عصفور وخيالو

بالحلم لما سمعتهم قالو

لبنان بدها تروق احوالو
ودّيت حالي بسحبة التفكير
عا بيتنا المهجور بشمالو

وهونيك مع وجه الصبح بكير
بسهول فيها شمخة جبالو
لقيت الجمال مفتقو التقصير
وخيط الشمس عم يلقط ديالو

وشفت الفقير بعدسة التصوير
وشفت البكي والمنشغل بالو
وشفت الهموم مقبّنه قناطير
وصرخة قلب لبنان عا رجالو

وبالكرم شفت المحل والتعتير
الصياد صرّف كل اعمالو
بيدفش بحظو والمجال كبير
والطير ما بيوقع عا اشكالو

الفرّي انقطع بمواسم التدمير
ولف الحجل بالسكت موالو
والتينة الكانت دني عصافير
صفرن ورقها وفضيت الاغصان
كل شي بقي عصفور وخيالو