الصفحات

ننشر في هذا الموقع أشعار الشاعر الكبير عصام ملكي

ميّت


ميّت انا لا تقربولي الكاس
يونان رح يبقى ببطن حوتو
الانسان لما بيعلن الافلاس
بتكون نشفت خلقة زيوتو

ميّت تا شوف الحب مد قواس
وخلى الغرام ينام عا تخوتو
وميت تا دوق شفاف ما بتباس
بمنامها العاشق بصر قوتو

وميّت عا جوّ مشبع بايناس
بيطلّع الشاعر من سكوتو
وميّت عا شعر يخدّر الانفاس
حروف الهجا بيستأجرو بيوتو

وميّت تا شوف الذوق والاحساس
عم يطعم الجوعان بسكوتو
وميت عا حالة كَيْف مَلها قياس
عليها جميع الناس بيفوتو


وميّت تا اقشع للسعاده اساس
ويفرش عليها الدين لاهوتو
وميّت تا اقشع يوم متل الناس
وما زال ميت كيف بدّي موت
كم الف مرّه الناس بيموتو

0 comments:

إرسال تعليق