لما غيابك طال تفكيري انفجع
ومكتوبك تسجل عا ظرفو مرتجع
وهلق بغفلة عقل عم يلبس خوات
عم ياكل النسيان وجبة ذكريات
وتا يضل عندي آخ عم فبرك وجع
لما عذاب الحب باللهفه احتما
صار الحيا بيناتنا ارض وسما
وعلقت شرارة بين دمع وابتسام
وصار على عين الناس بغياب الكلام
هاجس سكوتك يعرض مساطر وما
بشوب العمر لا تنشفي الدم الزكي
كوني كريمه بتربحي شاعر ذكي
عندي لاني صرت صاحب جبروت
ما في تمادي بالحكي ولا بالسكوت
مربى عا ايدي السكت ومربى الحكي
كلمة يا دلي ما الي عنها غني
ضرب الرمل ما كان يعرف شو بني
انتليو عيوني دموع وهمومي مدى
ورايح لعندي وما بقا مني حدا
تا اعمل غلى العيد جناز السنه
قلبت معي الايام بسنين الكبيس
يمكن تصير الاربعا نهار الخميس
لا تسأليني عن كلام الجوهري
ببيت الشعر ان كان بدك تسكري
بغطس حروف الابجديه بخندريس
0 comments:
إرسال تعليق