سنيني عا الارض عشرات هرّو
وهجرني الكيف وهمومي استمرّو
ما بقدر اقطع تذاكر نصيبي
اذا من صرخة المربح تبرّو
يا انتي مساطرك مش عم تجيبي
لجوع النفس والصدفات فرّو
صرت عم شوف اطباعك غريبه
وراهم مشكله للعمر جرّو
لدقّ القلب مش عم تستجيبي
وعليي بعرف عيونك تغرّو
ودوايي ما قدر يعمل عجيبه
لأنو مشاكلي زواويد صرّو
بعد ما كانت مروجي خصيبه
وعناتر شعر بخيالي تدرّو
صرت شوف المراجل بالهريبه
ومن الخيرات ايامي تعرّو
انا بالفاعل مشغَّل طبيبي
لأنو بالوجع آخات قرّو
اتركيني عا السكت احمل صليبي
ما بقدر سمِّعك ردة معنى
اذا التفكير مش عارف مقرّو
يا نور عواطفي بالعقل طارو
وما عندي مين يفرشلي بجوارو
زمان محبتك عني تخلّى
نهار الاربعا وغيّر مسارو
اذا بالعاطفة قلبك تحلّى
غرامي بيرجع يتلت عيارو
لأنك نبع والاشواق ملّو
لحناني بعدما فضيت جرارو
اذا عا مذبحك ما عاد صلّى
وجودي بالدني يخرب ديارو
شدي همتك بالحب يلله
تا يرجع للتفاهم اعتبارو
عليكي باصبعو الالهام دلّى
وغرامي عا السكت طلعت خبارو
ولأنو بْلا وعي حمّص وقلّى
بدنب الليل عم يوصل نهارو
غرامك نار والواقع تجلّى
وعيوني من عدا بصابيص صارو
بلا انذار والله والف والله
عا بالي بسحبة التفكير جيتي
وجوع النفس اعلن انتشارو
يا شعّار الزجل الوان هاتو
لبيت الشعر تا يفرح بذاتو
ما بدنا نجوّعو ويحكو الجرايد
وبقلب المجتمع نقطع لهاتو
لازم نزرعو ونحصد فوايد
ونعرض للوجود مقبّلاتو
ما بدنا نموّتو بسجن الشدايد
ضروري يكون عايش انفلاتو
هجرنا بلادنا وعنّا عوايد
وكلام الجوهري منعرف صفاتو
املنا نشوف بالميدان قايد
تا معنا تنفتح سيرة نجاتو
ما بقدر كون يا رفاقي محايد
الحقيقه بقولها الهمات ماتو
تا نقدر بالوحي نجمع طرايد
وعلينا العصر يدلق التفاتو
وتا يبقى فضلنا عا الشعر زايد
وجحيم الموت نبعد عن حياتو
لازم بالوما ننظم قصايد
المعنى قال انو الابجديه
ما فيها حرف مش طالع خواتو
يا هند جايي ضبضب غراضي
مدماك ما تعمّر عا انقاضي
منك اذا ما بجيب استقلال
رح انقبر من هون عا الماضي
يمكن عا عمري سيطر الاهمال
ومش بس ما بتنطاق امراضي
من الهم عندي صار نص شوال
وزاحف عا وجه الارض عراضي
مَرْقت عليي بالدني اهوال
المجرم طلع عا منصتو قاضي
وبالرغم ما جوع القلم خيال
بأسمو ما عاود سجّل اراضي
لا تسالي عني وعن الاحوال
لساعة غنا رح جيب بعواضي
بالدفش مش عم يطلع الموال
وعا وراق بيضا للوجع ماضي
بالمال عندي كان شغل البال
واليوم مَنّي عا الوضع راضي
الكلمه بعدما تبخّرو الاموال
"يا ريت بقدر واجه المصروف"
"بجياب منو فكرها فاضي"
توفيت في داربعشتار- لبنان المرحومة تراز زوجة حنا الشالوحي، وهو ابن عمّة السيدة يولندا، زوجة الشاعر عصام ملكي. وقد رثاها الشاعر ملكي بهذه القصيدة:
ولادك "تراز" بروح مقهوره
بآخات عم بيسايرو الصوره
ولا يوم قالو الدمّ اسمو مْوي
منشان تبْكي الأبجديه شوي
دلْقو دمع بحروف مقصوره
عليكي الحزن متسَوكر جْنونو
ما في حدا ما حرّك سكونو
قالت "يولندا": خسِرتْ شوفتها
و"حنّا" اللي هوّي ابن عمّتها
نتفة دمع ما ضلّ بعيونو
ولادِك وزوجك والحَوالَيكي
يْروحو ويجو ويبوّسو دَيكي
تا يقْعدو عا السكت مش معقول
كنتي اللطيفه المخْلصه عا طول
مين الما بدّو يزْعل عليكي؟
يا إمّ رشيد الحقّ ما بُوفي
بالشعر مهما ساعَدو ظْروفي
ولادك بيقولو وكلّهم إحساس
بتاني دِني رح تلْتقي بـ "الياس"
وكلّ اللي راحو لفَوق بتشوفي
بْقدّم تعازي لكلّ "شالوحي"
ولقْرايبينك حِكْيت جروحي
بالإسم رحتي وباقيه بها الكون
ما في حَدا بيقول مَنّك هون...
