لولو عفاها ودخل عينيها
فيها سحر بيشدني ليها
وقت اللي وقعت عا طريق البيت
تا لمها ما لي قلب نخّيت
فزعت النظر لا يوقع عليها
ولما بالحيا وجهي تحنى
ما عاد بموقفي وجودي تهنى
تا الها بالشعر قدم هديه
من التفكير جبت الابجديه
وصرت عا حروفها ادلق معنى
وخيالي من الوحي شقفه عطيتو
تا حتى يعمر على الوزن بيتو
وتا حتى بالهوى ينسم هوايي
لعندي جيت تا اخد مدايي
وعا ذمة كم انا اقطش لقيتو
جوع النفس عا شفافي تغرى
لا اسمي بايع ولا بقيت شرا
ما بعرف ليش طلقني زماني
بحياتي عليه مش ساحب لساني
لسان الحال ساحب فرد مره
قالت هدى يوم الفرج آتي
قلتلها الغليان جوَّاتي
الانسان بيخبي بقلبو جروح
وما في حدا من ها الدني بيروح
الا ومعو سرَّين وتلاته
الأسرار كاني وبعضها ماني
ويا مصيبة اللي جعبتو ملانه
في سر حتى ينعرف ممنوع
وفي سر بيزمِّر عا مطلق كوع
تا يعرفو القاصي مع الدَّاني
وهلّي ملامه قال ما عليي
وبالمجتمع ما جويت ايديي
هيدا عا سر كبير عم بيعِّص
وان قال مش نايم عا سبعه ونص
بقللو انت كذاب وشويه
قالت وسرَّك وينها فصولو
وعندك لسان الما انعرف طولو
قلتلها بالآخ والتنهيد
سر الحملتو من زمان بعيد
كلما سكرت للناس عم قولو
لعند القلت دخيلن عينيها
رايح تا ابقى رهن ايديها
ولما الدقايق ما بقو هني
عا الدرب وقعت ساعتي مني
وصارو العقارب يبرمو عليها
من وصتلي قالت عن القرميد
لو مت صفك بالهوى ما بعيد
قلتلها من جديد مش رح موت
اسمك عا قلبي بشهوتي منحوت
وميت عليكي من زمان بعيد
تذكر قالتلي عا الهدا تذكر
بعلمي قلت رح توصل مبكر
ولما ضميري ظروفها راعى
وعرفت شو هيي قصة الساعه
قالت تعا عا ذوقنا نسكر
ودار الشرب بنهار الفلاني
وانتليت فراغ الدملجانه
وما عاد نرضى بكاس وبكاسين
وها السكرة الكانت بنت كلبين
عْلَيها بيضل يهبهب زماني
الهام فيكي لقيت الهامي
دخلك عا سبعه ونص لا تنامي
ودى ورايي عالم المجهول
ورايح بنزله والوهم بيقول
طلعة خلق رح شوف قدّامي
بشلح النظر عم لبِّك عيوني
وبالعمر عما يكبرو ديوني
ضايع ما بين الكفر والايمان
وعا دروب نسيو خلقة الانسان
رايح انا عالوين من دوني
وبالرغم اني قريتك قرايه
ومنِّك ما بقدر اشبع كفايه
مش بس ريقي عا الحلا بيشط
بيطير عقلي وعا الدبق بيغط
كلما تجي عا البال انتايه
روحي لأنو بجِّن مسكونه
ما في ضمير يحرِّك سكوني
تا كون غيري صعب اني كون
هلِّي بيقولو بالجنون فنون
بقلُّن ما عندي فنون بجنوني
سكران وبيشهد حواليي
وشلح النظر عم يبرم عليي
ما ضل عندي للحديث كلام
وكلما حدا يرمي عليي سلام
عم جاوبو بتهويت ايديي
مش بس ما بيوقاف تهميزي
حامل عصا من سلالة ركيزه
جريي ورايي وحامل العرقات
تعبو وما قدرو يسايرو الطرقات
بصباط ما بيحكي انكليزي
ومرقت "هدى" الما بتقعد بلايي
ومني عند ما شافت كفايه
قالت اسملله مية مره عليك
شو باك عم بتروح هيك وهيك
مش منعرف رايح ولا جايي
قلتلها يا نور عينيي...
