قلبت حياتي وغيّرت لوني
تخمين منّي قاعد بكوني
ومش بس اني بغربتي سايح
آخي بجرحي منيّمو ورايح
عا آخر الهونيك من هوني
ظروفي ما بدي التجي ليها
صار العما بخراج عينيها
وهلق لساني بمرحبا علـَّـق
وما زال ماشي عا الهوا هلـَّـق
لمّي الارض لا ادعس عليها
منها عا ذوقي كل ها الحاله
بنص الطريق وقعت من حالي
وعم يوقع عليك مزاد اللوم
وصوتك بيعلى بين يوم ويوم
وعم تلبسي باجرك ضغط عالي
حبّك منع تصريف اعمالي
ضروري لعندك ابعت بدالي
لا تطلبي مني الحضور لوين
المشوار صوبك ما الو اجرين
من هيك ما بيطلع على بالي
ان قلت يمكن دوب ما بغالي
صارت عدم بغيابك الحاله
حظّي حرقني بأربعه ايلول
وعاود شهر تشرين كفـّـالي
بحبك كنافه وبعبدك معمول
وبمراية عيونك شفت حالي
كلما عيوني بالحياة تجول
بقشع وراكي دعسة خيالي
بغنّي الك وبلحّن عْلى طول
وبشلح عا كتف الاخ موَّالي
وطوفان دمعي والوهم اسطول
وانتي بعيده وطيفك قبالي
اني الك طول الوقت عم قول
وصعبه من التفكير تنشالي
وانو تا نبقى بعاد مش معقول
صارت بلون الزفت احوالي
بيضلّ خطّك بالدني مشغول
وما في بريد بياخد رساله
وبيتك بيقولو بآخر المجهول
وما زال منها معبّده الطرقات
لعندك انا رح روح من بالي
انا بالارض نازل نص قامه
وبصف الحب صفرين العلامه
لانو الحظ عاملني شهيدو
وصباح الخير ما بشوف بمنامي
غرامِك ليش ما بيعطي جديدو
حرام تصير عا الارض الكرامه
انا الجبران للخاطر بريدو
تا حتى اقشعك سلمى كرامي
المضى يا ريت فينا نستعيدو
تا نرجع نلتقي بخير وسلامه
بكل مناسبه بطالع بريدو
والو بالمرحبا ببعت سلامي
ضروري وجودنا يجمع رصيدو
ما بدو واسطه ومندوب سامي
لازم بالهوى ينقام عيدو
وبساعه واختها تقوم القيامه
القلب زرِّيع عم يطلع نهيدو
وعا كتف الآخ دمعه وابتسامه
و"امامي" من الفزع قلبو بايدو
ما بقدر سيرة المشوار افتح
اذا من الدرب رح يهرب امامي
لما بغفله اندق عا بابي
حملت العصا تا اضرب حسابي
ومن قبرها خلي القيامه تقوم
بشوفة مرا بشلحلها تيابي
وبالحال قلت اليوم مش رح صوم
الزفره اجت عا البال بسبابي
وعن دينها سألت وقالتلي روم
ومتلك قلت وبرحمة شبابي
المجهول بقدر اعملو معلوم
وهوني الك رح اطعج ركابي
لكن ما قالت عا الجسد معزوم
لما قلت بالفعل جذابه
حسبت انو الحظ بدو يدوم
وإلها بيصيرو يصوفرو جيابي
ووقت اللي قالت شو حلو ومهضوم
بدقات قلبي صرت سب الدين
وقلت لأنا هالست كذابه
نحنا بعرس الشعر هنّينا
وبمأتمو الكلمات عزّينا
وكلما رمينا للحياة سلام
عم تنتلي فراغات ايدينا
بأرض الجهل لما نصبنا خيام
ضعنا وبعد ما حالنا لقينا
جبرنا الورق يمشي بصف قلام
ونسخه لشوفة حال ودّينا
تركنا النغم فوق الحرير ينام
ومش بس انو الناس لبّينا
من السطر شلنا علامة استفهام
وكسر الوزن قيراط ما عطينا
خلو الحقيقه تحاكم الاوهام
سعر الوعي بالسوق غلـّـينا
نحنا اكلنا نكهة الاحلام
لما بصحن النوم غطـّـينا
وهلق بعد ما مرقت الايام
تش النظر جوّات عينينا
وما عاد فينا نفشخ لقدام
صرنا عا اخر والمشي احلام
بالكاد انو نشحط جرينا
اعصري شفافك بكاس وقدّميلي
تا عقلي اخسر واربح جميله
