

ومـا قــــدرت اوصــــل عـــا التــرم (روقي)

يـــــا تــقــبـــريــنــي الحـــب صــار جنــون

لــعــنـــدي تــعـــي وتـبـــضــعــي بســوقـي

عــــا الــجــمـــر صـــابـــر والــقدر ملعـون

وفـــزعــــان انــــو يــكتــــرو حــــروقــــي

يـــــا ريـــت بــقـــدر عــا حيـــاتـــك مـــون

تـــــا تــقــشـــعـــي الالــــــــوان بعـــروقـي

لــكــــن مـــا فـــيـــكـــي تقـــشعــيني بـدون

مـــا تبــقــبشــــي عــــم ييبســـــو عـروقي

ان كــــان بـــدك تــكــســـري الـــقـــانـــون

مـــــا بـــعــــود غــنــــي للهـــوى شـروقي

وان كـــــان بـــدو الــحـــب هيكـــي يـكـون

لا شـــــيـــش طـــــاووقـــك انــــأ رح دوق

ولا بتـــاكــلـي مـــــن شـــيـــش طــاووقي.

بقسمه وضرب

 

قــلــتـــــلـــهــــا لـــمـــا وصـــلـــت لـيــــــهـــــا

وشــــفـــت الــحـــكـــي جــــوات عــيـــنيــــــها

جــــايـــــي تــــا غــنـــــي لــلـــهـــوى مـــــوال

شـــيــلــــي الــحـــواجـــز عـــن طــريـق الــبال

وضـــبــــي الـــســـمـــا لا ادعـــس عليــهـــــــا

كـُــبـَّـــا ابـــــوكــــي صـــدِّقـــي كــــلامـــــــــي

بــلــعــــبـــة ورق عـــــا ذمـــــة قـــــلامــــــي

بــــيــــضــــل تـــخـــتــــك بــالــدني مفـــروش

ســــاعـــــه عــــم تنـــامـي عـَـلـَــى الاشـــوش

وســــاعــــه عــــا سبـــعـــه ونــصــف بتنامي

ومــــا زال حـــلــمـــك عــــا هـــــوى حــلمــي

آخــــر حـــيـــاتـــي تـــفــضــلــي استـــلمـــــي

هـــــم الــحـــيــــا لا تـــعــتـــلــــي مــــــــا زال

بـــيــمـــشــــي الــحــكـــي بينـــاتنـــا اميــــــال

كـــلـــمـــــا ســكــوتــــك زقــمــــو كــلمــــــــه

نحــنـــــا تــمـــــن افــــراحــنـــا دفــعـــنــــــــا

عـــلــيــنــــا قـــبــــل مـــا نـــوقـــف وقعــنـــا

لا تــتـــعـــبـــي مـــن هــــون مــش رح روح

بــقــسمــــه وضـرب ان كـــان مــش مسموح

بــخــلـِّـــي الــطــــرح عـــا الارض يجــمعنـــا

مــــا زال قــلـــبــــي بــقلبــــــك مـــعــــلـَّــــق

ومـــــــــا زال لا مــــــــزوّج ولا مــطــلـَّـــــق

ومــــــــا زال انتــــــي عــــايــشـــه بالــــذات

ومـــــا زال صــــــار الــحــــب ضــرب خوات

جــــنّـــــي انــــــا جـــنـــيــــت مـــــن هــلــــــــــق.

فصل الصيف

  

الـــصــــيــف ابــــــتـــدا وتبــــسمــــــو ورودو

وزر الـــقــــرنفـــــل بـــــودر خــــــــــــــــدودو

وودّى الـــكــــرم مــــرســـــال لللهــــفـــــــــات

حـــــتــــــى يــــجــــو عــــا خــــراج عنقـــودو

والـــتـــيـــــن قدَّم كــــرت للـــشهـــــــــــوات

ووصّــــــــى الـــقشـــــر تـــا يحــــن عـا عودو

والطقـــــــس صــــــار يخــضــــرم مســافــات

ويــــطــــرش لـــهــيــــب الـــنـــار بــبـــــرودو

والابـــجــــديـــه رِمْـيـــــــت ســـــلامـــــــات

للــــشــــاعـــــر الـــمـــا بيـــوقفــو جهـــــودو

وعـــطـــر البــنــفـــســـج بــالقصــيـــده فــات

ودق الــــوزن عــــا قـــافـــــــيــــة عـــــــودو

وشــعـــر المــعنّــــى استــفــقــــد الـــكلمــات

الــفــيهـــــا الـــــوحــــي بــيــحـــط بــــارودو

وتــــــــزوج المـــعــنــــى مــحــبـــــــــة ذات

وحــــط الـــحــبـــق والــــزنـــبــق شهــــودو

ومــــع بــــــو زلـــــف عــــا اول الهيهـــات

واقـــــف زمـــانـــــي وعــــــارف حـــــدودو

وبـــالـــرايــــح مـــــن الآخ والنـهـــــــــدات

هــــونـــيـــــك يــــا عيــــونـــــي خيالك كان

منيّـــــم زرار الـــــورد عـــــــا زنــــــــودو.

