تهنّي بعذابي يا سما تهنّي
نفسي عليي ما بقا دنّي
بيضل طافح بالهموم الكيل
عا الكون جيت وما بقى تنّي
من ميل عم انقل لتاني ميل
تا جيب راحه الضعف جنّني
الهمه عا آخر والتعاسه سيل
وما بقيت عم أعرف أنا كنّي
صاير نهاري ابن عم الليل
ويمكن جهنم صايره جنّه
والآخ عندي بعدها من جيل
العنّه الطلع عا كعبها عنّه
طلق وجودي كل شد الحيل
ومنّي بقا متل الخلق منّي
وقت اللي صارت صحتي بالويل
سألت الدني: لك ليش بدّك فل
قالت تا حتّى تنقبر عنّي
**
لأول مرة أقرأ قصيدة يستنطق فيها الشاعر رجلاً رحل عن هذه الفانية. ماذا يريد الشاعر عصام ملكي من هذه القصيدة، ولمن يريد أن يوصلها؟.. ومن هم الذين لم يأتوا للعزاء بل للتأكد من رحيله؟ أسئلة حيّرتني كثيراً وأنا أقرأ آخر ما جادت به قريحته:
**
رايح انا من هون مترسّم
نسيت الحكي ونسيت اتبسّم
والمعرفه بها اليوم هيي فرض
نحنا مواسم كلنا على الارض
بيروح موسم وبيجي موسم
ممقوت وحياة السما ممقوت
ما حسبت اني بهالسنه رح موت
ممنون حضرتكم يا أشرف قوم
جيتو تا حتّى تودعوني اليوم
هوني أنا جوّات ها التابوت
من حيث اني عا الارض سايح
بيجوز حولي تقشعو قبايح
حق الصداقه ناس ما بيوفو
مش للعزا جايين تا يشوفو
كنو صحيح على القبر رايح
نهاية انا من الكون ها هيي
طول العمر معلوم مش ليي
يا حاضرين صحاب او اغراب
بحكم القدر رح صير جوز تراب
فيكم شو بدكم تزرعو فيي
تحاشو الفقر يا رفاقنا تحاشو
يمكن ضرب ها العصر فوفاشو
سألت السما ورحت عْلى كعب الكون
وبين الغنا بقبشت هون وهون
وما لقيت أوف يطلّع معاشو
عا الابجديه عهد المجاعه
شرَّف بعد ما عطيت الطاعه
ما في عمل والهم حجمو كبير
وحرف الهجا راكض ورا التفكير
تا يشغلو ولنو ربع ساعه
ما قدرت فصِّل للوحي قماشي
واللي بقي من هيبتي ما شي
عم يبرم التحليق عا الالهام
وعا ربع ورقه بوازها الاقلام
عم تبرم وبعدو السكت ماشي
ما بقيت عن شعر الزجل راضي
طالع عا بالي كلمتو قاضي
بالامس كان باغلب الاحيان
الموال يطلع عا الدني مليان
واليوم عم يطلع على الفاضي
لعندك يا سيدني جيت من كومة سنين
وكانو حواس الخمس منهم عارفين
ولما عا ايا بلاد صارو يسألو
قلتلهم عالوين مدري لعند مين
الحاصود فيكي عم بيشلح منجلو
واستاذ يعمل بين حين وبين حين
ومن ساعة الفيكي عيوني تقابلو
دقات قلبي عا العقارب واقفين
بمجاهلك كلما جهودي توغلّو
بلاقي الاعانه عا الطريق درابزين
وهلي عليكي من قديم توصلّو
قالو الدني من هون صرنا شايفين
بالرغم انك بالحلا صرتي ملو
واللي بيحبو الكاس كاسك شاربين
ما في امل اني ربيعك اقبلو
النحلات مش عم يبعتولو مطربين
مش بس انو الزهر ريحه ما الو
عطرو ما فينا نشم والمالك حزين
وزهر الربي عا تراب لبنان الحلو
كلما بعبيرو تشردق هبوب الهوا
بلا مواخذه بيصير يسعل ياسمين
تا تاركه حولك حواليي
بحيي انمرقتي الحي لا تحيي
مهما جناحك بالسما علّو
كذبك بيضل يفوش عا الميه
تيابك عليكي هلهلو وحلّو
وصعبه مزادك يوقع عليي
اللي بيعشقوكي عنك تخلو
حاجي بخيط الشمس تتفيي
ومن جهتي اللي حالتي تولّو
قالو التعب عا نمرة جريي
هربان مني واخوتي صلّو
منشان ما اوقع بايديي
جيوش الصبر من ساحتي فلّو
من سيرة التفاح والحيه
وهلق بعدما عواطفي قلّو
طلق لساني كلمة خطيه
سودا الدني وانوارها ولّو
ودعسة عتم بخراج عينيي
صار النظر عم يبرد محلّو
وهونيك هلّق ما بقى هونيك
وهوني نقل بالرياح شويه
انا بالريف ساكن والمدينه
ورايي شلحتها لأجل السكينه
بصفاوة جوّها رافق مدايي
رفوف من العبير الياسميني
ويا انتي العاشقه فنون الرمايه
بشلحة عين صعبه تشنكحيني
جمالك عوعد بعين العنايه
وعنادك رقبتو صارت تخينه
ووجودك ما نزل ضيف بسمايي
وجدالك طالع بكذبه بدينه
ولأني منتفخ منك كفايه
ما بدّي وين بيتي تسأليني
طريقي اليوم صوب اللانهايه
بدعسه ناقصه لا تلحقيني
وجريمه تبعتي صريخك ورايي
اتركي الصرخات وبهمي اتركيني
بحب الذات في عندي هوايه
