قصيدتان للشاعر عصام ملكي القيتا بمناسبة الحفل التأبيني للفنانة صباح والشاعر سعيد عقل الذي دعت اليه "جمعية انماء الشعر العامي العربي في استراليا والوطن العربي" وذلك بتاريخ 18/12/2014 في سدني استراليا
صباح
الصرخه عبايه والوجع لتمه
ومن ها الوجود غيابنا حتمي
راحت صباح وكل واحد حد
كانت صباح الخير عم تنعد
ولما عليها الموت ايدو مد
صار الصبح بغيابها عتمه
عند المنيه بيرخص الغالي
فلتت زمنها ان قلت ما بغالي
الشعب بفلكها لاعجب بيدور
منها جانيت وبس صبح النور
اسعد الخوري عمها الشحرور
تاريخ الها عيلة فغالي
عملت صباح بموتها هزه
وكان العلا بحسابها فزه
فيها المدى بيضل يشمط طول
من قبل ما نعزي الاهالي بقول
مفروض انو حالنا نعزي
**
سعيد عقل
توفى سعيد العقل هللي عا كل لسان
بيضل اسمو وصعب تتحلق صفوفو
بسحبة خيالو اذا شاف الحرف عريان
بيبرم عا ورقه وقلم تا يلبسو ظروفو
شاعر بعرف الوحي اسمو عظيم الشان
ما كان الا جبل عا المنبر وقوفو
وما انعد بيتو حجر بيتو من الاوزان
ببسمه وبدقة قلب يستقبل ضيوفو
هوي اله الشعر متجسد بانسان
بساعة رحيلو انكتب لدموعنا يطوفو
مش بس من دون عقل صار الوطن لبنان
بيجوز صوب السما عم يرفع كفوفو
بقلوب اهل الشعر والنثر عندو مكان
عند الثقافه كبر بالعمر معروفو
ولما النهايه اجت عا قدها ما كان
ودع بدمعه الدني ولعند الله راح
هللي عا تاني دني بيروح بيشوفو
