فرد رده

دقت هنا وقلتلها انّو

جروحي من الهجران بيعنّو

مشوار قالت يا عصام عمال

قلتلها عندي شغل بالبال

بشهرين مش رح انتهي منّو

اكتر ما بدّو الحب مشتقلِك

وانتي عا عقلِك ما انزرع حقلِك

بيناتنا صار الحديث عياط

وما ضل من عقلي ربع قيراط

وبالعمر عم يزغر كُبِر عقلِك

قالت قصيده مدوزنه بدّي

رده ما بدِّي بمنطق الجدِّي

وقت الغزل قلت الكلام بلاش

الناثر بيحمل مدفع الرشاش

والشاعر بيحمل فرد ردّه

وجرَّبت غنِّي متل ما غنُّو

من زمان هلي بحبها جنّو

ما قدرت لاقي للغزل معبور

قال الحرف طالع عا بالو يدور

بالبيت ما بيقعد غصب عنو.