كان مصدرها البلاهه
عا جهنم سفروها
قبل ما يكتر بلاها
كلمة المنها غنيّه
وما لها طلعه قويه
قال صوت الشاعريه
سفروها من الخليّه
وقال حرف الأبجديه
ريحوني من سماها
الشاعر فلان الفلاني
وصلولو عن لساني
عا الشعر لا يكون جاني
يعمل لحالو مكانه
ردّتو بزمّ المعاني
مش رح بتاخد مداها
قبل ما يكفّي الرساله
قال شعر الارتجالي
بالسكت ضيّق مجالي
طار مني راس مالي
ونبرة اللون الخيالي
من السما ضربه إجاها
اطلبو يد المعونه
ولبّسو المعنى ليونه
وقبل ما يطلع جنوني
قدّمو للشعر مونه
الأبجديه يا عيوني
لازم تغيّر هواها
لمّا كسر الشعر غنّى
ما حدا بلونو تهنا
وبعدما مقامو تدنى
من ورا أحمد وحنا
تخلـّقت بنت المعنـّى
وللسمع دارت قفاها
بدنا شعر يكون نادر
ينسمى شلال هادر
مش عم نلاقي مصادر
عارفين الدهر غادر
بدنا شعب يكون قادر
يعرف العله ودواها
