الطفر زرِّيع عم يطلع بايدي
وقريبه الاخ والفرحه بعيده
حلفت ما بقيت رح اخد مواقف
الخبر عني عا نص الدرب واقف
بعد ما كان يقعد بالجريده
وبعد ما هرّ مني عنفواني
صرت فزعان عا تدحرح لساني
وتا حتى يضل عندي شعر بنّا
دفعت رعبون عا بيت المعنى
ولحقني القسط عا اخر زماني
عا قولي ما بقا عندي مهمّه
وحياتي الفارغه منها مهمّه
وجودي للملا اعلن جفافو
وخيالي للارض وصلت شفافو
وفركها بالليالي المدلهمه
انا هربان من ذاتي عا ذاتي
بنفسي الجايعه والهمّ اتي
يا عينين العنايه تقبروني
تا اقدر عا الحلا اشلح عيوني
دخيل الرب عيروني التفاته
لما التقينا وبلشِت الورشه
تطلّعت فيها وقْلبت كمشه
ولما طلع عا خدودها الوان
طعَّمت صوتي بالوما منشان
طفل اللمس بيناتنا يمشي
ووقت اللي موّج شعرها الاشقر
صار الهوى عا القلب يتدقّر
قالت تعا تا ناخد استقلال
ولما لقيت اللحم صار حلال
شلحت النظر تا جمسها يدقر
فيها سحرني المنطق الدافي
ووقت اللي صارو يعرضو كتافي
قلتلها بالدلعنه وبالغنج
يمكن يكونو شفافك من سفنج
من هيك نشفت خلقة شفافي
ولما قالتلي تحلل الممنوع
زمّر بنيي عا المدى وعا الكوع
وقلتلها من وين بيجنو
مكتوب ليي بالدني انو
يوم اشبع يوم موت الجوع
عا درب مش عم تعرف جريي
ماشي وسلامي قاعد بديي
رايح عا ذاتي وقلت مش رح روح
وشلح النظر ختير بعينيي
انتي وهم عا محورو بيلوح
سلامات ما برمي ولا بحيي
ضم الاحبه بدمتك مفتوح
لساعة لقا ما بقلك تهيي
بسرِّك اذا حبَّيت اني بوح
بتبقى البدايه بآخ يا بيي
المضروب عندك بالدني مطروح
وكيف ما انشويتي بتطلعي نيه
عمري انا خلف المدى مشلوح
زماني دني بتبرم حواليي
وغب على قلبو خاطري المجروح
مني اهربي لا تركضي ليي
تا تشرّفي عا البيت مش مسموح
وما في امل تتغنجي عليي
ضلّي بعيده بالجسد والروح
من التلج انتي وحضرتي من نار
ان دقيت فيكي بتقلبي مويه
طل الصباح ورفرف جناحو الندي
ونور الشمس زيزق عا نسمات الهوا
وقوس القدح عن وقفتو شال الصدي
وبقبش تا يعرف وين خط الاستوا
من النوم قومي اليوم عا ذوقك بدي
المنو جميل بقرنة السودا انزوى
وخلص وراقو وسافر الطقس الردي
وريق الجمال بطعمة اللون ارتوى
قومي وعيونك بالمناظر زودي
وزن الشعر والقافيه مشيو سوى
وعم تعرق بكفري حروف مجلده
الها انكتب تا تكون للكلمه دوا
بيتي طريقو بالعطور معبّده
والسحر ماشي غندره ورافع لوا
وفصّل لحالو الفجر خلقه مورّده
وموسم جنون الحب عا امّو استوى
وهوني انا مسمّر عا خشبة مقعدي
وراسي بديي بظرف منهوك القوى
قلبي خدي مشوار وبقلبو اقعدي
ولما الهوى بيجيب كل الاهتمام
شم الهوا بيصير عا حساب الهوى
رايح تا شوف الكانت بحيي
شوقي شحطني وشاحط جريي
وكلما مرق عا خاطري موال
يقلي شو باك تحرّك شويه
بجو الشعر كان الفكر خيّال
يعبر خيوط الشمس بالفيّه
ويدرز صور ويسرّج الاحوال
وليل ونهار يقايس عليي
ويا ما الوحي ربّى بظروفي عيال
وخلّى وجودو يلتفت ليي
وكان الحرف من زغرتو رجّال
بقصايد الاخات يا بيي
لكن بعد ما تبخّر الرسمال
غنّى الطفر بخراج ايديي
ولما العتم بجنون صال وجال
صار النظر يبرم عا عينيي
وهلي عا ديها تصرّفو الاعمال
صارت تطعّم دمعها مويي
وراحت عا مطرح ما اجا عا البال
وهلق عا جمر الصبر بالهونيك
قاعد انا وهوني وحواليي
هلي لها وللرب عم صلّي
منها ما عاد سلام يوصلّي
وصاير حديث خيالها ترقيع
ما عاد نتفة مرحبا قلّي
فيها اتصلت بظرف خيطو رفيع
وقلتلها متل الخلق ضلّي
الا الك ما بشرح مواضيع
وممنوع عبّي المي بالسله
ولما التقينا من كذا اسابيع
عا الطين زادت بالسكت بلّه
وقلتلها امري الهوى بيطيع
غيري انا ما بياخد محلّي
عيفي الجدال وبطّلي التكويع
عمري بايدك مسبحه تسلّي
لكن ما بعرف ليش عم بتضيع
عا الارض يوم ويوم بتعلّي
طالع فزع عا كعبها زرِّيع
بالرغم انو كسور ما بخلّي
ساعه عم بتفزع من التطليع
وساعه اذا بضحك بدون سنان
وساعه اذا بتشوف سنبلّه