دخان

   

رســمـــتـــك عـــا لهــفـــه وقــالـــت الــرسمــه

كــبِّـــي الغـــــضـــب تـــا تريّـــــش البســمـــــه

لا تســـافـــري بهـــا الشــــوب عـــا بيــــــروت

ان كـــــــــان دولاب الــهــــوا مــــفـــــــخــــوت

لعـنــــدك مـــا فيهــــا تــــــوصــــــل النــســمــه

ونــــــــحــنـــــا بــعــــدمــــا الـــهــــم زوَّدنــــــا

كــــومــــة حــكــــي "عـــا سكتنـــا قعــدنـــــــا"

ولــمـــا الـــحــــروف مـــن الســـكــت ضجــرو

قـــلـــــــــنــــا الــكـــلام بيـــاخــــد بــــاجــــــرو

مـــــا عــــــاد يمـــشــــي متــــــل مـــأ بـــدنـــا

وعــــدنــــا انقطعــنـــــا وضـــاعــت الـوصلـه

وتشـــريـــن صــــار بغيبتـــــــك فــصــلـــــــي

وانــتـــي البكــــي لحقتـــي عيــــان بيـــــــــان

واللـــــي انــــا حبــيتهــــــا مـــــن زمـــــــــان

صـــــــــارت الآخ بـــتـــمـــهـــــا خـــصــلــــه

مــــــــا ضـــــل عــنـــــدي للغــــــزل فــكــــره

عــــم ادلــــق النــسيــــــان عــــا الــذكــــــرى

كـــل الـــهــــوى طــــار بــجــنـــــاح الــريــــح

وحـــاطــــط ضمــيـــري الــيــــوم بــالتصليــح

مــــا بيــــرجــــع لعـــنــــدي لــبـــعـــد بكــــرا

جــــايـــــي سنــــه تـــا نعــكِّــز عــلــيــــهـــــا

مــــــا فــــي ســحـــر جــــــوَّات عيــنــيــــــها

فـيــهــــا ضـــــــروري نحــلِّـــل المــمــنـــــوع

ان كــــــان بــــــــدِّك نــــدرس المــوضــــــوع

راس الــــســـنــــــه أحــســــــن مـــن جريهــــــــا.

مأجّر حياتي

 

رِخـْــيــــت سنــيـــنــــي تِــقــلــهـــــا عـــليـي

وعــــم يكــتــــرو الآخـــــــات يـــــا بـــيـــــي

الامـــــوات هـــالاسبـــــوع صـــارو تنيــــــن

مـــــات الـــفـــــزع بالـــلقــــب مــــن يومــيــن

ومــــــات الـــضــحــــك قـــــــدّام عيــنيـــــي

كـــلــمـــا عــليــــي الـــبــــرد يــتـــســــــرّق

عـــــم روح بـــالجـــمـــلـــــه وبـــالمـــفـرق

بـــالــرغـــم إنــــو الصيـــــف مـــــد لســـان

وراح الشــتــــي مــــن جمــعــــتين زمــــان

عــــم ضــــل اتنفـــــس هـــــــوا مــــغــــرّق

بــــــدِّي شــــي حــــالـــه بالقلــــب تشـــفـع

كــتــــر الــحـــصـــر بيـــضــــرّ مــا بينفـــع

مــــا فــــي هــــوى بــالجـــــو يــحـــمــلني

يــمــــكــن عــبــــكـــرا الـــديــــن يـاكلـنــي

مــــأجّــــر حيــــاتــــي لــنـــاس مــا بتدفـع

هــيــــدا الــقـيـــامـــه قـــامــهـــا بــس مـرّ

وهــيـــدا عـــم بيــشـــمــــر زنــــد اسمـــر

صـــايــــر كـــلامـــن مــتـل ضــرب السيخ

بيــصَّــنـــفـــو الـــعــــالـــم مـــن البطيــخ

ومــطــلـــوبــهــم احمـــر مـــن الاحمــــر.

