بقبش يا أيار بشهر أيلول
بطوفة بخل ضيّعت احبابي
سنة الصداقة صارت بلا فصول
ومات الوفا وما لقيت ندّابه
تا كون هون وهون مش مقبول
لازم حضوري يلبس غيابي
كلما عيوني بذكرياتي تجول
عم اقشع مسافات كذابه
بحيث الأصاله صارت بلا اصول
بغير العصا ما بضرب حسابي
تيابي البشر كانو بعرض وطول
وهلق أنا عم إشلح تيابي
بالرغم انو معارفي اسطول
بالامسيه ما دار دولابي
ما بقيت كيّل فول بالمكيول
ولا سابق الغزلان عالدابه
وين اللي كانو يقرّصو المعمول
ووين اللي فيهم زاد اعجابي
ووين العلى المشروب والمأكول
حلفو بإسمي وسيّلو لعابي
ووين اللي كانو يقاسمو المحصول
ووين العليهم صوفرو جيابي
ما ضلّ لا فاعل ولا مفعول
وقت اللي طلعت صرخة كتابي
ما بين يوم ويوم مش معقول
ينسى الشعب وتضيع أتعابي
من هيك عن راس السطح عم قول
مسافر بعد يومين مدري لوين
وللبيع حاطط بعض أصحابي.