جيبي حياتي وروجي ليي
فشخة ورا عم تطلع لقدام
حابب عا سبعه ونص اني نام
وعبي نعس بفراغ عينيي
عصري انعصر وبعيد تحليلو
ضيع ابانا بقلب انجيلو
ومش طالعه فصولو طبيعيه
وبدو انا وسكران صليلو
ماشي عا جمر بارض بريه
وآخي عا شقفة جو تسجيلو
وعم تمرق النسمات مغليه
وبحر الشعر طلق اساطيلو
وكان العرق شعلان كميه
وبالنفخ مش عم ينطفي فتيلو
وعا كعب شجره تحشرت فيي
حبيت قيِّل تا التعب شيلو
ولما الهوا "الفو" انلوق ليي
صار اشتياقي يربح جميلو
وما عادت الاحلام عاديه
وصرت الصبا مراسيل ودِّيلو
وهزيت جسم بيوت شعريه
الها وزن بيحاشر الكيلو
ودخلك تعي قلت بشفافيه
ولما خيالك شرف على البال
شلحت السكت وبلشت غنيلو
لولو امرقي عا خاطري مرقه
عيني اليمين بدمعها غرقى
ما قدرت فيها هون اقشع وين
ولما شلحت نظره بتاني عين
نزلت عليها موية الزرقا
وقعت بهواكي وكنت متوقع
انو الوحي ما يطلع مصقع
وبين الي بحكم النحو والصرف
الكلمه اذا وقفتها عا الحرف
وصوتي طلع عا راسها بتوقع
ورغم الجهد هل ما الو تاني
راحه من الحلقوم ما جاني
مش بس صبري موقعو دشر
بورقه القلم ما كان يتحشر
تا ركلجو عا تدحرج لساني
منو الي مستقبل الاتي
حتى الو قدم تحياتي
وجودي بورقة تين متستر
باقي الي يومين مش اكتر
ما بينزلو ولا بيطلعو تلاته
اتركيني يا هدى الايام داعي
عليي يمكن الابداع داعي
لساني دحرج الكلمه البليده
ولسان الحال صاير اصطناعي
ببحر الشعر ما مخرت قصيده
العواصف خزَّقو هيبة شراعي
وبوجهي واقفه السفره البعيده
وعقارب ما التقى بساعة وداعي
ولأنو الدم نشَّف من وريدي
عَلَى المجهول صاير اندفاعي
وعليي تكوَّمو مشاكل عديده
وشو اسمي بدمتي ما بقيت واعي
مع الآخات عم يمشي نهيدي
وتا يمشي عا الورق شفتر يراعي
ما بقدر الحق الموضه الجديده
بقصر الباع زايد اقتناعي
ما عندي مقدره تكسر جليدي
والي شهرين عم جد المساعي
وتا انظم شعر ما بيطلع بإيدي
الوحي الما كان عم يوقف دقيقه
قاعد عا الضمان الاجتماعي
ناسي يا لولو حضرتي ناسي
وبالبقبشه اعلنت إفلاسي
طيرت عقلي من سنه وشهرين
يا ريت عندي جمجمه بايدين
تا كنت حمّلها وجع راسي
الهمه ما عِرْفت وين مطرحها
التقصير مدري ليش شرشحها
النظره البعيني ما لها مطرح
منشان فيها اجمع واطرح
طول الوقت عا الناس بشلحها
بشوفك انا كل يوم ببنامي
ومش عم يجي تفسير احلامي
هلق صرت من دون طعمه ولون
ومن كتر ما بضيِّع بوين وهون
ما قدرت امشي نهار قدَّامي
فوتي عا قلبي متل هل جوني
وعملو عجيبه وغيَّرو كوني
بوجهك أنا ما بعمِّر مداميك
لعندي تعي قبلك اجا هونيك
وعبَّى طلب تا يروح من هوني
يا دعد لازم بعضنا نطرح
الله الوكيل عذابنا مبرح
نحنا بنهايه ما لها دبار
بيجوز فينا رايحه عا النار
حد الخلقنا ما لنا مطرح
بير الدني والنقش مش طره
ومش كل مره بتسلم الجره
قولي لهلي لا صدى ولا صوت
ما زال جايي عا الطريق الموت
كونو اوادم شي فرد مره
وهلي متاعب منهم حملنا
والهم عجايب تحرز عملنا
راحو بعد ما قدسو الدولار
وببدال ما يقولو معن شو صار
كرت المنيه بيبعتو النا
نحنا ما نحنا قالت فلانه
القاصي عرف وبيعرف الداني
انو الوجع بالراس كميات
في ناس عما تاكل مسبّات
وللمرحبا في ناس جوعانه