 

يا حنه

  

دخل السما والأرض يا حنه

موَّال دخلِكْ للهوى غنَّي

مفروض انك تعرفي انو

قلبي النبض عم تاخدي منو

كلما بعنِّه تسألي عنّي

من الهم مش شايف حواليي

وما في عرق قدّام عينيي

البطحه اللي معها كنت حط كباش

وكانت بجيبي تقعد على بلاش

بعشره دولار عم توقف عليي

هي حالتي بالحب شوفيها

وما زال انتي هون داويها

من الشرق كنك رايحه عا الغرب

وشفتي شي نظره واقعه عا الدرب

هيدي الي بتكون لمِّيها

قولي يا دلّو وعا القلب حنِّي

عليي شريعة حب لا تسنِّي

مش بس آخي مالها عيارات

وعا الدرب منِّي بيوقعو النظرات

أوقات عم يوقع شقف منّي

الوزن انسحب

  

نحنا الحلو من قلبنا عطينا

زرعنا القلام وفرخو بدينا

بالرغم انو منعصر من الذات

كلما نجي تا نركِّب الأبيات

هني بيصير يركبو علينا

صار الشِعْر عم يطلع منبِّر

وما في كسر باللحن يتجبَّر

مطلوب انو الضغط نحنا نزيد

تا يصير فينا نجيب لون جديد

يطلع بإيدو يساير المنبر

الضو على بحر الشعر متسلَّط

ولحد هلق بعدما تبلَّط

الوزن انسحب والحرف راسو كبير

جينا تا حتى نلبَّسو تفكير

عا البحر قال بيلبسو مزلَّط

عا كل كلمه طيبه متنا

وجابت صور للشعر همتنا

ووقت اللي قلنا بالجسد والروح

صوب العطا ساعة زمن منروح

اليلعن إجت قدام ساعتنا

سكره طبيعيه

لما الهوى مجروح خلاني

وصبري ما حلحل عقدة لساني

قلت الزهر بيجوز مشتقلي

بكير قمت ورحت عا الحقله

منشان اتنشق هوا تاني

قال الندي تا ينعرف ختمي

للزهر دمعي عاملو لتمه

ورايح من الهونيك حدي كان

طلوع الشمس عا زحمة الألوان

عا الريق عم ياكل شقف عتمه

وعا ريحة النكهه الطبيعيه

العا الأرض كانت فارشي وصيه

تشلقحت ساعه حد يخزي العين

ولما عا بالي عن امشي لوين

كل الدروب تحشرو فيي

وعن يد فكره انكرِّت البكره

ومن كاس وقتي راحت العكره

وسكران وقت اللي وصلت عا البيت

تطلعت بالخمره وقلت يا ريت

بيطلع بإيدك متل ها السكره

الجسد مدرسه

 

ضلي معي بالحب لا تضيعي

منشان اشرحلك مواضيعي

لا تحسّبي المرمر ما بقدر شوف

اسمي بمدرسة الجسد معروف

استاذ وبعلِّم بصابيعي

سهران عا كاس ودملجانه

عم تبصر بنامات مليانه

ومنشان لاقي للسكت دبار

لاقط لساني بشنكلين زغار

وبدك تا حتى افلت لساني

هزي الخصر لا تغيري لوني

بيصير كونك من بني كوني

حلم الهوى راكض ورا التفسير

لا توعدي حالك ببكرا كتير

يمكن عبكرا ما يجي لهوني

بكرا أنا يا نور عينيي

مني الي رح رجِّع شويه

طالع عا بالي اقدح مشاوير

هونيك بالرايح من التفكير

في درب يمكن تمرق عليي

 

حرف ادمي

 

أنا عا الخط يا حلوه اسمعيني

تا ضل على السكت قاعد ما فيني

وقعت بمشكله والضغط عالي

لوما معلم بطبشور حالي

عليي بتمرقي وما بتعرفيني

أنا ان قلت مني عم بغالي

الك غنيت شعر الارتجالي

كنت جايي تا اشرحلك حقايق

عقارب ساعتي عقصو الدقايق

العليهم كنت حاطط اتكالي

نقلت من عندك وعا النقل نادم

افتكرت الحظ بدو يكون خادم

تا حتى اكتب رساله ما فيي

لأنو بالحقيقه الابجديه

ما فيها ولا حرف متل الأوادم

ما بقدر بالهوى آخد مدايي

صرت ببدايتي شوف النهايه

حظي ما وفي للعمر دينو

ولأنو ما انعرف هونيك وينو

عا مدري لوين رايح من عدايي

 

أول نيسان

 

قلت لهدى لا تقطعي قوتي

عزمتك عا قلبي ومش عم تفوتي

صارت طريقي بالغرام كواع

كل الحكي بالسوق عم ينباع

وما في حدا عم يشتري سكوتي

قلبي إلي ما بينعرف انّو

تا اكسر القانون أو سنو

صار التعب بوراق مصفره

علوَّاه لنّو الصبر شي مره

بيسعل بوجهي وبنعدي منّو

شلح النظر عم ضل من يمّو

وكلما وقع وتشربك بهمّو

عا درب منها خرج المواعيد

منشان عوزو ساعة اللي بريد

بعمل حناني إيد وبلمّو

وكلما إجي تا اقترب ليكي

عم تبعدي انتي وحواليكي

وما زال مش عم تقنعي بها الآن

اني بصدقي مشرَّف الانسان

رح صير أول يوم من نيسان

تا صير اقدر امرق عليكي

المعرِّي

 

