بحر "الملاحم" والدبح أسطول
السوق انضرَب بمْقوَّر ومحشي
يمكن مسيح الشعر عم بيقول:
كلّ البيكون مكرسَح بيمشي
زُمّوا المعاني وتخّنو العنوان
لازم يكون الشعر حزّورَه
تا يصير كلما يفصِّل الإنسان
يحمِل معو للشرح مازوره
"اعطوني جبَل تا إنفخو عصفور"
"ونتِّف رياشو وإعملو الله"
شو هالوحي؟ شو هالحَكي المأجور؟
وعا أيش يخزي العين واسمالله؟
وحياة عينيكم يا عينيّي
كلمن بعقلو بينزرع حقلو
هيدا شِعر من شَعر وشويِّه
بَدّو فرِق عالنصّ يلبقلو.
بدنا شعر متعمَّد بإيمان
وأوزان يوم العاصفِه يهَدّو
شبعنا من الأشكال والألوان
قولو الأبانا وعالبحر ودّو.
