امي ما فيكي تطلعي منـّـا
منبقى بوجهك وين ما كنـّـا
مش ممكن تموتي يا ام وبي
بالفكر رح يبقى خيالِك حي
وروحك ما فيها تروح ما عنـّـا
يا عين شنـّـي بالبكي غاره
وخلي الدمع للرمش اسواره
ساره الزغيره بآخر الستين
راحت وبكيت دم بشمزين
واليوم راحت أمنا ساره
لساني برقبة كلمتي معلـّـق
وحرف الهجا عا القافيه تخلـّق
أوقات عم يطلع حديثي صراخ
الجمعه نقلنا من الفرح عا الآخ
وامي عا ركوود ناقله هلق
وانتو يا هلـّـي بعدّكم اخوان
وواحد منبقى بأغلب الأحيان
بلسان نحنا حضوركم ممنون
انشلله فدا عنكم وعنا تكون
وايامكم تبقى بلا أحزان
وانتو اللي معكم أكبر مهمّه
تا تدفنوها وكلكم همّه
شوقي لامي ما قدرت اخفيه
صدري احفرو وحطو جسدها فيه
لا تطمرولي بالأرض امي
0 comments:
إرسال تعليق