مبارح اجت عا البال الهامي
لما كنت عم عدّ ايامي
وزعلت لأني بالوجع ملفوف
والآخ نشله والضجر قامه
قلتلها من الهم عندي رفوف
وناطر شي مرفع يكسر صيامي
النزله قويه وما معي مصروف
وصعبه تا ادعس رقبة فرامي
سالت السما تعمل معي معروف
وتبعت لعندك ريحة سلامي
عندي ما عادو تجمهرو الحروف
والسكت عم يوقف على كلامي
وحق السما تا اقشعك ملهوف
وعم فرق ملبس على قضامي
منشان عدلك بالمحبه صفوف
لكن ما فيها تقوم القيامه
ومش بس انو جانحي منتوف
وما بقيت اقدر احفظ اسامي
وتا تعرفي قديش بقدر شوف
نجوم الضهر شفتن باخر هون
لما وقعت هونيك قدامي
ي
لولو الي شحمه على فطيره
الها قلت بجوانحي طيري
قالت تا جبلا حلمها المسروق
وكل يوم جبلا طعمتي تا تدوق
ووقت اللي عرفت نازل على السوق
قالت الي تا جبلها سيره
وحنه قريبه كتير وبعيدي
بتفكيرها وبتقول يا سيدي
المش عال مش عم تعرفو من العال
عليها بحلمي ما قدرت اوصال
ولما قالتلي مرحبا يا خال
وقعت بهواها وكسرت ايدي
ودنيا بشرعي حلم ما تفسر
معها ما بقدر يوم اتيسر
وبالحب قيمتها ما بقدر قيم
بتاكل حقوقي وعاملي ريجيم
وبتقول انو وزن عم تخسر
والهام متلا الناس ما شافو
موسم حلاها بيحرز قطافو
قالت بغنجه زايده يا سام
ايدك عن الفستان يلله قوام
قلتلها الفستان يا الهام
شلح النظر عم يلقطو بزافو
قلت لهنا اني ابن امي
شقفة جبل وبدمتي مهمه
ومن تمها لما وصللي غب
قلتلها هيكي بيكون الحب
من ها الدني شقاقيف لا تلمي
بأول لقا ما حسبتها ملكي
قصة حياتي ما قدرت احكي
والها بعدما قلت يخزي العين
مش بس عم شيل الحكي وجهين
بمشِّي النظر عا دعسة الضحكه
قلتلها وحق المار تمورا
بزرع فرح بقلوب مقهوره
ولما لقتني بفيَّق الأموات
قالت الي عم يعرجو النسمات
تنشق هوا بحروف مقصوره
وبالشوب منها ساعة العركه
كان العرق منشال بالكركه
ضربت المتل الها بخود وهات
ومن حيث اني جمعتها بالذات
كلما التقينا بطرح البركه.
يا قاعدة رايح من الهونيك
غيابك دبحني وقايم التلبيك
مش عم بلاقي ساعتين ملاح
عنّ على بالي من الشقا ارتاح
قلي الوجع بالراس ما بخليك
بالذكريات العا الهدا جوني
جيتي عا بالي مبارحه بمونه
ولما لقيت بحاضري التعتير
الماضي ربطتو بسحبة التفكير
تا شد فيه ورجعو لهوني
وتا تعرفي اكتر يا عينيي
بقلِّة مروِّه تفسدو جريي
صاير كاني مقطع وموصول
ودرب اللي راحت بالعرض والطول
مش عم بترجع اقصر شويه
عا ذوقنا تا نعيش مش مسموح
وما في دوا للخاطر المجروح
وما في سنه بيندق الها جراس
وبها الدني بيضل الها راس
بنهار واحد راسها بيروح
لمي وجودي من الارض لمي
كلما شلحت بوسات بتزمِّي
قلبي لكي صرلو زمن مفتوح
فوتي عا قلبو ودقتو ضمي
لما عرفت صار الصدى مبحوح
شطبت على فاس وراحت القمه
وما عدت غني عا المضى عم نوح
وهمي صرت عم اشربو بكمي
بزهرة شبابي العطر كان يفوح
وقلك عليي حوّلي وشمي
بلكي الامل بالملتقى بيلوح
وبيصير فيكي تعملي همه
من ها الدني طالع عا بالي روح
واخد معي الوجدان والدمه
ضاع الوقت بين الجسد والروح
وعقرب مصيري عقصتو مسمه
قلت لانا انو السكر مطروح
وليي ما عادت صحتي مهمه
ومش بس انو خاطري مجروح
عم ابعت مراسيل للآخات
تا يحضرو كلما فتحت تمي.