أنا انسان في عندي مرونه

وما فيها العاطفه تمشي بدوني

جروحي من عذاب الحب أنو

وما عم لاقي جماعه يفهموني

اللي كانو يحلفو بإسمي تدنو

غريب الدار صارو يحسبوني

وهلـِّـي بكلمتي الحلوه تهنو

صارو بالسكوت يطالبوني

عيوني بشوفة الحلوين جنو

وعا حرقة قلب بدهم ياخدوني

وهلـِّـي بيشلح النظرات منّو

رجل ما بيترك بعينيه مونه

أنا من جملة الغنو وتغنو

وبكل مناسبه بحرِّك سكوني

صرت محتار من أمري لأنو

الأناتا عم يسموني المعرِّي

وأنا بالليل ما بغمض عيوني

قلت لحياتي

  

مبارح سكرني وحسبت انـِّـي

انسان ما عندو ولا انه

ومن بعد ما وقفو القناني صفوف

جرَّبت بمرايه عيوني شوف

وطلعو بنزلة آخ مش هنـِّـي

ومنشان فرفح وقتها شويه

قلت لحياتي روجي ليي

وجربت فوت بباب مش مفتوح

تا شد همه وصوب حالي روح

بس المشي ما ساقب جريي

وهلـِّـي حنيني شدّني ليها

وبقول الها دخل عينيها

قررت اني شوفها ويا عين

راحت طريق البيت مدري لوين

وبعدو الرصيف بيبرم عليها

 

رح ضلّ عا حسابي

هلي كنت عم عدها مرجع

عا غيابها عم ضلّ اتوجع

كانت إلي عا منبري موال

لكن يا ولدي راحت من البال

وناطر عا جمر الصبر تا ترجع

صرنا قصيده من عدا أوزان

وصار الوحي من دربنا هربان

بشلحة نظر من عين العنايه

قلنا الأمل عا وجودنا جايي

ومن يومها صرنا خبر للكان

عم دوب منها ما معي تذكار

ومحتار شو بعمل معي محتار

لما زماني دقّ عا بابي

سألتو إذا رح ضل عا حسابي

أو صار بدو ينتهي المشوار

الرجفه إجت تا تزور إيديي

وما بقيت عم اقشع حواليي

شالح ورايي كومة مواضيع

وفزعان لا اني بحالي ضيع

وتنسى حياتي تبقبش عليي

ما لقيت عنواني

  

ماشي سكوتي وواقف كلامي

وقلي الفرح عا ذمة بنامي

جايي لعندك بعد خمس جماع

طعاج الدرب تا يصير فيها كواع

لعندك ما بقدر روح قوَّامي

ما في ظرف عم يمرق عليي

تا بهمتو أوقف عا إجريي

وافرش طريقو بالورد والفلّ

وقلو ما بدي ساعة البتفل

عا نهايتك تاخد حواليي

بجرِّب تا حتى ساير زماني

وما في حروف تدحرج لساني

طاير صوابي وخاطري مجروح

ولما لعندي قلت بدِّي روح

بْرَمْت الأرض ما لقيت عنواني

صارت يا ولدي حكايتي حكايه

وما عدت مني اقشع كفايه

وحسيت صار على الوهم رُكبي

ورغيت تعب صابونة الركبه

وصفيت لا رايح ولا جايي

 

نروح عا الماضي

  

وينك يا ام عيون خليني

شوفك قبل ما يحترق ديني

كرمال تا يبقى المقام رفيع

طالع عا بالي اشرح مواضيع

ما زال أمري صار يعنيني

كلمة يا أهلا مِنـْـدِفع حقا

وبالحب مش معقول اترقّى

صوب النهايه قاطع مسافات

من بعيد حاجي تشلحي بوسات

لإنسان ما بيقدر يستلقى

نحنا يا ولدي هيك ما كنا

قبل الشلح عم ينطلع منا

علينا الضعف عم يشهر سلاحو

لما هممنا تفضلو راحو

رحنا عا مدري لوين من عنا

عنك وعني طالعه اشاعه

وظرفك وظرفي الجو ما راعى

لا راضيه انتي ولا راضي

قومي تا حتى نروح عا الماضي

ونبادلو الساعه بربع ساعه

مشوار 1

  

بالحلم شوقي قبَّن قناطير

وعَّن على بالي عا بلادي طير

ولما وصلت عا ضيعتي بلبنان

صوب الدني الفيها زماني كان

حبيت إني اقدح مشواير

نقيَّت درب بتقدر توَّدي

لمطرح ما كانت فرحتي قـِّـدي

ومن بعد سحبه بقلب البساتين

شلحت النظر صوب العنب والتين

وما قدرت اقشع متل ما بدِّي

التينه الزرعتا بقلبها حرقه

من البرد صارت كلها زرقا

ومش بس انو رايحه بالعرض

مسامير إجريها عا وجه الأرض

وما في بجيبتها ربع ورقه

وهونيك شفت على كتف غبِّيط

عصافير سودا بتشبه وطاويط

وزهره عليها الريح متسطى

عا الأرض كانت عاملي غطه

ونايم عا ديها أربع جلابيط

خافو الله

  