عيوني ختيرو والدمع بنـِّـي
وبكتر الدلعنه منـِّـك قليله
اعرفي يا جارحه بهالظرف اني
انا جنـَّـيت ومضيّع سبيلي
وما زالك صايره متلي مسنّه
شو بدك بالشروط المستحيله
لحالك مش الي قوانين سنّي
تا اقدر بالهوى اروي غليلي
شمالي قالت على القلب حنّي
ويميني كتير رقبتها طويله
ما زالك ما لقيتي ربع أنّه
بسلوكي وبالقبل مَنّك بخيله
بربك ليش خفتي اليوم مني
لجوع النفس بدّي فرد وقعه
ما عن اطلب تا بطن تخلّفيلي
بشغل البال عا الارض افرشيلي
انا نعسان واليقظه قليله
وهاتي ذات من ذاتك لذاتي
بدون مبالغه بقصّر حياتي
اذا عا رقبتي صرتي طويله
نهار الملتقى زهّر وورّق
تا حتى اقشعك قلبي تحرّق
بدون حدود عم اقشع مليحك
الحرف بيروح بالجمله بمديحك
ولغير بنات رايح بالمفرّق
انا ان قلت بوقف عا كلامي
صارت فارقه فيكي العلامه
العواطف عا هوى الاشواق غنّو
ولعندك ما قدرت اوصل لأنّو
طريق البيت هربت من امامي
بنزول العمر عم يطلع جنوني
وانا عا الطاير بعدِّك حنونه
لقاكي للنظر متل المقوّى
وتا تبقى شوفتك بالعين جوّا
كلما ودّع بغمض عيوني
تعي تا نقول انو الهم ولّى
علينا الكيف بالصابيع دلّى
بغيرك بالدني ما بقيت شاعر
اذا ما بتحضري كرمال شاعر
دخيلك شرّفي كرمال الله
عليكي النصاحه عربشت ليكي
شكل البحبو كتير مش هيكي
بدّك محبه من قماش الذات
وكيف بدّي لبّسك شوفات
وما في نظر عم يطلع عليكي
دقيقه اوقفي مقابيل عينيكي
وشوفي شحم من شغل ايديكي
مش بس مره باغلب الاوقات
عا الدرب قالو عقارب الساعات
بصف المشي اربع خمس لغات
صارت تعلم دعست جريكي
خيالك ما ليي نفس اوميلو
واسمك من التفكير عم شيلو
من وين بدك تضعفي من وين
فارة زنودك حاشرت كيلين
وصدرك اسملله اربعه كيلو
شوقي لكي من خلقتي تسفّر
ودرب التفاهم صاير محفّر
ما في درج تا تطلعي عا البال
لحمك اذا بيكون اسمو حلال
بدي عا خبز الحاف اتزفّر
يا حلوه الفكر عا ذكرك تطرّق
تا يجبر خاطر الوضع المحرّق
ودّي للقلب كمشة ليونه
اذا شبوبيّة الدقات شبرق
انا بالحب مش وافي ديوني
لأنو بالهوى جنحي تغرّق
بجمله كتار مش عم يقبلوني
وعا دورك جيت انزل بالمفرق
بغير الضم ما تحرّك سكوني
وخيالك خلقتي بالبرد عرّق
عَلى الطرقات ما بيمشي بدوني
وببيت الشعر عا وجودي تسرّق
غرامي من بعد دور السخونه
تحت باطو عذاب الحب مرّق
ومعِك منشان ما خيّب ظنوني
زرعت بصبوص عين بكل مفرق
جايي عا الهدا بلهجه حنونه
تا قلك بعدما الالهام ورّق
يا بنت الناس رح يطلع جنوني
ما زال بتلبسي فساطين ريقي
شو بدك بالمقلّم والمعرّق
شوها الدني البتضل مش هيي
وفصولها مَنها طبيعيه
بدّي بصراحه غيّر العدّان
وخلّي الصفا يستوطن النيّه
واطرح نفور واجمع العربان
واصرف عا وقتي ورقة الميه
واعطي حقوق تساقب النسوان
ومشّي الجميع بفرد عقليه
وطعمي الفقير ولبِّس العريان
وما ربِّح الايام منيّه
وقوّي الضعيف وفتِّح العميان
وعا الختيره ادلق شبوبيّه
والطائفيه شيل من لبنان
وازرع بقلبو شتل حريه
تا يصير شوكو شقايق النعمان
وتسجّل الالوان كميه
وشيل الكفر عن شفة الانسان
واعطي الصلا اكبر أهميه
وللشعر بدّي غيّر الاوزان