قاعد بنص الليل عم اقرا
عنوان مكتوب بسفر ذكرى
ودقت "هنا" وقالت الي بصراخ
وينك؟ قلت حاطط بتمي الآخ
وعم ركلج لساني لبعد بكرا
وكان الحرف عا طلعة الرده
مغمض عيونو والضجر قدي
وبالفكر كان مقيَّل الموّال
وبنت المعنى الشاغلتلي البال
قالت الي عا البيت ما بعدِّي
وطلّ الصباح بوقتها عليي
وكانو بلون الدم عينيي
وكاسي بايدي وعا الظرف سهران
ومنشان ما اوقع انا وسكران
حطيت حالي بين ايديي
ولما نهاري صرت غنيلو
وسعر القعد عا السكت غليلو
طارو بدون جوانح العرقات
شافو عتم واقف على الطرقات
وجايي الشمس من دربها تشيلو.
راحت "هنا" والحب ما توفر
قالت شبابي من الدني تسفر
للعشق كنت مطلَّع قوانين
وكنت اتزفر على الحلوين
وهلق عا مين ما كان بتزفر
و"لولو" ما طلعت للهوى وجبه
بوقت الغزل عم شوفها خشبه
عليي ماعاود ضغطها مقبول
سنان الحليب سنانها بتقول
وعمرين الها لابسي وجبه
و"حنه" اللي مش مفعولها ساري
بتحب انو تخرب دياري
صار البطاطا عندها كوسى
وبتقول انو صدرها موسى
ومعروف انو صدرها عياري
و"دنيا" اللي جاها من الضعف قوه
ما ضل فيها نتفة مروه
من المستحيل تكون مي وطين
جريها حديد وايدها جفصين
ويمكن قفاها يكون مش هوِّي.
يا دعد حتى الحب يرويكي
ومن شغل بالي شعر اهديكي
وتفسري شقفة حلم مسروق
سكرتي وعليكي فاق ماضيكي
ولما اتصلتي بالحكي الملووق
تا يركلج مبارح لياليكي
قلتي ما زال لشوفتي محروق
ما بقيت رح عمّر مداميكي
وينك يا قلبي؟ قلت صالي دبوق
"بميفوق" بدك دبق بعطيكي
وقلتي الي هلق انا "بالزوق"
عندك بكون بفرد تحريكه
ومن ساعة الجيتي على "ميفوق"
صرت السما بالبيت فرجيكي
ومن كتر ما فيكي كنت معجوق
كلمة يا اهلا وقعت على الارض
وضلت بتمي معلقه فيكي.
لمين بدي عن انا اشرح
ماعاد فيي بشوفتي افرح
دقات قلبي رح يصيرو جراس
وهلق همومي تجنسو بالراس
وما ضل عندي للوعي مطرح
عمري بجمر العاطفه حرقتو
وحط القدر عا الحل مطرقتو
من كتر مني من الوضع ضجران
تا عد حالي مدودخ وسكران
دلقت الوهم بالكاس وشربتو
مشوار يمكن راحت الذكرى
وما ضل عندي لراحتي فكره
صبر السما صاير قليل العرض
يمكن عبكرا ما يجي عا الارض
وتحط ببدالو بعد بكرا
وحضرة هدى بتضل زعلانه
بالحقد يمكن صارت ملانه
معها الشمس عم تشرق من الغرب
شلحت النظر الها عا نص الدرب
دعسو الشحن بنهار الفلاني.