يا عاطيين القلب تنهيدو

صفوف التفاهم بينكم عيدو

نحنا بدنيا وجودها تعبان

بشبر الأرض لو كبِّش الإنسان

كل السما بتروح من إيدو

لازم عن الممنوع نتخلى

وبالصبر والايمان نتحلى

ونشلح ورانا قلة التدبير

كتار البيقولو "كبير الله كبير"

وقلال هلي بيعرفو الله

شوفو اللي عملو المال الهم دين

وطرحو بشر تا يجمعو ملايين

نص اللي معهم فرَّقو للناس

وقالو ما بدنا جواهر والماس

لما لحقهم عا الدرب تشرين

لازم نظيفه تضل إيدينا

حتى الخلقنا يلتفت لينا

ما زال رح نرجع لمي وطين

وما زال هلي خلفنا جايين

بدهم عبكرا يدعسو علينا

بالنوم غطّينا

  

لعندي إجت ايفات مهمومه

وصارت عا فوق ركابها تومي

قلتلها ان رحنا عا هوني بر

وحياتك على المسك ما مننضر

قومي تا حتى ننقبر قومي

وهيي وأنا مشينا وحوالينا

معنا مشي تا نهنهو جرينا

وعا السكت تحت مظلة الأشجار

بالنوم غطينا بعدما طار

عقل العرق من بين إيدينا

قالت يا ملكي بحسبك ملكي

وصارت الضحكه تلحق الضحكه

ومن بعد ما نشَّف دموعو الكاس

دار الغزل واخضرت الأنفاس

وبالحال صار سكوتنا يحكي

قلتلها النجمات سهَّرتي

وليله ببريد العمر سوكرتي

ووقت العلينا طل نجم سهيل

قالت يا دلّي حالتي بالويل

لما إجت عا بالها مرتي.

دار التدفيش

 

نحنا شو نحنا بالدني نسينا

بيضل حب الذات عامينا

مننسى بانو جناحنا بلا ريش

وأوقات عم ننسى أسامينا

في ناس عنا بينسمو خرافيش

المنّو حدا صاير ابن سينا

وعملو الذكي بالمجتمع درويش

من ها البشر يا رب نجّينا

عا الأرض فينا داير التدفيش

وبدل العرق عم نشرب الكينا

"الطاووق" فلّ وضلّ النا "الشيش"

ومنو تا نكدش كدش ما فينا

طار الرواق وغاطط التشويش

وما في حدا أفراح يعدينا

وعمرين حتى نعيش ما منعيش

جينا بلا طعمه عا الدني من زمان

ومنروح منها متل ما جينا

ماشي الغلا

  

يا ها الدني رح تاكلي مسبّه

عا القلب منك رح تجي الغبِّه

هجرنا البلاد وصار هلّي صار

وخردق وجعنا لحقتو طبّه

حابب تاارجع عا الوطن مشوار

وراق الخضر والصفر عم خبّي

بس النحس حاطط بدربي حجار

وقالت همومي كيل وعبي

قرش اللي عندي كان يحكي طار

وما ضل عندو راس تا يقبّي

والآخ صارت عم تجي بلا عيار

بالرغم اني بقلها تربّي

وماشي الغلا عا دعسة الدولار

وعا العالم الويلات منصبِّه

وما في دوا يمشي على البومار

بخمسه دولار عم نشتري الحبّه

وبالسفريات السعر متل النار

وما بقول هيدا من فضل ربي

ان كان مش رح ترخص الأسعار

وتنزل عن الألف وعن الألفين

برجع على لبنان عا الدبه

ضايع بحالي

قلت لحنان الكسر ما جبرتي

وليي وجع للراس سوكرتي

مدبّر الك مقعد بقمة فاس

وانتي شغل للبال دبّرتي

ضايع بحالي وعيّروني الناس

وانتي طريق الحب غيّرتي

فارش الك بالمنطقه احساس

وغيري لطلوع الضو سهّرتي

صابر عليكي والوفا بلا قياس

وتا لبسِّك اشعار ما صبرتي

وما كنت اعرف قيمة الألماس

لوما على السيقان  شمّرتي

ومن بعدما عطينا الغزل اجناس

وقلتلها الأنفاس خدّرتي

قالت تعا تا ندق كاس بكاس

ومن وصلتي عا البيت قالت روح

لما اجت عا بالها مرتي

البسك بالحب

  