ماشي بسدني ودعستي بلبنان
وخلفي امامي والقلب مليان
صارت شبر عا همتي الغبره
ومن عب صوتي هَرْبت النبره
واسمي ما بعرف بالدني شو كان
عا كل ذكرى بحركش شويه
تا صير اقدر اقترب ليي
بالرغم اني كيف كنت نسيت
عا هالدني من ساعة اللي جيت
راكض تا عرِّف خلقتي عليي
مزوّج عذابي والوعي مطلّق
والحل لا بكرا ولا هلّق
صاير متل مركب بَلا قبطان
وشلْح النظر داير على الحيطان
تا شوف كنّو صورتي معلّق
نفسي من الايام مخجوله
عني الي عم ادفع عموله
التفتيش عنّي صار نقدي ودين
احسن ما بقبش بين وين ووين
كني انا يا ناس قولولي
يا مدوبي بصابيص عينيي
رح دوب وبيشهد حواليي
ساكت عا همي والوجع قنطار
وبالرغم انو من خيالي بغار
صوبك ما بفتح سيرة المشوار
ما في درب بتساير جريي
بحلف انا وبقول ما بغالي
انو الك عم يرخص الغالي
بقلب القلب حافظلك التقدير
قولي تعا رهن الاشاره بصير
خيالك برملي عقرب التفكير
وقت الكنت رح روح من بالي
سكبتي لحالك وَهْم وسكرتي
وليي السمع بالعمر ما عرتي
ما قدرت لاقي بخاطري جبران
عايش لحالي بغيبتك ضجران
من بعدما عشنا العمر جيران
باخر ما عمّر ربنا صرتي
يا مصيبتي منها السنه سنتي
خبزتي عا ذوقك جو وعجنتي
وكيف بدو الحال يبقى عال
هجرتي الدني وتقطّعو الاوصال
الضيعه اللي فيها ساكنه بينقال
انو عدد سكانها انتي
كفّي طريقك بالعطا كفّي
كنو عليكي الخير بتلفي
صار القهر عا خلقتي الوان
حلّك بقا للحب تشتفي
بحكم الهوى صار الجمر بردان
وبعدك لهيب النار بتطفّي
انما شفت منك عاطفه وتحنان
بحلف الك مش ممكن توفّي
تيابي حواجز والجسد لهبان
وبصرت قُبَل بمنامها الشفه
من هيك عم قلك عيان بيان
كلما عا بالي تمرقي تحفي
حجمي ما بعرف بالدني شو كان
ويمكن وقع من جيبتي صفّي
واليوم من حالي صرت هربان
وما بقيت اعرف وين رح صفّي
لا تطعميني لقمة الحرمان
طار الصواب وصرت عا الحفه
واقف ما بين الاخره والآن
وحامل عا ضهري من الهموم جبال
وحسنه بتمي ودخلك بكفّي
الكانو ببسمه يبينو سني
بالحجم زغرو من كبر سني
وما عاد بدهم يقعدو بالبال
وما عاد يطلع للهوى موّال
وما ضل في عندي حدا منّي
وهلي عليي صبّت النقمه
قالت ما عادت حافظه رقمي
انطفيت معي ومولعه بسمعان
وهلي مرقت عا بيتها جوعان
خدّي اكل من ايدها لقمه
عا منبري عملو همومي جوق
ومدري عا ايا بلاد راح الذوق
يا ملاك حارس قلبت عليي
ان كنت مش رح تلتفت ليي
بهز السما وبوقعك من فوق
عا ارض عم تبرم حواليها
الهمه الضعيفه شاحطه جريها
من هون بدّي فل كيف ما كان
شايف دني بقراية الفنجان
وطالع عا بالي انقل عليها
كلما عيوني بسيرتك جالو
بيشبرق التفكير اقوالو
يا ريت صوبي بتمرقي يا ريت
جوع النظر قاعد على السكّيت
وناطر تا حتى تمرقي قبالو
لما تياب المعرفه حلّو
جروح القلب بالصبر ما تحلّو
مش بس انو حالتو بالويل
من ميل عم ينقل لتاني ميل
بصدري ما عاود يعرف محلّو
كلما بصباحي جانحك علاّ
بشلحة نظر عا الريق بتحلاّ
وحياتك عْلى المسك يا "الهام"
بصلّي الِك كنت السبع تيام
لوما الاحد عم ياخدو الله
جوِّك حلو وبيضلّ يشتقلي
وبدّك عا عقلك ينزرع حقلي
بالحب كلما اجمع المحصول
مينك شو اسمك للبشر ما بقول
عم قول هلّي اخدي عقلي
انتي يا هلي ناس مش عم تلمحي
وباب الضيافه عم تضلي تفتحي
بالبخل والتعتير عالمنا ابتدا
ضلي محلك لا بقا تزوري حدا
وهوني انا رح ضل قاعد مطرحي
نحنا بغربة بهدله عليها اضحكي
فيها الوهم عا الرمل عمر مملكه
مش بس فيها الوضع صار على الحديد
هوني ما فيكي تسمعي نهارك سعيد
لو ما بتم السكت عم ندلق حكي
هلي بيموت بها الدني عم يستريح
فيها القبيح مشلّش وراح المليح
ما في حدا عم يحفظ وصايا العشر
لما حدا بيموت بيطلّو البشر
مش للعزا تا يعرفو كنّو صحيح
نحنا بحالة حرب وبعيد السلام
والا علينا مش عم نوجه ملام
الحاله بوطننا اليوم بتجيب الفزع
وما زال زاد الكفر والجو انتزع
مفروض انو نقول عا الدنيا السلام