يا بارمه بالقلب دولابي
نظره اشلحي عا كومة عذابي
كتابي كتبتو عا الشقا بسطرين
وبكرا الوجع بيوقـِّـع كتابي
منوين بيجيبو الهنا منوين
ووين الدوا لهياج اعصابي
صعبه بحجر تا صيب عصفورين
ولاقي ظروف تغيَّر تيابي
بالحب اخد صفر عا ميتين
وبيشهدولي كل احبابي
حامل عصاتي من سنه وشهرين
وعم تنسمع صوفيرة جيابي
ما في امل تا اخلص من الدين
عم يكبر المصروف بغيابي
وتا الخمر اتجنب بعين وزين
عم اشرب الكاسات جنابي
وهلق الي تخمين اسبوعين
او اكتر شويه عَلَى حسابي
لاحق انا ورايح عا مدري لوين
وكلما ورايي روِّج على الدرب
عم اوقع ويتفجمو ركابي.
وقت اللي صارو سوالفي يشيبو
جرحي هرب من درب تقطيبو
وراحت هدى عالوين من يومين
وحابب لعندي حضورها جيبو
وهلي كنت عا سلوكها راضي
وكلما التقينا تقول اهلا فيك
سافرت بالتفكير عا الماضي
تا شوف كنو بعدها هونيك
ولما وصلت مطرح ما حبي كان
قلت الأبانا وطعجت ركابي
وراح الصدى تا يسأل الوديان
فوق الأرض شو صار بغيابي
ومطرح ما حالو سجل التاريخ
عا حيط موال الفقر غنى
فساويخ عم تحكي مع فساويخ
وتسأل سنين الماضيه عنّا
وبرواز راح وما ترك عنوان
وصوره بقلبو حملت ندوره
وصارت الذكرى تسأل النسيان
عن رحلة البرواز والصوره
وباب اللي كان يهزّ خصرو كتير
ومفصلاتو مش الو كانو
عندو قفل متقمص التعتير
طول الوقت بيعض عا لسانو
ولما شلحت نظره على الشباك
وجربت هزو هرهر بكفي
بالشعر قلتلو انا وياك
بليله وضحاها تراب منصفي
وللشعر لما صرت جيب حروف
تقدر تفسّر للهوى حلمي
صار البحر بالاهتمام يطوف
ورغيت مواجو للسمع كلمه
ولما بصوتي خفت النبره
وشفت النهايه مطرح اللي بديت
اسمي كتبت هونيك عا الغبره
تا قول اني لعند حالي جيت.
يا دعد شو عم تعملي فيي
صارت دموع العين بنيه
نظراتك بلا شك دليله
الظاهر بغيري اليوم ملهيه
نتفة عقل بالراس خليلي
ماعادت فصولي ربيعيه
اعطيني وعد بربحلك جميله
وبقول رجعت متل ما هيي
ودخلك شو صاير بالدني احكيلي
بربح الك ميتين منيه
باسم الهوى موال غنيلي
وكوني معي مره طبيعيه
ولما حضورك قلت جيبيلي
وصلت لعندي الحد صبحيه
وقلتلها الآخات شيليلي
من الراس صرت بربع عقليه
قالت بحبك ما الي حيله
وعلامتك ميه على ميه
الدفتر جبت قلتلها امضيلي
بالـقٌـلب كتبت اسمها منشان
تا تقول منها ماضيه ليي
قاعد عا جمر وخاطري مجروح
وحاطط عا ضهر الآخ تنهيده
بلمح البصر بيجوز روحي تروح
ومنها بعيده روح من ايدي
ما قدرت احكي مع زمن هربان
ولاقي من التفكير فتفوته
نفخو القوافي وطيرو الأوزان
وماشي الوما عا دعسة سكوتي
لساني ما بقدر بالصمت ضبو
عليي بيصيرو مواقفي يسبّو
حابب تا اكتب للزمن عنوان
وراح الوحي عا عالم النسيان
وما في حرف عم يضحك بعبو
الاحلام صارو من بني الاوهام
منهم ا بقدر اشتري بضاعه
ومن كتر منها مروجي الايام
عم يمرق الشهر بربع ساعه
مني ما بقدر آخد استقلال
ليِّن مزاجي والدهر قاسي
من كتر ما عندي وجع بالبال
ما بقيت عم حسّ بوجع راسي.