وعا الابجديه زيد عشر حروف
بكرا بعدما التقي فيي
تعي يا ختيره بعكاز غنـّـي
حياتي رايحه صوب التدنّي
صرت عم شوف قدامي ورايي
وما عندي للغمز اسلوب فـنـّي
عا راحة فكر ما نسّم هوايي
ولا جاب العافيه كتر التمنّي
البدايه انوصلت بيوم النهايه
وعذاب الحب بكير امتحنّي
ما بقدر عيش كم ساعه بلايي
الركاوي فحّمو ومحروق بنـّـي
وعذابي كان كلّو من بلايي
صرفت العمر همِّز عا التأنـّـي
الفرح معدوم والويلات جايي
محطه للوجع صاير كأنـّـي
الفراغ تجنّس بعين العنايه
ولحقني الاخ مَنّي متل َمنـّـي
الارض قالت يا اهلا لمستوايي
وقلت عا الطاير بمليون عنه
يا دنيي ما شفت فيكي هنايي
متل ما غصب عنك جيت ليكي
عبكرا بروح منك غصب عني
انا يا ظالمه عايش بضيقي
وما عندي وقت اطلع من مضيقي
حياتي مزعجه بكلام جدّي
وما فيكي تعرفي وضعي الحقيقي
ولأني مرسمل بأطباع حَدّه
بنقطه واقع وقايم حريقي
وخلاصي بين شَدّه وبين مَدّه
تا صار الضفدع يقلّد نقيقي
الدني يومين وكبير التحدي
وعا دق القلب مش ممكن تفيقي
وتا اني صير مستعبد ما بدي
وما بدي يختفي عني بريقي
بخيالي كلما اوقف بهدّي
وبعين المجتمع فايش غميقي
وعا هون وهون لاحقني التردّي
وحكاية زيت طِلعت من بريقي
ما بقدر صوبِك بها الظرف عدّي
زماني نشّف ومبلوع ريقي
وماشي عا الجمر والمي حدّي
وبدها مشاكلي بالعمر تكبر
اذا ما قدرت اهرب من طريقي
حسبت بدك بالهوى تجنّي
ويعطي الحيا لخدودك الحنّه
صاير نزولي بالحياة طلوع
ودمعة عيوني لابسي بنّي
من بعد ما صار الوصل مقطوع
قلبي عليكي داب لكنّي
بوهم التلاقي بضل اكسر جوع
وجرِّب تا رجِّع للورا سنّي
لا تسمّعيني محرّم وممنوع
وعا ذوقك قوانين لا تسني
بحكم الزمن قدّامنا مشروع
لهلق بعد ما لحقتو انّه
انتي ما عندك بالوجع موضوع
ومن دون شك بتعرفي اني
مرافق مشاكل صوتهم مسموع
راسين رح اطلع انا وهني
اسبوع صرلي ناطرك اسبوع
وعا الوضع مش عم تقبلي تحنّي
الايام عوجا والسعاده قطوع
يا ريت فيكي ترقّعي الاحوال
تا كنت اعطيكي شقف مني
كبّي الغياب وخلقتك هاتي
بيضحك لنا مستقبل الآتي
وبيصير فيكي تكسري القانون
العم يمنع الحلفان بحياتي
مَنّو عا ذوقي المنطق المدهون
واحد وواحد مَنهم تلاته
الا عصامي بالدني ما بكون
وعند الجدل متل الـ "ابو كاتي"
بقلك عا لحن العود والقانون
فارشلك مسافات جوّاتي
كلما بقلبي تحرّكيلي سكون
يا بو الزلف بتصير هيهاتي
بحبك لانو مسلّح الباطون
عا دروبك وفزَّع سلاماتي
بحبك لانك من بني اللهليون
بحبك لانك ذات من ذاتي
لا تطلبي بساعه ملانه جنون
قدملك عقارب تحياتي
من هلق بقلك جنوني فنون
وعندي الهوى متل الهوا بالذات
دوقي شي مره طعمة خواتي
انا من هون رايح يا غرامي
وورايي من الغضب كومة قرامي
وخيالي بلا وعي بالجو شارد
وعا ورقه معلمه دعسة قلامي
الحراره طايفه والطقس بارد
وظروفي بين دمعه وابتسامه
وتا غيِّر موقفي ما كان وارد
بعدما صرت عا الخط الامامي
خشونة ها الدني بدها مبارد
وعا كل دروبها ضايع مقامي
اذا عا منابري ما بكون مارد
ورايي بصير اشلح اهتمامي
حكايه شو انا للناس سارد
الكرامه دين ما ببيع الكرامه