مْن البال مش رح تقدْري تروحي
اوقفي يا قاطعه مسافات فيي
تا نفتح بالوما سيرة قضيه
اذا بيمشي زمانك مع زماني
الشمس بتصير تشرق من عشيه
بعد ما الفكر ضيّعني لقاني
عا مفرق درب مجهول الهويه
ما بقبل اقعد بصف الحضانه
بعد ما حفظت كل الابجديه
انا اسمي الحبيب الاولاني
وحياتي صايره هلق ما هيي
ما بقدر بالضعف ارفع كياني
اذا عا الريق باكل صيدليه
اسمحيلي قول هلق عن لساني
اذا ما منلتقي منعمل خطيه
العرق منشيل من سجن القناني
وبعد كم كاس بتصيري صبّيه
انا بالملعقه طعمتك حناني
ضروري ضحكتك تطلع وقيّه
قبل ما ننقل عْلى كون تاني
تعي تا ندوق طعمة مستوانا
اذا للحب عندك قابليه
عنك بعيد وكبرت العنه
وناطر تا حتى تسألي عني
وبعدو وجودي قاطع الانفاس
وبعدي الو آخات عم غنّي
ما في امل صلِّب بخمس حواس
ما زال انتي مخيّبه ظني
قلتي ما بدك تشربي من الكاس
وبعرف انا انو بتستمنّي
قعدو براسي الهم والوسواس
وهنّي اساس المشكله هنّي
الظاهر زماني اعلن الافلاس
وجايي خيالك بالعزا يهنّي
ما ضل عندي من كياني اساس
واني انا ما بينعرف اني
مش عم بلاقي للظروف قياس
وحب الاجا تعبان جنّني
حسّيت اني صرت عم ايباس
وما في امل يزغر كبر سني
ومن كتر ما بشلح نظر عا الناس
انتليو عيوني يا عيوني فراغ
وما بقيت عم اقشع حدا مني
ماشي ورايي وشاحط جريي
بايام برمت بوزها عليي
تا شوف هلي ما لها دبار
ورجِّع زيارة حيّها لحيّي
ومرقت عليي ست يا ستار
شافت عذابي وقالت خطيي
وصارت متل ام الحنونه تغار
وقدّامها هرهر حواليي
ولما اجاني من الهوى انذار
لطوفة دمع اجّرت عينيي
وقلتلها بأمرك وجودي صار
وحَب الشباب استفتح بديي
الها خصر ما بيلزمو زنار
بينقال عنو اخ يا بيي
وسحبة جسد بتجيب استنفار
للي بيحبو لحمة النيه
وهونيك صار التلج متل النار
ورايح وجايي جوع ايديي
ولما عملت عا جسمها مشوار
ولقيت حالي صرت بدّي ضيع
قلت لحياتي روّجي ليي
هلّي ما بقدر غير استحلي
جرة عسل وشفافها نحله
شباكها دقّيت من يومين
وما كانت الشباك تفتحلي
جرّبت سايرها بعين وزين
وما في تفاهم عين رجّحلي
وحبّيت ما اترك عليي دين
حتى يا ولدي جميل تربحلي
قلتلها ما بريدك بلونين
منوين انتي؟ قال من زحله
قلتلها ماشي على الايدين
وكفتا معك مش نافعه الزحله
جايي تا حتى حقق الحلمين
وخلّي ضمير الحب يرتحلي
وما بتقبلي تقولي خلاصي منين
وما في ظرف بالايد لولحلي
ومن بعد ما رحت عْلى آخر وين
صار اشتياقي رجوع يشرحلي
ولما رجعت عا غلاقة السنتين
قالو شو صرلك قلّنا يا "سام"
قلتلهم دقت الي الهام
وقالت تعا والدرب سلكحلي