عا البحر كانت نورما هلِّي
بجو المحبه بعدها فراشه
وقربت ليها عا الهدا علِّي
بعمل حلاها فيلم عا الشاشه
ومن فرد بسمه حصت بمحلِّي
وصار الدمع عا خلقتي ماشي
قالت عيونك شو بهم قلِّي
قلتلها ضهرن إجا يا ست
لما لقيتك لابسي ماشي
بطوفة عبير الورد عا الزنبق
هب الهوا وعا ريحتو لزّق
وتاني هوى تحشر بورد الخال
وقلا القلب بالعاطفه تخزّق
وقال الوحي للشعر كيف الحال
لما الوزن بالقافيه تعنزق
وحرف الهجا بالفكر جال وصال
والصمت صار بخلقتو مبرزق
وطلو صبايا لابسين العال
والدرب فيهم لبست مزوزق
وعصام ملكي بدق قلبو قال
مليون مره يسلمو الحلوين
وهوَّت بايدو والوما تحوزق.
رايح لعند الشفت ببنامي
بساعة سكر ومقصر وحامي
ومش بس اني من انا هريت
ما قدرت اقشع وين درب البيت
وبالبقبشه ما لقيت قدامي
الحاضر شلحتو وشاحط الماضي
وعا وراق بيضا للوجع ماضي
وعا وزن صرخة آخ يا امي
كان المشي زيكزاك عا الدمه
ومليان راسي والقدح فاضي
ومرقت حقيقه وقربت ليها
بلهفه تا اقرا كفوف ايديها
ولما لظروفي جيت اعمل عرض
ساعة وصولي كانت على الارض
ومارق زمان وداعس عليها
وصرت بخيالي اجمع واطرح
تا شوف كنو بالوهم بفرح
ولما وصلت عا مطرح الهيي
جنـَّـيت فيها قد ما فيي
وما قدرت لاقي للهوى مطرح
يا عايشه فيي بضرب من الخوات
وفيكي المديح تقمص تياب الهجو
كلما عليكي يمَّرقوني التجربات
بجِّرب تا فيكي اهتمامي عالجو
صار الفرح ينعد عنا مصادفات
ومواقفو ما عاد معنا تبرمجو
ما جرب يجيب لعطشنا مرطبات
وكان بنهار الاسود يبيض وجو
شوهاالدني الفيها ما شفنا مقبَّلات
وفيها اللي عما يدرسو ما تخرَّجو
عم يكترو العملو عليها مخالفات
وما استفتحو بنطره العليها تفرَّجو
بعد البحث والشرح عرنا التفات
عا عواطف العنا بحراره تلَّجو
وقلنا زمننا قايم على الحب ذات
واللب عما ناكل ونرمي العجو
عشنا عا ارض مطعمه سكر نبات
فيها الحلا ولا يوم غيَّر منهجو
كل اللي راحو من الحياة على الممات
عبُّو طلب تا يرجعو عليها يجو.
توفي في سيدني الشاعر المهجري المخضرم ميلاد الطحان بعد رحلة طويلة مع الألم، وها نحن في "الغربة" ننشر الفيديو الذي كرمناه به تحت عنوان عظيم من بلادي، ونطلب لنفسه الراحة ولعائلته الصبر والسلوان. رحمك الله يا صديقنا العزيز.
