يا شاعر الكنـّـا بعيونك عم نشوف
تا بكل ردة شعر يتجسّد وعي
قلك وجودك أنت وحدك فيلسوف
ونهج البلاغه عا صدى صوتك وعي
وقت اللي قالو رحت من بين الصفوف
بدمعي قلت يا روح عا جسمو ارجعي
وجرّبت اكتب كلمتي بكيو الحروف
وقال الورق للحبر لا تحكي معي
بأيّا قلب يا عقل ما عندك مكان
من الذاكره ممنوع اسمك ينمحي
انت بزماني ما كنت كنت الزمان
وغير على زندك ما ربي طفل الوحي
الله وكيلك كان قلبك اقحوان
وتلج العلى صنين منـّـك يستحي
وكنا سوى للشعر عم نعمل كيان
وكان السهر عا مصالحك ومصالحي
وهلق رحت من هون عا بلاد الأمان
وبعدي أنا عالارض قاعد مطرحي
شعر الزجل يا عقل بيعدك ملك
صوتك حلو ونكهة جناك معتـّـقه
عرفتك صريح وكان صافي منهلك
وكانت جناحك عالنجوم محلقه
وبيت المعنّـى كان اسمو منزلك
وكلك وفا وفيك القلوب معلقه
عند الخلقنا فوق في فسحة إلك
والابجديه قالت وقالو الجميع
بعدك عا صدر الشاعريه معلـّـقه
وهلق بعد ما غاب عنا السندباد
بطوفة دمع منقول بالجو الحزين
يا آل كرم يا مي مع كل الولاد
انشلله فدا بيكون عنكم اجمعين
0 comments:
إرسال تعليق