جرّبت اسهر والوحي منشّف
والريق ناشف والوجه انشف
وجاني نعس تا يسوكر جنوني
بصبوص بدّو يغمّض عيوني
وبصبوص بدّو اتركو مكشّف
صنين كنت ودابت تلوجي
يمكن صرت للكون همروجه
عنّي ابوها ما بقا ينقال
الكلمه اللي فيها كنت شوف الحال
من دعسة الالهام مطعوجه
حاجي عا درب البال تختالي
صارت بلون الزفت احوالي
لا تسأليني منين رحت لوين
التفكير عندي ما الو اجرين
منهيك ما بيوقف شغل بالي
عنّي بعيده وجايعه شفافي
وكاسك معي بيروح عا الصافي
وكرمال انو شفتك تنمصّ
عن اعمل الفشخه بشكل مقصّ
تا قصّر فساتين المسافه
اوقفي يا عايشه فيي هنيهه
الحقيقه بالارض ضربت جريها
الهوى بالختيره لا شك عيبه
المرايه الكنت احملها بجيبي
هلق صرت عم اوقف عليها
اسمحيلي كرّ كبكوبة لساني
وقلّك ليش طلّقني زماني
غرامي وزّع عْلى الحب طيشو
ولهلق موسمي ما عرفت ايشو
طلعت زرِّيع تحت السنديانه
ما بيني وبين انا زاد التحدّي
ما بدي ها الدني وبقول بدّي
العمر سهران وبقلبي حريقه
وتا اقدر غمّض عيوني دقيقه
ما عندي راس بيساير مخدّه
شعر عا العيد ما بجبلك هديه
لانّو داعس فرامات فيي
وببحرو صار عم يندب نشافو
الوزن عا القافيه قالب شفافو
وبلا اخلاق حرف الابجديه
صبي تا نشرب كاس عا الصافي
موسم قطافك موسم قطافي
ماشي الصبر فوق الجمر حفيان
وفات البرد عا المنطق الدافي
عودان صرنا والنصح هربان
وجوع النفس عم يقطع مسافه
والنا عوافي ما عطانا الان
وانتي وانا زبونات العوافي
صار الهوى شعر والو الوان
وبالارتجالي مرهمو شافي
ببحرو المعاني علّمو الاوزان
تا يطلبو ايدين القوافي
ونحنا عا منبر والوحي طوفان
وداب القطر عا صدر الكنافه
بجمله الحرف ما بنزّلو منشان
طول الوقت يركب عَلى كتافي
بايدك زمانك حمِّلك نيشان
وفيكي مزايا اللطف منشافه
وبالحب نحنا تنيننا خوتان
معنا ما فيهم يزبطو القبلات
انما تعيّرو شفافك عَلى شفافي
يا شالحه نظراتك عليي
عم يعرقو بصابيص عينيي
وطاير صوابي وبالدني سارح
جربت صوبك امرق مبارح
لكن زمط من بين ايديي
عَنـِّـك ما بدَي الجو يبعدني
وما في ظرف بالكون يسعدني
تا شوفك بهمّز باستمرار
وصوبك ما بقدر آخد المشوار
انتي ابعتي مشوار ياخدني
بينك وبيني من الدني مسافه
وحامل ولاد الهم عا كتافي
تا اكلك عا الريق ميّت موت
وكلما اجي لعندك تا ودّي الصوت
بيفرض وجودو الصمت عا شفافي
فارط انا وهربان تجميعي
عنّي خبر للاخره ذيعي
ساعة زمن ما لقيت متل الناس
وما في عرق يتزوج عْلى الكاس
تا لفّ حولو خمس صابيعي
بشلح النظر يا ناعمه وجودي انأسر
والقلب قال بدقتو خشمو انكسر