VIDEO
وقد رثاه صديقه الشاعر عصام ملكي بهذه القصيدة النابعة من القلب:
ميلاد ألله يرحمك حبّوب
قلوب الأهالي عليك عم بتدوب
جنانيز بكرا بتطلع الأعياد
صار الصبر إسمو صبر ميلاد
عا الآخ قدك ما صبر ايوب
عنك ما بقدر غير ما إشرح
عندك بقلبي من زمن مطرح
كنا بفرد جوقه أنا ويّاك
"يعقوب حنا" عبقري سماك
ومهضوم كنت كتير عا المسرح
طوفة بَلا شفت بزغر سنك
ورغم العذاب الكان لكنك
عا حالك ولا يوم مره حزنت
خي وصديق لكل شاعر كنت
واحساس كنا ننعدي منك
معلوم إنو جبلتك إيمان
ولا شك إنك للصدق عنوان
بتقول مرتك منقطع حيلي
وبالدمع قالت آخ يا ويلي
بقدّم تعازي القلب للعيله
ولقرايبنك والوطن لبنان
حب الوطن ما في الو تاني
هيكي قلت بتدحرج لساني
وحبي عباده بالفعل محسوب
وصارو غمر وشوي احزاني
ما قدرت لاقي بالحياة قلوب
تشهق الي عا دروب وجداني
وكلما شفافي تجسّدو المشروب
بيمشي الفراغ بقلب القناني
حظي ما قشّر من صبر ايوب
وكيف الفرح بيكون نسّاني
ما قدرت لاقي للفرح اسلوب
وما ساعد القاصي ولا الداني
رح دوب من كتر القهر رح دوب
بيجوز مَنو بها الدني زماني
مش بس عا امري صرت مغلوب
صارت عليي دمعتي عيانه
الايام سودا والفكر متعوب
ومِنّي خبر لليوم ما جاني
لا تلومني يا موطني المحبوب
عم كيّل مسبّات للشيطان
ومش عارف الشيطان لبناني
كل يوم بقلب بالهوى قلبه
ما بحب وحده معلق بجلبه
وعندي «السعاده» آخدي صفرين
صرلي سنه ما شفت هالكلبه
بحب اللي فيها تجمع الضدين
وعند الطلب بتشوفني شلبي
وبحب هلّي عندها لونين
وطول الوقت ايجابها سلبي
وبحب هل بتقول ما لي عين
وبتصير هيي للرقص حلبه
وبحب هل بتكون قد تنين
وما في حدا بيهزها صلبه
وبحب هلّي ما لها دينين
وما بتسمع وبتكتّر الغلبه
وبحب هلّي بتمها سنين
وبحب هل بتكون مَلها سنان
والدم ريتو يحب عن قلبي
اليوم الوحي هبطت مداميكو
وبيت الشعر سكّر شبابيكو
ما قدرت غنّي بزحمة الاشواق
تقمّص كلامي سكوت ما بينطاق
وصار الوما يلدغ بتحريكو
البسمه عا تمّي والدمع سارح
وصار الكلام الجوهري جارح
عارف عبكرا بتنضج الفكره
وكيف بدّي هيّص لبكرا
وبعدو بفكري مقيّل مبارح
شموخي بعدما تكلّخو عمادو
جرّبت ودّي الهَمّ عا بلادو
لا سنان عندي ولا بقا لي ضراس
وعا قول آخاتي الوجع بالراس
يوم الفلاني عيد ميلادو
ان غبت عنّي بصير اتوجّع
وتا انقل من الذات متشجّع
طالع عا بالي ضبّ حالي وروح
وبكرا بعد ما تروح منّي الروح
حالف يمين لهون ما برجع
بيت الهجرتو بآخ طوّقتو
لما عطاني شوَّي من وقتو
ومن سهلتو لما السقف ما قام
نيّمت تصليحو عا ريش نعام
وحيط الغفي عا الارض فيّقتو
وعا الطحلب البرّا مرقت مرقه
من البرد كانت خلقتو زرقه
ونجاصة الكانت الي موّال
تا تشتري من الطقس راحة بال
بالريح عم تصرف ربع ورقه
وشلح العريشه الما عطى فيّه
بفصل الشتي ما استفتح بميي
وبالتينة العنها النحل ممنوع
الدبور جرّب يعقص الفقوع
تا يشوف كنّو بينصح شويه
وهلي بحيي كانت تحيي
راحت عا غير بلاد مش حيه
وهلق لأنّي صرت بالسبعين
عليي ما عادو يمرقو الحلوين
بس الكذب عم يمرق عليي
يا ابجديه منطفي المطلع
بيت الشعر بالجمر ما بيولع
ان كان بدو يعلن الافلاس
قماش الخيال بحرقتي بملع
بدّي فنوني تنوّع الاجناس
ويبقى وجودي للوحي مقلع
وبدّي لبيت الشعر شوف اساس
واقشع عجينو من الشَعِر اصلع
وبدّي عاراسي ما يجي الوسواس
وشجرة حياتي الريح ما تقلع
وبدّي شموخي يطلع بلا قياس
ويكون صوتي بالفضا ملعلع
وبدّي بايدي يكون صافي الكاس
واقشع عهد عن خصلتو اقلع
وبدّي لزماني كون بو النواس
ولعوِس الخمره قبل ما ابلع
وبالصخر بدّي يموِّج الاحساس
وبدّي تياب الختيره اقلع
وبدّي بلاد مفرّغه من الناس
وبدّي درب ما يكون فيها نزول
وبدّي دني عا بالها اطلع