الزمان لعقربي قلّل موارد
لانو طالق بساعة دوامي
تا اوصل بالسلامه الوهم طارد
اطلبيلي اليوم اوصل بالسلامه
بعدما صار غصن العمر طارد
ما بقدر غمّض عيوني بحماكي
اذا من النوم بتقوم القيامه
ما ضل عندي للفرح مرجع
من ذكرياتي صرت اتوجّع
وهوني انا ببلاد مجهوله
قاعد عا كرسي نص مشلوله
صوب الكسر بتروح وبترجع
قايل بشعري بأول المطلع
لقمة حرارة صيف ما ببلع
صارت حياتي بالفعل تهميش
عم جرّب الصقعة تا فيها عيش
بلكي الخلق بالبرد ما بيطلع
كلما وصلت عا مصيبتي بدمع
الذكرى صرت عم حف تا تلمع
مش بس فيي استوطن الوسواس
ما كنت اعرف شو انا من الناس
واليوم فيي صرت عم اسمع
عطرك لذيذ وطعمتك نعنع
وحظي شنيع وغيبتك اشنع
يا روح روحي وعايشه بالبال
ان كان فينا نرتّب الاحوال
وبيسمح الرجال شو بيمنع
صبري فقع من خلقتو حيدي
بالسن عم تكبر تجاعيدي
وعا درب عمري كل فكري ضلّ
وان كان هيكي الحال بدو يضلّ
رح افلت عْلى الناس من ايدي
مزامير داوود النبي بقرا
وكلما خيالي يلتقي بفكره
بيطلع عا بالي غيّر مطارح
من هون يمكن روح عا مبارح
نكايه بعبكرا وببعد بكرا
الايام يمكن عا الارض جنّو
ويوم الاحد يوم الاحد منّو
وحياتك التزوير ما لو حد
متل التلاته صار يوم الحدّ
وقت اللي وقعت صبغتو عنّو
ما قدرت عنّي اعرف كفايه
بالرغم اني بنقرا قرايه
قد النتف صاير بعيني الكون
وماشي بقعودي بين هون وهون
وما بنعرف رايح ولا جايي
ماشي سكوتي بصوت صارخ بالودا
وبنزلة الاخات مش طالع صدى
وكلما يجي عا البال موسم ذكريات
بعمل عيوني زهر ودموعي ندى
ضاعت سنيني بين خود وبين هات
وساعة خلاصي ما حدا عليها اهتدى
ومن جهة الاشعار عند الواجبات
ما لقيت عندي بيت واحد ينهدى
قاعد ببيتي بين موتي والحياة
واخر زماني فضلة الماضي ارتدى
وكلما "لهنا" بالنفس شوف مقبلات
الصوره الحملها الحيط بعزم عا الغدا
ما عرفت ليش عْلى الدني الاحلام جات
وجابت مشاكل عرضها طول المدى
من العمر ساحب طعمتو السكر نبات
وقال الخبر عا الارض هيدا المبتدا
يمكن انا عامل بحقي مخالفات
ويوم النهايه بكيف رح روح ابتدا
قلّي الفرح ما بقيت عيرك التفات
ان كان بدّك تشتري وعندك فلوس
ما بين يوم ويوم ببعتلك حدا
مَرْقِت بفسحة متر المربّع
مطرح ما كان الشوق متربّع
تدعس موسيقى وخصرها تلوي
ومن كتر مَنْها ناعمه وحلوه
تطلعت فيها وما عدت اشبع
وبالشمس وقفت والبرد اضرب
خلى الدفا عا جسمها يقرب
وموج الحراره حقّق الغايه
وصارت عا عين الرايح وجايي
تسكب عرقها والهوا يشرب
ومني لحالي بلّشت اشرح
شو عم يصير واجمع واطرح
قلتلها طالع عبالي الآن
بإيد الشهيه حبحب الرمان
وراسي عا صدرك ساعتين زمان
القي اذا بيساقبو مطرح
حبيت ريقي بريقها بلّو
وقلت القلب مجروح يا دلّو
من وين قولي بيرصدو الاحوال؟
ومن وين قولي بحوش الامال؟
ومن وين قولي بجيب راحة بال؟
ووقت اللي قالت شرَّف الرجال
قلتلها من وين بيفلّو
هيهات يصفا لي الزمن هيهات
صار الهمج من شعبنا ارقى
وما في غصن من كومة الميات
عم يحمل بإيدو ربع ورقه
وفكري اللي جنّد للشعر قوّات
وشاف الدني عا دروبها مرقه
النقمه عا قلبو غصب عنّو جات