كيف بطلاق الحرب بتزوج سلام
ومصالحه عا الارض بيكون السلام
بايدي زرعت المرحبا فرّخ نسر
كنو صحيح الشوق مدماكو انبنا
بساعة لقانا بيبرم العقرب هنا
بينك وبيني لازم نمشّي الحوار
بالليل طلّي انما عطى مجال النهار
من فرد دقره بتعرفي اني انا
حلّك عا صوبي تعملي شمة هوا
حلم اللي كنت معمّرو عليي هوى
شاعر انا والحب عندي حب ذات
وكلما ببحر الشعر زورق بالحياة
مني لحالي بوقع بقلب الهوى
مبارح عيوني طالعو رسالة وما
وشتل اشتياقي لشوفتك فيي نما
وقلتي بتجي وجاوبتك عْلى التفرجه
انكنتي بدعسه ناقصه بدك تجي
ما بتوصلي لعندي تا اوصل عا السما
يا مشغلي التفكير يا فلانه
بالراس عندي هم لبناني
ما بين هون وهون عمري ضاع
مفروض اني غيّر الاوضاع
وعا الدبق ارجع القط زماني
عليي القدر لما برم بوزو
سألت الخساره كيف بيفوزو
الحاضر عطاني كل امراضي
وما في امل تا عيش بالماضي
الماضي بري من كتر ما بعوزو
رح جن ما بيوقف شغل بالي
شلحت الجديد ولابس البالي
وجرّبت لاقي عا الطلب يومين
هاجرت من حالي عا مدري لوين
واليوم عم ارجع عَلَى حالي
ماشي ورايي وعجقتي حدي
وعندي ضجيج السكت بيودّي
اسمي عا كفي كاتبو منشان
كلما عليي يخيِّم النسيان
فيي لقايي يكون عن يدي
الوحي ختيار والفكره صبيه
وتا اقعد عا السكت ما عاد فيي
زماني بعد ما بايدو عجنني
خبزني مع حروف الابجديه
دموعي اليوم لبسو طقم بني
وتا تمشي الاخ جابو القابليه
قشط كتفي بحملة كبر سني
وما رح ارتاح الا بالمنيّه
اذا وجودك يا كحلا بيمتحنّي
عا وجه الارض ما باخد هويه
بتمي كلمة بحبك مسنّه
وما بقدر قولها بلا معلميه
بَلاَ ما تسألي معروف اني
عا راسي شك واقع بالخطيه
ومن الانات عندي الف أنّه
ولكبر الهم صاير مرجعيه
حَمَا الاوزان والكلمات كنّه
وبيوتي من القوافي مستحيه
وحياتي واقعه عا الارض مني
وما بقدر بالصبح شوفك دقيقه
اذا ما كان طالع من عشيه
الحزن عا صهوة الافراح جايي
وموج الهم عم يفقش ورايي
وبيني وبين احلامي قطيعه
لانو المستوى مش مستوايي
كتبلي الحظ ما شوف الطليعه
وصباحي بطلعتو استطعم مسايي
وعطى لنهايتي موجه سريعه
قبل ما يطلعو سنان البدايه
ومشي التفكير عا خطوط الرفيعه
لأنو مصيبتي بنت الحكايه
وخيالي تقمّص الخلقه الشنيعه
وعليي تفصّلو فصول الروايه
عما البلقلب ما بيقبض شريعه
اذا بتشيل من ايدو العصايه
يا ريت كسرت قانون الطبيعه
وما جيت على الدني الا برضايي
فظيعه مشاكلي صارت فظيعه
بحياتي ما قدرت اخد مدايي
عذاب الحب بجدال وشريعه
ما خلّى من انا الا العفاره
وبلايي صار ما بيقعد بلايي
