الصفحات

ننشر في هذا الموقع أشعار الشاعر الكبير عصام ملكي

الى روح الاديب الصديق كلارك بعيني

ـ1ـ
كلارك البعيني ما هجر عيني
بشحطة قلامو بينعرف ويني
بشربل بأقلامن طلع جبّار
عنّي حكي ودلاّ عا ناس كتار
مليون ألف عليه يا عيني
ـ2ـ
عطرو بيضل بهالدني فايح
عليها متل غيرو إجا سايح
البيكون متلو مستحيل يموت
ولو كان جسمو سافر بتابوت
لعند القرايب بالسما رايح
ـ3ـ
علينا المنيّه  ساحبه لسانا
وصار الفرح عنّا خبر كانا
قنديل عمرو قبل ترمو ناس
وقت اللي قالو انقطعت الأنفاس
طاف الدمع بعيون روزانا
ـ4ـ
ومن وين بتجيب الصبر راحيل
آخات صارت دون قال وقيل
عا كلارك هلّق دمعها جاري
وقلبا انسلخ من قبل عا ماري
ليل ونهار بتحمل الإنجيل
ـ5ـ
فراقو ترك شربل بغيبوبه
وعندو الكلام تقمّص صعوبه
مش بس إنّو عواطفو جنّو
الأبيات هللي قالها عنّو
مش بالقلم بالدمع مكتوبه
ـ6ـ
كلارك البعيني جبلتو إيمان
صاحب قلم والمقدره طوفان
شاعر ما هوّي بس هالإنسان
ببيت الشعر ما بيقبل فساويخ
بشربل بأقلامن عمل تاريخ
دقّه بقلوب العارفينو كان
بقدّم تعازي لعليتو ولبنان
**
الرجاء قراءة التعازي تحت القصيدة

8 comments:

الفنانة غادة البادية يقول...

يا شربل اللي بغربتك شاقع بيوت
من شعر خالد كلمتك للذوق قوت
كلارك البعيني بقول: ألله يرحمو
بالذاكره بيضل مش ممكن يموت

حسين ضاوي يقول...

يا شربل حسين اللي انت بعالمو
بلا شك انك من وفاك معلّمو
كلارك البعيني قرايبك كاتب عظيم
ومليون مره بقول: ألله يرحمو

طوني الهاشم يقول...

يا شربل بعيني يا أكبر من كبير
كلارك البعيني صرح بكلامو بنى
صرلي زمان مطالع كتابو الشهير
بقدّم تعازي لكل عيلتكن أنا

روبير نجار يقول...

يا شربل اللي بعرفك طوفة حنين
مين اللي متلك باللطف والذوق مين
كلارك البعيني راح عا تاني بلاد
وعا غيبتو بالفعل طوفان الحداد
مني تعازي بقدم ومن بترومين

جورج الهاشم يقول...

عزيزي شربل
تلقينا نبأ وفاة ابن عمّتكم الاديب كلارك بعيني بمزيد من الاسف والحزن.
ألهم الله عائلته الصبر لفقدانه.
أتقدم منكم ومن والدته وعائلته بأصدق التعازي.
لكم من بعده طول البقاء.
الآسف
جورج الهاشم

الدكتور قاسم مصطفى يقول...

حروف طافحه بالحزن وماثر الفقيد.لروحه الرحمه والسلام ولكم وللعائله أحر العزاء

ماري عنداري كلش يقول...

فليكن ذكره مؤبداً

ترازيا بعيني شينا يقول...

الف شكر للشاعر عصام ملكي وحضرتك يا شاعرنا شربل البعيني والادباء والشعراء وكل من ذكر اسم كلارك بعيني كافاءهم الله عنا خيرا رحمك الله يا صهرنا الغالي كنت ملاكا بيننا بكيناك وسنبكيك

إرسال تعليق