عندي وضع

سهران عم طالع سفر بكرا
بعينين صارو من التعب خلفي
وبكل فكره فرّخت ذكرى
وتا إنتهي بدّي بقا الصرفي

عا باب قلبي ملاحم من جروح
نقاقيطها مواويل بتغني
وعندي وجع بالبال ما بيروح
الا بعد ما إنقبر عني

الدرب على بيتي فرشتها أزهار
وقلت بعيون الحال شوفيها
ومسمرت صدفه بخلقة المشوار
وتا شوف كنو بتمرقي فيها

غنو القناني قدك المياس
وفتحو طريق الخمر بالقوه
وتا يصير فيكي تحضري عالكاس
هزّي الجمود بكمشة مروّه

فليت ضحكي من البكي والآخ
ونفضت عني غبرة القله
وناطر عا جمر وإشتياقي سياخ
وراخي التقل عا يمكن تطلي