شفتك بحلمي قاعده بحيره

ودغري كبر بالحجم تقديري

ولما معك بالمرحبا تعاطيت

صارت ملو تضحك أساريري

وقرَّبت ليكي عا بنا يا ريت

خرج الأكل والشرب بتصيري

ومن بعد ما فيكي العقل وصّيت

فات الحلم عا خراج تفسيري

وشهوه قويه عا الجسد ودّيت

حسبتك الي شحمه على فطيره

ومن بعدما بإخد وعطا تماديت

نفختك تا حتى بالهوى تطيري

وقدّام عينك عا الوجع دلّيت

وصوتي اختنق عا حد تعبيري

وشكلك تا حتى غيّرو حبّيت

ولما ورايي شلحت تقصيري

نظمتك قصيده حروفها عدّيت

ولونتها بإيدين تفكيري

ومن بعدما فيكي وزن حطّيت

كنت بدِّي البسك بالحب

لوما عليي لقيتك زغيره

صندوق قازاني

 

صدفه التقيت ببنت الفلاني

بنهار متلو ما التقى تاني

وقالت الي اربع خمس مرات

منشفّ لساني وهون عنواني

ومعها رحت زهره من الزهرات

كلا حلا وبالذوق حليانه

مشروبها قالت بلا عيارات

وجابت الي صندوق "قازاني

وبلّشت شن على العرق غارات

وفقعت سكره ما لها ديانه

الخمسات صارو بدمتي سبعات

وشق اللفت لون البتنجاني

ومن بعدما شربت معي جرعات

حسّيت انو صارت ملانه

قالت الي ما بفوِّت السهرات

لكن ضروري زور اخواني

وبيجوز طوّل شي خمس ساعات

ووحدك بتضجر والدني عيانه

قلتلها روحي اعملي زيارات

ولا تفزعي عليي بغيابك هون

بعبّي الوقت بفراغ القناني

مقام الضغط

 

بعد ما الحب شبشبني بدالي

الهوى عنقود ومحصرم بدالي

تا حتى كون مقبول لفريده

دخيلك يا دني اعطيني بدالي

فريده بالفعل هيي فريده

الحلا بيقول فيها بشوف حالي

شفتا بمطلع السنة الجديده

والها ما قدرت احمل رساله

مهما تقرب بتبقى بعيده

وانا بها المرحله مشغول بالي

ظرفي عا الشقا سوكر بريدي

ومقام الضغط عم بيصير عالي

الها قلت عم تحمى الحديده

وما بعرف ليش يا زهره بخيالي

كلما جيت غنيلك قصيده

حروف الابجديه بيفركوها

وبيصير الصمت يطلع ارتجالي.

عبيت كاس

  

قاعد انا وهونيك عا شقفة حجر

وصبري فركها بعدما ضغطي انفجر

نصي فراغ وما الي فيي مكان

وبيت اللي كان بأحمد وحنا ملان

لما فضي من الناس عبّيتو ضجر

صوبي الفرج مشوار ما عاود قدح

وما قدرت لاقي جو صافي ينمدح

عم يشرب النسيان دم الذكريات

وحدِّي عرق من جنس محمود الصفات

وجهين عندو ومش عم يشوف القدح

ولما الشهيه حركتني على الهدا

وحدي قلت ما بشرب لبعد الغدا

وبالرغم انو من الفكر راح الحماس

حطيت مازه ورجعت عبيت كاس

شفت الوهم عا الدرب حسبتو حدا

حسيت فيي ها الحياة مشربكه

وانو بفقسه زر بيدور البكي

كان السكوت مسيطر عليه الزمان

ولما لعندي شرفو دنيا وحنان

جمعت الحروف وصرت حملّهم حكي

 

أهلا بالجهد الجبراني

 

