الحرف وانا منعمّر المطلع
بيجوز نحنا من فرد مقلع
ببيتي أنا وشالح ورايي الكون
وهوي ببيت الشعر قاعد هون
تنيناتنا من البيت ما منطلع
بإيد الوحي هماتنا جمعنا
ومونه عا وزن وقافيه معنا
ممنوع نخلط فاعل بمفعول
وكلما طلع بيت الشعر منقول:
عالسوق ما بينزل بلا معنى
بحيث العلى درجه ورا درجه
ضروري الدني ابداعنا نفرجي
اللون العا كتفو حامل الموال
وببلادنا تعود على الشروال
صرنا بسدني نلبسو فرنجي
ما في حدا من كلمتي بيشكي
بقبل اذا قالو: الحرف ملكي
معروف انو بالجزر والمد
شعر الركاكه اخرس بينعد
وشعر الحلو بالسكت عم يحكي
شاعر انا وعندي عمق علمي
وروعه زمام الامر مستلمه
يعني أنا "اني انا" بعتز
عالابجديه ما بقى انهز
صار الحرف عم يسمع الكلمه
0 comments:
إرسال تعليق