جرّبت غنّي

شروقي

هربان مني وانا من ها الدني هربان

الايام عتقو معي وساعاتهم ناحو

عنّ عْلى بالي الغنا تا سفّر الاحزان

العا الضحك قعدو سنه ولليوم ما انزاحو

ناديت بحر الشعر تا يدبّر الطوفان

وعا البيت يبرم اذا موجود مفتاحو

تا جيب كمشة وحي من عالم النسيان

بلكي بيصير الحرف يوقف عَلى سلاحو

وجرّبت غنّي صور لشقايق النعمان

النامو عا كتف الدرب تا شوي يرتاحو

تا شوف كنّو الهوى بيرجع متل ما كان

وموّال دخلك تعي بيقطّب جراحو

ولما لقيت الحكي بعدو بدون سنان

عِزمو عيوني الوما تا يشبّق جناحو

وضاعو القوافي معي عا مفرق الاوزان

وزعلو حروف الهجا وعا بيوتهم راحو