تا اقعد على السكت ما بيجوز

ولو كان منو مطرحي محجوز

زمام الأمر يا عالم تولَّو

تا يصير فينا الاهتمام نعوز

بيا مية أهلا صوتكم علُّو

وعا المرحبا حطو حبق مهزوز

لعنا نجوم من الوطن طلُّو

ومنهم حسب ما خبروني الناس

شدياق ورده وجعجع وكيروز

وحلباب معهم جايب موده

واسمو بحساب المنطق الجدي

من حيث ما ساقب عا واو وزين

حبيت وحدو طلّعو برده

بشِعري شو بقدر قول عن جبران

حقو تا يعطي ما حدا قدران

سجل على التاريخ عنوانو

وبعدو الزمان بسيرتو سكران

كتيره بكل مجال الوانو

بإيدو ما خلَّى ولا قلم ضجران

قلبو الوفي تعلَّق بلبنانو

ولوحات فنو علَّقو الجدران

مليون مره بقول ضيعانو

كان السخافه يرجم بحجران

مين اللي قادر ياخد مكانو

الغلطو بحقو يطلبو الغفران

حروف الهجا اللي تجسدو لسانو

علَّوا تا صارو للقمر جيران

لنحل الفكر بالمختصر كانو

وجبه عليها توحَّم القفران

جبران اسمو الحي نيشانو

عا كل كلمه قالها سهران

متلو ما شاف الشرق بزمانو

بلسان نحنا بقول يا بشري

جبران خاطر للدني جبران

الى روح ابن عمي موريس الحاوي

أميون، عاصمة قضاء الكورة، خسرت ابنها المغترب البار موريس الحاوي، شقيق السيدة يولندا ملكي، التي تربطنا بها علاقة اخوة وصداقة، والتي تزيّن المجتمع بطلتها وابتسامتها، فإذا بها كسيرة القلب، تبلل الدموع خديها، وتحرق الآهات قلبها، حزناً على أخيها، وما من حزن أقوى من حزن الأخت على أخيها، وكلنا يعلم كيف بكت شاعرة العرب "الخنساء" أخاها حتى جفّ الدمع في مقلتيها. فإلى السيدة يولندا، وإلى عائلة الحاوي المحترمة وكل الاهل، نتقدم بأحر التعازي القلبية، راجين من المولى تعالى أن يسكنه الفردوس الالهي، وإليكم دمعة ابن عمه الشاعر عصام ملكي:

 

شو صار مني اعرفو يا حباب يا إخوان

وساعة ما بدكم تعو عا قلوبنا فوتو

موريس خي المرا ودّع حياتو الآن

والقلب دقّو قطع لما انقطع قوتو

العيله ما خلّت دمع يحكي بفرد لسان

وبالدم شعري طلب تا اكتب بيوتو

روحو عا تاني دني راحت بلا استئذان

ومنها عجيبة زمن ان تش تابوتو

يا مطالعين الخبر قولو لمين ما كان

هوي وبنومو اندعى تا يطوّل سكوتو

موريس مات وبموتو طافت الأحزان

وكتار كانو سمعت عا شوفتو يموتو

آخي دني

يا آخدي مني حواليي

مش بس مني واقع شويه

مبارح عا غفله نص عقلي طار

وما قدرت قلك بالدني شو صار

كان السكوت ملزّق عليي

سنتين صرلي بالشقا سنتين

منوين بيجيبو الفرج من وين

بنسيان عم بقبش على ذاتي

ورايح بنزله وطالع خواتي

والدرب عم تلعب على الحبلين

جيبي حنين وغيّري كوني

حظي سحبلي من الزفت لوني

همي اذا ما راح بالتدليلك

رح حط حالي بآخر الهونيك

تا يصير عني ينقبر هوني

آخي دني وطوفان تنهيدي

"ومني انا" وشو بعد بتريدي

للمرحبا عم ضل عيد صفوف

ومنشان تمي ريّحو نتوف

الأهلا صرت عم حطها بإيدي

اطلع على البال

يا ضايعه بعجقة حواليي

من كل حالي نفضت ايديي

بدرب الوحي عم يعرج التفكير

وقاعد عا سحبة قلة التدبير

وساعة خلاصي واقفه عليي

لعندي بتجي الآخات يوميه

ومغيره فصول الطبيعيه

اسمي ما بعرف بالدني شو كان

الهمه ضعيفه والوضع تعبان

وتا اطلع على البال ما فيي

عمري بسكره ضيع سنينو

ومنها بعيده يحترق دينو

وعا سيرة الاشكال والألوان

عندي بحضن الذاكره انسان

بضرب الرمل ما بينعرف مينو

همومي عا غفله مبارحه جوني

واليوم مش عم ينعرف لوني

محتار شو بعمل بقلب الكون

هونيك بدو يشيلني من هون

وهوني ما بدو روح من هوني.

 

اعطونا شعر

  

عا باب الشعر يا هلي طرقتو

وتا حتى تركّبوا بيوت انعجقتو

نحنا عا الوحي منسهر ليالي

وانتو لجونا مشاكل خلقتو

ما جبتو للشعر نكهة اصاله

بدل ما تسبقو الناس انسبقتو

هرب منكم كلام الارتجالي

مع الالهام يمكن ما اتفقتو

ببحر الشعر جبتو شغل بالي

بدل ما تسبحو بقلبو غرقتو

يا ريت بتبعدو عن ها الرساله

الشعر ما زال مشـَّـطتو وفرقتو

ما بدنا يضل عنا ضغط عالي

لأنو اخضر ويابس حرقتو

اعطونا شعر بيفيد الجوالي

عا قلة هيبة الكلمه اشتلقتو

انا بالابجديه بشوف حالي

وعا ذكري بشي زمن يمكن مرقتو

قلت عا منبر الشعر الخيالي

الحرف بالمجتمع عندو وظيفه

ولا مره بالشعر ضيَّعت وقتو.

