ناطر زماني

 إنتي بجنه والفرح موجود

والحظ قلك: كبشي بايدي

وهوني انا مكبش بريشه وعود

وعم دوزن على الآخ تنهيدي

صرخة خيالي متل دود القز

كانت تحيك عالورق حلمي

وكانت الكلمه عالسكت تنهز

صار السكت ينهز عالكلمه

إصبع بصف كلام ما برفع

صاير قعودي فراغ الكراسي

وقديش بدها الادويه تنفع

من بعد ما ختير وجع راسي

ما قدرت داوي الخاطر المجروح
وطعّم حريق العاطفه مويّه

ولما تركت العقل مني يروح

خلّف جنوني خوات وشويه

بينك وبيني عيلة مسافات

ولهفه نبضها بتقدري تجسي

وناطر زماني يلهت الصدفات

تا إقشعك من دون ما تحسي