ما بقدر قول ريتك تقبريني
خلقت ليي ونهار الجوع جايي
ما بقدر من انا بالعمر اشبع
اذا بدك عليي تسابقيني
بسحبه من الغزل نزفت دواتي
حبر بيساهم بدورة حياتي
ابعتيلي ظرف يقرضني فلوسو
تا اقدر للحرف عير التفاته
غرامي بدمتك سوكر جلوسو
وقلك عا الهوا بوسات هاتي
وعا حالو ضل ما غيّر طقوسو
تا حتى تندمج ذاتك بذاتي
يا نوسو بقول ما ضينا يا نوسو
بايدو كنت عم اجمع شتاتي
المسافه كنت اقطعها بموسو
وعقارب ركب لساعة خواتي
خيالك كلما يحضر ببوسو
وعا سحنة شفّتو معلّم لهاتي
بشغل البال متسجّل نفوسو
وتا حتى ضل شوفك تقبريني
عا رفّ العين حاطط ذكرياتي
بصراحه يا هنا افضل بلاكي
بلايي من ورا حضرة بلاكي
وهمومي ولادهم عا الراس جابو
وعا حالي وعا العصا عم ضل تاكي
انا انسان ما بيوقف عذابو
عليي من قبل ما خلقت باكي
وجودي مش رح يغيّر تيابو
تا حتى يضل قايم ارتباكي
ابعدي عن خلقتي الايام شابو
ما فيكي ترفعي قبالي لواكي
وروحي عا زمن يقبر شبابو
ما بدي يكون عن يدّك هلاكي
عليكي الذوق ما بيكتب كتابو
ووراكي ماشيه يحرق سماكي
وغرورك بالطرح ضارب حسابو
وما عاود عا الهوى نسّم هواكي
حضورك عا البشر شابه غيابو
وصباحك صار انزع من مساكي
ما زال القلب جبتيلو عذابو
وما فيكي تغيّري مجرى حياتك
انقلي من البال تا كنّس وراكي
هلي قالتلي شم اصحا تدوق
وهربت من سلامات ايديي
من كتر ما فيها كنت معجوق
صار النظر يفرك بعينيي
راح الهنا لهونيك مدري لوين
وبعدي انا لابس شغل بالي
وتا تقصر مسافة ما بيني وبين
حالي صرت اركض ورا حالي
قلتلها بدرب الهوى ماضي
قلة خصيّه موقفي اظهر
بكرا انا رح جيب بعواضي
وشبرق شبابي وغيِّر المظهر
مفروض نرجع متل ما كنا
جودي بنظره تفرفح وجودي
ميّت تا اسمع شرّف لعنا
قهوتك عا النار موجوده
وهلق انا بين الضحك والآخ
عم ساير فصول الطبيعيه
تا شوف كنو بيلتقالي مناخ
يخلّي حياتي معلّقه فيي
يا عاملي مواعيد لا تطلّي
ريقك ما فيكي تقدري تبلّي
من الراس شيلي هيكل الموّال
وحياتك بقلك براحة بال
بدك قبل ما توصلي تفلـّـي
خلّي الصبر يبقى بحضن امو
تا يصير فينا وجودنا نلمو
الصقعه قويه ما لها دبار
وتلج الهوى كلو يا ولدي صار
مفروض انو ندوّبو عا النار
تا يصير فينا نقدر نشمّو
كيف بدّي اطلع بمطلع
ما ضل عندي ريق تا ابلع
لمطرح ما انتي وظفي التركيز
العصفور عاطي جوانحو التهميز
وما لو قلب من قعدتو يطلع
علينا بمزاد جنوننا وقعنا
والنا تمن اخلاصنا دفعنا
وما زال يا عيوني الغضب طوفان
بالبيت ضلي قافيه واوزان
تا يصير مشوارك الو معنى
لسانك يا بنت الناس عا الطقس افلتي
وان كان بدِّك تخوتي عليه اخوتي
مش بس انو حاكمو عا رض جنون
بقرص السما موجود عا قول العيون
شلعة غيوم بتقدر تمشّي الشتي
بقلك انا عن جد مش عن ولدني
يمكن تكون مشقلبه شهور السنه
ويمكن لأنو طلتك طلة عروس
كلما ابتسمتي الشمس بتغير طقوس
وكلما دموعك ينزلو بتبكي الدني
يمكن نظام اليوم ارجع خربطو
وبالبيت ابقى وعقد فكري فرفطو
وين الصحو بيكون مش معروف وين
عندي بسقف البيت هلق دلفتين
وما في عرس تا نقول حبُّو ينقطو
شوفي المطر بالصف قدامك سقط
وخيط الشمس عا الحارك بدنبو انلقط
ضبّي تا حتى نروح من هوني سوى
مش رح نشوف الشمس ونشم الهوا
نجوم الضهر بالصيف رح نقشع فقط
تعي يا موهبه محروق ديني
تا انظم شعر بيهز السكينه
الوزن والقافيه للبحر قالو
الحرف ربان والفكره سفينه
مدينه الشعر لا شك بجمالو
وعبيرو ابن روح الياسيمنه
وتا حتى يمرجح الشاعر خيالو
ضروري يكون ساكن ها المدينه
الشاعر كلمتو من شغل بالو
بشوبك سحر بيرِّق العجينه
وكلما العمر ختير راس مالو
الدهب بصير موّال الخزينه
وانا انسان اقوالو فعالو
ما بقبل وظِّف الشك بيقيني
قلت للابجديه كتير صالو
عيون مواقفي وجالو بسنيني
حرام الشعر ما جمعت بحلالو
الحقيقه ظاهره وبتعرفيني
اذا بدِّك زمان يشوف حالو
وشموخ بتطلبي كرمال الله
حروفك عا المنابر سلميني