شمر زنودو اللمس

  قاعد عا جمر الصبر والقلب احترق

بفية عريشه شلوحها بتلعب ورق

جربت بيعد بين خود وبين هات

لما شفت عنقود عامل واجبات

ومنشان افقع سكرتي بقلب الحياة

صبتو بعيني وبلش يكدو العرق

وقلت لهنا عا الهاتف لعندي تعي

يمكن بساعه واختها تنقش معي

صارت حياتي مزعجه والهم زاد

حابب عليكي بالهوى اعمل مزاد

بلكي عليي بالمزاد بتوقعي

ولما اجت قلتلها بوجهي اضحكي

وبدقيقة القلتلها كلي لكي

غنت الي أبيات بالشعر الحديث

ومنشان بيني وبينها يدور الحديث

عطيت الحرف اجرين تا يمشي الحكي

وقلتلها حبي عباده بينسما

وانتي بدون مبالغه قدرك سما

وبلشت اشرح تا صرت صفر اليدين

ولما الحكي بالشرح قصَّر مرتين

شمر زنودو اللمس عا حساب الوما.

تعي تا طالعك

 

اللي قالت ما حدا غيرك بلفـِّـي

عا منبر شعرها خشـَّـيت دفـِّـي

وعليها مرقت بالجمعه الحزينه

وصباح الخير كانت بالملفـِّـه

الها قلت ريتك تقبريني

جايي بالهوى تا عيد صفـِّـي

بعد الضهر رايح عا المدينه

وما بعرف وين بالاخر بصفـِّـي

ما بدي تحرقي ديني ويقيني

ضروري كاسك بها الظرف قفـِّـي

تعي تا طالعك ايدك اعطيني

تا حتى سطورها باللمس قفـِّـي

ولما هاجت بحور السكينه

طريقي باللمس حبيت كفـِّـي

والها قلت اصحي تقاوميني

قفـِّـي تا الطرح نضرب حسابو

بلا قفه هون مش ممكن توفـِّـي.

مني عا ذوقي

هوني انا وهونيك "الهامي"

ومش عم يجي عا البال الهامي

عا سليق قلت بعيش باستمرار

بلكي القٌلب بيصير قوّامي

وساعة ما طقسي تعرَّف على غيار

وعقصو العقارب ساعة دوامي

وعرفت الزفره بجيبتي دولار

لعندي اجت تا تكسر صيامي

ما في فرح عا الأرض يرخي بدار

بصرف ونحو تا اعرب اسامي

التقصير حاطط عا الدروب حجار

ويا ريت فيها تقوم القيامه

بعت الوقت تا اشتري دبَّار

وعا شغل بالي وصِّل سلامي

وساعة زمن ما لقيت بالايجار

تا نام فيها وابصر بنامي

محتار شو بعمل معي محتار

ما بيقعد ولا بيوقف كلامي

مني عا ذوقي وحيرتي قنطار

طالع عا بالي روح مدري لوين

وحاطط ما بعرف ليش قدامي.

الى روح اختي المرحومة فكتوريا ملكي باداكاس

 ما أصعب أن يخسر الانسان أخته، وكم بالحري لو كان هذا الانسان شاعراً بإمكانه أن يتلاعب بالكلمات ليحولها صوراً بشرية، تبكي لبكائه.

البارحة خسر الشاعر عصام ملكي أخته فكتوريا، فأحسسنا ونحن نعزيه، بثقل كلماته، بنار آهاته ودموعه، وبدقات قلبه. لقد كان موجوعاً ومتألماً وباكياً، وها هو يشعل ألمه في كل بيت من أبيات قصيدته المحزنة هذه.

لك منا مع جميع أفراد العائلة العزاء والمحبة أيها الشاعر الصديق عصام.. ورحم الله أختك وأعطاك العمر المديد.

أختي يا أختي دمعنا طوفان

عا فرقتك صرنا بجحيم الآن

وكل القرايب بالدمع قالو

مجرم عذابك قبل موتك كان

زوجك غفي ولما عليكي فاق

تا يسلم عليكي شمر زندو

وتا يقشعك حدو عندما اشتاق

ودا وراكي تا تجي لعندو

صارت العيشه بغيبتك تعتير

الآخات كومه وأخرس التفكير

ما في حدا ما ترحّم عليكي

وبول وسيمون عذابن قناطير

مني لعندك رح تروح الروح

يوم اللقا بيناتنا مطروح

عا ها الدني جينا غصب عنا

ومنعود منها غصب عنا نروح

**

My sister, my sister,

Our tears were like a flood.

We lost you, and we are in hell without you. 

All of your relatives, with tears they said,

Your suffering before death was unjust. 

Your husband was sleeping in heaven,

Dreaming of the day he would see you again. 

He raises his sleeves,

Ready to embrace you as he thanks God. 

Your husband asks for you to join him in celebration,

Because there was no happiness without you.

Living without you is miserable,

Your children- Paul and Simone can’t stop crying.

To them, life doesn’t mean anything without you.

I am at the end of my life, 

And it won’t be long until my spirit will be with you.

We came into this world without our knowledge,

And we leave the same way.