ونزلت عا عينو مويّة الزرقا
واقع بحبك والتفاهم مات
وجاب الطفر عا جيبتي حرقه
ما قدرت اكتبلك خمس كلمات
جاع الخيال ونشّف الالهام
وبدو القلم عا وقعتو ورقه
شفتك بحلمي بعين فيها خوات
وشعرك عا كتفك كان متكسر
وصرت عْلى صوبك خزّق مسافات
وصلي تا شوف الحظ متيسر
وحتى الي يتوفّرو اللذات
عزمت الحلم عا لقمة تفسّر
وعا سفرتي فرَمْت الوهم مازات
وعملت كاسي للصلح مكسر
وغنّيتك بيابو الزلف هيهات
لما عرفت انو السكت خسّر
ومن ساعة الصرتي لذاتي ذات
قلتي الي من هون مشر رح روح
وبالارض كبّش شلشك الانسر
جنّي بقلب الكون ما حسابي
جايي عبكرا يفتفت ترابي
قاعد عا نار مجمره وبردان
وما في حضور استفقَد غيابي
وما في زمان يغيّر العدان
وْكسر الوعود مطيّر صوابي
وصار الوقت اول شهر نيسان
وعقارب الساعات كذابه
وعا الذاكره تسلّط شبح نسيان
ونزول عم اطلع من تيابي
وقوافل فواتير من لبنان
ومارد طفر مستاجر جيابي
وعندي وجع بالفكر والوجدان
وبالبال سحبة وهم ارهابي
وعندي خدود بقلبها وديان
وشلحة نظر بالعين منصابه
وكلما عطش قلبي سأل انسان
وين الخمر بتشفتر خوابي
ماشي عا هامش هالدني حفيان
وعمري بدمة كم انا محسوب
دولاب عم يبرم عا اصحابي
مره لحالي كنت عم غنّي
وسكران مش عارف أنا اني
تذكرت لما رحت عا لبنان
وعا حدود بيتي بآخر البستان
لميت شقفه واقعه مني
ومن بو الزلف لما وقع هيهات
وبطلت غني صرت خبريات
مني لقيت الأرض مدووخه
وكانت خيوط الشمس منفوخه
من كتر منها آكله فيّات
وهونيك بنجاصه ملانه عماد
غصنين سرحو روسهم بولاد
واحد سجّلو بالهوى دواره
وواحد لتينه عامل زياره
وحامل عا ضهرو ست سبع ولاد
بها الذكريات العهدها ماضي
إلها تا تبقى بالفكر ماضي
ولما عرفت انو الجنون فنون
ضليت إشرب ما وقفت تا يكون
الكاس فاضي والفكر فاضي
لما عرفت ما في عرق كافي
عندي، قلت بشرب على الصافي
ودقّت "هنا" عا الهاتف الجوّال
وقالت: تعا واستفقد الاحوال
دغري مرقت تا ركلج شفافي
ومن وصلتي قلت بيجي كاسي
وصرت على فرحه حمّس حواسي
وغنيت إلها وقلت: ترمك حلّ
قالت إلي عا السكت: دخلك ضلّ
ها الصوت رجّعلي وجع راسي
الألحان قلت حقوق بعطيها
وين العرق تا شوي داويها
وقنينة القالت عا راس الرف
ما كان بدها غير ضربة كف
نقطة عرق متشلقحه فيها
ولما لقيت الحظ عندي ضعيف
قلت لشفافي بيلزمك توظيف
وبستا عا خدا وقلت: يا نوسو
قالت إلي: مش هيك بيبوسو
قلتلها: ما بقيت أعرف كيف
كل المشاكل وقتها جوني
وهيي بصراحه غيّرت لوني
وقالت: بقلك بعد يخزي العين
ان كنت بيتك عم بتعرف وين
ساعة ما بدك فل من هوني
تهنّي بعذابي يا سما تهنّي
نفسي عليي ما بقا دنّي
بيضل طافح بالهموم الكيل
عا الكون جيت وما بقى تنّي
من ميل عم انقل لتاني ميل
تا جيب راحه الضعف جنّني
الهمه عا آخر والتعاسه سيل
وما بقيت عم أعرف أنا كنّي
صاير نهاري ابن عم الليل
ويمكن جهنم صايره جنّه
والآخ عندي بعدها من جيل
العنّه الطلع عا كعبها عنّه
طلق وجودي كل شد الحيل
ومنّي بقا متل الخلق منّي
وقت اللي صارت صحتي بالويل
سألت الدني: لك ليش بدّك فل
قالت تا حتّى تنقبر عنّي
**
